新寵Piglet

呢隻Piglet本來就係二表姐嘅，有一次去表姐屋企，臨走時表姐無啦啦送左俾Ambrose，都幾無厘頭！不過果時Ambrose又無話唔要，就咁就帶左佢返屋企。媽咪開頭有諗住還返俾表姐，見Ambrose又出奇地幾鍾意隻豬，又見表姐話唔攞返，咁就由佢啦！不過當時Ambrose都係三分鐘熱度，過左一陣又唔見佢理隻豬仔喇！

 

過左成半年，都唔知點解最近佢無啦啦對呢隻豬仔異常熱愛喎！唔知係咪因為爹爹媽咪從來唔俾Ambrose攞玩具入房玩，但嫲嫲有突然俾左隻豬仔俾Ambrose陪瞓，好似自此之後，Ambrose對呢隻豬仔寵愛有加！除左瞓覺都一定搵佢之外，瞓醒左又第一時間搵佢，嫲嫲仲話Ambrose有日仲走左去佢嘅廚房煮野食餵Piglet食，真係服左佢！

 

雖然話Ambrose好鍾意隻豬仔，佢都好粗暴對隻豬，成日周圍掉，話變魔術喎！但又有時候，Ambrose又會好溫柔，瞓覺要同隻豬仔蓋被，又同豬仔一齊聽故事架喎！唔知佢會唔會突然有一日又唔鍾意隻豬呢？