Ambrose第一次住醫院(4y3m)

Ambrose第一次住醫院，過了三天兩夜呢！

星期日早上起來， 叫極Ambrose 食蛋糕佢都唔多願食，以為係因為表姐們在家過夜，夜瞓會攰d，同埋以為佢掛住同表姐玩唔願食，所以不以為意。但因為見佢有幾聲咳，咳中有痰，而且又有少少鼻水，所以送左佢去補堂後，媽咪即時同Ambrose去醫生處掛號，諗住快d睇醫生食藥快d清左d咳佢舒服d！

點知，接放學時，老師話Ambrose應該發燒，見佢擺左張櫈俾Ambrose放腳，Ambrose個樣皺哂眉，好似好辛苦咁，即時就同佢去診所睇醫生。一早黎掛號，但已經係排十幾二十個，隔左成個鐘再返去，姑娘都話唔到仲要等幾多個！其實Ambrose自己都已經話要睇醫生，去到診所見到咁多人又未到自己見醫生，佢已經好扭計，又喊哂，爹爹抱住都唔係幾安撫到。平時Ambrose都唔會咁樣扭計喊法，甚至上星期打疫苗針都無扭無喊過，都知道佢今次應該真係好唔舒服。有幾次佢仲係响爹爹懷裡本來安安靜靜的，突然大喊出黎，真係好反常！爹爹話見到Ambrose抖氣唔係好順，有點氣促，而且要大力抖氣，心知不妙！已經問左好幾次姑娘仲有幾多個至到Ambrose，都係答唔到，叫量體溫又話入左去見醫生都會量，真係俾姑娘激到彈起！見Ambrose好似越黎越唔對路，爹爹已經忍唔住衝去同姑娘講，Ambrose越來越氣促，可唔可以睇先！好彩咁啱終於輪到Ambrose！

醫生問完睇完症後，都無講d咩，只係問我地係咪有醫療咭，可以去邊間醫院，真係俾佢嚇一嚇，呢個時候，本來見到醫生都算平靜左嘅Ambrose又無啦啦大喊，連醫生都覺得奇怪！醫生話Ambrose係有點氣促，抖氣唔多順，有發燒，有咳，唔知咩事，但以而家嘅菌咁勁，有d病係以小數計咁惡化，唔係以日去計，所以建議入醫院檢查會好d！醫生一方面幫手call醫院問有無床位，一方面叫左姑娘開機俾Ambrose聞氣，成個診症室一片混亂！搞左一輪，call左幾間醫院都話無床位，要waiting，所以醫生都係叫我地返屋企先，以防萬一，仲開埋氣管藥俾Ambrose噴。

睇完醫生即食藥，食完藥即回家，Ambrose响車程中終於瞓著左！返到屋企唔夠個半鐘，醫生打黎話浸會醫院有床位了，要我地盡快入院！媽咪無咩入院經驗，又一心諗住都只係入去照吓肺，第二朝都應該出得院，所以幾乎咩都無執，只係帶住出世紙同一套Ambrose嘅家居服就出發去了！

入到醫院，Ambrose被安排入住三人房，房入面無窗，房嘅盡頭係一幅有魚公仔嘅牆，而Ambrose就好彩地被安排瞓响近牆果張床，感覺上有d公仔無咁悶！見Ambrose成日都未食過野，爹爹就買左碗通粉俾佢食，一開餐就有姑娘黎左話要响鼻入面抽取分泌物去驗。只見個姑娘攞住一條長長嘅棉化棒出黎，然後話只係少少唔舒服，媽咪仲以為只係放少少入去攞分泌物，點知見個姑娘成條棉花棒塞左大半條入個鼻入面，真係好難想像Ambrose個鼻有咁深架咩？咁長嘅棉花棒塞左入去大概去到咩位置呢？媽咪都有點嚇到擰轉面唔敢望！好彩只係一下，時間唔算耐， Ambrose好叻，一聲都無出過，姑娘都讚佢好叻，話好多小朋友都會反抗周圍擰， Ambrose真係好定！

攞完鼻液，又俾姑娘叫左去照肺，去完照肺，食唔到幾啖通粉，又話要去抽血！上次爹爹陪唔到Ambrose打疫苗，已經有點遺憾！今次爹爹可以陪住Ambrose抽血，心痛不已！爹爹話，姑娘先將Ambrose包腸粉咁捲實，另一個姑娘負責撳住Ambrose，以防打針入去時會反抗整到。 Ambrose見到要打針，係都要睇住人打落去，仲要睇住抽血出黎，其實都幾得人驚！上次打針佢事後已經話痛，今次唔係打野入去，係抽血出黎，應該仲痛，爹爹話見Ambrose無喊，但眼神有點驚恐，真係好可憐！

搞掂哂d野，終於都可以食通粉，食完，又話要去聞氣，原來入醫院都幾忙吓！

無咩準備入醫院住，咩都無帶黎，好彩醫院有小朋友嘅鎮定劑－電視！平時無得點睇電視嘅Ambrose，由於住响醫院實在地方有限唔可以周圍走，又無野可做，自自然然就只可以睇電視，仲有兩個兒童台不停係咁播。私家醫院一張床一部電視，有埋headphone帶住，騷擾唔到其他人，對Ambrose黎講，應該係一流嘅享受，哈哈！

第一晚，由媽咪陪瞓。下午兩點入醫院，一直到夜晚都未見到主診醫生，等到十點左右，睇電視都睇到攰哂，諗住唔等，熄燈準備瞓覺，點知，醫生呢個時候先黎！醫生初步望左Ambrose，又問左佢仲有無氣促，媽咪話聞左氣好似好左好多了，不過剛準備瞓，Ambrose話鼻塞。媽咪問醫生，下午檢驗報告有未，有無問題？醫生就話Ambrose白血球高左少少，係身體有炎症導致，有氣促，即係有菌搞住個肺，都算係有少少肺炎，但暫未知係咩菌，要明日黃昏有報告至知！一聽到肺炎呢個字眼，當然抽動媽咪嘅神經啦，最近肺炎鏈球菌鬧得熱哄哄，就係見Ambrose病得咁急，又氣促，所以醫院幾唔好住都要聽話送佢入院以防萬一，一聽到肺炎仲唔嚇死？！醫生同護士長都再三強調佢地所講嘅肺炎並唔係媽咪想像中咁嚴重果種，係一種統稱。不過由於有炎症，而呢排嘅菌又咁勁，醫生建議响未惡化前都係食定抗生素先好d，於是，護士長就叫媽咪唔好俾Ambrose瞓住，等埋配抗生素同鼻塞藥食左至瞓！

呢一等，真係人都顛，因為一等就等左個半鐘！都唔知有無搞錯！搞左成日已經好攰架啦，小朋友有病又食左藥，當然要早d瞓，醫生遲黎都算，佢實在太忙喇，但有咩理由配藥配左個半鐘丫？！媽咪期間追問過一次，都係話藥房要配出藥來係需要d時間，等到個半鐘時，Ambrose已經問左N咁多次點解咁耐，媽咪亦已經忍唔住再打去姑娘度問，個姑娘仲話本來十二點鐘都有藥要食云云！大佬，咁係咪因為要等埋十二點果轉一齊食至得？如果係，咁佢一早講我地可以瞓一陣先都得麻，响張床度係咁等又無得瞓，又無交代，係人都火滾啦！終於，都唔知係咪媽咪打左個電話好不滿咁話咁夜都未有得食藥，小朋友好攰云云，都唔夠五分鐘，就有藥送到！姑娘臨走時仲問媽咪，半夜四點有藥食，咁叫唔叫起身食藥喎？！本身Ambrose入院時已經退左燒，媽咪就話既然無燒，而家都成十一點喇，俾佢休息多d仲好啦，唔食喇！

 

好啦，以為講左唔食就可以啦。成晚，因為醫院唔似屋企有被袋可著，媽咪同Ambrose又分兩張床瞓，醫院冷氣又勁凍，媽咪自己嘅被都唔多夠暖，成晚又擔心Ambrose踢被凍親，搞到成晚都迷迷糊糊咁起身睇Ambrose。個姑娘竟然三更半夜同Ambrose量完體溫，再同迷糊嘅媽咪講Ambrose無燒！Oh my God！！！無燒唔使講架麻？！有至同媽咪講啦，幾點呀？！仲要，都唔知幾點又走黎再問媽咪，四點鐘仲食唔食藥？係咪有問題架？！！！！

 

媽咪成晚都無覺好瞓，Ambrose應該無咁嘅問題，第二朝早八點，自動起身，大聲咁叫：媽咪，早晨！响屋企都唔見佢咁精靈呀！由於之前果晚問過醫生今日幾時出得院，醫生話，邊有咁快出得院，報告都未出，所以第二日起身後，Ambrose已經不斷問點解佢咁慘唔可以返屋企？哈哈！

 

住院嘅第二日，以為所有檢查已經捱過哂，點知有個物理治療師走黎話要同Ambrose拍痰抽痰。開始拍痰時就好輕鬆，Ambrose只需要扒在床上俾治療師係咁拍，佢仲笑瞇瞇好似好舒服咁問媽咪點解咁似揼骨？拍完後原來又要包腸粉，媽咪要撳住Ambrose膊頭，仲要放條幼幼嘅管入喉嚨入面，等佢大力咳出黎時治療師可以吸到痰出黎。至慘係，要Ambrose特登咳又好難咳到，結果治療師要用喉＂了＂Ambrose喉嚨刺激佢咳，成個過程雖然治療師盡量快手，希望快d可以完成，眼見Ambrose唔知係被刺激到眼水都出埋，定係驚到標眼水，但佢都忍住無喊無俾眼淚流出黎，媽咪看在眼內心痛到自己都想喊！

 

呢日嫲嫲出左黎，媽咪至有機會出去走動一行、逛一陣又一城，如果唔係，响不見天日嘅病房入面，無野做，又無得瞓，真係唔病都搞到病呀！出左又一城，買左少少零食俾Ambrose口痕時食，仲去左反斗城買左弓箭，真係要大大獎賞佢咁勇敢，入左醫院要做咁多咁唔舒服嘅檢查，都無喊過扭過，叻仔！果然，佢見到弓箭好開心，無得真係射，但佢都係咁攞住擺pose！哈哈！

 

呢晚，輪到爹爹陪瞓！爹爹竟然話，好好瞓喎！

 

入院第三日，晨早醫生黎睇過Ambrose，由於爹爹覺得Ambrose已經穩定，响醫院入面都係定時食藥聞氣無咩可做，怕住得耐醫院多菌又無得好好活動同休息，於是向醫生提出要出院，醫生同意！爹爹即時執野走人，哈哈！