Ambrose轉畫班

上次果間畫室雖然上堂內容都ok，但環境始終都係一般，媽咪成日都唔敢行開，又無理由以後堂堂都怪獸家長咁企足全程等放學架麻，所以都係決定幫Ambrose轉畫班！如果要方便嘅話，非柏麗莫屬啦！之前搵畫班嘅時候，媽咪已經掃樓式咁搵哂全幢柏麗嘅畫班資料，鎖定左一、兩間ok嘅！所以當決定要轉畫班時，其實已即時鎖定兩間諗住有需要就轉過去！其中一間原本要三歲先收，但上次問嘅時候話可以獨立上堂唔夠年齡都可以！所以當表姐報左另一間畫班時，媽咪怕兩表姐弟成日都一齊會搞搞震，媽咪就一心報呢間！點知去到想報名時，想要嘅時間已full，要waiting！媽咪都照wait住先，但當負責人問起小朋友幾大時，媽咪話兩歲半，負責人就話如果可以都係試左堂先，因為老師會响白板畫一筆，小朋友跟住畫喎，言下之意，即係佢覺得兩歲半雖然可以獨立上堂，但未必跟到囉！既然都無位，媽咪都無得諗，即時再去埋表姐果間，呢間其實係新開嘅興趣班中心，其實媽咪較喜歡呢間，只係俾表姐報左先，至會去另一間報！而家無位，自然都係走番黎報啦！好彩地，呢間重有最後一個位呀！即時俾錢報埋啦！咁以後兩表姐弟就星期六一齊上芭蕾舞，星期日又一齊學畫畫喇！

 

呢間中心，其實唔係專係學畫畫，佢重有其他興趣班提供，所以比起其他畫室，好似無咁專業咁！不過上過之前果間畫室幾堂，媽咪嘅感覺係，以Ambrose現階段嘅能力，真係未必跟到去真正嘅畫室上堂，而其實媽咪當初俾Ambrose學畫畫，並唔係希望佢學到d咩野，只係知佢對顏色有興趣，鍾意塗鴉，咁不如俾一個環境佢去學，去接觸多d，培養多d佢呢方面嘅興趣，當然，學到相關技能係bonus，但小朋友個個進程唔同，無得勉強！如果Ambrose大d仍然有興趣，媽咪先至同佢轉去d專業少少嘅畫班啦！

 

亦因為得過之前果間畫室上堂嘅經驗，以Ambrose咁細個上堂，媽咪覺得環境係重要過上堂內容！呢間中心，入口係電門，出面嘅人係推唔入去嘅，要中心負責人開電門先推到，咁即係話閒人唔係咁易入到去，小朋友亦唔會輕易走左出去！中心入門口就係reception檯，媽咪幾次去都係兩個人坐陣嘅，唔會話無人望住，感覺好好多，起碼小朋友如要去廁所，都有人可以行開行埋同佢地去丫麻！女廁正正响中心斜對面，如果小朋友真係急起上黎，真係幾步就到，好方便，而且柏麗嘅廁所環境點都好過之前果間嘅商場廁所！中心入面有兩間房，一間係專上音樂班，另一間係畫班（其他時段可能用黎上lego班或playgroup），兩間房出面係一個小小空地，家長可以响果度逗留等小朋友放學！真係要讚呀！好少中心係可以俾家長逗留中心入面，好多都貼紙要家長响出面門口等架！咁樣响呢度等都好過响上次個畫室門口企响度等啦，起碼都有得放低d野坐吓麻！課室門有一條玻璃條，可以望到上堂情形，咁家長有需要咪可以“莊”小朋友，又唔會全透明咁開揚，或全封閉咁咩都睇唔到做緊咩！

 

最重要嘅係，好多畫室師生比例都係一對八至十位小朋友，呢間負責人話一對六，而媽咪望過課室，都相信同一時間只可有六個小朋友上堂，因為再多嘅話都唔夠位！咁對於Ambrose咁細個小朋友黎講，比例細d梗係好啦，老師都會照顧到每個學生麻！