今日爹爹要返工，所以只有媽咪湊Ambrose上堂。因為Ambrose七點幾已經起左身碌黎碌去，結果媽咪八點幾就要起身，慢慢執野換衫，再慢慢行出去搭小巴，去到都重有時間淨，真係少有呀，哈哈！今日Ambrose又無咩扭擰，重好出奇地肯著媽咪買俾佢果對反斗車王鞋，去到又好順利咁換埋對芭蕾舞鞋，未等到表姐黎前佢已經跑左入課室玩地墊喇！見咁順利，媽咪今日無好似爹爹咁响門口等接放學，即時走左過去大會堂果邊睇書展，速去速回！
放學時見到Ambrose企 左响 老師張工作檯度，一步都無行開過，一臉期待咁，連媽咪入左課室都唔知！媽咪睇左一陣，估計Ambrose係等緊老師同小朋友吸印仔，可能上一堂放學老師有派珍寶珠，所以佢以為今堂都會有，係咁企响度等！見到佢咁樣又可笑又可憐，因為老師話珍寶珠要吸夠印仔先至會派，上次佢有，好大可能係因為新入班氹佢開心，哈哈！老師上堂又無同媽咪講要預備薄仔，今堂見媽咪入左課室至同媽咪講，“記得”下堂要帶本薄仔黎俾佢吸印仔喎！攪到Ambrose期待左咁耐，佢連吸印仔都無得吸呀！所以媽咪最尾都俾左條fruit bar俾佢，等佢開心番啦！
今日幫Ambrose交埋三、四月嘅學費喇，睇吓佢究竟上埋呢兩個月之後會有咩進展啦！
沒有留言:
張貼留言