一早買左飛睇呢套戲偶劇，竟然完全唔記得左，好彩朋友相約媽咪食飯，至赫然發現！因為係同天天、浠浠一齊睇，所以佢地上完興趣班，慢慢行去食野，再慢慢食完行去大會堂，應該啱啱好！叫左爹爹湊Ambrose去同朋友仔食住野等媽咪收工，點知收工時公路好塞車，結果媽咪去到時，所有人都食哂野等走，媽咪只好快快咁食完就出發！
呢套劇係無劃位嘅，所以都要預早少少去排隊。Ambrose都係第一次同兩個朋友仔一齊睇show，平時多數都係同浠浠去，今日三個小朋友一路行一路等就一路顛，真係頭都大埋。
夠鐘入場，呢個劇係無台嘅，都係地下搭佈景，再set到d櫈一級級有高度分別。最前係地墊，之後就係兩排小朋友矮櫈，之後係平時嘅正常櫈，再後面係搭高左嘅台放左正常櫈。今次嘅安排比起上年睇另一個劇好好多。因為大人唔可以坐矮櫈，小朋友坐就要同大人分開坐，諗住Ambrose有朋友一齊都可以啦，點知佢死都要同媽咪一齊坐，結果，天天同浠浠坐响前面，Ambrose就要坐媽咪大脾坐後面。地墊其實無人敢坐，但一開始後有個劇團負責人出黎話家長可以同小朋友一齊坐地墊，但家長要盡量坐邊位，以免遮住後面坐矮櫈仔嘅人。咁樣一講，好多人就出左去坐地墊，而家長又唔係個個坐邊位，搞到好多坐矮櫈仔嘅小朋友都遮住左，包括天天同浠浠。見好多坐超等座嘅家長已經去左坐地墊，反而超等座有位，咁我地一行六人就搬左上超等座，雖然唔可以近距離同d布偶接觸，但因為場地唔大，其實坐後面又清楚又舒服。
個故事大意係講班獼猴因為人類不斷咁開發，而令到佢地失去左原本安居嘅樹林，無左屋企，亦都令部份獼猴嘅飲食習慣改變，內容真係教人反思。雖然部份情節以佢地三歲幾嘅年紀黎講未必會明白或體會到，但大抵內容：因為人類要起樓、馬路而令獼猴無左屋企，同家人失散，Ambrose唔多唔少都明白，可以講番俾爹爹知！
沒有留言:
張貼留言