海底世界@童眼看世界繪畫比賽(3y6m)

媽咪二月份時知道有呢個比賽，由於畫室無特別舉辦比賽班，媽咪又就唔到時間俾Ambrose跟老師上幾堂特別堂畫幅比賽畫，所以決定自己試吓同Ambrose响屋企畫！又由於Ambrose三月尾要參加一個現場嘅繪畫比賽，比賽主題係海洋世界，為左可以順便同Ambrose為個比賽練習下，所以決定呢個比賽嘅主題都係以海底世界為主！

 

同之前畫舞獅一樣，媽咪首先要自己學吓點畫海洋動物先，又係用左一晚時間畫左一幅有唔同海洋動物嘅畫出黎。當Ambrose第二日見到呢幅畫時，又係好興奮咁要媽咪教佢畫，仲一連講左好幾日！

 

三月初嘅一個夜晚，又同Ambrose一齊逐part逐part畫！原本其實媽咪只係打算畫多幾種唔同嘅魚出黎教Ambrose畫，至於最後要畫咩魚同位置就由Ambrose自己決定。但當一開始畫嘅時候，基本上Ambrose係要畫到同媽咪一模一樣！呢一刻，媽咪開始諗，咁樣畫左一幅畫俾Ambrose教佢畫，其實唔知好事定壞事？究竟咁樣抄畫法會唔會令佢無左創意？但，既然果刻已經開始左，都要繼續畫落下，之後先至再諗喇！

 

呢幅畫，本來媽咪覺得難度應該比起舞獅果張易，起碼佢之前已經識畫八爪魚、鯊魚等，其他魚，其實只係形狀有所不同，照計其實好快上手！但，一開始同佢畫龍蝦就有問題，畫完龍蝦個身，原本只係畫個箝，佢平時都畫開蟹箝，理應無問題，但佢竟然畫到一pat野，媽咪見只係剛剛開始，所以就要求Ambrose不如開過張畫紙再畫過啦！可能Ambrose唔理解，點解好地地要再畫，不過佢諗左一下，都話好，但就打算揭去後面再畫過，媽咪又要再一次否定佢，係都要佢開過另一張畫紙！

 

到畫到八爪魚，見Ambrose又係倫倫盡盡咁畫到d爪唔夠位畫，真係唔知點教佢！最煩就係佢根本唔知粉彩其實係好麻煩嘅一種顏料，佢隻手又唔識吊起少少唔好摩擦住幅畫，搞到佢一路畫，對手就一路响張畫紙度捽，成幅畫都烏卒卒咁，成檯成地都係果d甩出黎嘅粒粒，真係好煩！

 

呢幅畫一開頭開得唔好，加上媽咪預期應該好簡單，再加上媽咪心急，情緒真係幾忟吓，有幾次見佢捽到污糟哂嘅時侯，又見佢好似神遊太虛咁，忍唔住有幾次好嚴厲咁話佢！媽咪有一下見到Ambrose雙眼有少少愕然，但無出聲，果一刻，媽咪開始醒覺到自己對佢太嚴厲喇！教小朋友畫畫，根本唔應該咁去教，如果因為要畫一幅媽咪心目中嘅畫交去比賽，而對Ambrose每一樣野都挑剔，每畫一陣都得動氣的話，根本就有違本身要去比賽嘅意義，亦抹殺左Ambrose嘅畫畫興趣同創意！

 

呢一晚，海底世界並未畫完就已經停筆，懷住愧疚嘅心情再回想呢一晚教畫嘅情景，不禁覺得自己好衰！或者有一刻，响房入面嘅嫲嫲會諗，點解媽咪會咁＂怪獸＂？呢一晚，媽咪瞓得唔多好，不斷檢討自己！可幸嘅係，媽咪能夠响忽然迷失之中搵番自己，認清楚自己應該有嘅態度。

 

第二晚，再同Ambrose畫埋下半部份嘅畫，過程已經輕鬆不少喇！啱啱仲因為畫班補堂教畫雞泡魚，Ambrose即席畫左一隻，仲係咁畫左一堆泡泡圍住，叫都叫唔切唔好畫咁多住，但其實睇番都幾Cute！又好似幅畫畫到最後有條三角形嘅魚，教佢畫時諗住位置都夠，都可以畫大少少，點知Ambrose又畫到出奇地細，再畫尾部時又畫到斜哂，成條魚怪怪地咁，媽咪覺得好唔完美，但小朋友嘅畫，又點會有完美呢？見到呢條魚，就更加覺得其實Ambrose已經好盡力畫喇，呢幅係佢嘅畫，唔係媽咪嘅畫！

 

油埋水彩，成幅畫可能用左好多唔同顏色，效果比想像中好！媽咪超鍾意呢幅畫，但Ambrose話佢鍾意媽咪畫果張多d，最後我地亙送自己嘅畫俾對方！

 

由於時間真係太趕嘅關係，最終要麻煩爹爹親身交稿參賽。