今日瞓過左龍，出門口有少少趕。送左Ambrose入課室之後，媽咪都無離開，坐左課室門外等放學。中途聽到有小朋友喊，見喊聲有少少熟悉，但又覺得都幾斯文，心諗，唔會係佢掛？再聽多一陣，又覺得把聲似似地Ambrose喎，媽咪真係分唔到係咪Ambrose喊，但又覺得Ambrose一向上興趣班唔會喊，無理由係佢啫！
放學時，為左求證，媽咪問老師，原來喊果個真係Ambrose！老師話佢問Ambrose攞番舖在地上嘅地墊，但Ambrose唔俾，老師話唔俾就唔“吸”印仔，之後Ambrose就大喊喇！老師一定唔知道，印仔對Ambrose黎講好重要啦，有印仔即係有糖架麻，雖然要儲夠六個至有，但唔“吸”俾佢真係攞佢命呀！
Ambrose出左課室後都扭計同大喊 ，爹爹問佢係咪唔舒服佢又話係，搞到爹爹鬼咁緊張！於是，我地同Ambrose去食少少野等睇醫生，呢個Ambrose食完半碗通粉之後已經生猛哂！再問佢個肚重有無唔舒服，佢話無喎！
好明顯呢個小朋友唔係個肚唔舒服，係肚餓囉！咁又難怪嘅，一早起身趕住出門，佢又唔飲奶，無食野，連水都無飲過一滴就上堂，上左成個鐘出黎，梗係餓到個肚好唔舒服啦，哈哈！
沒有留言:
張貼留言