自從Ambrose識踩單車之後，踩單車已經成為日常節目喇！再加上Ambrose已經識踩正式單車，爹爹當然想同佢去郊遊踩單車啦！今日姑丈放假，學完畫畫後就去左大尾督踩單車！Ambrose好鬼叻，一上車無耐就自動自覺唔使奶咀挨住媽咪瞓覺喇！梗係啦，要抖足精神先有力踩單車架麻！六大三小加三架單車，落車時要控制三個小魔怪同佢地嘅車，都真係幾狼狽！因為諗住上水霸踩單車，所以都係租左兩架家庭車上去，一來方便老人家，二來都方便擺行李！不過租左家庭車，d細路又要坐家庭車，全部人上哂車嘅話，d單車點上水霸呢？搞左一輪，最後都係一車放一架單車扶住上，多左果架中單車由爺爺幫手踩上去囉！咁都俾我地諗到，哈哈！
上到水霸有大直路可以踩，大表姐已經一馬當先踩左去，影都無！Ambrose同二表姐係新手，所以慢慢踩！不過今日真係好多人，成條水霸都係單車，要睇緊呢兩個小朋友至得！上次黎大尾督係星期六朝早，無人咁濟，真係差得遠呀！想話影相，背景全部都係人，上次影果d真係靚好多！因為都係突然諗起去大尾督，都無咩準備，見到人地玩風箏，至醒起次次話要買但又無買，又無帶泡泡水黎玩，真係好可惜！好彩爹爹買左一大袋麵包，小朋友坐低食包包都一樣好開心嘅！下次啦，下次真係要買風箏去玩吓至得！
玩左兩個鐘，爹爹同姑丈都散哂，因為佢地都係負責踩家庭車上上落落，都咪話唔辛苦，哈哈！
沒有留言:
張貼留言