Thomas and the Hidden Treasure (3y7m)

買左飛同Ambrose 去睇Thomas Show，又係約左show友浠浠一齊去。上年Thomas
Show係爹爹同Ambrose入場睇，原來個show仲有好多人物出場，但爹爹好多都未見過，完全唔知咩黎，而Thomas就最遲先出場，仲只係出左好短時間，佢話好悶，所以今次都費時再叫爹爹同Ambrose入場了！

 

特登預早少少到場，睇吓有無小禮品買。今次禮品唔多，只有tee、書、旗、望遠鏡同小燈！其實好多價錢都唔平，較為覺得可以買得落手嘅係旗，$100兩枝，不過，真係無咩用，就算只花$50都嫌多！最後，見Thomas盞小燈有手抽，可以俾Ambrose攞住，真係半夜要行過黎搵我地都有d用，所以雖然要$180咁貴，都照買俾佢，買左禮物係開心d嘅！

 

今次都係買左山頂飛，但去到時職員通知要換飛！原來山頂無開，職員將我地嘅飛換過前d嘅位置，真係唔多明白，係咪因為少人買飛，開唔哂咁多地方，所以可以upgrade我地呢？Anyway，坐前左就著數左，大家都無異議！

 

入到去坐低，發覺位置都唔錯，反而前面果d係平面無梯級擺櫈，而後面就有梯級分，所以媽咪覺得前面反而好大機會俾人遮住！個Show好快開始左，仲要一開始無耐，Thomas已經出場喇，仲有Gordon、Percy 、James同埋肥控制員！基本上，其實Ambrose唔係特別熱愛Thomas，亦無睇過Thomas嘅卡通，佢只係識Thomas；而媽咪亦從來搞唔清，究竟邊架車打邊架車，好似架架一樣咁，所以媽咪亦都講唔到俾Ambrose知d車叫咩名，好彩浠浠係Thomas Fans，佢咩都知，哈哈！

 

成個故事應該係講Thomas同d旅客去搵寶藏，中間因為行到無路軌嘅地方而唔可以前進，而同時間Thomas嘅朋友發現佢無返車站，所以周圍去搜索佢，最終，Thomas亦可以帶領旅客搵到寶藏！故事都算係好簡單，但，真係好悶！雖然Thomas、Gordon、Percy 、James成日都响台上無欺場！點解咁悶？因為成場都講同唱英文，仲要幾高音吓，又無字幕，好難聽明，仲要加上對Thomas真係唔多認識，悶上加悶！好彩個show又出奇地快完喎，成個show加埋中場休息都只係個幾鐘，都算好快過！

 

都係Mickey Show好睇d！！！

創意畫班@第二十四堂(3y7m)

適逄復活節假期，都估到畫班嘅主題一定係復活節架喇！唔知係咪個個都去左旅行，今堂無咩人返學咁，只有Ambrose 同二表姐上，一對二，都幾好，哈哈！

 

早左少少去等Ambrose放學，可能因為一對二，老師可以好集中教兩個小朋友，當媽咪去到時，佢地都已經畫好哂，坐响度傾計，哈哈！只見佢兩個嘅籃都幾唔同，表姐果個就同之前放學嘅同學差唔多，都係一個個圈圈畫在籃上，應該係復活蛋，前後都有！但Ambrose果個就只有一面全部油上唔同顏色，同分開左好多格，一貫佢油顏色嘅作風！諗深一層，都幾似滕籃果d一格格喎！

 

原本以為平平無奇，老師走出黎同媽咪講，話Ambrose一定要畫巴斯同索克天王復活蛋，老師响籃入面攞左兩隻蛋出黎俾媽咪睇，真係好搞笑呀！呢個Ambrose，真係對超人果d野上哂腦喇！

新傘子 (3y7m)

Ambrose開始單對單上普通話，今日係第三堂了！可能因為學英文都係呢間中心上，但學英文就有兩個好朋友一齊上，所以次次都好開心，甚至乎有時三個有d失控咁！普通話時間安排响上英文嘅第二日，唔知係咪咁，Ambrose成日問住媽咪佢d朋友黎唔黎？點解唔黎？個樣好似好失落咁！今日起身時，Ambrose甚至同媽咪講唔想返！平時Ambrose真係好少話唔返興趣班，所以媽咪有d擔心佢一對一上堂悶，加上之前一日上英文，同一間中心有好大對比！同老師了解過上堂情況，又話無咩野，放學問返Ambrose開唔開心，佢又話開心！其實佢可能只係去果下有d唔想，但入到去又無咩野！希望佢慢慢會enjoy學普通話啦！

 

為左鼓勵Ambrose可以自己一對一上堂上成個鐘，而且唔係畫畫跳舞呢類型嘅興趣班，媽咪就帶左Ambrose去反斗城買份禮物送俾佢，話係老師同媽咪講，Ambrose背到兩首普通話詩，好叻，所以要獎勵佢！

 

左揀右揀，Ambrose都係要買槍，媽咪當然唔肯啦，一屋幾把槍同劍，一個人都玩唔哂啦！幾番辛苦，本來一直唔贊成買傘子俾小朋友用嘅媽咪，今日終於屈服喇，因為Ambrose揀極都係家中已有嘅玩具，真係唔想佢買太多重複的，佢無傘子，又撞啱呢幾日落雨落唔停，就買把俾佢試吓啦！買左把貓貓傘子，係因為無哂Mickey，得Minnie！其他果d唔係立體傘，一係就長d重d，Ambrose好難攞！佢自己揀左把貓貓傘，媽咪再三問佢，把傘有少少粉紅色，佢話唔緊要啦，男仔都可以用粉紅色架麻，GOOD！

 

不過，買完之後都無落雨，佢幾咁失望，係都話有少少，照開！但一開傘，又有車，要上車，哈哈！結果，返左屋企瞓一覺，瞓醒左竟然落大雨，仲要去婆婆度，call左的士又無得開傘，最後，去到婆婆家樓下，見有個籃球場，就俾Ambrose自己雨中漫步。Ambrose個樣，真係好冧呀！

學校復活節手工 (3y7m)

今個星期學校派回來嘅手工，係因應復活節而做嘅籃、雞仔同蛋。媽咪見到嘅時候，真係覺得Ambrose 整得好靚！忍唔住一定要影低佢記錄一下！見到手工上面嘅蛋，油得好colorful同埋好是正，無點出界，Ambrose真係開始大個仔喇！

第一次整蛋糕 (3y7m)

爹爹最近買左個焗爐仔，諗住有時可以整吓野食。媽咪諗起同學仔都有整過蛋糕仔，於是，走左去買材料，打算同Ambrose試吓整！咩都唔識嘅媽咪，都係買預拌粉就算，快丫麻！仲要買左個迷你針磅，唔使靠估！

 

今晚同Ambrose一齊整，量完水同蛋嘅份量，到量菜油時，個磅已經壊左無反應喇，激氣！最終都係靠估囉！點入爐，幾多度先得，一杯份量要幾多，全部都唔知！買材料嘅時候，個店員已經好唔helpful，話預拌粉有寫點整，但包粉只係寫左份量，撈埋就入爐，200℃，無寫其他，想問店員，佢真係問一句答一句，擺明唔想理我地！唯有自己靠估！

 

開左200℃後將蛋糕仔放入，蛋糕面好快已經轉色，未發起，Ambrose一直都守候住d蛋糕，叫佢去沖涼等出爐都唔肯！後來見面開始深色，但仍然未發，都有諗過係咪水同油都太多，發唔起！開過出黎用牙簽篤吓佢，發現入面仲係濕，未熟，咁又入番爐再焗！來來回回幾次之後，就見到蛋糕發起，而且仲開始火山爆發咁流出黎！Ambrose見到，又聽到我地大叫，佢就好緊張咁提議叫我地快d抹左佢，哈哈！睇佢真係好肉緊咁！

 

最後，蛋糕終於都熟哂，個面好燶，流出黎果d又同隔離果d黏痴埋一齊，得一個叫勉強見得吓人！雖然如此，Ambrose都好開心！影完相，攞左個蛋糕試吓，唔要個燶面，其實入面都ok，質地同平時食嘅無咩分別，味道都ok呀！下次再努力過至得！

Home Craft Time @ Make your own Lion and Cub (3y7m)

 

做開手工有條癮，今晚Ambrose又話要做手工喇！呢排媽咪返工好忙好攰，真係無咩精力同Ambrose玩手工，又唔想拒絕Ambrose，所以一盒盒執好哂嘅手工set真係唔少得！諗起之前買落一盒木匙手工，入面嘅材料媽咪又一早已經裁剪好，又有簡單說明書，所以今晚決定同佢做呢隻大小木匙獅子！

 

Ambrose見到隻大木匙好疑惑，都有問媽咪做咩，可能心諗又話做手工，做咩攞隻匙出黎？哈哈！不過當媽咪解釋左其實好多野都可以用黎做手工，只要發揮創意，木匙都可以變獅子。於是，Ambrose就好專心咁聽媽咪指示去整隻大獅子！

 

不過到整隻細獅子時，Ambrose自行整左木匙上嘅五官，之後嘅毛髮，可能太細緻，又或者又係重複之前整大獅子嘅步驟，佢已經覺得悶悶地，所以最後細獅子嘅毛髮係由媽咪完成嘅！

 

整好哂兩隻獅子之後，Ambrose仍然未諗到點玩，媽咪攞起大獅子往面上一放，再作狀扮獅子叫，引得Ambrose哈哈大笑，然後，佢就成晚攞隻大獅子木匙黎扮獅子喇，哈哈！

 

海洋世界@全港青年繪畫比賽 (3y7m)

之前幫Ambrose報左一個現場嘅繪畫比賽，諗住俾佢感受吓咩野係繪畫比賽，而且，諗起咁多人一齊畫畫，Ambrose一定會覺得有趣！因為係現場嘅繪畫比賽，難度真係幾高，一來係無老師指導，只靠媽咪呢個門外漢；二來現場環境係點唔知道，Ambrose合唔合作亦唔可以太肯定，唯有抱住去玩吓嘅心態去參加！

 

為著呢個比賽，之前媽咪有同Ambrose响屋企練習過一次點畫（其實亦順道將幅畫交去另一個比賽）。比賽前夕，媽咪為Ambrose收拾繪畫用具，講真，媽咪覺得好緊張，成日都驚唔知Ambrose會唔會怯場，覺得果個地方唔係畫畫嘅而唔畫，又或唔肯畫指定主題嘅畫。加上，大會講到明所有繪畫用具包括檯櫈同洗筆水都唔會提供，媽咪一直都擔心，究竟如果要Ambrose响地下畫佢又可以捱到幾耐！原本媽咪一直幻想無檯無櫈都無所謂啦，比賽得就應該可能响個禮堂度進行，是但搵個空位都可以畫。但媽咪半夜夢徊，又諗起，會唔會其實係無劃分地方，只係要家長隨處搵地方就可以畫，咁到時如果地下係紙皮石嘅話，真係唔知點搞！媽咪真係好後悔無為Ambrose買塊畫板去！好彩比賽當日一早起身摷到一本A3大嘅畫薄，諗住可以墊吓黎畫畫！

 

十點比賽，九點幾已經到會場，早到左，但見不斷有人已進入場地，媽咪都係同Ambrose入去睇吓咩環境先！入到去，至發現勁多人，因為唔同組別嘅人都係同時間進行比賽，場面真係有d混亂！媽咪未試過參加現場繪畫比賽，諗住無檯櫈提供，斷估都無人會帶埋去掛，點知去到見到人人都自備左，仲要有d人勁到成張檯係摺唔埋嘅都照帶去，見到咁嘅情形，媽咪個心真係跌到落谷底，早知係咁，爹爹又有揸車，媽咪真係應該車埋d檯櫈過去！

 

入左會場無耐，Ambrose無啦啦又話要去poo poo，搞到媽咪好狼狽咁同佢去廁所，去到佢又poo唔到，諗起佢之前一日已經話個肚痛，媽咪真係擔心，萬一比賽開始左，又或者夠鐘要登記時，如果Ambrose又話要poo poo，得媽咪一個人咁點算呢？唉，本來媽咪嘅心情已經跌至谷底，再因為肚痛問題，又令媽咪好心煩！大會之前講明幼兒組只可一家長陪同入內，所以爹爹放低左我地之後就去左泊車，係後來打俾媽咪了解情況之後，覺得人人都唔係一家長一小朋友，所以爹爹泊好車都入左場陪我地！真係太好！

 

入到會場之後，其實場面幾混亂，見到有一條人龍，媽咪傻更更的以為係排隊登記，但排左一段時間，去完廁所再返去排過，發現人龍無特別多左，亦無郁動過！好彩爹爹已經入左場，幫手去了解吓，至發現根本果條唔係登記嘅人龍！工作人員就話夠鐘時會宣佈可以排隊取畫紙，然後就進入有蓋操場進行比賽，但轉過頭，突然就無啦啦開始左可以排隊取畫紙及進場，一片混亂。仲要d人一知道可以取畫紙時，實際上已經有好多人未取畫紙但已經進入有蓋操場霸位喇，見到咁嘅情況，媽咪再一次後悔，無幫Ambrose準備檯櫈。而慶幸嘅係爹爹有入會場，當媽咪攞緊畫紙時，爹爹幫媽咪搵好學校嘅櫈充當住檯，同埋搵到一個較開揚嘅位置俾Ambrose畫畫，真係萬幸！如果只係得媽咪一個，真係唔知顧得邊樣囉！

 

因為排得好前，我地好快已經攞左畫紙同Set好左個位，但見果條攞畫紙嘅人龍，真係長得好緊要！而隨住人龍嘅縮短，場地內嘅人已經迫到無可再迫，幾乎係人貼人，櫈貼櫈！比賽時間亦因為要清派畫紙人龍而延遲左半個鐘！由於我地一早已入會場，又已經set好野可以畫畫，當知道一定要等齊所有人入場至可以畫時，真係頭都大埋，因為Ambrose已經好心急想要開始畫喇！加上隔離櫈嘅人又越迫越過，搞到Ambrose都開始有d忟，媽咪個心仲煩！

 

幾經辛苦，比賽終於開始，攞左之前嘅sample畫，問Ambrose想畫咩野，媽咪就從旁指點住Ambrose去畫，雖然有d地方畫得唔好，有時都要媽咪想辦法點去補救，但今次同Ambrose一齊畫畫，又比在家中練習時來得輕鬆，可能經過上次迷失過反省過之後，認清左自己應該抱持咩心態去參與，所以反而比之前更加enjoy教Ambrose去畫。Ambrose亦出奇地投入同合作，之前响屋企練習時要分兩晚先可以完成，今個比賽，竟然一個鐘頭多d就畫好哂，仲有時間淨，算係好好喇！

 

媽咪一直教Ambrose畫，其實都無時間留意其他人作畫，只係見到身後一個小朋友一開始已攞左張草圖出黎照跟住起稿畫，見佢地嘅圖真係好靚，直情好似係畫室畫嘅畫咁，真係覺得人地好勁！不過開始比賽之後，媽咪只係不斷聽到身後個媽咪不斷同個小朋人講夠鐘喇，要快d起好稿喇、要快d開始油邊度邊度喇、呢度要點點點畫、果度又點點點畫、又話要漸變色，果度d泡泡又咁咁咁，真係未停過！曾經有幾次，媽咪忍唔住偷望一下，都見到小朋友爹爹响度油緊顏色，不已為意。及後，爹爹同媽咪講，其實個小朋友一早已經無畫，响度食早餐，又行左去，係佢爹爹自己响度畫，媽咪心諗，咁都得？！

 

臨交畫時，工作人員要求參賽者交畫時亦都順便交還已取用嘅櫈出去，其實咁樣做都好正常，借人櫈當然要還，幫一幫手攞出去叠番好俾人都好合理，如果唔係，全部人都就咁走左，工作人員執櫈都好辛苦啦！但媽咪見到有人走左無搬櫈不特止，張櫈仲係畫左d水彩上去，完全無清潔過，真係一d公德心都無囉！

 

綜觀今次現場嘅繪畫比賽，其實都係一個好好嘅經驗，要Ambrose响一個既陌生又嘈雜迫夾嘅環境中保持耐性與專注，完成繪畫比賽，機會著實不多。對於媽咪黎講，為左比賽而去畫畫同埋教Ambrose去畫，某程度上Ambrose有一點點覺得媽咪好叻，加左d分架喇！同埋比賽過程Ambrose同媽咪都好享受，媽咪覺得似係一個親子活動多於比賽，感覺好好！至於攞獎麻，算罷！現場眾多參加者，驟眼睇多數都係K2-K3大嘅小朋友，有d仲係畫室成團咁帶去比賽，仲有係好似媽咪身後有美術天份嘅家長大有人在，以Ambrose三歲半年齡，望勻全場都唔多見有咁細嘅小朋友，佢媽咪又唔係叻，要突圍攞獎，都唔使諗喇！

太空之旅@小星星創作園地 (3y7m)

 

一直以來，媽咪從來都無諗過要Ambrose响跳舞方面有咩發展，只係俾佢跳吓郁吓，見佢嘅真正興趣其實係畫畫，亦有能力同專注力畫，所以媽咪諗住與其俾Ambrose一星期跳兩節舞，不如減一節時間，轉而學多一節畫，或者得益更大！也許之前有問過其他朋友意見，早前朋友介紹左一個復活節特別班俾媽咪，見主題係太空之旅，又話以油畫同黏土製作立體畫，
Ambrose之前見畫室有人畫油畫，曾表示有興趣，但油畫幅幅都大大幅，要學起上黎，真係周屋都係，見Ambrose仲細，就推說要大個仔先學得。所以見今次有呢個特別班，只係一次性質，媽咪覺得不妨一試，滿足吓Ambrose心願啦！

 

老師畫畫前，原來都有相關主題嘅大資料板攞出黎同小朋友講，但由於Ambrose係遲左入去，唔知佢聽左幾多！原以為油畫會用油畫架俾小朋友畫，但原來唔係，只係一般坐响度畫，等爹爹媽咪之前仲同Ambrose講左好多次可以企响度畫油畫，唔知佢有無覺得爹爹媽咪呃佢呢？！哈哈！

 

Anyway，見佢放學時個樣都好開心，就知道佢唔介意唔係企响度嘅油畫啦！而幅畫，爹爹媽咪一眼睇落去已經覺得好靚，個背景好多星星咁嘅點點，真係令人驚嘆，老師解釋，係由兩枝畫筆點了顏料再打十字咁敲落幅畫度，就有呢個效果！媽咪今次真係學到野喇（雖然咁玩法响屋企好大機會出事）！老師同媽咪講，話Ambrose好搞笑，佢問老師，佢可唔以同太空人整眼眉毛？嘩哈哈！老師話，當然可以啦！媽咪聽到，就覺得Ambrose真係好叻，第一次見老師，竟然咁大膽可以自己提出要求。

 

見到其他小朋友嘅太空人都係紅色或藍色，只有Ambrose果個係白色，仲要只有佢對手係真係立體到豎起來，而其他小朋友果d都係平平的痴响畫板上，真係有d奇怪！返到屋企問Ambrose點解佢個太空人係白色嘅，佢就話：太空人件衫係白色架麻！問佢係老師俾黏土佢整，定係自己揀，佢話係佢叫老師俾白色佢架喎！再問佢點解對手會豎起黎，佢就話大空人係咁架麻，佢浮緊丫麻！Ambrose嘅答案真係令爹爹媽咪好欣慰，因為佢真係有觀察過至去做呢幅立體畫！

 

有時覺得Ambrose都係選擇性去睇野，平時好多野擺佢面前都話見唔到，但有時好多細微野爹爹媽咪唔expect佢會知佢會觀察到，但佢又真係好心水清知道架喎！

寫字@麥坤 (3y7m)

臨瞓前，Ambrose又叫爹爹教佢寫「麥坤」呢個字，見佢咁有興趣，爹爹當然唔會拒絕，吩咐媽咪寫大隻d俾Ambrose跟住抄！Ambrose一開始就話唔識寫個「麥」字，叫爹爹媽咪捉住佢隻手教佢寫，但爹爹話唔可以捉手教，叫佢自己抄到幾多就寫幾多。之後佢跳過左個「麥」字唔寫，寫左個「坤」字先。呢個字對於佢黎講應該易開始少少，因為學校已經學寫左「土」字，見Ambrose好快寫完個「土」字，可能佢無預位，到要寫「申」時，發覺媽咪寫果個字有一棟响度阻住佢寫，佢竟然無啦啦將「申」寫左去第二度，成個字分開左，笑死爹爹媽咪！可能見爹爹媽咪笑，佢未完成「申」，又再响空白位置由頭再寫過，真係寫到個「坤」字，真係好叻！

 

之後，佢就開始嘗試寫「麥」字，唔知係咪個字唔係全部橫直線，見Ambrose真係要諗一陣至開到筆，明顯比只有橫直線嘅「坤」寫得較遲疑！Ambrose好努力寫，雖然最後個「麥」字佢寫漏左d筆劃，但見佢咁俾心機去寫，真係好感動！再講，個「麥」字嘅字形佢都寫得幾似丫！

Construct and Colour 手工書 (3y7m)

又買到兩本手工書俾Ambrose，車同飛機，佢一定鍾意呀！

初學加法 (3y7m)

最近同Ambrose嘅同學仔媽咪講起返興趣班的事，好驚訝原來有d同學仔除左上緊一般嘅畫畫、跳舞、英文、普通話班之外，原來佢地仲會上數學班！媽咪從來都無諗過呢個年紀已經可以開始學計數！問過上堂模式，又覺得對於三歲幾嘅小朋友黎講都幾悶，要佢好似返補習班咁坐响度做數，自己諗落都唔係幾好玩啦！所以數學班，暫時唔諗喇！不如自己試吓教d簡單嘅數學，等上K2至諗啦！

 

同學仔媽咪介紹左d數學workbook俾媽咪試吓，本來佢地介紹「加法練習」呢本俾媽咪，不過無貨，見到呢本「初學加法」都唔錯，所以買住返去試吓先啦！

Home Craft Time@輕黏土昆蟲 (3y7m)

今晚Ambrose又話要再整黏土手工，媽咪見前幾晚同佢整左架clay moving car仲有少少顏色黏土淨，有材料，又剛買左本黏土大全教整黏土公仔，咁就一於試吓啦！

 

攞左本黏土大全俾Ambrose自己選擇整咩公仔，佢揀左甲蟲！望落都幾易，媽咪攞左d黏土出黎教Ambrose點整，佢就自己整喇！最緊張係甲蟲身體中間要用工具印一條坑，幾驚佢印到大細邊，哈哈，好彩又無喎！整好左身體同頭，痴埋一齊，就開始整身上果d細圓點。以為呢part幾易整，點知Ambrose整到d粒粒大大粒，又厚，又貼得好密！

 

以前整輕黏土勞作多數都係買白色返屋企撈色，今次唔使撈黏土顏色果然快好多，話咁快就整起左一隻甲蟲，Ambrose又話要再整，佢揀左蝸牛。搓完長條再卷埋一餅，呢個Ambrose就卷到成餅野高高低低。雖然係唔平，但出黎個效果又唔係好差！

 

整完蝸牛，Ambrose又話要整蟲蟲，最難整反而係個殼，又要包到條蟲，個形狀又要唔大唔細，結果都係整大左，要兩邊反摺少少入去至勉強似d！

 

好快咁整完三個輕黏土手工，媽咪都好有滿足感！呢本黏土大全真係無買錯，自己真係唔識整架喇，有本書跟住做，真係又易又快咁就做起！

Home Art Jamming @彩色恐龍 (3y7m)

Ambrose另一傑作
– 彩色恐龍！佢真係好鍾意勁用唔同顏色畫公仔，究竟點解呢？

Home Art Jamming @鴨仔船 (3y7m)

放工返去又見到Ambrose嘅傑作！其實都完全唔知佢畫咩，只係覺得好多線條同埋好多顏色！見到下面一堆雜亂嘅藍色線，其實都估係海，Ambrose畫海嘅模式成日都係咁，好似個怒海咁，哈哈！所以如果呢個係海，上面果隻應該係船！問Ambrose係咩黎，佢話係鴨仔船，仲即時指住前面個鴨頭俾媽咪睇！又係喎，真係有個鴨頭！問佢點解隻鴨仔係船，佢話因為佢鍾意！細問佢咁多線係咩意思，係咪貨櫃船，又話唔係！但就指著海上面紫色一排好似門嘅物體，話係門，但就話呢隻果隻爛左，要去前面入先得，真係唔知佢究竟諗緊咩？！

創意畫班@第二十三堂(3y7m)

黎緊嘅星期日要去參加繪畫比賽，又返唔到畫班，所以今晚又專登提早補堂！今日去接Ambrose放學，又係見肥妹仔老師教畫畫，唔知係咪呢個時段係佢負責嘅呢？

 

Ambrose攞住本畫薄行出黎時，媽咪已經覺得幅畫熟口熟面。對上果次補堂，又係呢個時段，呢個老師，果次係畫雞泡魚，而今次係熱帶魚！幅畫個背景真係好似，都係d石仔同海草，所唔同嘅係條魚唔同左囉！某程度上媽咪應該慶幸，因為星期日嘅比賽媽咪幫Ambrose揀左海洋世界為主題，老師又咁啱呢兩次教畫魚，當學吓點畫同埋練習吓都好嘅！不過媽咪心入面就覺得，即使教畫唔同嘅魚，其實個畫面都可以好唔同囉，兩幅背景咁相似嘅畫，雖然今次有撕紙貼落幅畫度幾生動吓，但令媽咪感覺係老師比較求其左d囉！下次都係揀番Miss
Chan嘅時段黎補堂至得喇！

寫字@楊 (3y7m)

Ambrose下學期開始有寫字功課。Ambrose小肌肉都可以，所以寫字對於佢黎講都可以應付到，當然，寫得靚唔靚同是唔是正係另一回事，但只要佢肯寫，無抗拒，現階段媽咪會由得佢自己寫完交功課。

 

早幾日同開同學仔媽咪講開寫字問題，話上到K2、K3寫字深好多，聽見都覺得辛苦。見Ambrose對畫畫有興趣，爹爹就試吓寫個「楊」字出黎，俾佢跟住寫，話其實寫字就好似畫畫咁，Ambrose即時真係跟住寫個「楊」字出黎。見到佢其實真係要睇好耐至一筆一劃抄到，尤其是個字有筆劃轉彎，就更加猶豫點寫，證明其實抄一個字對於佢黎講，都唔係易。雖然個字嘅比例寫得唔靚，但見到Ambrose寫到個字出黎嘅時候，真係好感動，我嘅Ambrose真係成長了不少！

 

寫完「楊」字第二日，媽咪放工返屋企，見到張紙又多左兩個「楊」字，嫲嫲話係Ambrose自己走去寫。呢兩個字開始無大細邊喇，哈哈！

幼兒字咭掛袋@小樹苗 (3y6m)

其實屋企都有字咭掛袋，但膠片size比較矮，如果插一d高少少嘅字咭，好似A4咁，就會搖搖欲墜，所以並唔係隻隻字咭都可用到！之前買左嘅「幼稚園認字咭」嘅size就應該無問題，但媽咪年多前買左一套「有趣的文字」，由於字咭係直向，屋企嘅字咭掛袋都唔啱用，所以一直都收埋入櫃無用過！

 

最近，就住Ambrose 嘅零認字進度，媽咪終於又的起心肝諗下可以點搞，突然記起呢套字咭！無疑，要引起Ambrose對文字嘅興趣，媽咪覺得，都係用圖畫吸引佢可能會比較有效一d！所以，之前買嘅「幼稚園認字咭」暫時又要待用先！正係媽咪煩惱點去將「有趣的文字」嘅字咭show出黎嘅時候，終於俾媽咪買左一個啱放嘅字咭掛袋！

 

小樹苗嘅幼兒字咭掛袋，雖然外形真係幾一般，但實用性強！每一行膠片，都有前後嘅膠片，可放唔同size嘅字咭！試放左「有趣的文字」字咭，同埋幾張英文sight words小字咭，效果唔錯！

 

字咭掛袋掛左出黎之後，Ambrose並無反應，亦無問大人d咭係咩黎，就好似見唔到個掛袋一樣，可想而知佢對文字係幾咁無興趣同唔敏感！可幸嘅係，當媽咪同Ambrose講解字咭時，佢都肯聽下！同埋，原本媽咪揀左一d好簡單嘅字俾佢睇，以為佢都係識個「小」字，點知原來佢已經識哂呢d字！

 

似乎字咭掛袋係一個好開始，要繼續努力嘗試至得！

Home Craft @Clay Moving Car (3y6m)

上年年尾買左盒Clay Moving Car，今晚先至攞出黎同 Ambrose一齊整！盒入面有說明書，教整兩款車，一架係私家車，一架係貨車。 Ambrose揀左整私家車。媽咪同佢一齊整就覺得有難度，張說明書上嘅圖唔係好大張，媽咪睇來睇去都唔知點整，更何況唔知點同Ambrose講點整，唉！最奇特係入面包左四隻色嘅黏土，如果要跟住幅圖嘅顏色去整，要溝黏土！呢個都唔係問題嘅，但最大問題係，媽咪發覺如果整哂成架車身，包嘅黏土係唔夠囉！因為四包黏土入面係有一包白色，如果要溝黏土，咁白色其實都唔可以撈太多，有咪即係無囉！好彩媽咪聖誕節時咁啱買左同一牌子嘅綠色黏土，基本上係同幅圖隻綠色一模一樣嘅，所以媽咪索性唔溝，出動私伙黏土至得！用左私伙黏土，包果四包自然就有淨喇！

 

好求其咁同Ambrose一齊整左架clay moving car出黎，睇Ambrose反應都唔係特別興奮，加上整完將架車對比番落幅圖度，見佢個樣都覺得：吓？就係咁架喇？所以媽咪覺得今次係失敗之作！

 

唯有擺一排先，遲d睇吓可唔可以整走哂 d黏土，再用個車身整過第二架啦！

Home Art Jamming @恐龍 (3y6m)

星期日同Ambrose响市中心睇侏羅紀恐龍，其實都係得一隻超大嘅恐龍放左出黎，無咩好睇，但Ambrose當然勁鍾意呢d野，叫極走都要跑返去睇，話未睇完喎！

 

尋日放工返去就見到檯面上有呢幅畫，媽咪一心以為佢畫左條變色龍，因為之前果晚至同佢講故事書，啱啱入面就有條變色龍，Ambrose又不斷問關於變色龍嘅野！而媽咪一眼見到呢幅畫，就覺得有d似果本書入面嘅變色龍！

 

未等媽咪開口，嫲嫲就話爹爹見到Ambrose畫呢隻恐龍，就話Ambrose畫到恐龍咁少手指！果一刻，媽咪至知呢隻係恐龍，嘩哈哈！嫲嫲引述，話爹爹覺得恐龍前手係應該唔止兩隻手指，但Ambrose堅持話係得兩隻，爹爹有同恐龍影相，但張相係媽咪用自己手機影，所以佢地無從得知答案！

 

結果，媽咪打開張相放大睇，係Ambrose啱，恐龍隻手得兩隻手指！開始明白，點解Ambrose睇左成半個鐘都唔走，真係有佢嘅原因！

油粉彩(3y6m)

剛上畫班嘅時候，特登去搵盒jumbo
size嘅油粉彩俾Ambrose，諗住佢用粗粉彩好揸手d！雖然見畫室好多同學仔都係用一般粗度嘅粉彩多，有時都驚Ambrose會覺得自己果盒同人地唔同而覺得奇怪。但媽咪一直都覺得呢個選擇無錯！起碼，半年下來，呢盒jumbo size油粉彩都無咩點斷過！

 

之前同Ambrose油過填色比賽，攞過d幼嘅蠟筆俾佢用，見佢都用得無咩問題，加上之前同佢响屋企畫舞獅畫，至覺得原來用jumbo size嘅油粉彩都幾難要佢油到d細緻位，所以打算同佢畫海底世界之前，又走左去買左一盒正常size嘅油粉彩，諗住筆身幼d，Ambrose可以油得細緻少少，同埋顏色可以多d選擇。

 

畫海底世界前半part就係用左盒幼粉彩，點知都唔夠十分鐘，Ambrose已經油斷顏色，見佢下下都大大力咁油，果d粉彩真係幼得濟，本來已經好短嘅粉彩，斷左之後再用果半枝，真係揸唔到上手，媽咪見再用落去都唔知要斷幾多枝至得，都係急急同佢換番盒jumbo size畫喇！

 

睇黎，盒正常size嘅粉彩又要放上好一段時間至可以用得喇，暫時都係用番jumbo size算喇！

海底世界@童眼看世界繪畫比賽(3y6m)

媽咪二月份時知道有呢個比賽，由於畫室無特別舉辦比賽班，媽咪又就唔到時間俾Ambrose跟老師上幾堂特別堂畫幅比賽畫，所以決定自己試吓同Ambrose响屋企畫！又由於Ambrose三月尾要參加一個現場嘅繪畫比賽，比賽主題係海洋世界，為左可以順便同Ambrose為個比賽練習下，所以決定呢個比賽嘅主題都係以海底世界為主！

 

同之前畫舞獅一樣，媽咪首先要自己學吓點畫海洋動物先，又係用左一晚時間畫左一幅有唔同海洋動物嘅畫出黎。當Ambrose第二日見到呢幅畫時，又係好興奮咁要媽咪教佢畫，仲一連講左好幾日！

 

三月初嘅一個夜晚，又同Ambrose一齊逐part逐part畫！原本其實媽咪只係打算畫多幾種唔同嘅魚出黎教Ambrose畫，至於最後要畫咩魚同位置就由Ambrose自己決定。但當一開始畫嘅時候，基本上Ambrose係要畫到同媽咪一模一樣！呢一刻，媽咪開始諗，咁樣畫左一幅畫俾Ambrose教佢畫，其實唔知好事定壞事？究竟咁樣抄畫法會唔會令佢無左創意？但，既然果刻已經開始左，都要繼續畫落下，之後先至再諗喇！

 

呢幅畫，本來媽咪覺得難度應該比起舞獅果張易，起碼佢之前已經識畫八爪魚、鯊魚等，其他魚，其實只係形狀有所不同，照計其實好快上手！但，一開始同佢畫龍蝦就有問題，畫完龍蝦個身，原本只係畫個箝，佢平時都畫開蟹箝，理應無問題，但佢竟然畫到一pat野，媽咪見只係剛剛開始，所以就要求Ambrose不如開過張畫紙再畫過啦！可能Ambrose唔理解，點解好地地要再畫，不過佢諗左一下，都話好，但就打算揭去後面再畫過，媽咪又要再一次否定佢，係都要佢開過另一張畫紙！

 

到畫到八爪魚，見Ambrose又係倫倫盡盡咁畫到d爪唔夠位畫，真係唔知點教佢！最煩就係佢根本唔知粉彩其實係好麻煩嘅一種顏料，佢隻手又唔識吊起少少唔好摩擦住幅畫，搞到佢一路畫，對手就一路响張畫紙度捽，成幅畫都烏卒卒咁，成檯成地都係果d甩出黎嘅粒粒，真係好煩！

 

呢幅畫一開頭開得唔好，加上媽咪預期應該好簡單，再加上媽咪心急，情緒真係幾忟吓，有幾次見佢捽到污糟哂嘅時侯，又見佢好似神遊太虛咁，忍唔住有幾次好嚴厲咁話佢！媽咪有一下見到Ambrose雙眼有少少愕然，但無出聲，果一刻，媽咪開始醒覺到自己對佢太嚴厲喇！教小朋友畫畫，根本唔應該咁去教，如果因為要畫一幅媽咪心目中嘅畫交去比賽，而對Ambrose每一樣野都挑剔，每畫一陣都得動氣的話，根本就有違本身要去比賽嘅意義，亦抹殺左Ambrose嘅畫畫興趣同創意！

 

呢一晚，海底世界並未畫完就已經停筆，懷住愧疚嘅心情再回想呢一晚教畫嘅情景，不禁覺得自己好衰！或者有一刻，响房入面嘅嫲嫲會諗，點解媽咪會咁＂怪獸＂？呢一晚，媽咪瞓得唔多好，不斷檢討自己！可幸嘅係，媽咪能夠响忽然迷失之中搵番自己，認清楚自己應該有嘅態度。

 

第二晚，再同Ambrose畫埋下半部份嘅畫，過程已經輕鬆不少喇！啱啱仲因為畫班補堂教畫雞泡魚，Ambrose即席畫左一隻，仲係咁畫左一堆泡泡圍住，叫都叫唔切唔好畫咁多住，但其實睇番都幾Cute！又好似幅畫畫到最後有條三角形嘅魚，教佢畫時諗住位置都夠，都可以畫大少少，點知Ambrose又畫到出奇地細，再畫尾部時又畫到斜哂，成條魚怪怪地咁，媽咪覺得好唔完美，但小朋友嘅畫，又點會有完美呢？見到呢條魚，就更加覺得其實Ambrose已經好盡力畫喇，呢幅係佢嘅畫，唔係媽咪嘅畫！

 

油埋水彩，成幅畫可能用左好多唔同顏色，效果比想像中好！媽咪超鍾意呢幅畫，但Ambrose話佢鍾意媽咪畫果張多d，最後我地亙送自己嘅畫俾對方！

 

由於時間真係太趕嘅關係，最終要麻煩爹爹親身交稿參賽。

 

創意畫班@第二十二堂(3y6m)

今堂畫火箭，啱哂Ambrose！佢一畫完出黎，就急不及待同媽咪講，好大火！哈哈哈！

Home Art Jamming @媽媽 (3y6m)

Ambrose又畫媽媽！喜歡佢畫嘅眼睛，係一個圓形入面再畫眼珠，唔係就咁畫一點叫做眼！

 

By the
way，點解媽媽個肚咁突架？！！！

Home Art Jamming @睫毛魚 (3y6m)

Ambrose畫左條鯊魚，加上左睫毛，佢話女仔黎架喎！
幾可愛啊！

Home Art Jamming @鯨魚 (3y6m)

 

原本以為呢幅畫頂部又係雲，有d虛線可能係落緊雨，點知Ambrose話呢條係鯨魚，佢噴緊水，噴左好多上天空喎！

Home Art Jamming @鯊魚 (3y6m)

又係放工返屋企發現Ambrose又去攞左好多A4紙畫畫，成個窗台都係紙！見到就頭痛喇！

 

幫佢執返去d紙時發現呢張鯊魚！Ambrose話鯊魚下面係海，右下角係一隻潛艇，上面係一大排雲同太陽！

 

媽咪心諗，點解條鯊魚咁肥嘅？哈哈！

Home Art Jamming @校巴 (3y6m)

有一晚，Ambrose自己坐左响檯仔度畫左架校巴，之後佢就話要畫埋校巴姨姨！問吓Ambrose車頭果條線係咩黎，以為佢會答係水撥啦，點知佢話係天線，佢話佢校巴有架喎，媽咪有d懷疑係咪真架？！之後Ambrose就不斷問媽咪，點解的士同校巴有天線，私家車同巴士無喎？唔識答！唯有話其實好多車都有，只係睇唔睇到咁解，之後當然換來N咁多次”點解架？＂

 

頭都大埋！

再試高爾夫球 (3y6m)

今日上完興趣班，爹爹又話同Ambrose 去打高爾夫球，今次都係媽咪第一次接觸呢個玩意，感覺都幾新奇！

 

去到小店，問過店主有小童球桿返未，答案係未返到。唯有再租住上次果枝先啦！其實打波嘅時間真係好快過，好似打左唔係好耐就已經一個鐘！Ambrose可能因為無瞓晏覺，上完堂食完午餐就去打波，個人都幾忟吓！見到人地個波可以打得好遠，自己就只係不斷推波，佢係咁扭計話點解佢打唔到，唉！無計啦，爹爹媽咪其實都唔識打，見人地好似好輕鬆咁打個波出去，到自己打時其實邊有咁易架，自己都未打得到，點教咁細個嘅Ambrose丫！

 

還球桿時同店員講起原來康文署都有兒童高爾夫球班，不過小朋友最少好似要六歲喎，咁Ambrose即係有排等啦！店員話如果小朋友想學，佢地有教練介紹，一對二咁上堂，其實都幾吸引，不過學爹爹話齋，樣樣野都要學，一學又要咁認真咁搵專人教，真係幾多錢都唔夠！同埋暫時Ambrose真係有太多興趣班要上，如果只係見佢玩兩次就扭住話想學，亦未必可以盡信，始終唔知佢係咪三分鐘熱度，所以都係同佢平時黎玩吓、打吓，揣摩吓，睇吓佢係咪真係咁有興趣再慢慢諗係咪要同佢認真搵個教練！

Home Art Jamming 比賽畫@舞獅 (3y6m)

二月份的時候，媽咪發現左一個海外繪畫比賽，掙扎著該不該讓Ambrose参加。希望比Ambrose参加的原因，係想Ambrose多参加比賽，見識一下之餘，亦可以從籌備参賽嘅過程有所得著。從現實d嘅角度黎講，好天真地諗，萬一得獎，對之後考小學或有少許幫助吧！媽咪之前問過畫室老師，倘若媽咪想為Ambrose參加繪畫比賽而又唔知點教佢畫，畫室亦未必有為個比賽而開比賽班，老師可唔可以另外教授指定主題嘅畫，老師話可以上幾堂單對單教比賽畫，但其實雖然叫單對單教授，老師只係可以安排到平日一些較少學生嘅時段，同成班同學一齊上堂，其他人就畫佢地嘅主題畫，而單對單就可以畫指定題目嘅畫，並唔係真正嘅單對單教授！本來，媽咪為左參加呢個比賽，都決定以呢個形式一試，但度黎度去個schedule，加上要預時間寄去國外，時間真係唔多，畫室又唔係每日都開門，所以最後係擠唔出時間，同埋夾唔到畫室額外上幾堂！

其實夾唔到畫室時間，媽咪已經放棄左大半，因為個比賽主題係自己國家嘅傳統事物或舞蹈，媽咪只係諗到中國嘅傳統節日，如新年嘅舞獅同端午節嘅龍舟，呢兩樣野都好似好難畫吓，如果無老師教，真係唔知從何入手！個題目對於Ambrose黎講幾深，根本唔可以話俾張畫紙佢諗到咩就自由發揮！

 

結果，媽咪無放棄到，仲決定不如自己試吓教Ambrose，畫得好就寄，唔好的話就當平日親子活動，消磨下時間。見朋友仔有利是封係舞獅頭造型，靈機一觸問佢攞黎參考吓點畫舞獅塊面。講真，真係好細緻，媽咪對住個利是封都唔知點畫好！由於媽咪打算自己教，所以媽咪用左一晚時間嘗試自己畫一次，睇左個效果先，同埋揣摩下應該點教Ambrose。

 

第二日，Ambrose見到媽咪畫嘅畫，超級興奮，仲話好靚，要媽咪教佢畫，真係估唔到媽咪呢幅咁核突嘅畫竟然有人欣賞喎！哈哈！

 

三月初某一個夜晚，媽咪教Ambrose畫舞獅，大家坐埋檯時，媽咪真係唔知點開始教！原本媽咪打算好似老師之前教比賽班咁，先以鉛筆起稿，但最後又覺得咁複雜嘅野要用鉛筆起一次稿至可以上色，真係兩番困難，分分鐘未起完稿Ambrose已經無哂癮喇！所以媽咪決定都係教Ambrose直接畫响張畫紙度就算喇！媽咪攞多張畫紙俾自己，响自己畫紙逐part畫一次俾Ambrose睇，佢跟住逐part响自己畫紙度畫，過程其實都好驚險，因為一落手，其實畫錯左或者畫得唔好，係無得返轉頭嘅！成幅畫，其實最難係隻舞獅，Ambrose已經畫到成隻豬咁，雖然唔多似，但就好好笑！畫完舞獅，果串炮仗佢自己搶先唔使人教就畫，但個位置其實唔多夠位，唉！去到畫打鼓果部份，畫鼓時已經好多問題問媽咪，點解咁咁咁，到畫打鼓人時，佢已經好想唔用粉彩，用水筆直接畫喇！可能佢平時自己畫畫時多用水筆，比較習慣用水筆嘅手感，畫左成晚粉彩，又污糟又無咁好控制，所以開始唔多耐煩！媽咪最後都俾Ambrose用水筆畫個人，諗住佢平時都成日畫人仔，而家只係畫半身，由得佢自己發揮啦！點知，佢一畫就畫到件衫上下掉轉左，但用左水筆又改唔番，結果都係要用粉彩，仲要用黑色從新畫過遮番住佢！畫到最後嘅燈籠，睇得出Ambrose已經無咩心機！本來畫完隻舞獅時已經叫佢唔好畫，分兩晚完成幅畫，佢又唔肯，係都要畫，但畫又唔係咁認真去畫，真係令媽咪好激氣。好彩畫完粉彩後，係用水彩上色，Ambrose一知道可以油水彩，精神又番返黎！

 

終於，呢幅畫用左近兩個鐘完成！

 

講真，媽咪覺得幅畫畫得唔太靚，如果攞去參賽，好似有d勉強。媽咪一直都想同Ambrose畫多一次，起碼佢已經畫過一次，再畫嘅時侯可能可以加到自己嘅idea，加d唔同嘅野落去，令到幅畫唔係只係抄媽咪嘅畫！可惜，真係無時間再同佢畫過！

 

最後，媽咪都無將幅畫寄出！

上面果幅係媽咪畫，下面果幅係Ambrose畫！