親子廚房@整沙律

Ambrose 响學術方面嘅興趣好似唔大，而且進度亦頗慢，有時媽咪都感到有d沮喪，與其無興趣教又教得辛苦、無癮兼勞氣，何不等到佢有興趣，對文字或各樣敏感期黎到至教，咁樣大家都輕鬆，亦係盡量避免太多磨擦影響原本己經唔係幾好嘅親子關係！

 

雖然學術方面Ambrose令媽咪暫時卻步，但係好彩佢對手工畫畫做功課等等都好有興趣，呢d興趣重延伸至整野食！幾乎每次媽咪一講話整野畫野又或者做功課，Ambrose都可以一個箭步拋低佢最愛嘅爹爹跟住媽咪團團轉！媽咪嘅地位往往都係呢個時候最高架喇！可能，Ambrose係個動手型嘅小朋友，樣樣都要自己動手做動手試先至開心，同埋有興趣做落去！或者媽咪都應該諗吓有d咩遊戲可以俾佢動手玩，响玩之中學習，可能會有意外得著都唔定？！

 

今晚媽咪話整沙律，本來同緊爹爹玩緊嘅Ambrose無啦啦跑左去廁所“擔櫈仔”，佢跑番出黎果陣，爹爹仲問佢做咩“擔櫈仔”，哈哈！媽咪當然知道佢係用黎企高d一齊整野食啦！就係咁，爹爹無啦啦俾Ambrose拋棄左，嘩哈哈！

 

今次整沙律，Ambrose似乎叻左，上次切唔到菠蘿，今次好快攪掂左，唔知同佢上次坐响度而今次企响度有無關係呢？攪左一大餐，差唔多尾聲，爹爹至出黎同我地影相！呢個Ambrose剝緊蛋殼，手都未洗，影影吓相一手摸落自己個後腦度抓，沖左涼架麻，真係唔知好嬲定好笑！

齊齊整沙律

用左櫈仔都要掂高對腳

未洗手抓頭髮,OMG!