媽咪咁大個人都未試過現場睇煙花呀！一係就响親戚屋企可睇到，一係就睇電視直播。唯一一次應該係同莊友走左去中環睇，無咩人又無咩特別！
趁住今日七月一日，就同Ambrose試吓現場睇煙花，感受一下吧！
由於知道會封路，都係唔揸車去喇，費時煩！五點幾已經到左海港城，見反正都有d肚餓，不如早少少食野，怕之後人多湊住三隻小魔怪就難搵食架喇！好彩有先見之明，入左pizza hut一陣，就已經見到出面成堆人企左响度等位！
我地無諗住霸頭位睇，只係諗住現場睇有氣氛d，唔一定要企最前，總之睇到就可以。所以當人人都趕住行出去霸位企時，我地重同三小魔怪行反斗城！八點開始放煙花，我地都係七點鬆d慢慢行出去。行出去唔遠，但同三小魔怪行，又要去定vivi，又多人又要睇緊d，行得出去鐘樓對開巴士站馬路位置已經係七點半喇！
半個鐘頭對於三小魔怪又真係耐左少少嘅，驚佢地攰，姑丈走去買報紙舖地坐，早知應該帶定野食黎野餐，哈哈！
Ambrose真係一個好得意嘅小朋友，一方面又好恨睇，野都唔食成日都催住話要睇煙花，但另一方面佢又不停同我地講佢好緊張，哈哈！
好唔容易等到放煙花，真係好靚！又近又大咁响眼前，同睇電視真係差好遠，再加埋d嘭嘭聲，人嘅歡呼聲，真係好有氣氛！不過Ambrose同二表姐可能都係細，聽見不停咁大聲嘭嘭聲就驚，又話要走！不過咁多人，要走都唔係易，所以最後都睇哂！
問Ambrose下次再睇煙花好唔好，佢話唔睇，唔鍾意咁大聲喎！
總結，原來要同小朋友去睇煙花都唔係想像中咁難同辛苦，唔高要求一定要企最前，同埋預左睇唔到放得好矮嘅煙花，其實去到鐘樓附近睇都好清楚，响海港城行出黎唔需要行好遠，又唔使一早去霸位，都幾好方便！
唔好以為海港城露天停車場就正，泊入去唔走就可睇煙花，sorry，原來係會封場架！如果想响果度睇煙花（應該又近又唔使點同人迫），唔該消費一千蚊至有一張入場證囉！一家三口想上去睇，就即係要三千蚊消費，無啦啦點使三千蚊丫？！可能只係d自由行至輕易攪掂喇！
沒有留言:
張貼留言