Neocolor II 水溶性蠟筆@Caran d’Ache” (3y6m)

早排經過大眾，見到有sales示範用Caran d’Ache” 產品，見個sales畫得咁靚，忍唔住停左响度睇佢介紹。個sales可能見到媽咪咁啱揸住盒粉彩打算買俾Ambrose，佢即問媽咪小朋友幾大，當知道係三歲半小朋友嘅時候，就已經猛話咁細小朋友唔應該用粉彩，個理由係，污糟喎！其實媽咪都知好污糟，用粉彩一定畫到甩哂d粒粒跌哂落地，真係幾麻煩，不過媽咪又覺得咩顏色都應該試吓，畫畫本身都已經係污糟架啦，除非唔畫啫！sales介紹媽咪呢隻水溶性蠟筆，話係washable，唔會甩粒粒，亦可以用水洗得好乾淨。同埋當蠟筆畫在畫紙上，再用微濕畫筆响上面掃，蠟筆會變成水彩咁嘅質地。Sales又示範左好幾種技巧，例如用唔同顏色畫在唔吸水嘅材料上，再用微濕畫筆掃過再畫在紙上，就會見到水彩質地嘅漸變色效果；又例如用一個中間剪通左圖案嘅紙模，响周圍油上顏色，再放到畫紙上，將之前油嘅顏色用手指捽落畫紙上，就會托印到個圖案响張畫紙上面！仲有就係，雖然d蠟筆望落去幾幼咁，sales話唔怕斷左用唔到會浪費，只要將斷左嘅蠟筆收集响個容器入面，其實之後都可以濕水用番黎做水彩，一d都唔會浪費。

 

睇完個sales嘅示範，媽咪已經好心動，加上大眾正好做八折優惠，更加吸引。最後媽咪照買盒粉彩，再買左呢盒十五色嘅水溶性蠟筆、一個專用嘅筆刨、一個有好多格嘅色盒，同埋一包海棉手指套，折左差唔多三百蚊，其實都真係好貴！買完返到屋企至諗起，前年書展其實買左盒Crayola水溶性蠟筆，開都未開！不過Crayola果盒係粗身的，無呢盒咁幼，唯有安慰下自己諗，畫唔同畫可能需要唔同粗幼嘅筆，都好有用嘅！