2009年7月31日 星期五
大肚相 II
終於都攞左大肚相返黎喇！我哋都無選，全部要哂！不過都無Ellen Law咁多，佢有成百一張，我得七十幾張，有d失望啦，大家都係俾一樣價錢，佢就多我幾十張相！老公話個攝影師話我哋“斬”眼多，所以cut左好多，我自己覺得唔係，影果日都唔係影得耐，最尾套衫重影得好少，可能男人都係無咁好心機，聽Ellen Law講之前佢個女攝影師有耐性d，教擺post好d咁，不過算啦，七十幾張都好！老公自己出去攞相，其實都係digital相，送多條link可以上網睇相，不過佢哋只係擺左部份相去條link度，唔係全部，而且係佢哋求其選d相擺入去，都唔係問我哋想擺邊d，所以個網上video果d相都唔係我哋精選！不過話時話，睇完d相係比我想像中靚，我好滿意！
入醫院喇
今日返贊育覆診，搭的士上到去都有d抖唔到氣！真係要同醫生講吓至得！
今次磅重比起十三號覆診輕左少少，而家keep住119磅，比起未有之前嘅103磅，35週重左16磅，都唔係好多。不過之前自己瘦，成日都係得90磅，轉左黎而家份工同無做舖頭，養專處優之下，肥左都唔知，直到過左100磅嘅時候已經太遲，好難返轉頭咁，好彩之前真係瘦左d，所以肥左都唔算係太肥。而家嘅磅數係我有生以來最重，以前都無諗過可以去到呢個數字，哈哈，感覺都好得意！人哋話臨尾果個月會暴重，因為bb要增磅，一個禮拜會重1磅，而家我都係得番最多4個禮拜，極盡肥4磅，咁都係重20磅，而且重唔重到都成問題，因為我跟營養餐食之後都係徘徊响呢個重量。人哋話一生完會即時無左十幾磅，嘩，咁我咪可以好快瘦返去百鬆d磅囉！再努力少少可能可以去返100樓下就perfect喇！不過希望小b再重多少少，肥b唔肥我就最好，嘻嘻！
今次覆診都有d緊張，因為係睇返上次超聲波嘅報告，唔知會唔會約埋開刀日期！更重要嘅係，好有可能會叫我入院住等生。其實我都真係唔係好想入去住，但都知咁樣對自己對小b係最安全嘅做法！自從睇完巫醫生之後，老公同奶奶都好想我入到醫院住，重成日叫我話醫生唔叫我自己要出聲話要入，對於我黎講，自己出聲話要入院住真係好難，咁咪即係要我自首去坐監？！我成日都應酬吓佢哋話睇吓醫生點講先算，不過老公都知我唔願都唔太push我！
醫生一開始同我講個超聲波報告，話confirm胎盤前置三期，一定要開刀！佢哋終於confirm要開刀喇！醫生重話我好彩，胎盤响肚面嘅下面，開刀嘅時候唔會介到胎盤先，我唔知咁有幾好彩，反正都要開刀，唔係咩？不過胎盤係小b命脈，如果一開刀就會介到個胎盤，咁d醫生咪要快手快腳攞小b出黎？咁會唔會求其d聯針呢？唉！都唔諗得咁多！醫生話下次覆診會有顧問醫生黎同我解釋手術風險同約期，開刀要等38週左右開喎！我都有問抖唔到氣嘅問題，頭先量血壓嘅時候心跳都136，我都無做過d咩野，醫生話睇返六月驗血糖報告d血都ok，有少少貧血，下次覆診同我驗血睇吓甲狀腺有無問題，嘩，下次都36週，驗完睇報告都37週，小b都隨時出左世啦！重等下次喎，都唔知有無攪錯！個醫生成日都講下星期覆診咩咩咩，提都無提要住院，有d奇，其他醫院嘅醫生都好緊張呢類case，即使連上次入屯門醫院果個醫生都好緊張，攪到我都唔知好唔好出聲！出聲又驚佢叫我入去住，唔出聲又好對唔住小b同老公咁！最後我無直接話我要入院住，我只係問個醫生其他醫院都會要胎盤前置嘅孕婦入院等生，我重要係三期，咁係咪我個case都ok唔使入呀？點知個醫生問我有無出過血，我話無，佢諗左三秒就話隱陣d要問吓顧問醫生，跟住出左去喇！入返黎佢就話顧問醫生話我35週前無出血，而且我住灣仔咁近，可以唔使入院住喎！咁我係用親戚嘅地址報入瑪麗生架麻，我都唔係真係住灣仔，我好尷尬同醫生講我而家住响屯門，佢就話：吓，咁遠呀？！咁唔得喎！跟住就dead air，佢諗左一陣就問我會唔會搬返去灣仔住，因為如果一入院就要住到生，都要住幾個禮拜咁耐。鬼唔知咩！我咪話我唔會搬返灣仔，重問如果出血之後飛車半個鐘出到黎醫院得唔得，醫生唔出聲，一陣之後佢就話驚趕唔切，我一定要入院喇！唉！真係要呀！佢重叫我聽朝入，我梗係唔肯咁快啦，咩都未準備好咁，至少俾我嘆埋星期六日，做埋我要做嘅野先啦！最尾醫生約我八月三日朝早九點入院！
走左之後都無即刻打俾老公，實在太down喇！不過我知佢聽到呢個消息會好開心，因為佢應該好擔心我隨時大出血，而家入埋院重可以check埋心臟驗埋血，悠悠閒咁等生幾好！係，係安全d嘅，但唔係佢想像中咁渡假feel呢！無得上網，肯定瞓得唔好，重要食千八卡，無得偷食喇！醫院只有奶，無原味無糖yogurt可以replace我飲唔到嘅奶，點算？！唔食yogurt唔飲奶會抽筋架！小b衫仔又未洗，奶樽、床單、床圍都未買，好似好多野都未ready咁！我又唔鍾意指意人，真係放心唔落！
2009年7月27日 星期一
私家覆診
今日又係私家覆診，今日係睇巫醫生，雖然佢貴d，我比較鍾意睇佢，因為佢細心d同真係好有耐性，好慶幸果時張醫生無得照結構，如果唔係我都唔會遇到巫醫生，睇完佢，我會安心d！
老公今日無攞假，因為約左一點鐘，咁佢就偷偷哋早少少出黎陪我一齊見小b喇！上到醫生度登記都氣來氣喘，都係行左一小段路，真係唔知點解！首先係磅重，同啱啱十三號响贊育磅都只係重一磅，但同對上一次睇巫醫生（六月廿二日）就無重過，都唔奇怪嘅！去完驗vivi就量血壓，正常，心跳就137，都真係好快！不過通常姑娘都唔睇心跳，所以無講d咩！
坐左都半個鐘，到我喇！一坐低，巫醫生話我無重過，估唔到佢有留意，我話我跟dietian食野之後輕過，而家叫做重番之前輕左果d，巫醫生都無再講咩，因為食千八卡餐，正常都唔會重得去邊，唔再輕落去都算好，哈哈，可能我成日都偷食，所以都重番少少啦！之後同巫醫生講我抖唔到氣，佢話如果唔係瞓覺抖唔到氣而醒，基本上唔擔心，因為小b越來越大，係會頂住橫隔膜喎！盡量坐或企直個人會好d，我又唔多覺好d，不過都係果句，無計！而家咩野唔舒服都係正常嘅！
巫醫生好快就話睇小b先，都好，好耐無見喇！一照就見到佢個頭仔轉左落去，啱啱响胎盤上面，怪唔得咁聚啦！巫醫生好快就話小b好多頭髮，我哋就唔識睇，猛話係咩係咩？我就更加心花怒放啦，之前成日想小b多d頭髮同黑d，聽人講食芝麻糊好，但市面上果d都有好多糖我都唔敢食，後尾終於買左盒諗住一次半次唔怕啦，最終驚驚哋食左會早產又唔敢食，而家聽到話小b好多頭髮，你話唔開心就假，哈哈！巫醫生見我哋唔識睇，又教我哋睇，話d一條條豎出黎飄飄吓果d就係頭髮，佢咁講完我哋就見到，嘩，真係好多好得意，希望到時出世唔好貨不對辦就好喇！
又係睇吓小b嘅頭仔、肚仔同大脾骨咁，巫醫生話小b肚仔大左d，我即刻諗起關唔關妊娠糖尿嘅事，巫醫生話梗係關啦，我真係好驚，係咪因為我唔乖所以小b肚仔大左呢，巫醫生叫我唔使擔心，正常bb嘅各部份生長速度都會唔同，正負兩星期都叫正常，所以而家唔可以話肚仔大左就係因為妊娠糖尿嘅影響，因為都有可能係小b咁啱肚仔大得快左，點都好，我都係唔可以咁放縱自己先得！
巫醫生話小b有5磅半，都ok重，唔怪得我都成日要兜住個肚先行到啦！不過最近聽Ellen Law生完講起佢個b，之前一路睇醫生都係estimate佢個b足月出世會有7磅幾，最尾39週出世都只係早左一週，唔知點解出世得5磅10，比之前estimate差咁多，所以我都有d擔心，因為小b要開刀出世更加會早，無咩時間比佢追番d磅數，如果又係差咁多，唔知點算！老公傻吓傻吓走去問巫醫生個磅數會唔會差好遠，巫醫生有少少尷尬咁話佢自己estimate嘅通常都正負10%，我心諗，老公咁問人，人哋唔通答你係呀會唔準架，咁倒米？！巫醫生都好好，次次去親都儘量shift去4D睇小b，清楚d，今次見到小b都係咁上下，無開眼仔，巫醫生話咁嘅週數都重睇到小b好難得，因為可能會迫到遮哂，巫醫生笑小b鍾意影相，小b唔知係咪聽到，竟然偷笑，巫醫生捕捉到呢個畫面，真係好攪笑，好彩之前姑娘問要唔要DVD，我諗住小b大喇都睇唔到所以唔諗住嘥錢要，但老公堅持話要咋，如果唔係就無左呢個record喇！
由於好似就黎生得，我哋都問左好多問題，巫醫生都好有耐性答。最好笑係老公呢排叫我沖涼唔好沖咁耐，驚沖涼果時穿左水都唔知喎，佢問醫生穿水會唔會唔知，巫醫生都有講會知有水滲吓滲吓，不過佢重答得妙，佢話我個case係唔會穿水，因為我個胎盤已經block左個出口，唔會有水出到黎，又係喎，都無諗到會咁，都好，理少一樣先，即係我只要留意肚痛同出血就得喇！不過巫醫生問我有無俾醫生捉我住院等生，我話未覆診重未知。其實我睇forum都知胎盤前置去到三十幾週會俾醫生捉入醫院住等生，因為驚無啦啦大出血，趕唔切入醫院，大人同bb都危險，不過間間醫院都有唔同policy，我見贊育無咩點提，我又無理，諗住免疫。俾巫醫生一講，老公又狂問，巫醫生就話政府醫生通常唔敢take risk，所以都會好緊張要你入院，我聽到都驚三十一號覆診嘅時候俾人捉去瑪麗，坐監喎，好悶架！不過我都知咁樣應該係最安全！巫醫生見老公咁緊張驚政府唔叫我入院，重話我可以自己提出擔心出血要求早d入院等生，唉！咁咪即係自投羅網？！都唔知點好，入去安全d但又悶到死，一定又瞓得唔好，千八卡又走唔甩，無得偷食，無得上網，唉！
最尾我問巫醫生寫幾日假俾我抖，一來係唔舒服啦，二來自己都驚會出血，咁佢知我三十一號會覆診，所以佢都寫左四日假俾我，啱啱駁到政府覆診果日，我諗唔會一覆診就要我即日入院咁快啩，如果真係入院，我可能都係返埋三十一號下午，咁就攪笑喇，得番一個下午做handover？！巫醫生話我都唔使book返黎覆診，下次見到我應該生左喎！連佢都覺得我會入醫院住？！
2009年7月26日 星期日
飯聚
今日同Ball仔，Gigi and Bonnie飯聚，好罕有地約左响星期日嘅lunch time，無法啦，四個人，時間係難就d，呢次真係應該係臨生前最後見面喇！我諗之後嘅日子我會太累，想出街都難喇！
去到Pokka Café坐低左，佢哋都未到，咪睇吓餐牌先囉，嘩，望落d野食好鬼吸引，最衰我妊娠糖尿啦，好多野都睇得唔食得，尤其是飯，食得果五匙，叫左都食得少少，嘥哂！反反覆覆咁睇個餐牌，我決定生完一定要黎刷一餐，以彌補我今日有得睇無得食之恨！哈哈！
佢三個終於都到，重要叫左果d我好想食嘅野，我？我最尾叫左肥牛烏冬，係失色d架喇，無計！大肚其間，我都見過佢三個，Ball仔同Gigi 應該係五、六月時見過，Bonnie就七月見兩次，之前個肚都未係好大，今次見面都差唔多三十五週，個肚大左好多，Ball仔竟然話唔認得我！我都唔係肥好多啫，真係俾佢激死！
今日都係輕輕鬆鬆坐吓，食吓野，傾吓偈咁，大肚婆係坐唔得耐，之後老公就接我走喇！再見到佢哋嘅時候都生左，唔知到時重可唔可以咁悠閒咁同佢哋食飯呢？
2009年7月24日 星期五
2009年7月22日 星期三
抖唔到氣
自從踏入三十三週，開始覺得辛苦左！好似Ellen Law所講，行一陣就會好累，企唔夠幾分鐘腳都軟，d血好似到唔到對腳，有時都痺痺哋咁，瞓覺左瞓又唔係右瞓又唔係，個肚重左好多咁，側邊面瞓都好聚好扯，次次轉身要好大動作好辛苦先轉到，如果瞓得臨唔曉轉身，半夜會痺醒或者重到醒左，平瞓條腰又會勁痛，真係好煩！今個禮拜開始踏入三十四週，開始時不時抖唔到氣，天氣熱都可能係原因之一，不過有時响公司好地地都會咁，都辛苦架！响公司成日坐，條腰又累又痛，行又行唔得多，企一陣又話無力，真係唔知可以點！有時都好想小b快d出世，但而家都係早左d，出世又唔係咁好，又有d唔捨得佢响我肚裡面郁黎郁去嘅感覺（雖然佢而家大力左好多，踢到我都好痛），心情好矛盾！
2009年7月17日 星期五
政府第二次超聲波
今日要返贊育照第二次超聲波，主要係睇個胎盤昇返未，我無咩期望，因為之前十號都响私家照左，都唔會一個禮拜就昇到無事啦！
約左兩點三，我俾埋錢上到去都兩點二，坐低等左一陣就叫我入去，都好準時！入到去個醫生都話只係睇胎盤同小b啱唔啱size，又問我有問睇私家，最近有無照過，私家點講，我咪又同佢講啱啱照過，胎盤前置第三期，咁佢開始照就照胎盤先，我唔識睇，不過我見個様同平時一様咁，無咩分別，即係無昇過啦！個醫生就自言自語咁唔知講咩，跟住有個老d嘅醫生入左黎，佢就同個老d果個講，遮哂喎！之後佢哋度小b嘅頭、肚同大脾骨，無同我講野，最尾只係話小b嘅size都ok，無喇！醫生叫我去一次vivi再返黎照，睇吓會唔會唔同左喎，不過去完個結果都係一様！
醫生就咁話我走得，我忍唔住問佢咁幾時知呢個超聲波報吿，佢又反問我係咪會返贊育定返健康院覆診，佢最後話俾我知，下次覆診我會知報告喎。其實我都知個結果啦，不過係想問吓佢幾時confirm我要開刀同幾時約開刀，不過我知問佢都答唔到我，又係會話佢係超聲波部，唔係產前檢查架啦！都唔係未試過！！！
唯有等三十一號覆診先睇吓幾時confirm啦！
2009年7月13日 星期一
大肚相
星期日去左影大肚相，之前成日都好驚胎盤前置會突然出血入院，咁就未必影到大肚相，擔心左一排，好彩都有驚無險到左呢日。而且之前爆嘅妊娠紋都唔係太嚴重，d褲頭都遮到，應該睇唔到，係條妊娠線越來越深色，唔記得揸d粉遮吓佢，不過算啦，都係一種紀念！
之前果晚同d莊友聚會，返到屋企瞓得覺都夜喇，第日十一點就要去到影樓，都驚咁早起身會面腫，好彩都無，係有d累！呢間studio係Ellen Law影過，效果唔錯，價錢又合理，所以都無咩點搵第二間就決定呢間喇！不過之前Ellen Law影嘅女攝影師走左，同我影果個會係男嘅！都無所謂啦！話唔定有d唔同style走出黎，都有d期待！
去到影樓都無人，原來佢哋咁準時，約十一點，佢哋都係十一點開門，我哋早左五分鐘去到都摸門釘。等左陣佢哋終於都到，化妝師好快就ready同我化妝，見佢化妝同平時有d唔同，可能係純粹影相啦，好似著重點遮面上嘅斑多d，用嘅化妝品都似杰d同舞台化妝feel咁，唔係咁smooth，同埋佢d掃掃我塊面都幾「吉」，是但啦，靚就得！booking時間係兩個鐘，但係化妝攪左一個鐘，我同老公都無唸過要化咁耐，佢唯有呆等！之前Ellen Law個化妝師有幫佢整假眼睫毛，不過我鍾意natural一d，所以都唸住叫佢唔使整，點知佢都無問我又無幫我整，咁咪不了了之囉！
攪掂個妝就影得，個攝影師問我哋想點影，我哋無咩idea，因為唸住都係咁上下嘅野，都無plan得咁仔細，咪話佢影樓影開果d都ok，摸肚果d都幾好，就係咁，佢好多張相都叫我摸肚或者係望住個肚，我都有d後悔！個攝影師把口就麻麻哋，個過程都比較靜，起碼佢唔會叫我哋笑多d，我同老公都對於影相好慢熱，真係需要d識攪氣氛嘅攝影師，奈何呢個唔係，可能人夾人啦！有d post都唔係好知d手腳點放好，佢又唔提我，要我覺得怪怪哋開口問佢，佢先教我！因為老公高，我又矮喎，所以有d相佢叫我著高跟鞋影，都幾驚架！因為佢張background paper舖到响地下，我一開始行埋去就“線”左一下，嚇死我！同埋佢d高跟鞋真係好高，就算唔係大肚果時，我都未著過咁高嘅鞋！不過我唸效果會好d，起碼我隻腳咁粗，著左高跟鞋應該會拉番瘦d，哈哈！整體黎講我覺得Ellen Law果輯相生動活潑d，我果d好似靜態d，希望佢影得我哋靚d，就算post麻麻哋都唔太緊要嘅！
不過都有d意外野，有套衫我係top著bikini，下身著牛仔裙，扣唔埋鈕架，不過真係想影牛仔裙，好似幾型咁，又咁啱屋企有條粗belt重可以圍到我條粓腰，又遮到我扣唔埋鈕，幾襯架，我都幾鐘意呢套衫，我換左出黎，個攝影師都話型，重唸到俾頂牛仔帽我戴住影，成個牛女look咁，最衰佢無d假鎗俾我做道具啦，如果唔係重型，哈哈！不過都係影左幾張，希望佢影得靚唔好cut左去啦！
臨尾可能個攝影師都覺得有d悶定係太行貨呢，佢suggest左一個好飄逸嘅post俾我，係我响佢嘅相簿同website無見過嘅，就係要搵條白紗圍住上身，下身就普普通通著條黑色短褲，踩住高跟鞋，响側面影埋黎，塊紗响我身後飄飄吓（係人手負責抛嘅），好似影緊廣告咁，都好特別！不過到影完哂之後我先發覺佢無幫我揸睫毛液囉！唔知有無影到close-up睇到呢d穿崩位呢？
d相要三十號先有得睇呀！好期待！
驗血結果
今日又要返贊育覆診，自從八號抽完血後，都無收過電話，我估計今日覆診都會有報告睇，唔使等足十日咁耐！
原本政府覆診我一定係星期五上午嘅，而今次覆診應該係十七號，不過因為十七號下午我要照超聲波，我唔想上午覆診，驚中間有段時間唔知做咩，食lunch又要行落斜路又行番上去咁辛苦，咪話十七號唔得，佢哋幫我約早d覆診，咁就變左今日喇，重要係下午，幾好，睇完可以早d返屋企！
今日去到贊育都有好多谷氣野！登記之後，姑娘就叫我坐埋一邊等量血壓磅重，但係果d指定嘅椅都已經full左，我見有個男人陪老婆坐，佢擺明聽到姑娘叫我坐低等叫名量血壓，又見我眼望望果d椅，佢都唔彈起身俾我坐，我唔係話大肚婆就大哂，一定要人讓，不過果排椅真係專俾大肚婆等磅重量血壓，我又唔係話d男人唔可以陪老婆，不過有需要嘅時候都要識做，唔好阻住！最激氣嘅係，當我行開左果排椅，响第二度坐低左之後，我見到頭先個男人同佢老婆一齊行左去第二度坐，佢哋原來唔係等磅重量血壓架，真係衰人黎架！
上次三號覆診，係跟餐食左一排，兩個禮拜瘦左磅半，今日返去，都只不過相差十日，我又重番兩磅，好驚呀！十日重兩磅唔係幾標準，而且如果我跟足營養餐食，suppose唔會重咁多咁快，可能我真係鬆懈左放肆左，日日都有d「一餐半餐無所謂啦」、「一次半次唔怕啦」嘅藉口，重有就係持住之前輕左就自己轉番杯凍檸茶走甜變成少甜，可能就係咁十日又暴重兩磅咁得人驚！
攪掂哂量血壓、磅重、驗vivi之後就係等見醫生。平時我朝早覆診都唔太多人，今日下午去就超多人，成個廰都係人，要搵位坐先得，重要坐低左都唔好周圍行，如果唔係都坐唔番個位。我一個人呆坐，無睇雜誌，坐吓坐吓先發現其實真係睇醫生嘅大肚婆又唔係多得咁緊要。咁多人坐响度係因為果d人係陪人坐嘅，有d係一家幾口黎哂，都唔緊要，但係d人就好鐘意响佢哋坐嘅椅隔離放吓雜誌呀、手袋呀，霸住哂d位。最衰嘅係呢d成班嘅人，坐親都坐成排椅嘅最開，淨番d最入嘅位，話明大肚婆，個肚咁大要經過哂果d人行到最入坐都唔係易，所以就係咁通常果行都會得一班人坐，無人會坐入去。之前講有兩公婆就係咁，女嘅坐開面第三個位，男就坐開面第二個位，最出個位係擺緊個男人嘅公事包同幾本贊育嘅雜誌，跟住成行椅就得佢兩個坐，好心啦，自己又唔係坐最出就讓番個位俾其他大肚婆坐啦，用黎擺公事包同雜誌，見到人哋咁辛苦「攝」到咁入先有位坐都無動於衷，雜誌唔睇又唔擺番好佢，都唔係男人黎架！佢老婆都係大肚婆，都唔出句聲話吓自己老公，呢d人真係好自私囉！
等左個幾鐘終於都到我，入到去個醫生又係後生嘅，想望吓佢個名牌係咪實習醫生，反轉左睇唔到，咁都又係按肚聽心跳，無咩特別。坐番落黎見佢猛咁check住個生長graph，唔知做咩，又唔同我講野，咁點呀？！係咪有問題呀？問我最近有無照過小b，有無睇過私家醫生，點講，咁我又要講番俾佢知，黎黎去去都係胎盤低，第三期，要開刀，等緊十七號返黎照，講過N咁多次！我問佢照完幾時知開刀嘅野，佢又九唔搭八咁，重話點都要等十七號照左先知，我夠知啦，我問緊係幾時，係十七號會即刻知定係之後嘅例行覆診先知，佢又話無咁快，要三十幾週至知，大佬呀，十七號我都三十三週幾，例行檢查兩星期一次，到時都三十五週，咁又話無咁快，即係幾時呀？唔係三十七週先同我講三十八週先開刀麻？問完個醫生都無咩結果，真係嘥氣！佢跟住同我講我嘅驗血報告pass左，隱約都見個report寫住5、6咁嘅數字，咪問佢我嘅血糖度數幾多，佢望吓個report就話總之我係pass，好難同我講幾多度喎！又一次，嘥氣！無咩唔舒服，又叫我岀去等約下次嘅期！
通常等約下次嘅期好快，今日我等左超耐，三點十睇完醫生，四點幾都未叫我，眼見其他人遲過我見醫生都約好哂走哂，我滿腔怒氣，唸緊係咪頭先個醫生無將我個牌板傳出來約期，等左半個鐘，忍唔住走去reception問吓點解咁耐，其他人都走左我都未得，個receptionist問左我叫咩名，又無做過d咩，好快咁話，你個牌板未見喎，我話見完醫生好耐，人哋遲過我都走左，佢望都唔望我，又無話同我check係咪miss左我個牌板，就話係咁耐架，個牌板要pass俾高級醫生睇完先會出返黎！SHIT！！！我心唸咁點解人哋又快過我？佢哋嘅牌板唔使俾高級醫生睇咩？點解我成個人棟响度個高級醫生唔黎睇我而去睇我個牌板呀？真係多鬼餘！等左咁耐你唔可以睇吓係咪真係miss左咩？check都唔幫我check吓就咁答我，慿咩咁肯定呀？當然，呢d全部係我心唸，無講出口啦！咁咪又等囉！
足足等左九個字先叫我，個receptionist一黎就叫我簽名，應該係簽收番本覆診書仔，好奇怪，咩唔係三十六週先俾番我跟身咩？我無理啦，簽咪簽囉！跟手佢包左本書仔同下次覆診張slip一次過俾我，我一望個期係廿七號下午，即係今日計兩個禮拜後，果日我book左睇私家，我話我唔得，可唔可以改期？個死八公即刻黑面，重大我話一改就唔可以兩個禮拜，要三個禮拜先返黎，我真係無所謂，反正我會响私家keep check住，黎政府都係因為要去政府醫院生先會黎，如果唔係貪佢等得耐咩？咁我咪問三個禮拜後即幾多號，點知佢話八月三號，果日我都要返私家，我咪同佢講可唔可以唔係約星期一而約番星期五，因為我本身分組都係星期五上午組，個死八公就話咁點解我今次係星期一嘅，我話上次約我十七號唔得，姑娘幫我約架，咁個死八公就話其實我哋唔suppose約期改黎改去，佢個様同把聲係勁寸，呢個時候我都忍唔住話我自己都係改左呢一次，我無改黎改去，嬲得我呀！我本身係星期五上午組，都係改左呢一次，重要係d姑娘幫我改去星期一，唔係我自己要求，我之前都係唸住順延一個禮拜，但個姑娘話唔想我遲返黎覆診，寧願早返，所以先會去左星期一，呢個死八公，佢醒少少嘅話佢係一定知我係星期五上午組，佢又唔check吓，一約期就幫我跟番星期一，都唔睇吓我張覆診卡，我一話改就話要三個禮拜，都唔會幫我調返星期五，等我唔使咁遲返黎，都算，我提議話去返星期五又寸我，真係咩態度呀？我都有交税架，我都有我嘅權利，而家係咪你俾個期我，我就一定要得呀？！傻傻哋！佢最尾幫我book左三十一號返黎，有電話响佢又接電話唔理我，我呆等佢俾番本書仔我，佢又寸寸貢咁話三十六週先俾番我架喎，走得架喇！我咪無啦啦硬食一野咪走去厠所，出返黎醒起佢之前叫我簽名係簽收本書仔，咪走去話佢好叫我簽名，佢咪好似無你咁好氣攞返我個file出黎，望一望，跟住當住我面劃左我個簽名囉！
攪掂哂都成四點九，個時間就尷尬d！唸住都未夠五點，d人未放工，咁咪唸住行落去西隧口前一個站搭車，費時搭叮叮返轉頭搭車。點知，排第一，上到車都無位坐，無人讓位俾我，要企足八、九個字先返到入屯門，甘到爆！好彩無抽筋同埋有塊玻璃「挨」吓咋！
2009年7月11日 星期六
林Nut生日
今日係林Nut生日，莊友約左去寶寶新屋慶祝，之前重話BBQ，嘩！成三十四、五度，就咁坐响度都熱死啦，點燒野食？！好彩佢哋都話熱，轉左打邊爐，咁都無咁驚！不過又衰喎，無啦啦打風，三號風球，要去天后咁遠，都麻麻哋想去，因為上次八號風球去飲，老公揸車黎接我，成程都好驚險咁，果次之後都覺得打風揸車幾危險，不過見打八號風球都唔大機會，夠鐘出門又無風無雨，都係見吓班莊友啦！呢次都好可能係我生之前嘅同佢哋嘅最後一次見面（都係懷孕期裡面嘅第一次）！
老公平時都唔會同我出席我嘅朋友聚會，今次佢肯同我一齊去，唔知係咪第一次呢？真係好難得！去到寶寶屋企，都好雅致，幾舒服！大肚婆都係等食，唔使幫手！哈哈！因為妊娠糖尿病，我都唔係好敢太放肆，但因為已經抽過血，我都比平時可以食嘅份量食多左，唔係嘅話，有得睇無得食都好down！
好耐都無見d莊友，個個都無咩點變咁，係呀茵瘦左好多，差唔多返番去住hall時代咁，個個都忍唔住問佢响邊減肥，我就一早都問左佢有關資料，唸住第日我生完瘦唔番都去吓！當然我希望可以自然瘦番啦！唔知去飲呀茵果餐我瘦番未呢？
成班人講吓講吓，又講番寶寶無囇番d畢業相俾我哋，佢竟然夠膽搵本相簿出黎俾我哋睇，證明唔係佢唔知擺左去邊而唔曬，而係「懶」得曬番俾我哋，衰人！佢重攞左當年我哋去韓國旅行嘅相出黎，真係令人懷念喇！我講起當年呀茵叫我同Anna過佢哋房，四個女仔一齊瞓，結果係我同Anna瞓地下，佢同呀儀就舒舒服服瞓床，攪到我瞓唔著自己一個人返房瞓驚左一晚嘅經歷，呀茵死都唔信佢做過d咁嘅野，抝左一大餐，好好笑！我係受害者，又點會記錯喎，重要果晚一個人响間咁大間嘅房瞓，震左一晚，實在太深刻喇！
唔覺唔覺都坐到成十一點幾，都好累，我都係走先，下次見面小b都應該出左世喇！呀Ming話佢會黎玩小b，我即刻話唔俾佢玩，抱就得！哈哈！
2009年7月10日 星期五
充實的一天
今日要去私家覆診，距離上次睇私家都只係隔左兩個禮拜多d，睇得咁密都係因為想睇吓跟餐食左一輪之後小b有無影響左，當然都睇吓胎盤嘅情形啦！巫醫生放假，我去返睇開嘅張醫生，又平d，一開二架！黎緊都要開始隔兩個禮拜同一個禮拜覆診，下下睇巫醫生好貴，所以都應該去返張醫生度算喇！
今日係我老豆生日，今晚都約左成家人食飯。出發去食早餐嘅時候打俾媽咪，原來佢同老豆响附近行街，小馬哥早幾日返左香港，俾佢哋捉左出黎買野，我一聽到就好心急想見吓佢，雖然我哋都趕時間去覆診，但都火速咁食完去搵佢哋！見到小馬哥，佢都無咩點變，媽咪之前話佢高左，我唔覺囉！似瘦左多d！不過最唔同嘅係佢而家唔出聲，同佢講野都無咩反應，係生保左定唔慣？我唔知道！定還是見番我哋令佢唸番起d唔開心嘅回憶？見到佢咁真係好心痛！因為我哋好趕住去睇醫生，都唔夠時間同小馬哥去買玩具氹吓佢，我哋就話睇完醫生再趕返黎揍佢行街買玩具，雖然小馬哥由頭到尾無講咩，但我見到佢臨走都眼定定望住我哋，唔知係唔捨得定係重好奇緊我哋係咩水？！
衝左去張醫生度，坐左陣開始量血壓，通常都無咩問題嘅，反而係心跳我會在意d，抖左十五分鐘量都有一百一十幾吓，雖然好似好快咁，我都慣左係咁，醫生從來都無提及呢d係問題，even我以前都成日覺得係問題而不斷睇醫生，到而家我真係化左，唔提就係ok啦！姑娘話快，抖多陣要量多一次，不過喺未量多次之前已經到我入醫生房喇！都係講番醫生知我有妊娠糖尿病，我問佢9.9算唔算高，佢話都高，不過當問佢嚴唔嚴重嘅時候，佢又話9.9未算真正嘅糖尿病，11度就叫真正嘅糖尿病喎！我好想問真正嘅糖尿病定係真正嘅妊娠糖尿病？不過都無關係啦，真正嘅糖尿病定真正嘅妊娠糖尿病都要跟餐食野，嚴唔嚴重都係要睇番跟餐食野之後嘅驗血報告先知！之後我哋即係睇吓小b嘅情況。張醫生話小b無野，而家三十二週有四磅六安士，嘩！原來有成四磅幾，怪唔得咁重啦！之後張醫生話我胎盤低左d，我見佢咁講，以為有d曙光，事關佢都講到好mild咁，我咪即刻問佢係咪昇左，而家第幾期，點知佢睇完一輪又講話都幾低，第二至三期，我都係第一次聽到係第二期呢個term，都重以為係好左，不過講多幾講，佢先話我真係低，第三期，遮左子宮頸，都叫嚴重，好大機會要開刀，不過都重有機會昇，三十四週前都有機會再昇喎！可能我好耐無睇張醫生啦，要我remind佢我而家三十二週，得番兩個禮拜都有機會咩？佢先話都好難昇得番，如果唔係佢成日都笑笑口有禮貌，真係俾佢激死左，由開頭講到咁輕描淡寫，俾左d希望我，到最尾俾我問多兩問，提多兩提，先至講到個我一早已經知嘅實情，同巫醫生一早好firm咁同我講“開梗刀”“昇唔到”嘅語調真係兩回事，都唔知係佢無咁細心定係佢怕我太擔心所以無咩點講？！Anyway，我都預左開刀架喇！而家係等下個禮拜贊育果次超聲波confirm埋就應該要決定幾時開刀喇！張醫生叫我食多d野，可能見我橫掂都開刀，食肥d小b啩！我咪話我跟緊醫院營養餐，唔好話食多d，食飽d都有難度！張醫生都話我個case無得攪，唯有聽話食餐先啦！
睇完小b返位坐，張醫生話我心跳快左d，我話係呀，有時坐响度都覺上氣唔接下氣，講野都唔係好夠氣，唔想講野咁！佢問我有無食鐡丸，我話無，佢再問我有無食vitamin，我都好尷尬話無，都唔敢望老公嘅表情！張醫生話我應該有少少貧血喎，要開鐡丸俾我，重叫我唔好唔食vitamin，唉！真係想偷雞都唔得！
睇完醫生就即返屯門，帶埋老豆媽咪小馬哥出尖沙咀行街街，都未試過，哈哈！媽咪對眼唔好，成日都只可以去d佢熟悉嘅地方，一話去陌生地方佢又唔去，但又成日聽我哋去邊去邊又好羡慕咁！我有左之後有一次陪佢去市中心行，我扶住佢，點知有幾級樓梯仔，我remind左佢，但因為有沙，佢“線”親，我拉住佢先無跌到，不過大家都好驚，自此之後我話帶佢去mega box，人少少都安全，佢都唔肯去，話驚整到我喎！今次有老豆一齊，同埋想氹小馬哥，佢先肯去咋，所以今次都可能會係最後一次咁出街lur！媽咪重話係第一次去尖沙咀，老豆就抗議話後生果時都有同佢去過，係佢唔認得喎！我都話我記得屋企有相為證！
小馬哥去到玩具反斗城都唔係好似其他小朋友咁興奮，望吓望吓，見到佢咁都好心酸，更加想買d野氹到佢開心！佢以前响香港嘅時候就好黏老公，頭先去接佢哋嘅時候，我見到小馬哥一個箭步衝左去車頭同老公坐，重要見佢耐唔時望住老公揸車，微微咀笑咁！所以我係咁叫老公陪佢行同選玩具，小馬哥都好似ok受落，都有少少笑容，雖然都無開口講野！
行完街我哋就返入屯門食飯，好塞車，老公放低我哋自己去泊車，我哋都係行兩步就到酒樓，我睇住小馬哥，老豆就扶住媽咪，點知無啦啦聽到媽咪慘叫，原來佢扭親腳，老豆有扶佢，唔知係咪無remind佢有一級樓梯，所以媽咪差錯腳，唉！出左成日街，返到屋企樓下先扭到，最衰係我唔方便，如果係我扶住就好d，始終男人都無咁細心！媽咪扭親之後都好彩重行到，佢先話我知上次“線”親之後佢睇左兩次跌打，我都唔知原來咁嚴重，我見佢無咩野咁，佢重自己行左去買餸，原來佢要睇跌打，怪唔得佢之後都唔肯同我出街啦！見到佢咁，自己都唔係好安樂，不過我又可以做得d咩呢？！佢嘅眼病係遺傳嘅，重要係一般傳男不傳女，細個佢都有帶我哋去check，無咩事，但係之前表哥check到眼有事，攪到我都好擔心，原本以為細個無就無，而家表哥咁大個人先發病，重要佢係男人，應該傳唔到佢，世事嘅野真係好難講，小b出世之後我都要去check吓先得！
今日真係好累！
2009年7月9日 星期四
Neal's Yard Remedies & Base Formula
最近上網睇吓Neal’s Yard Remedies嘅野，無意中發現呢個牌子多左少少人識喇！之前去日本買呢隻product嘅時候都search過吓有無人有comment，都好少，有都係响外國嘅多。用過佢哋嘅產品，真係幾好，尤其鍾意佢嘅玫瑰花水嘅味道，不過呢隻牌子係英國產品，只有英國、美國同日本有售，用完之後上網睇，原來可以上網訂再送黎香港，不過運費就超貴，45鎊喎！一路都唔捨得去訂！耐唔時上網睇吓有無人講佢，睇吓官網有咩新offer咁！誤打誤撞見到有個女仔原來都用佢，重mention代購嘅野，好開心，終於有人識佢講佢！個女仔都好鍾意扮靚，個blog有佢嘅skincare分享，其中介紹左Base Formula嘅Aloe Vera & Seaweed Gel同Rose Otto花水，厚厚搽上aloe gel當mask，可以响mask前用NYR嘅Orange Oil或Rose Oil按摩左先，又或者直接溝入個gel度當mask，再用花水浸濕mask paper舖上gel上，令個gel唔好咁快乾之餘，花水都有保濕滋潤嘅功效。睇完佢呢個方法，好吸引，講到個aloe gel好百搭，好保濕，而且我都重有NYR嘅Rose Oil，我不嬲對花水都幾鍾情，因為夠natural同爽，唔同市面嘅toner搽完上面都有少少笠咁！上官網check過Base Formula嘅野唔太貴，係運費貴d，不過計埋之後同响yahoo seller買都係差唔多咁，緊係响官網訂好d啦！一個禮拜左右收到貨，我同事重快，星期尾訂，星期一定二同我講收到，重早過我呀！我無sell佢訂，佢自己睇完都話吸引所以自己走去訂，估唔到突然間我哋多左個discuss嘅話題！大家試用完都異口同聲覺得正呀！呢隻aloe gel有seaweed或者rose，我哋買左seaweed嘅500ml（已經係最少嘅packing），rose嘅15ml sample，同事覺得rose果隻勁d，我就覺得兩隻差唔多，但rose就會貴一倍，下次再訂都會訂seaweed，鍾意嘅時候可以加自己嘅精油，好似flexible d！Rose Otto花水嘅味就一般，我都係念念不忘NYR嘅Rose花水多d！不過用呢個mask真係會用幾多花水，咁Base Formula就平d，NYR就貴好多，咁用真係嘥，等我再發掘吓有無d平又好聞嘅rose water去做呢個mask先！
最開心嘅係同事有個auntie响英國返黎，同事搭佢買NYR嘅野，下個禮拜有得攞喇！雖然搭人買野唔買得多，起碼都可以試吓佢哋嘅新野，重唔使俾運費，好抵呀！不過如果用完又好用嘅話，又係一個問題喇！唔係時時都有人去英國麻！
妊娠紋
三個月嘅時候就買左雅兒嘅有機肚紋膏，不過搽完痕痕哋，所以又走去Body Shop買左枝Olive Oil Mist，感覺質地薄d，無咁笠。不過我都係懶，唔係成日搽，又成日營住枝野唔係specially for妊娠紋咁，所以都唔太上心用。之後又走去買多枝第二隻牌子嘅肚紋膏，Mustela，感覺pro d，不過都係三分鐘熱度，可能都係cream，搽完有d笠，都唔爽嘅，唔太鐘意，久而久之，無咩點搽肚，又好彩無出紋，所以更加無動力去搽！直到之前Ellen Law影大肚相前一日响屋企試衫，見到個肚底爆左紋，再睇埋佢嘅相，見到真係有紋，啡啡哋細細“達”咁，我先開始知驚，因為我知佢一開始就好勤力搽cream，佢咁勤力都爆成咁，我咁懶，點算好呀？
就係因為驚，我都有搽番cream或oil，不過人懶無藥醫，都係一時時搽。呢排我好興上網訂d天然或者有機嘅護膚品，所以都有留意吓搽咩好。原來Rosehip Oil對妊娠紋係幾有效喎，加上之前上過DIY香薰護膚品嘅堂，知道橙花油可以幫到去妊娠紋，所以都心郁郁去訂呢d材料返黎溝。又好彩上網都搵到條formula係去妊娠紋嘅，所以上個禮拜响英國訂左d材料返黎，當然唔少得訂埋花水試吓，用盡d運費！不過呢間野都係第一次訂，唔知要等幾耐，我唸兩個禮拜點都到嘅！
大肚牛仔褲係象筋頭可以放大，但我去到成三十週嘅時侯就已經放盡左d象筋，d褲係重啱，只係大脾位有d緊，我唔鐘意箍住，尤其是個肚位，所以我索性著裙，無拘無束，好舒服！尋日入院食餐，唸住响醫院hea成日會幾凍，所以本身已經停著大肚牛仔褲轉著連身裙嘅我，都係著番條牛仔褲，費時著裙會凍。可能尋日著左條牛仔褲成日又坐左咁耐，我又好衰唔衰著左條有假褲頭嘅牛仔褲去（即有牛仔褲嘅耳仔同鈕），坐得耐都頂頂哋，返到屋企除褲照鏡時見到肚臍對落有兩條紅痕，個位置同長短就好似牛仔褲嘅耳仔咁，好驚係爆紋！不過唸住係著褲嘅痕，所以都係睇吓瞓醒覺重有無。今朝起身第一時間睇，重响度，不過好似無尋晚咁紅，因為响肚底嘅關係，睇得唔清楚，我搵左塊鏡放响肚底照，一照就晴天霹靂，果兩條真係妊娠紋！我响鏡見到條紋係銀白色有少少反光，周邊就紅紅哋，我未見過妊娠紋係點，不過我好肯定呢兩條一定係！好down囉！唔知呢兩條蛇仔會唔會越爆越長，定係會越黎越多蛇仔呢？
唔知我嘅橙花油幾時到呢？
2009年7月8日 星期三
抽血
自從覆診嘅時候磅過輕左之後，有意無意我食野都鬆懈左，最明顯嘅係原本飲嘅凍檸茶走甜又變番凍檸茶少甜，飯都不自覺食多少少，不過因為今日要入院食餐驗血，都只係鬆懈少少，唔敢太放肆。
話就話入院一日唔使過夜，我有d疑惑，究竟一日咁長响醫院，有無床俾我hea吓抖吓嘅呢？望落贊育都唔係好大，有無床架？！不過如果無，成日咁長點過呀？！我都好擔心呢個問題，不過老公就覺得會有，重話我入去渡假，好似講到我去歎世界咁！唸住有床瞓吓，所以都帶左把梳去；又怕悶，所以又帶左兩本書去。點知去到贊育登記，姑娘講一次流程，佢話呢度無床！嘩！成廿幾人响間唔係好大嘅房度，無床，點過一日呀！之後姑娘話我哋可以周圍行，不過要响指定時間返黎食餐同抽血，我心唸食完餐都要兩個鐘後準時抽血，近又無咩行，唔通行落斜路下面海味街咩？遠又去唔得邊度！重要我揹左兩本書，咁重，行都行唔郁啦！超後悔！抽左血無咩做，d媽咪有d有人陪，有d就睇雜誌，有d走左，無人傾偈架！晨咁早出左黎，好眼瞓，唔想睇書，果度接收唔好，好難講電話，所以我咪坐响度瞓覺！唉！都唔知點過好！
好辛苦等到lunch，食物比想像中好食，係可以入口而有d味嘅！份量出奇地比營養師俾嘅多，都飽喎！食完lunch後更多人走，我唸起條斜路都走唔郁，但係坐响度好悶，都係忍唔住出左去，曬吓太陽去搵機禁錢都好啦！最多行半條斜路仔，都應該ok嘅！哇！點知出面好鬼熱，行唔夠五分鐘就出哂汗，都好易搵到提款機，見到有間萬寧同實惠，走左入去過冷河。無咩好睇，都係返贊育等抽血啦！行番條斜路仔上去，甘到痺！行吓停吓先得！
兩點鐘抽血，三點半下午茶，我決定唔留响度，一抽完血攞包下午茶餅仔就走，生果攞唔到咪最多出去搵個果盒食吓！應該有嘅！一出贊育就搭的士，因為得三個鐘就要食晚飯，唔可以太遲返，所以都只係有大概兩個幾鐘來回兼行街，近近哋去中環囉！行左去馬莎，原來做緊sale，不過我都就生，唔會再買衫，反而隻腳就越來越肥咁，以前嘅鞋都唔啱著，想買鞋多d！見到有d拖鞋幾靚，不過鬼佬size，最細果對都大，算啦，拖鞋好難著返工嘅！睇吓睇吓，又見到一對金色平底鞋，個款普普通通，不過半價百二蚊，心唸第日隻腳細番唔啱著都唔肉痛啦！不過全部都大size，我唔啱，有一對細size，但又細左d，著左成隻豬蹄咁，無收獲！去睇吓童裝有無野啱小b先！有部份都有sale，見到有條牛仔褲仔，九十幾蚊，冬天著幾好，之前買左d冬天衫仔，都無買下身野，啱啦！牛仔褲襯到，二話不説就要左，好開心呀！小b你開唔開心呀？！哈哈！跟住睇左好耐都無咩啱，因為new born嘅衫仔好多喇，而家多數都係睇吓冬天野多，最後俾我見到件長袖T-shirt，巴士圖案，個轆係兩粒鈕，好得意，用黎襯返之前買嘅抓毛jacket仔咪啱囉！嘻嘻！小b又有收獲喇！
行完馬莎，想去H&M，不過唔知响邊，傻吓傻吓去左Landmark，咁多名店，都唔啱睇，見有Three Sixty，都夠鐘食下午茶，睇吓有無生果食先，點知一個個嘅生果就有，切好嘅果盒又唔覺，好無奈地走左！行番轉頭，見有Mcdonald，又唔多覺有沙律咁，唉！好肚餓，又無理由攞包餅仔出黎食咁核突，食街外野又驚抽血唔pass，都係忍吓啦！
終於都見到H&M，真係好，起碼可以行多陣，如果唔係中環其實無咩好行！話就話我好快生，所以都唔會買衫，不過女人買野通常都唔使理由嘅，要買嘅就會搵到千百個理由去support，哈哈！之前見過有條牛仔裙做特價好抵，而家著唔到，生左可能都無咁快著得番之前嘅裙呀褲呀，平平哋買條大少少碼嘅，生完無得出街都有新野著吓麻！唔係就要著返大肚牛仔褲，超悶！今個禮拜日會去影大肚相，之前都買左bikini架喇，唸吓唸吓，成套bikini又太sexy咁，想買番條短褲仔同短裙仔代替bikini嘅三角褲，搵左好耐，好彩俾我搵到，不過好多人呀，我都懶得試！一路睇都好多抵野，不過而家真係尷尬時期，生完都唔知幾肥（定瘦？），而家買定都唔知啱唔啱，反正我其實都買左唔少衫，全部都唔係專for大肚嘅，係大件d，生完點都有d啱著啩？！攻上最頂層，又係睇小b衫，都無咩啱，有嘅之前响尖沙咀果間都買左，所以都只係買多左件外套仔替換吓咁！今日雖然好似買左好多野咁，但我都係專攻特價野，所以都唔係使左好多錢！
今日食餐只有奶無yogurt，我驚驚哋抽筋，朝早都勉強自己飲左半盒奶，好過無，點知响H&M排隊俾錢時兩隻腳嘅腳趾一齊抽，好慘呀！不過都唔及上一次瞓瞓吓小腿抽筋咁痛，果次痛到我叫左出黎，嚇到老公以為我生得，勁攪笑！我一俾完錢就衝左出去截的士返贊育喇！再行我驚連小腿都抽埋就大件事喇！
返到贊育五點，五點九先食晚餐，好肚餓，終於可以攞包餅仔食吓，d媽咪好奇咁望吓我，哈哈，緊係啦，應該三點半食架，我五點，又就黎食飯先食喎！可能大家都呆左成日，佢哋都開始傾偈，我聽埋一份無咁悶！原來有d人得四個月都坐左响度，我以為大家坐得响度週數會差唔多，原來佢哋嘅媽咪都有糖尿病，所以佢哋唔似我哋咁成七個幾月先飲糖水test糖尿，佢哋一早就要做呢個test！咁佢哋慘d，我哋最多食餐食多兩個月都生啦，佢哋而家先四個月，要食半年喎，唸起都覺遙遙無期呀！大家講起有d下個月都生，然後當大家知道我係三十二週媽咪嘅時候，無不怪叫，因為我個肚望落唔大，隔離果個媽咪四個幾月都同我差唔多咁！成班媽咪要我企幾次身俾佢哋睇吓我個肚，都幾攪笑！不過其實我覺得個肚大唔大，某d情度睇你著咩衫，我發覺著one-piece裙，尤其是胸下開始束腰再散落去果d，個肚會睇落幾大，反而著d貼身tee就相對細d，好奇怪！
傾傾吓晚餐時間好快就到，無啦啦有人叫我個number，以為咩事，佢寧寧舎舍俾左個飯盒我，個個媽咪都望住我，點解我唔同嘅？唔．．．．我唸吓唸吓，應該係今朝佢問我有咩唔食，我話no chicken，所以今餐原本係食雞，我唔食就俾其他野我，又幾好喎！
食完飯六點，要等到八點抽血先走得，同d媽咪傾吓講吓，都唔太難過嘅，最好笑係好多媽咪都好似我咁以為有張床抖吓，我重以為得我一個咁天真添！八點鐘老公黎接我，終於可以返屋企，今日真係重累過返工呀！返到屋企，我忍唔到喇！開左包熱浪食，根本就停唔到，最尾好罪疚咁食淨半包塞左俾老公！
今日抽血嘅結果唔係即時知，又係話唔pass嘅十日內會收電話喎！
2009年7月3日 星期五
輕左！！！
上個月廿三號見完營養師後，開始跟餐單食野，真係好唔慣！五匙飯真係一陣就無，出街食嘅份量又好難預，因為要食無糖乳酪，成日都要去搵黎買，下午茶要食水果，之前一晚又要整定第日帶返工，一日六餐真係幾忙！食左十日，餐餐食完都無飽嘅感覺，重成日都覺得肚餓！真係無陰公！人哋大肚就大哂，鍾意食咩就食咩，女皇嘅待遇，我就慘喇，食都無得食，我都唔係“為食”果d人，都只係想有時食吓鍾意食嘅野，想有飽嘅感覺，咁都唔得？！最慘有時餓到手都震埋，全身無力，個menu都唔理人嘅感受嘅，人哋要返工，唔係食完就瞓，唔使點有energy都得架麻！
今日返贊育例行檢查，比起兩個禮拜前，輕左磅半，即係由有左到而家只係重左十四磅！入到醫生房，都無咩講，又係例牌按肚、度肚、聽心跳。本來唸住走得，姑娘又叫我等陣，有另一醫生會黎睇我，我都唔知點解又會有多個醫生要睇我，咩我有事咩？唔知係咪睇我胎盤前置嘅問題呢？最慘係我上半身平瞓左响度，但雙腳就只係好似人哋坐左响度咁，上下半身成九十度咁响度等，扯住個肚好辛苦。等等吓個醫生話我輕左，我真係忍唔住話梗係啦，俾你日日跟餐食，食到手都震埋，想唔輕都好難啦！佢就唔出聲，我又繼續等，終於有個醫生黎到，話佢叫呀Ben喎，奇奇怪怪，我都唔想知佢叫咩，只係想知等佢黎嘅目的。點知，佢都只係按肚同度肚就走左，咩都無講，SHIT！！！都唔知做咩架，要我瞓得咁辛苦等你黎都係做埋d無聊野，嘥時間！！！
訂閱：
文章 (Atom)