初試高爾夫球 (3y6m)

爹爹嘅同事打開高爾夫球，亦有同自己囡囡去打。同事知道我地住果區有高爾夫球場，所以提議爹爹可以試吓同Ambrose 去玩吓，近近地都不失為一個消磨時間嘅活動。爹爹都覺得呢個活動唔錯，所以就決定今日同Ambrose去試玩吓。

 

原來小朋友打高爾夫球係有小朋友嘅球棍，爹爹check過大約二百幾蚊就買到，本來要出尖沙咀買，但爹爹打左去場地問過，負責人話場地隔離小店有賣，所以爹爹就無出尖沙咀買，一心諗住去到買一枝就算。點知，去到時，店主話小朋友球棍賣哂未返貨，真係超失望！好彩，店主話記得有一枝display嘅球棍，俾佢摷左出黎話$10租俾爹爹，真係求之不得啦！除左要球棍外，打高爾夫球係要戴手套，原本爹爹同事教路，買一隻已經夠，佢嘅理論係，戴一隻手套嘅話，姿態唔好係會起水泡嘅，所以戴一隻手套可以知道有無錯手勢。不過當爹爹話買一隻手套俾Ambrose時，店主已經即時話唔戴手套好易起水泡，所以最後爹爹都買左一對俾Ambrose。爹爹話對手套係出乎意料之外貴，成二百蚊，哈哈！

 

帶Ambrose去打高爾夫球簡直係明智嘅決定。因為平時Ambrose已經好鍾意一d長條形嘅物件，佢一出街如果見到地下有一條條嘅樹枝，佢都會好似見到寶物咁執起。高爾夫球棍咁長，又可以一棍打去個波度，啱哂佢鍾意舞刀弄槍嘅個性。Ambrose足足打左一個鐘，爹爹話Ambrose基本上都可以打到個波，只係唔係太多次可以好似人地咁打到拋物線咁飛出去，媽咪覺得都算ok啦，其實要打中個波，都好講手眼協調，要打到飛出去真係要d力度同埋多練習囉，自問自己都未必得啦，哈哈！今日Ambrose差d打到唔願走咁濟，可想而知佢幾咁鍾意打高爾夫球啦！睇黎，可以繼續投資買埋枝球棍喇！