紙碟豬
2012年7月31日 星期二
暑期班畫作之一（2012年7月26日）
幫Ambrose報左三星期嘅暑期班，每日都要返兩個鐘，一來希望佢唔好放暑假响屋企無所事事，二來係唔想佢放完個暑假再返學唔適應。呢個暑期班每日都有兩個唔同主題，有中文、英文、普通話、唱歌、畫畫、餐桌禮儀、小廚師等，其實都幾充實！
呢幅人像係Ambrose第一幅畫作，唔知幾多係佢畫呢？
2012年7月30日 星期一
Winomino
爹爹响書展嘅時候已經見到Winomino呢副積木，不過因為媽咪只係聽爹爹形容係咩黎，總認為三百幾蚊買盒積木，一來都唔係平，二來又唔知好唔好玩，所以爹爹都係留番媽咪自己去睇！到媽咪去書展時睇到，真係覺得好好玩喎！將唔同形狀嘅積木放入指定嘅格內，真係好考眼力、邏輯！唔好話係小朋友玩具丫，大人玩都覺得好有趣！
不過呢隻積木原來有兩種，一隻叫Katamino，另一隻係媽咪買嘅Winomino！响書展嘅時候，媽咪已經問sales兩者之分別，但好唔好彩，行左去兩次，兩次個sales都唔係好識講解點玩俾媽咪聽，有一個就連睇圖都唔識，問完佢重要問番其他同事！另一個就好少少，大致都係講番Winomino係俾細少少嘅小朋友玩，因為情度淺d，同埋多左一條木bar可隔開木盤玩對戰！媽咪就响書展中十五十六咁唔知買邊套好，sales就係咁同媽咪講Katamino大人都玩得程度高d應該可以玩到好大個都得！好彩媽咪問個sale過左書展可响邊度買，sale話sogo有售！媽咪一聽到就諗起之前免費得來嘅Sogo Cash Coupon，即時決定唔買住，都係返去諗清楚，再用Sogo Cash Coupon買，咁就慳返啦！
今晚出開去銅鑼灣，當然去Sogo買埋啦！原本都已經決定買Katamino耐玩d架喇！點知sales好堅持問媽咪小朋友幾大。Sales一知係三歲小朋友玩，立即好決斷叫媽咪買Winomino，原因係呢套程度淺d，佢地如果玩到，成功感會大d，咁樣先至有興趣繼續玩，如果唔係，放極都玩唔到，下次就唔會有心機玩啦！聽落又真係喎，買副積木返去，都係想個仔玩啫，如果佢怕左唔玩，到時真係浪費哂！sales講得啱嘅，一套玩具耐玩係好，不過如果唔玩咪重衰，更何況，其實Winomino都可以玩到好大個都得，嫌程度淺自己可以set其他玩法！同埋如果真係好鍾意玩，又覺得唔夠玩，到時再轉套Katamino都唔為過啦！
媽咪同sales試玩左兩套積木，Winomino真係易少少，同埋有得對戰真係好好玩，相信Ambrose識玩時一齊比賽一定係個好好嘅親子遊戲！
真係好好彩無响書展時買Winomino，一來書展價其實無平，响書展買左要攞住佢周圍行都幾甘；二來書展sales似乎無sogo promoter咁熟套產品，呢個promoter都好詳細同媽咪講套積木點玩，真係感覺好好多囉！最重要嘅係而家用左sogo cash coupon俾錢，咁即係唔使錢，呵呵呵！
2012年7月29日 星期日
Color Match Game@ELC
Melissa and Doug嘅遊戲，有個顏色轉針同顏色汽球咭，一set多玩！原本之前買左set幾類似嘅數字matching game，不過Ambrose似乎未認到數字同埋數唔到咁多住，所以未係時候玩！呢set係顏色，佢識哂架喇，應該而家已可玩，見平，仲有八五折，試吓先！
Ambrose上新畫班之二十一(2y11m)
今堂整乳牛，唔知點解唔係好覺對眼去左邊？鼻孔又有三個咁多！綠色果條原來係草，只係Ambrose逐part撕開少少，所以唔覺！雖然唔夠長唔多似草，但最欣慰嘅係Ambrose終於開始識撕紙喇！
2012年7月22日 星期日
Home Art Jamming @ 楊喜瞓緊覺(2y11m)
今朝Ambrose一早起身，爹爹媽咪好眼瞓，根本起唔到身陪佢玩，唯有叫佢出去畫畫！真係幾衰吓！
一陣之後，佢攞左幅畫入來，話楊喜瞓緊覺，又真係好似！Ambrose畫人嘅技巧突然間成熟左少少喎！
Home Art Jamming @ 甲蟲(2y11m)
有一日，Ambrose無啦啦自己畫左隻甲蟲出黎，好勁呀！爹爹提佢，甲蟲要有觸鬚架，同埋會有黑圓點，Ambrose就加番上去，望落都幾似甲蟲架！
Home Art Jamming @ 楊喜(2y11m)
屋企有個bb公仔，因為佢叫呀喜，所以大家都叫佢楊喜！有一晚，當爹爹同嫲嫲掛住傾計唔得閒理Ambrose，於是打發佢叫佢去畫楊喜！點知佢地傾完計去陪Ambrose玩嘅時候，見到佢畫左呢幅畫，大家都好驚訝！因為真係好似一個人形，而且係佢自己一手一腳畫，仲油好顏色添，好勁呀！隔離用原子筆畫果pat野，Ambrose話係佢簽名喎，邊個教佢嘅呢？
2012年7月21日 星期六
小樹苗@書展收獲 part 2
話唔買書，點都買左幾本！
一本係Thomas數獨書，同之前買嘅Dora一樣，唔係以數字黎玩，係以公仔貼紙黎玩，對於咁細小朋友黎講，公仔可能易d，買多本大d玩，練吓pattern都好！
買左兩本莎莎系列嘅書！原因都係為左生活習慣嘅培養而買啦！Ambrose刷牙都係要大人三催四請先去做，希望佢睇左故事書，驚有細菌同牙痛／甩牙之下，會比較主動去刷牙啦！同埋Ambrose麻麻地鍾意食菜，又唔太飲水，又係希望佢藉睇故事書而明白飲食要均衡，接受多d食菜飲水就好喇！佢自己都suffer過想去poo poo又去唔到嘅苦，睇埋本書，應該明白點解會咁，更有感受囉！
立雜手工材料@書展收獲 part 2
响唔同檔度買左d立立雜雜手工材料，突然做手工都可以有少少野响手麻！
張黑色紙，其實係刮畫紙，用籤响上面刮，好似用筆畫畫咁，就會有彩色紋出黎架喇！咁得意，一定要玩吓啦！
Colorloon@書展收獲 part 2
去左一檔見到賣foam clay手工車仔，同之前媽咪買過嘅油顏色車仔吹脹左後可以玩同一原理，只係呢隻用foam clay代替顏色筆上色，幾特別！Foam clay之前Ambrose歲幾玩過，唔鍾意，不過而家又大左咁多，相信佢會ok！本來想買直昇機，見佢顏色撞得sharp一d，不過賣哂喇，反正成日都係車仔，今次揀左飛機！
另外，見有一包Growing Ice動物手工紙，油完顏色可掉落水玩，隻動物落水會脹大架喎！sales話玩完撈番上黎吹乾下次再玩過都得，唔會爛架喎，咁神奇？！不過最神奇嘅係佢話可以擺入冰箱，發燒時當冰袋用喎，係真唔係呀？！見一包六隻動物都只係$28，又有得填色同玩，好抵丫！
仲有買左一包Sea Train，都係填完色吹脹佢，車卡可連接成一串火車，都幾得意！
恐龍balloon，之前在Mega Box見過有得賣，不過無為意幾錢，一場黎到呢度，唔理有無平左，都買番隻氹吓Ambrose開心先！
Crayola Dry Erase Markers@書展收獲 part 2
去書展一定要去嘅係“藝林”，因為佢地賣Crayola產品標價已經平過反斗城，重要書展再有八折，真係好平！
上年已經買左好多唔同嘅顏色筆，Ambrose未識細力同唔好篤，所以PIP markers比較少用，到而家都未無墨！當中crayons更加超耐用，預期唔係玩唔見，一盒crayon真係可以用好幾年唔使再買！所以今年都無打算再添顏色筆之類嘅野！
不過一定要買嘅係白板筆，因為Ambrose開始成日响白板畫野，而佢又用完呢枝又用果枝，結果成日都無將筆蓋扭上，d白板筆好快就無哂墨！用過crayola同IKEA嘅白板筆，都係覺得Crayola好用d，畫在板上嘅感覺smooth一d，就算無扭筆蓋，都無咁快無哂墨！
今日去買時，白板筆原來出左新裝！原本舊裝只有standard嘅黑藍紅等色，新裝係彩色，好colorful！所以都係忍唔住要取新捨舊，哈哈！
2012年7月20日 星期五
大屋@書展收獲 part 2
媽咪年年都去書展，今年亦唔例外，不過今年轉左工，無以前咁近咁方便過去，而且，因為轉新工唔方便請假，所以無得請半晝入去慢慢行血拚！所以今年書展著實可以睇嘅時間比以往少好多！不過根據過往兩年經驗，買得多，又重又攞得辛苦，而且媽咪亦往往高估自己嘅能力，成日買書，但其實放工返屋企都唔多時間陪Ambrose，亦都唔係晚晚都有心情同精力陪佢睇書教書，好多書同教具買番黎都係擺多過用！更甚嘅係，其實書店不定期都會做特價，雖然書展會平多少少，但書店特價時買都係抵，只係爭少少錢但就可以避免左買得多好重同埋積存太多嘅問題！所以，今年媽咪決定入書展，但唔買書喇！
唔買書，入書展做咩？睇野囉！見識吓有d咩新教材教具都係好架，update下自己麻！同埋媽咪target係睇手工用品材料，入書展買雖然未必係平左，但一定比較集中，方便揀選嘅！
呢間大屋，入去書展無耐就見到，超鍾意呀！因為佢夠哂大，自己油完顏色就可以入去玩，好似自己起屋咁，Ambrose一定會鍾意！唯一唔好嘅係屋嘅花紋已經係印好哂，只係colouring，唔係自己design，不過都唔係大問題嘅！其實仲有火箭款，媽咪都考慮左好耐究竟買邊盒好，火箭款就男仔d，大屋款就女仔d！媽咪其實好想買哂兩盒返去，不過每盒都好大盒，打直放都差唔多到腰位，同埋話哂都係紙皮，攞起上黎都咪話唔重！所以諗黎諗去，都係大屋啦，橫身d可能可以夠兩個小朋友入去，但火箭係直身，一定唔得！咁大盒，媽咪都係睇完哂其他地方至返轉頭買，由會展行去巴士站，原來都幾重吓！
呢間大屋，只係$120，算抵！之前响ELC見過類似嘅大型車車，賣$2XX，係好好玩，不過真係買唔落手，今次竟然以百鬆d就買左間大屋，真係超開心！
美芯手藝@書展收獲 part 2
行過美芯手藝嘅both，原本都不抱太大期望有咩野買，事關平時大眾都有佢嘅手工pack賣，而媽咪眼見檔口全部都係近期好興整嘅蛋糕盒同埋音樂盒，完全未啱Ambrose嘅程度，所以都無諗住買野！
點知貢左入去之後，見到有d小手工，平時唔見大眾有得賣（可能去開果間無啦），同埋又啱Ambrose嘅程度，仲要，望吓個價錢，好平，真係唔係幾信有十幾蚊一包嘅手工包！
買左一個萬花筒，都幾大枝，啱哂Ambrose嘅小手，只係$15！另外，買左架裝便條嘅火車，可以自己油顏色自己design，架火車係木做，都只係$20！仲有買左包穿繩手偶，諗住練吓Ambrose小肌肉穿吓繩，整完又有個手偶玩吓，唔錯，$15，自己買料真係唔止呢個價！不過最衰手偶包完全唔知邊包係咩公仔，媽咪問左個sales，佢都答唔知，所以都係執左一包顏色ok嘅就算！三包手工套裝加埋$50，真係好抵！
2012年7月19日 星期四
2012書展收獲 part 1
估唔到爹爹今年會去書展，更加估唔到嘅係佢今年竟然自己去左兒童館睇野買野！平時呢d野都一定係媽咪做架麻！
今日爹爹唔係買左好多野，只係一堆手工書，同埋三隻立體動物（要逐粒砌）！原因之一，媽咪之前已經買得太多書，而且故事書媽咪一早講左唔買，同埋最大原因，爹爹都唔知媽咪嘅存貨有咩，唔買唔錯麻！原因之二，就係即使爹爹睇完之後倒頭來都係要打電話問媽咪先，所以佢都係行吓睇吓，自行買一d佢真係好sure無問題嘅野！哈哈！
呢堆手工書，實在太多喇！全部都係撕出黎貼兩貼就可以玩，係就係好方便，不過如果作為“手工”又略嫌太簡單了吧？！不過閒時無特別野做唔想諗攪d咩，都不失為好嘅主意！
至於三隻立體動物，爹爹分別買左恐龍、烏龜同埋甲蟲，因為組件都好細粒，都係爹爹砌好俾Ambrose玩，又估唔到砌出黎又無話一攞起好易散嘅情況，都幾結實！
媽咪懶，動物無影相！
2012年7月18日 星期三
Ambrose人生的第一個獎項(2y10m)
上星期已經收到老師致電通知，Ambrose在校得了一個進步獎，因為會安排在k3結業禮中領獎，而結業禮安排在平日日間舉行，所以老師先問媽咪會否出席！媽咪剛轉新工不太方便攞假，幸而爹爹剛好放假，所以Ambrose可以去領獎了！
原本以為幼稚園嘅獎項都係豬肉獎，人人有份，但原來老師告訴媽咪，並不是人人有獎，進步獎係每班N班得一至兩位獲獎，而媽咪其他朋友仔中，亦無人獲獎，所以今次Ambrose得獎真係好難得，好驚喜！！！
因為獲獎實在太難得，呢個獎又係Ambrose人生中第一個獎項，媽咪真係唔想响咁重要嘅一刻缺席！但係新工又剛開始不久，攞假真係唔係幾好，掙扎左好幾日，媽咪終於決定攞病假去睇Ambrose攞獎！無法啦，如果唔去，媽咪一定會好遺憾！
因為上台攞獎要綵排，所以要預早一小時送Ambrose到會場！估唔到嘅係，其他家長很早到來排隊，爹爹媽咪一送走Ambrose，即時要排隊等候！等呀等，等呀等，終於都可以入場，媽咪非常緊張入場，怕坐不到前面中間嘅有利位置，好彩，雖然唔係坐最前，都也是前十行之內嘅中間位置！
坐下後打開場刊一看，才知道Ambrose攞嘅進步獎，全級N班共六班百多人，只有八人獲獎，而Ambrose更係自己班唯一一個得獎！等嘉賓進場就坐，校長嘉賓致辭，之後開始頒獎！先是班高年級嘅獎項，因為不太清楚需時幾耐，又怕錯過左Ambrose上台一刻，所以爹爹媽咪一人一部相機及攝錄機，一直影著，不敢放下來！
緊接高年級嘅獎項，就係N班嘅進步獎！只見Ambrose被老師引領行出來，好淡定，真係估唔到！因為之前怕就咁交低佢俾老師走左去，而結業禮基本上如果唔係攞獎，N班學生無得參加，所以Ambrose應該唔會見到同學仔，咁樣嘅情況之下等出場等左成個幾鐘，一出場又咁多人，媽咪都好驚佢支持唔到會扭計！點知又無，好叻仔！之前同Ambrose講爹爹媽咪會在台下睇佢攞獎，見Ambrose一出場個口仔已經在細聲叫媽咪，之後才又細聲的叫爹爹，真係好感動！因為佢竟然先找媽咪，哈哈！當然，人太多，Ambrose又唔係好眼力，任憑媽咪點揮手，佢都見唔到！雖然係咁，Ambrose攞獎一刻都依然好淡定有禮，係企定等嘅時候見佢雙眼周圍尋找爹爹媽咪！媽咪深信，如果那一刻Ambrose見到爹爹媽咪的話，佢一定會好開心，一定會笑到眼睛都彎了！可惜，佢點都睇唔到！
最抵讚嘅係，Ambrose臨下台之前，佢竟然主動鞠躬！八個得獎嘅小朋友一起在台上領獎，就只有Ambrose一個在離開前鞠躬，教爹爹媽咪驕傲不已！
結業禮完結之後，爹爹媽咪終於可以接回Ambrose，佢問點解唔見我地？果然，Ambrose個心一直惦記住爹爹媽咪，相信佢一定好想我地見證佢攞獎一刻嘅喜悅，遺憾嘅係佢唔知道，爹爹媽咪嘅視線從來無離開過，見到佢有點失望嘅神情，又帶點怪責嘅口吻，心為之痛！
2012年7月17日 星期二
TAMIYA Walking Elephant Set
同Ambrose去整cake pop果日，見去開旺角，就同左佢去睇吓d槍店模型店，佢咁鍾意槍，爹爹話要帶佢見識吓唔同嘅槍！果然，男仔即係男仔，Ambrose睇到嘩嘩聲，把把槍都話靚話勁，又勁問係咩黎，真係唔識答佢！
响間賣槍店見有動物模型買，整好會行都幾得意，俾Ambrose揀左佢話要大象，所以買左返去！
估唔到瞓醒覺佢又記得，係咁話要砌！不過呢d咁仔細嘅工作，真係唔係佢可以做到，都係靠爹爹架喇！
諗住雙星賣開模型，都應該可信，點知爹爹話d位超唔fit，好難整！隻咁簡單嘅大象，足足整左幾個鐘！仲要個開關制實在太渣，推開佢又鬆鬆地咁接觸不良，隻象郁吓又停吓，根本玩唔到，咁就無左$100，激氣！
2012年7月15日 星期日
親子廚房@Cake Pop
响團購買左個親子cake pop製作班！
有過上次整pizza經驗，媽咪都係加錢，要爹爹都一齊入黎幫手整又好，影吓相都好！因為團購有期限，而cake pop個schedule又得好少，所以迫不得已，星期日夜晚七點開始，都要照去！
其實報前見網上預約個介面唔係親子，只有團購嘅曲奇班先有列明親子，都覺有d奇怪，不過打過電話無問題，所以又無諗太多！
點知今晚出到去，見到其他同學仔，全部都係大人，有一家三口黎學，不過個女都十幾廿歲咁大，係得Ambrose一個三歲未夠，見到咁樣就覺得唔多對路！不過人地又無講過媽咪又無問過要幾歲同係咪group埋差不多年齡嘅小朋友上，呢個情形，只怪當初媽咪無仔細問清楚！
不過雖然親子班並唔係心目中果回事，但無減Ambrose嘅興致！同學都因為呢個小小學生，禮讓我地企在最近老師位置！不過問題係，因為個班唔係專for小朋友，張工作檯係普通檯嘅高度，媽咪見到咁，都忍唔住好不滿咁講左句“咁高點搞呀”，負責人先至衝去攞左張櫈俾Ambrose企响上面！
開始整嘅時侯，Ambrose都好興致勃勃，好多野都好想自己動手整，但因為d朱固力要座溶，個鋁杯好熱，而且材料都要同人share用，好多野都唔可以俾佢掂，驚佢亂攪！其實有一刻媽咪都有後悔報左呢個班，似乎都唔適合小朋友咁！
開頭整嘅時候，爹爹媽咪都好alert要睇住傍住Ambrose，始終企响櫈上面都危險，不過整下整下好忙嘅時候又鬆懈左，就係咁，Ambrose可能太興奮去整cake pop，無為意一腳叉錯左由張櫈跌左落地，仲要跌果陣個口撞埋張檯角度，好彩爹爹都好快反應即時撲去接住，如果唔係分分鐘後腦撞埋落地！抱起Ambrose睇，見佢個口流哂血，媽咪個心不知幾驚！媽咪係親眼睇住Ambrose跌落地同點撞法，真係嚇到媽咪死死吓！最擔心嘅唔係流血，而係撞到牙齒就大件事！好彩，檢查完應該只係撞到牙肉，d牙無咩事！
撞到之後，Ambrose都無哂心機繼續整，可能有少少怕左！媽咪只係好想快d整完快 d走！好彩，cake pop最後要加裝飾物，Ambrose都有返興趣一齊整，開心番咋！
下次再同Ambrose報班，真係要諗清楚問清楚潛在嘅危險至得！總結呢個班唔係唔好，其實都幾好玩，如果只係for大人嘅話！但係團購時係親子班，而且個團購網都係專for小朋友野嘅網站，心入面已經諗住係小朋友嘅蛋糕班，無諗過原來係個成人班，佢地嘅安排真係差左d囉！好彩今次有叫埋爹爹入去幫手咋，如果唔係，都唔知點算呀！
走迷宮之二
之前Ambrose做走迷宮好似無咩興趣咁，好可能係因為開頭部份主要係tracing多，不停畫線，悶悶地！
點知之後真係有迷宮果d，睇完媽咪示範同講解，佢似乎都有d興趣，仲一做再做，做唔停！結果，呢本走迷宮只係分左三次做就KO左喇！
做完呢本迷宮，感覺Ambrose對於有幾條線交叠住做matching係有少少障礙，佢成日都唔知道交叠之後應該行邊條線，同埋佢好似都分唔到線响底同線响面，唔識分底面，所以一有交叉時佢就唔知點行好！不過對於一d簡單嘅迷宮，可能因為有公仔嘅輔助，好似話小動物迷路要帶佢返屋企，咁樣佢就識點行！
暫時手上都無類似簡單嘅迷宮練習，都要再搵多少少類似咁簡單嘅迷宮至得！有無人有好介紹？
訂閱：
文章 (Atom)