Ambrose的白恤衫 (4y4m)

白恤衫，因你變耀眼～

 

相信，除左校服之外，Ambrose都無咩機會著恤衫！家中唯一一件花恤衫，都係多月前去飲時著過一次咁大把！Ambrose麻麻地鍾意扣埋個領包住條頸嘅感覺，畢竟，佢並唔係斯文書生類吧！

昨日收到老師通知，樂團將於12月23日在商場表演，Ambrose都有份參與，媽咪開心不已。表演嘅衣著，男生要著白恤衫、打tie，黑褲及黑鞋。家中無白恤衫，過幾日就要表演喇，今晚收工臨急臨忙走去H&M一轉，好彩買到件白恤衫連tie，唔使煩！本來都想為Ambrose買條黑色西褲，但時間太急趕，H&M只得一款西款，很薄很薄的，褲型又唔係咁啱心水，都係算喇，下次見啱至買啦！今次，就著條黑牛仔褲去，唔係好覺啫！黑鞋，當然係返學鞋就得喇！天氣凍，單著一件恤衫未免有點寒，媽咪想起之前買落的一件黑色背花格仔冷外套，當時買大了，打算遲一、兩年至啱著，臨時又摷番出黎俾Ambrose試試，發覺衫身同衫袖都長左d，不過衫袖摺一摺其實都唔太覺大件，就著呢件外套保暖吧！

 

今晚同Ambrose試上身衫，佢見到時出奇地唔抗拒包頸，好合作咁著哂上身，哈哈！唔知係咪平時睇音樂會見到人地都係著到黑白色咁表演，所以當同佢講套衫係表演著時，佢非常受落，仲擺出唔同表情俾媽咪影相留念添！