之前發現到有個填色比賽，媽咪見張圖畫嘅公仔咁細緻，諗緊應唔應該同Ambrose參加好呢，一來諗住咁細好難油咁；二來之前見過其他填色比賽，d作品係誇張地畫得好靚，雖然提供嘅公仔係一樣，但d人係可以將個背景畫好多野，畫完出黎之後張張作品都可以望落去好唔同，填色比賽並唔係單單填色咁簡單！自問媽咪無咩畫畫天份，無咩本事畫到咁，亦無咩創意，完全諗唔到可以畫d咩背景，所以媽咪雖然一早已經download左幅圖，但一直都十五十六好唔好同Ambrose參加呢個比賽。
今晚無咩野做，突然諗起個比賽就到期，不如都係俾Ambrose試吓油吓顏色，油得好就寄去比賽啦，油得唔好當練吓小肌肉就算！諗起之前買過盒櫻花牌蠟筆，筆身幼幼，筆係尖嘅，其實都幾啱攞黎油呢幅圖，於是，媽咪即時攞左呢盒蠟筆俾Ambrose油！之前其實俾過呢盒幼蠟筆Ambrose用過，不過果時佢唔識就力，成日都大大力咁，為免好快整斷d筆，媽咪就收起左，估唔到今晚大派用場！
Ambrose見番呢盒蠟筆，好似好開心咁，可能因為咁，佢一開始就非常認真咁油顏色！首先係油爹爹，一貫佢嘅作風，同一件衫佢係會油唔同顏色落去，呢件都唔例外！原本媽咪諗住Ambrose未必油到呢幅圖，點知，原來用幼嘅顏色筆，佢係可以handle得好好！媽咪完全唔使理Ambrose，任由佢自己發揮，佢都油得幾好，雖然油到後來嘅bb同媽媽已經無油爹爹咁好心機同靚，但效果比媽咪想像中好好多，起碼無油到失控，見得吓人先！
背景，媽咪完全無idea畫咩好，諗到之前買水溶性蠟筆時個sales做過手指捽顏色托模，既然填色比賽主題係愛，咁就不如整好多心心落幅畫度，一來簡單d；二來亦可確保Ambrose應該可以handle到！Ambrose對於手指捽畫非常有興趣，係咁要捽，不過由於紙模唔係咁大張，有時Ambrose捽時又大大力，搞到周圍都掃到少少顏色，有d美中不足咁！
呢幅作品，近乎九成半出自Ambrose之手，果半成，其實係媽咪幫手油紙模周邊顏色俾Ambrose捽落畫紙度；同埋後期媽咪嘗試用擦膠擦番污糟左嘅位置。媽咪真係好滿意呢幅作品呢！
沒有留言:
張貼留言