Ambrose係一個問題小朋友，好多時侯，佢都會問問題，重要唔止問一次，半次，而係勁問！同一條問題，佢可以今日問完一次，答左，佢即時再問，再答，再問，再答，不斷重覆！然後，可能到第二日，佢又會再問過，好似尋日完全無問過，完全唔知咁，一切又會由頭黎過！佢問問題好鍾意用“做咩事”黎行先，而唔係問“點解”，唔知點解呢？！
小朋友鍾意問問題，其實係好事，證明佢求知慾強同埋觀察力強，起碼佢係睇到咩野而又想知就真係去問，照道理媽咪應該好appreciate，不過有時媽咪真係好頭痛，唔知點答佢好，又或者根本唔識答！好似有一次，佢同爹爹去踩單車，沿單車徑係一條河，佢會問爹爹，做咩事（河上面）舊石頭會濕？呢個問題其實都唔難答嘅．．．．又試過一次，爹爹揸車經過條路有挖泥機，佢無啦啦問媽咪，做咩事部挖泥機唔郁嘅？媽咪就話，因為挖泥機無操作員操作；然後，佢又重覆幾次問同一條問題，再問媽咪做咩事挖泥機無操作員，媽咪答，因為操作員放假囉；再問做咩事操作員放假，再答，因為今日係假期，再解釋人人都會有假期俾佢知，其實佢之後都重有問題，不過媽咪已經唔多記得佢果一連串問題喇，只係覺得點解d問題咁難答嘅？
Ambrose另一個好鍾意嘅問題，就係“响邊度呀”！媽咪好記得，啱啱返學嘅Ambrose，每當媽咪話要返學，佢一定問媽咪“响邊度呀”？媽咪總會答學校名，再之後佢就會問學校响邊度，再答新屯中；再問新屯中响邊度，再答屯門；再問屯門响邊度，再答新界；如是者，佢咁樣問法，係可以一直答到去太陽系嘅！而佢呢一連串嘅問題唔係單日發生，而係每日都會問，都會重覆！
其實可能好多小朋友都會好似Ambrose咁好鍾意問野，但媽咪暫時所識嘅小朋友，未有一個好似佢咁真係“打爛沙窩問到篤”！爹爹話Ambrose鍾意發問係好事，我地一定要認真答佢！媽咪當然明白，不過有時明白同做唔做到又係兩回事喎！一來佢嘅問題真係可以層出不窮，二來佢發問嘅時候往往都唔啱時候！明明媽咪好想正經同Ambrose睇本故事書，媽咪亦跟住故事書咁去讀俾Ambrose聽，但Ambrose成日見到故事書入面d圖，就會不斷問問題，好似見到隻恐龍响左頁，佢可以問媽咪做咩事佢會响呢頁，而唔係右頁，做咩事佢唔“行”過去？？見到架火車，佢又會問做咩事架火車唔行唔郁？做咩事d人咁坐法？見到本書隻鴨仔有個影，佢會問做咩事鴨仔瀨尿，做咩事佢著片片，做咩事佢睇左豬仔d書玩左豬仔d玩具？好多時就係一路講故事，佢會被圖畫吸引左，再引發佢無限同埋極有可能重覆又重覆嘅問題，有時可能同故事有關，有時可能同個故事離題至十萬八千里，答佢又好似沒完沒了有排都返唔到去正題，唔答佢又好似好衰！所以有時侯，講故事真係一個好大嘅挑戰，而且媽咪諗緊其實Ambrose係聽左幾多成故事入去呢，因為佢實在太多問題，成日都岔到好遠！
不過，好耐之前同Ambrose做左份皮紋測試，又真係話佢係“打爛沙窩問到篤”，如果真係咁準，相信媽咪真係好快要買定本“十萬個為甚麼”睇定先至得喇！
沒有留言:
張貼留言