爬行比賽

原來想同Ambrose報爬行比賽都好難！之前有好幾個爬行比賽舉行，不過Ambrose又未識爬，到佢識爬嘅時候，又無爬行比賽。Ambrose已經十一個半月，先黎有一個爬行比賽，好彩佢重未識行，唔係真係爬爬吓企左起身都唔知點算！因為要就番同月份bb一齊爬，雖然我要求 八月一日 爬，但大會都派左 七月三十一日 俾我，我見呢個可能係Ambrose人生嘅唯一一次嘅爬行比賽，就算果日上完playgroup要趕過去都在所不計。

爬行比賽之前Ambrose要上playgroup，佢果朝九點起左身，之後搭車佢都無瞓過，上到playgroup其實佢隻眼都細哂，表現不在狀態。平時上playgroup Ambrose都好少喊，係有一次佢眼瞓豬重俾人抆頭髮喊左幾聲就停左，佢其實都幾enjoy上playgroup，我估！今堂playgroup佢又係眼瞓，加上玩彩虹布，我地唔俾佢爬開一定要佢玩，佢又喊幾聲，真係可想而知佢有幾累！我都好擔心佢上完堂趕過去愉景新城未必會瞓，因為表姐都响車度，佢一定唔願瞓！

好好彩，佢上車同表姐玩左一陣，佢就開始瞓著左，表姐都係，真係超級好彩！因為車程唔耐，兩個小朋友响中途先開始瞓，去到泊車嘅時候都係瞓左一陣。見未夠鐘報到，我地停左車之後由佢地瞓多一陣先，老公落車出去行吓，表姐幾乎係同一時間就醒左，只係等Ambrose而已。到差唔多夠鐘去報到嘅時候，只聽見Ambrose發開口夢，講左一句外星話，之後再半句，咁就醒左，笑死我！

一行人去報到。好快已經夠鐘入去standby熱身。因為只可用一樣野黎引bb，我攞左個殺手間，就係上鏈蟲蟲。呢條蟲一出，Ambrose一定會起動去追，係百發百中咁濟，只係亦有機會佢唔係追住條蟲，佢係會同條蟲相反方向速逃，咁就弊傢伙喇！不過因為我日日返去都會同佢一齊周屋爬，所以第二殺手間就係我自己喇，我一爬，佢一定會跟住追我，哈哈！熱身時間我攞左條蟲出黎，果然，Ambrose一見條蟲行，佢就起勢去追，真係超快，唔係講笑，連計分員都忍唔住話佢好快，我見佢無因為瞓得少而唔願郁，真係放心哂！不過為免佢爬得太攰到比賽會失準，我收左條蟲，然後俾佢自由發揮一下。

熱身一排司儀終於行出黎叫我地standby响指定地方，我抱起Ambrose去到起點，佢不斷掙扎要落地爬，我就不斷拑實佢唔俾佢落，果兩個司儀，唉，真係俾佢地激死，我好辛苦咁拑實Ambrose，佢地原來有成抽野要講，講極都唔完，我又要一手拑住Ambrose，一手又要準備同條蟲上鏈，上左鏈嘅蟲又要定住佢唔好郁，真係好難攪，我就不斷大叫講完未呀，雖然好無禮貌，唔知佢地聽唔聽到，不過我真係投降啦，再唔開始Ambrose可能扭落地落唔到發脾氣喊，到時一開始就坐左响度唔肯郁係咁喊真係好掃興架麻！

終於司儀話開始，我即掉條蟲落地。可能條蟲上左鏈定住左好耐都無放度，一放落地都唔多郁，Ambrose啱啱扭完一放佢响地條蟲又唔多郁佢又唔大反應。不過我係咁拍張地墊同震吓條蟲，唔使幾秒佢郁番，Ambrose都一如平時咁起動追，真係好快，簡直係一枝箭咁衝左出去。我自己無周圍望，不過都見到係Ambrose一馬當先去終點，而司儀都講緊七號仔（我地條賽道係七線）一馬當先差唔多到終點喇！點知Ambrose就响離終點差一步嘅地方停左落黎，望實响終點坐左响度嘅計分姐姐唔郁，真係俾佢笑死！因為前面已經有個計分姐姐坐响度，老公又响果度錄影緊，我唔可以帶頭爬住引Ambrose行埋果步，唯有掉左我部Iphone出黎引佢，不過佢都係無動於衷，只係自己望夠喇就爬多兩步過埋終點，時間係十七秒，不過已經 三甲 不入，只係排第五，唉！真係好失望，不過亦都好好笑！

我同呀仔講第時大個唔好成日掛住望女仔呀，同埋要望都要棟d質數高d先麻！

Dr Poon Playgroup – 第八堂

終於到最後一堂喇！因為今堂上完之後要趕去愉景新城參加爬行比賽，所以爹爹都係要掉假黎車我地趕兩場。九點鐘已經起左身，今次我決意要落樓下食早餐，所有野都ready好，但係就反而奶奶返黎之後拖慢哂出唔到門口，加上又要去接埋個姨甥女去睇比賽，結果又係攪到好趕咁出發，重要俾奶奶埋怨話早知買返上屋企食就唔使咁趕，真係諗起都嬲呀！原本我就唔使咁趕架，我夠想安安樂樂食餐早餐啦！

今日出奇暢順出到去，十一點已經去到，重好好彩有標位，我地坐左一陣落車入標再上Dr Poon度。今日最後一堂先最準時返學，同d同學仔响樓下電梯大堂相遇嘅感覺非常好！

今堂一開始都係講解父母用咩態度去湊子女，一路聽bb可以有一地書玩同睇，花左大概十分鐘時間去講，之後就Dr Poon就話今堂玩激d，佢攞左一張好大嘅彩虹布出黎，佢叫我地擺bb上去熱身先，佢話每次介紹一隻新遊戲俾bb都要循序漸進咁俾佢地熟習先。可能因為地墊已經係彩色，果塊彩虹布又係咁彩色，擺左响塊地墊上，叫bb坐埋上去，其實真係唔多起眼！我地唯有用彩虹布同Ambrose玩peekaboo，又捽塊布令佢有聲黎吸引Ambrose，不過佢都無咩興趣爬走左。佢走左去個櫃度扶住企，又fing又拍不知幾開心，我地捉番佢埋去佢又係咁爬走，重引埋個靚女同佢一齊去扶櫃，好攪笑！之後Dr Poon要我地幫手舉高塊彩虹布俾bb坐入去，成塊布就响頭頂，有bb好開心“岳”高頭係咁望，有bb坐左响度唔郁又無太大反應，有bb又不感興趣想爬走，Ambrose就係其一。Dr Poon教我地係咁揚塊彩虹布，有時會cover到bb個頭，有時又舉番高，全場只有一個bb好enjoy坐响中間好開心係咁望，其他果d就一黎已經唔肯埋去喊到淒涼豬咁，一係入左去無太大反應，一係就爬黎爬去見佢唔到咁！可能Ambrose太眼瞓，佢無平日咁自在，又呆哂咁，佢都唔係幾有興趣玩，成日爬去扶櫃，我地捉佢佢又走，Dr Poon話佢個樣有d崩緊好緊張咁，我唔知Ambrose係咪真係好緊張，定真係好眼瞓頂唔順所以無哂表情無哂興趣，真係唔知佢係邊樣！不過佢唔玩彩虹布我地都由佢喇，反正其他bb都唔係咁enjoy，我地由佢自由發揮！

玩彩虹布都玩左幾耐，之後就派左一塊盒蓋，上面貼左d唔同pattern嘅彩色膠紙，係俾bb用手搣番出黎，訓練手指仔嘅。不過Ambrose都做唔到，佢只係好著眼要食塊蓋，佢無incentive去搣番d貼紙出黎，我地唯有同佢搣左出黎之後貼响佢身上面，咁佢就識去搣喇，不過貼左响塊面果塊佢一直都無去搣，唔知佢知唔知有野响塊面度，唔通佢要見到果d至知，見唔到就唔知？！玩左一陣貼字Ambrose都依然無去搣盒蓋果d膠紙，真係唔明！之後我地將d貼紙痴上牆，等Ambrose爬過去再伸手去搣，呢個佢都肯做，不過如果貼得太高佢又會好易放棄，然後佢又會唔記得左d膠紙，一路扶住幅牆打橫行，俾佢笑死！

再之後就係之前幾堂都玩過嘅坐櫈仔，睇吓bb識唔識自己坐落去企番身，不過佢地嘅櫈仔係偏高，bb好難坐，呢個問題佢地都知，到而家都未買到矮d嘅櫈仔，所以我地都係抱Ambrose上去坐，然後佢坐一陣又會想企起身或仆前落地爬爬喇！其實我地屋企個地櫃係有一級，Ambrose好耐之前都已經識行埋去坐，同而家會成日行左上去落唔番黎，我諗佢係識自己坐架喇，只係有時唔啱高度做唔到無辦法啦！玩坐櫈仔嘅時侯Dr Poon都有提到potty training，佢話歲半可以開始訓練，而家都可以俾potty坐，等bb習慣坐，知道有potty呢樣野先。我重諗緊幾時potty training，如果真係歲半時訓練，到時又冬天，好難攪咁！同埋又唔知應該買個potty俾佢自己去坐好，定還是買小童廁所板，定時定侯抱佢上去坐好，potty training呢part都令我有d煩惱！

玩完坐櫈仔又係時候say goodbye喇！Ambrose今堂攞左佢人生第一張畢業證書，嘻嘻！同埋一定要寫低嘅係Ambrose好叻，一堂都無缺席過，上足哂，好抵錫！

智慧寶寶

星期五去完書展，親身睇過套普通話教材「智慧寶寶」，果時聽左幾張咭嘅發音，再問左價錢同有咩送就走左喇！返到去其實都無點同老公討論太多，買或唔買，好或唔好，好似又將佢擺埋左一邊咁！今朝早老公無啦啦話想買，我就話想咪買囉，又唔使睇碟，應該都可以安排到時間同個仔玩呢套教材嘅，何況我覺得呢套教材只係我地DWE分期嘅一期價錢，相比之下都係有限錢，又可以學吓我地唔識嘅普通話，真係唔貴。老公就話再問吓個sales會有咩送先再決定啦！我一直都唔為意，重覺得今次唔買，下次到bb展都有機會買，再唔係都有個sales電話，幾時想買都得，反正書展無平，都係一樣價，再唔係可能之後又會有d唔同嘅普通話教材更加好都未定，好似未係好急住買咁。點知晏晝老公打黎，佢話已經confirm左個sales我地落單，佢重要人送哂兩樣贈品俾我地先肯買，真係好利害！因為唔想再迫入去展館入面，而我返工地方都只係會展附近，老公要求個sales等我收工直接出黎我公司樓下簽單，就係咁簡單，我地終於買左套智慧寶寶普通話系列喇！

一星期之後先會送貨，到時就會有枝點讀筆玩，真係好期待！睇黎，真係要再執一執屋企至得喇，實在太多教材教具，要organise一下至得！

飛吻 ~ 俾

唔知道發生咩事，好突然，Ambrose識得飛吻同俾野人喇！其實之前都有教飛吻，不過唔係成日教，反而教打娃娃教得重多。Ambrose打娃娃一係就打左落個口度就痴住左然後唔會再拍係咁自己娃娃娃；一係就會一路拍住個口但唔會講娃娃娃，我地都當佢識架喇！之不過飛吻真係無點教，係無啦啦今日同佢講佢真係做到打一下個咀再飛隻手出黎，只係佢重唔識鍚果吓有“卜”一聲，都合格啦！經過我地試驗左幾次，發覺呢個動作絕對唔係巧合，佢真係識！

再有就係叫佢俾野你，佢真係會俾喎！之前如果佢瞓醒左佢重食奶咀嘅話，我地會同佢講瞓醒左唔要咀喇，佢會吐番出黎俾我地，呢個係佢唯一叫做有意識俾番我地嘅野，其他玩具，從來都無試過你叫佢俾佢會俾囉。呢兩日Ambrose突然又識左，佢揸住玩具，有時我地唔叫，佢都會伸直隻手出黎，然後我地去攞嘅時候，佢係會放手俾嘅。亦都試過開聲叫佢俾，佢真係聽到之後遞俾你，當然我地唔會响佢玩到興高彩烈嘅時候問佢攞啦，一定唔肯！再回想番呢排佢會無啦啦無揸住野，45度角伸直隻手出黎，成個希特拉咁，唔知佢做咩架，而家見佢俾野我地嘅動作，係同呢個動作一樣，先覺得佢識得俾野人唔係我睇得咁突然，可能佢之前果d舉動就係自己練習緊，係我地唔為意啫！

呢兩日真係多第一次呀！

Dr Poon Playgroup – 第七堂

呢個禮拜又係打過風，重黑雨埋，但係都好好彩到上playgroup嘅時候又出番太陽，重要係勁曬果隻！我地今次叫有少少進步，老公可以去到買腸粉燒賣上黎食埋早餐先出發。不過唔知點解，九點起身都只係可以食到少少野，執埋d野出得門口又已經係十點半！今日我地上完堂重要留响尖沙咀一排，等個網友下午上Dr Poon嘅時候攞之前我搭佢訂嘅帳篷隧道組合，因為時間都有少少吊腳，我地今日極需要一個標位，咁樣我地唔使揸住架車兩頭走，最多都係响附近hea住等。講都唔信，我地前一個禮拜已經好好彩有標位，今日我地都有得泊標位，真係好開心！

今日上堂都係遲左幾分鐘，上到去Auntie May已經講緊say no嘅問題，雖然話所有野都要正面教bb，但係有時都可以同佢say no，不過因為呢一part我重响度執緊野都無好好聽到佢講咩，都係等佢send番notes黎先再睇番至得！

一黎又係大動作，今次都幾激！兩個人打對面企，一個打橫抱住bb然後由心口碌佢落去再由對面果個接住又再碌番過對面，有d似玩波浪咁，不過係攬住bb！Ambrose開頭都好似有少少驚架，一來佢一向唔鍾意我地打橫抱佢好耐架喇，二來碌落去其實有少少離心，第一次佢未知係咁玩又會驚碌左落地咁，唔係好肯俾我地碌，不過碌多幾次就知好野，玩到笑哂！我地碌左一陣又係好累，停左睇吓其他人，重玩緊，哈哈！我地通常都係最快停果個！

之後Dr Poon攞左好多地墊出黎，叠住唔同高度俾bb爬或者行，Ambrose只係識爬，d地墊全部都係mickey，一開始佢已經發動摩打周圍爬。雖然Auntie May話由高爬向低係俾佢有平衡感同唔知咩野，不過我又覺得佢叠d墊高低差距唔太大，都係果 一兩 寸咁上下差距，唔太大分別，而Ambrose爬方面係好好，基本上果d墊實在太easy，佢平時响大人床有哂被有哂枕頭都爬到，呢d真係同响平地爬一樣咁無難度，我地就由佢自己發揮任佢爬，都無跟住去陪佢喇！

再之後Dr Poon派左一個扭蓋嘅水樽仔同一兜長通粉，見到都大概知係做咩啦。都係俾個樽bb睇吓佢識唔識扭開個樽，答案係梗係唔識啦！之後示範開俾bb睇，俾佢再試，都唔得，我放棄喇！呢個簡直係越級挑戰！之後教bb逐條長通粉放入個水樽仔度，訓練手眼協調。之但係Ambrose從來都唔會擺野，叫佢擺野入盒佢都唔會擺，重要撥亂佢掃林哂d野先安樂！今次都無突破，又係將兜長通粉摷哂出黎，倒哂出黎，叫佢擺入去個樽度佢又擺入個口度。Dr Poon話如果bb放入口可以教佢呢d粉係未煮熟，係唔食得，俾佢區分生同熟喎，不過Ambrose依然係食食食，我制止佢，佢都有少少發脾氣咁。Dr Poon離遠都見到Ambrose食通粉，佢都有出聲話唔食得，唉，呢個仔都唔知幾時先識唔好樣樣野放入口！其實如果對比番頭幾堂，Ambrose而家都叫食少左喇，起碼佢無食個樽同個兜先。無論我地點示範點教Ambrose，佢都唔擺野入樽，都算啦，佢重要我不斷執番d通粉入兜／樽，佢同我不斷又倒又撥又掃，務求要d粉走哂出黎至安落！再望吓其他bb，好多都幾定咁入緊樽，就算唔係都無bb食囉，係Ambrose呢方面發展得慢定係佢太有求知慾呢？唔食過唔知道過咩味係唔安樂？擺野同放野而家係佢最弱嘅一環，真係未見過佢做到，應該話未見過佢有動機去做，只係好熱衷摷哂d野出黎後走左去。有對父母都安慰我話之前佢仔仔都唔得，係屋企同佢成日玩最近先得喎。我唔係無同Ambrose玩，不過真係從來無成功過，我繼而問佢仔仔幾大，原來佢仔仔係一歲，唔知Ambrose一歲嘅時候，又會唔會有進步，可以擺／放到野呢？

今堂好似無咩做過野又到唱good bye song嘅時侯喇！下一堂會係最尾嘅一堂，之後就到九月尾開班嘅幼潛喇，今次好好彩抽到，重要係星期日嘅尖沙咀，咁可以確保老公可以車我地去，唔使擔心落雨酷熱天氣又要推住bb車又要攞奶粉袋重要老遠行過去，真係太好喇！不過都係十一點咁早就上堂囉！

2010年書展

好多年無去書展喇！我諗自從大學以黎都無去過。書，我鍾意睇，亦都鍾意買，不過當每次搬屋都要搬果一箱二箱書嘅時侯，我開始發現，原來d書只係睇完一次就會被放入書櫃，直到永遠！好少書我會得閒無事又攞番出黎再睇，記憶中只係大肚放病假嘅時候成日無所事事先會摷出黎睇吓！而隨住我年紀越黎越大，買嘅書又越黎越多，書櫃都迫滿左嘅時侯，我決定唔會再買書，盡量！！！

自從有Ambrose之後，屋企又多左d育兒雜誌同育兒書，加上Ambrose好多嘅日用品如棉花、濕紙巾、尿片等同埋一d已經唔啱著嘅衫仔，真係需要好多地方，佢嘅野已經進佔左原本屬於我嘅書櫃同爹爹嘅衣櫃，而我一路又幫Ambrose買同訂左唔少書同教材，因為未啱時候用，好多都只係放落床下底，令到原本已經好滿嘅床下底、書櫃、衣櫃真係塞無可再塞，爹爹不斷要倉庫翻先可以巧妙地收埋越黎越多嘅bb野！養一個小朋友真係唔簡單，Ambrose嘅日用品、書、衫、玩具真係多到三房嘅屋都嫌唔夠大，我覺得好需要一間雜物房！

話唔買書架！都無諗過要去書展架！不過老公話想去，見書展又响我公司隔離，星期五書展又開到午夜十二點，都係忍唔住要去一轉。唔諗果d迫爆嘅書櫃、衣櫃同床下底喇，攞早一個鐘頭放工出血去！！！

收工四點八左右，直接由地下行去會展，好近！見一邊斜路人頭湧湧排住上，我一早買左飛，見隊尾都唔知响邊，又無理由已經差唔多到門口都唔行去走回頭路搵隊尾排架，我就响另一條斜路上，人地係走先行果邊我就逆流而上，哈哈！結果，好好彩，無人制止我，我目標係童書，我一行左入去已經直接上三樓，五點鐘我已經企左响兒童館，好爽！

一個人沿住每條巷行，開頭都有少少悶，覺得d書平時書局都有，唔太特別，書局做折都係差唔多價錢，真係無謂要而家托番去！之前又見baby kindom有媽咪買左d書好吸引，我又見唔到有，所以我行得好小心，幾乎所有巷所有檔口都有望，要行到去場中近左面先開始有我心儀嘅書，我至開始覺得入黎係無錯架！最開心都係見到好多big book，立體書同pop up book，因為果d平時書店唔多又貴，我去到見到都睇左好耐，睇完左邊睇右邊再行番過左邊，不過到最後都無買到！唔係d書唔好，只係佢定哂一百蚊三本呀，一百八十蚊三本咁，好多時，唔同價錢嘅書我只係有 一兩 本啱，根本搵唔夠同一價錢嘅書黎買，好可惜！而big book係好吸引，不過真係好難諗可以放响屋企邊度至得，太大喇，書櫃又入唔到，最後都係放棄！

之後見有一間賣書嘅，都有少少文儀用品，有d木造好colourful嘅英文字母貼，之前响天地圖書見一個要十八蚊，要砌哂Ambrose個名真係好貴，唔捨得買。竟然响呢度又見番，重要四折，一個七個二，平好多！二話不說就開始執，超開心！

一路再行，終於見到心儀嘅磁石書，立體書，一本一本明碼實價，唔使左砌右砌幾多本，而老公又差唔多到，我就開始選定目標，買買買！

其實今次都唔係放左好多血，一來童書好多都係厚紙板書多，買左好幾本之後已經好重，抽住行好辛苦，二來可能平時我已經有買唔同嘅書同教材，我真係唔敢買太多，無地方擺，有排都未用得果d，即使又平又靚我都係留番出年先喇！

入書展其實都有個目標，好想親身試吓之前上網睇中東西圖書嘅Ipen，之前Ellen買左，我去佢屋企睇過，不過佢又未開枝Ipen，都唔係好知大概點樣。上次去DWE Playgroup見到新嘅Mickey點讀筆，見Ambrose好似幾鍾意，又覺得如果出街可以攞枝筆攞書仔或咭仔點住聽吓都唔錯，不過DWE果枝又太貴，所以好想睇吓東西枝筆，平平地買套starter kit，可以有song card同story card，再大少少買埋phonics kid，都唔錯丫，phonics kid可以用埋枝Ipen，所以如果點都要買phonics kid，枝Ipen真係一定要買！不過老公又覺得呢一套又係教英文，而佢唔鍾意story card同song card，又覺得再買教材應該買普通話，佢都有佢嘅道理嘅！我地都有睇到之前有朋友買左嘅一套普通話教材，之前買重係十送一，十一個家長share十套價錢，果個價重平過書展，雖然老公都好鍾意，又覺得套教材又有枝點讀筆又有字咭，絕對乎合我話攞出街嘅要求，又可以學多樣語言，最重要係呢套唔使睇碟，我地都應該schedule到時間同Ambrose玩呢套教材！不過我地唔想太衝動，都係諗吓先，無即時買喇！

行到成十一點，又累又餓d野又重，都係時侯走喇！今日出血係$649.4！！！

大聲講爸爸媽媽

今朝Ambrose响大人床顛黎顛去一排我地無人理佢，然後佢就成個背脊瞓左上我個枕頭上面，瞓响我同老公中間。我感覺到佢擰左個頭去老公果邊，之後聽到佢好清晰講爸爸，緊接係好清晰嘅媽媽，我即刻張開眼望Ambrose，佢竟然係望住我！老公係全程目睹呢個咁令人驚喜嘅過程，佢話Ambrose真係擰個頭同佢講爸爸再擰個頭同我講媽媽，真係好神奇呀！好可惜，呢d咁奇妙嘅情景黎得太突然，我地永遠都唔會知道幾時會發生而又夠時間攞部機出黎拍低！我要，我一定要寫低呢一件咁奇妙嘅事，如果唔係過多一兩年我諗我已經會唔記得左！

不過諗番轉頭，最神奇嘅係Ambrose唔係講我地平時叫開而佢又最早識發音嘅爹爹，亦唔係講我地平時叫開嘅媽咪！爸爸媽媽係我個幾兩個月之前做左中文字咭教佢然後一直到而家都重痴响個白板度俾佢日睇夜睇嘅字！唔通佢真係有聽到我教佢，只係到而家先識講番出黎？如果係真嘅，我真係要加倍努力，重拾製作字咭嘅動力，俾心機教Ambrose至得喇！

DWE Playgroup

買左套DWE返黎我諗都有成半年喇，除左開頭我地有唔明要搵個顧問問野，個顧問一路都無再聯絡我地。直至前幾日個顧問終於打黎睇吓Ambrose嘅情況，我相信我地已經捱過左一個極難攪嘅時期，而家開始睇書又好似有少少進步咁，都叫做有少少情況可以update吓，如果佢早個幾月打黎，我諗真係會同佢講攪唔掂囉！今次打黎除左update番Ambrose近況，佢原來係打黎叫我地今日去個playgroup，唔使錢嘅！主要係唱番Play Along嘅歌仔，我見佢平時嘅playgroup都成二百幾三百蚊一堂，佢話唔使錢，加上Ambrose都睇過哂Play Along，我覺得幾啱佢，咁梗係即刻話好啦！不過收左線之後老公就話邊有咁好人咁著數唔使錢上playgroup丫，一定係叫我地上去順便又sell吓野啦！不過始終都係覺得俾Ambrose上吓又無壞嘅，唔諗太多都係決定去喇！

上堂果度係响加拿芬廣場，見就近已經有西鐡站，我地決定唔揸車搭西鐡！

時間啱啱好上到去，都有幾多家長去喎，佢嘅playgroup好似限定十個家庭之內架，驟眼望都好似唔止，不過又係果句啦，唔使錢唔理咁多啦！我地除左鞋搵左個地方坐低個playgroup就開始喇！

其實好簡單，只係有個projector响個台仔度播番一d歌仔，只係有個外國人著左套好sharp同少少浮誇嘅衫，相信係要配合番disney而做嘅，佢一路帶領住唱歌仔。碟播完一次佢會停大左screen又再一齊唱，唱左好幾首之後，有d歌仔佢重有大foam board俾小朋友／家長揸住，例如首歌係有cat, hat, house同chicken, cherries, bananas等等嘅歌詞就有呢d物件嘅大foam board，又問邊個小朋友想要，派俾小朋友，到唱到果件物件就舉起果個foam board，唱完之後要收返foam board，佢又會逐個收同叫小朋友say goodbye to果樣野，雖然其實好多小朋友都細到唔會自己去攞去舉同去還塊foam board，不過我覺得呢個playgroup簡單得黎又幾好，真人同我地去唱平日成日聽到嘅歌仔，又有活動教材，同埋個外國人全程都係用英文lead住個流程，唱完呢兩首歌又無啦啦話唱多次之前果首歌仔，真係幾互動，雖然都係果d歌仔，不過咁樣演繹對bb黎講應該都好有新鮮感啦！

大概唱左九個字至一個鐘，堂playgroup就完左，個外國人請d家長如果想，可以同佢影相，因為Ambrose夠鐘食奶，我地第一時間係餵奶！餵緊奶見有人派書仔就贈品，重要係我之前想要果本書仔，叫埋個朋友幫手去報名攞都話無哂攞唔到！老公即刻舉手問係咪派書，佢就派左一本我已經有嘅書仔俾我，我即刻問佢有無第二本，我已經有果本，我想要peekaboo果本，佢話無咩貨，不過好彩最尾佢都俾左一本我，超開心！

可能我地要餵奶未走啦，其他人都好快走哂，唔見佢地sell野喎！我地個顧問見我地未走就叫我睇吓佢地有套新嘅upgrade版 fun with words！可以試用果枝點讀筆，枝筆好靚，係Mickey頭，Ambrose一攞上手就笑哂，聽到枝筆播佢平時聽嘅歌仔，又係好開心咁搖搖“un un”，真係無佢收！套野upgrade都要成四千八，係好靚，Ambrose又好似好鍾意咁，不過幾貴囉！我地唔係無果套野，不過只係而家佢有埋點讀筆，點咭同書都有聲，而我地屋企果套已經淪為舊版，同樣嘅內容只係無點讀功能，如果要退哂set野俾佢地再俾番四千八蚊佢地，真係好唔抵呀！不過個顧問唔hard sell，都叫我地諗吓先，咁我地咪睇左陣就走喇，臨走個顧問又送左一套posters俾我地，雖然其中一張我地已經有，不過唔使錢唔會嫌多架，如果萬一俾Ambrose撕爛左都重有張spare丫麻！

上完呢個playgroup，令我更加想幫Ambrose搵一d係外國人講外語嘅playgroup，不論係真係想俾佢正經學外語又好，想俾佢玩遊戲得黎又聽多少少外語都好，我覺得反正都係要俾錢上playgroup，咁不如實際d搵d又可以訓練大小肌肉運動型嘅playgroup又順便可以聽英文／外語，俾多d唔同體驗佢，一舉兩得！或者都係時候可以選擇性地幫Ambrose報吓DWE嘅playgroup，睇吓會唔會令佢對套教材更加有興趣先！

Dr Poon Playgroup – 第六堂

前幾日一號風球，心諗打風playgroup要cancel，想與唔想之間原來打唔成風，開始擔心打風唔成三日雨喇！今個禮拜又係我同奶奶兩個人推Ambrose出去上堂，如果真係落雨就好煩，我諗要放棄推車用揹帶先攪得掂呀！

有過之前成日瞓過龍嘅經驗，奶奶今次話佢會早少少打電話叫醒我起身，都好呀，我唔想次次趕到裙甩褲甩，好辛苦！結果，佢九點三叫醒我，我趁住Ambrose瞓緊，手快快刷牙洗面同執埋個奶粉袋喇！唔知點解，雖然早左起身，依然係叫唔切外賣早餐，依然係要攪到十點二先出到門口，今次好少少，我夾左一份三文治上車食！

由於又係咁遲先出到門口，再推住Ambrose去到西鐡站已經係十點半，搭到去柯士甸站已經係十一點喇！我响未到站之前已經沖定枝奶攤凍先，落左車，奶奶話不如飲埋先行，費時又係上到去先飲，不過我覺得反正都遲喇，不如辛苦d推埋上去先飲，起碼可以無miss咁多野丫麻！點知奶奶話咁不如俾枝奶Ambrose自己飲我地照推去，咁可以慳少少時間，我有d擔心佢會飲得辛苦同會易嘔架，不過奶奶又係話唔怕，咁我見咁趕，不如一試啦，結果係得嘅！當然啦，Ambrose第一次咁樣坐車仔一路推一路飲，我唔敢推得太急太快，同埋佢都有少少分心周圍望！不過佢都算叻仔喇，多得佢嘅合作，同埋好彩無落雨（事實重係熱到飛起添），我地趕到去都係啱啱開始講書！我地亦唔係最遲，嘻嘻！

開頭Auntie May講要俾bb自己做決定，自己選擇，唔好迫佢，一旦選擇左佢又唔想繼續，或者唔要開初選擇好嘅野又要你果d，我地唔可以俾佢，要佢完成左之後先可以再要其他，因為呢個係佢嘅選擇，佢要承擔責任，我地要鼓勵佢完成一樣才開始另一樣！我當然好認同，不過唔知實行係咪真係得囉，哈哈，加上其他人又係咪可以同我一致做法都係一個問題，不過我都會堅持嘅！

之後第一個遊戲係人手搖搖板呀！Dr Poon示範一次俾大家睇，首先係瞓低响地下，好似sit-up嘅姿態，將bb面向自己分腿坐在自己腳背上，然後撐起雙腳上下上下咁搖，bb雙手自然會抓實大人個膝蓋，就算唔係都會自然垂下，佢自己會balance番個人唔跌落黎！我睇完示範都忍唔住嘩嘩聲，因為真係好似好好玩，不過做果個真係好辛苦喎！我同奶奶分別都有嘗試用腳舉起Ambrose，不過真係唔得，係點撐都撐唔起，少少都唔得呀！Dr Poon叫如果腰有事就唔好勉強去做，佢之後又教話其實坐响椅子上做都係一樣可以搖到，而且易d撐起，我同奶奶又一鼓作氣去試，都係失敗！Dr Poon見到我地攪唔掂，佢走左過黎，佢幫Ambrose人手搖搖板，終於都有得玩喇，Ambrose都不知幾開心！呢d咁大動作嘅運動，無爹爹真係唔掂呀！望吓其他人，有d媽咪都做到，好利害呀！唔知點解好似次次去我都唔係好玩到呢d大動作咁，一係玩一陣又要抖，見其他人都唔係嘅，我真係好渣！

玩完呢個大動作，Dr Poon每人派左一個呼拉圈。呢個呼拉圈有幾個玩法，首先係bb企响呼拉圈入面，俾bb扶住個圈，一個人响前面引bb行前，另一個可以幫手抖住後面個呼拉圈等個圈唔好墮哂落地！我今次就係做前面果個，就啱Ambrose舒舒服服扶住個圈嘅高度，我响前面一路抖住個圈，一路向後“吞”，而Ambrose就不斷一步一步向前行，當佢不自覺行左兩三步之後，佢發現左自己行前左，佢自己都响度笑呀，好開心咁！Ambrose一路行行行，我一路“吞吞吞”，有時更加會轉方向，佢都ok喎。玩左一陣，Ambrose坐左响度休息，我地坐左一陣又想俾佢行過就諗住抱企佢啦，點知佢唔肯企。Dr Poon話佢可能累呀，唔好勉強佢再行，話bb呢個動作會好累，又要用手抓實個圈，又要用腳一步一步行，兼且要平衡身體，所以我見Ambrose唔企就算喇！呢個呼拉圈學行我覺得幾好，因為就算有學步車，我覺得bb一推，個車又有碌，好易一推就“線”左出去趴低咁，不過奶奶又話Ambrose識得“線”左出去拉番架車埋身喎，我就係覺得唔好攞，一推又“線”又要顧住拉番架車埋身，到佢拉番番黎佢已經累哂要坐，同埋學步車好難就到一步一步咁，如果用呼拉圈，所有野都係我地控制到，bb又唔使好用力又要拉前又要拉後架車！不過我唔急要Ambrose學行嘅，爬多d好呀，所以暫時唔會好刻意著力同佢／引佢行！

呼拉圈另一個玩法係棟高佢，要bb用腳“攬”過去，因為個圈棟高左都係矮過bb，所以bb“攪”過去除左用腳過，佢都要“dub”低個頭先過到！不過由於Ambrose係未識行，佢一定係扶野企，呢個遊戲佢當然玩唔到啦，真係顧得行又唔顧得“攬”，顧得“攬”都唔顧得個頭啦，所以我地無同佢試呢個！

之後就係要幾個家長幫手棟起d呼拉圈造成一條隊道俾bb爬過。不過我覺得其他家長都好自私咁囉，其實就無咩家長幫手扶起d呼拉圈，Dr Poon一人手執三個圈，我自己一手一個，奶奶第一時間俾左Ambrose爬完之後黎幫手扶圈，我以為其他人會等佢地bb爬完會有人過黎換吓人，點知唔覺有囉！我同奶奶都要扶圈，Ambrose就自己有自己响隧道尾坐住玩，我都只係可以遙望自己個仔！其他人就不斷又影相又引bb玩，有一刻都覺得有無攪錯呀！之後有個bb已經再爬第二次，我都見到喇，只係Dr Poon都忍唔住快過我講，我見第二轉都已經玩緊，我都走左去抱Ambrose再爬囉，基本上佢係唔會抗拒爬，再加上有玩具响前面，真係唔使十秒都爬完！果條隧道，嚴格黎講係變哂形啦，一個人揸三個係咁架喇，我真係唔明，點解d人真係唔會諗吓其他人，兩個人去上堂，都總可以有一個人去幫手攞圈丫，都唔係一定要你由頭攞到尾架，到你bb咪搵人頂你去同bb玩囉，咁你又唔幫手又係咁玩，我兩個人黎都要幫手，無人湊住個仔都係咁啦，真係好唔得呀！

玩完呢個之後，Dr Poon放左好多唔同大小唔同質感嘅積木出黎俾bb自由玩喇！其中有布有木有膠嘅，我發覺Ambrose唔玩大大件膠果隻積木，無興趣！然後布嘅正方體每個面都有唔同公仔可以睇，佢都無興趣！我只係見Ambrose不斷用手攞細件嘅木積木，攞左又掉，兩隻手不斷係咁掃d木積木，其他真係無咩點掂過，就算我俾佢，佢都係接左之後望 一兩 眼就掉左去，繼續好開心咁抓同掃果d木積木！我又諗，係咪又係時候可以引進積木同lego呢？但Ambrose已經有好多玩具喇，好似每樣玩具買番黎都係有佢嘅作用，不過so far又好似未有成績咁，未有outcome，有時真係好似呢樣可以train佢呢樣，果樣又可train佢果樣，好似永遠都有好多野要train，好多野都好似要買，會唔會多左d呢？重未計有時覺得好得意但係又未必有實際教育作用嘅玩具，再咁買法好似要再搬大d屋企先得喇！

玩左一陣積木，Dr Poon叫我地可以攞個大件嘅膠積木做base，再攞d細嘅積木俾bb放响上面，一來係學手眼協調，二來係創意，不過Ambrose係從來都唔肯放低手上玩具，成日教佢放，佢都唔肯放，一係就推倒哂d野，所以今次都唔例外，我地示範去放低小積木上個大積木度，佢睇左又唔放，轉頭重推跌哂我地放上去果d積木，真係激死！Auntie May走埋黎嘗試教佢放，結果都一樣，然後佢叫我地平日多d教佢放野俾野。佢真係有所不知，我地日日都幾乎有教，放圈圈落柱啦，放布公仔落布桶啦，放返d膠杯入大膠杯啦，放番佢响個櫃抆出黎果d好貴嘅CD同DVD啦，無一次成功！唔係我地無教，係佢從來唔肯做，我地都無哂符呀！都係唯有等佢大少少會開始明同識架咋！

以為已經就快落堂，見下一班有家長到左喇！點知原來重有睇書呢part，今次係over run左少少！

Dr Poon攞左本好大好大嘅書出黎，一路唱歌仔一路做動作同埋指番本書，有bb坐定定唔去哄就咁遠距離望住本書睇你班人做咩，有bb有興趣爬埋去睇去望本書，有bb好活躍咁行埋去又摸又攪本書，而Ambrose都叫乖，佢只係見到本書之後爬埋少少，中近距離去睇，眼定定睇人地做咩，之後唱歌仔又跟住拍手掌又係咁“un”個身，好似好投入咁。唱完本書之後Dr Poon將本大書攤响地下整理摺番埋，呢個時候就有bb走埋去坐本書喇，因為本書係架巴士黎，Ambrose見人地一個屁股坐左响架巴士上面，佢都唔執輸，佢坐在响果個bb隔離，係咁易都坐住本書邊，真係要寫個服字俾佢呀！

唱埋bye bye歌，呢堂都過哂鐘先完，已經有 一兩 組下堂家長到左，個個又要整理bb同著鞋，都一片混亂，雖然係咁，我覺得呢堂真係好好玩呀！

Dr Poon Playgroup – 第五堂

今個星期老公短週，YEAH～～～

今堂，我地破哂記錄。九點九我紮醒左，望吓個鐘，九點九？係，九點九！我無睇錯！我地一家三口又瞓過龍喇！！！即刻叫醒老公，佢成個人彈起左身，火速去刷牙洗面換衫，見到佢好累都要出動陪我地上堂，有一種歉疚，再一次覺得是否值得勞師動眾個個星期晨早仆出去上呢個唔知係咪真係有用真係好嘅playgroup，重要係唔平嘅！或者下次我應該挑個下午時間，大家都不用太辛苦！又一次餓住個肚飛出去上堂，因為太趕時間，老公都提議在山林道放低我地佢唔上去唔泊車喇，因為佢一放低我地又要兜去泊車又要行番過黎搵我地已經會遲黎，之後唔想我地一齊行去攞車又要預早行番過去兜番架車返黎，一來佢又頻撲，二來真係嘥泊車錢，一個鐘頭嘅堂（唔計我地遲到）無左頭無左尾真係唔太多時間剩！開頭我都好唔想，因為覺得難得Dr Poon容許父母一齊上堂真係唔好浪費囉，但係回頭一諗老公已經好辛苦喇，重要佢頻頻撲撲又真係好慘嘅，所以都係算啦！

可能係我太好心喇（嘩哈哈）！入到山林道就响上堂幢大廈附近，咁啱有車駛走，係標位呀！其實第一堂Dr Poon已經同我地講雖然山林道好多標位，但係呢d位係長期有車泊住，要响山林道泊到車難過登天，或者去幫襯果度嘅食肆，咁就有機會代客泊車泊到果度喇！所以揸車去果度上堂，泊車都幾遠吓！今日真係有運行，竟然俾我地泊到個標位，咁老公可以同我地一齊上堂啦！

上到去，我地已經係最遲果個喇，只見Dr Poon响度講緊bb發展同點教bb嘅tips，未開始唱歌仔玩，我突然諗，唔通我次次遲到都未開始玩係因為堂堂一開始都有呢part講解？而我每次就係miss左呢一part講解，所以成日都覺得上去無咩大得著，次次都係玩完就算？！諗落又真係無一堂唔遲到咁濟喎！

唱完歌仔第一個遊戲係空中飛人，係要抱住bb盆骨位面向出，bb腰自然會挺起，然後父母互追，之後同其他bb互追！呢個遊戲可以訓練bb腰力，老公同我都覺得幾好，因為我地發覺Ambrose而家自己坐响度玩嘅時候，無以前坐得咁挺咁直，有時好似彎住條腰咁，我地都有擔心點解會咁，但係都可能要一歲返健康院時先可以問到喇！見呢個遊戲可以訓練腰力，而又見Ambrose真係挺直條腰玩，老公就話要响屋企玩多d先得喇！

之後Dr Poon叫我地企埋去側邊d櫈度，再俾個膠水樽我地去引bb由扶住櫈邊企去到蹲响度攞個樽，不過試左好多次，Ambrose都係一個屁股坐落地下度去攞個樽，佢唔蹲呀！我記得佢應該識架喎，不過始終覺得佢或者未係好熟未ready去做，由得佢啦！見其他bb都做到咁濟，又覺得無所謂喎，佢遲少少就會識啦！話哂佢係呢班尾二細架！有幾個bb重已經識行喇，佢地可以蹲响度攞地下嘅物件真係唔出奇！我地無迫Ambrose去做呢個動作，重俾佢自己玩個樽，見人地隔離個樽靚，佢又想打橫走去攞！Dr Poon可能見我地唔係引佢蹲而係由得佢玩樽，佢走埋黎想引Ambrose蹲低，不過Ambrose只係一個屁股得左落地就算，雖然Dr Poon好似好想Ambrose做到，但我自己就唔想太勉強囉！重有少少反感，覺得如果Ambrose係想玩個樽而唔跟我地指引去蹲低，既然已經試左幾次唔得而佢又唔係咁大動力去做呢個動作，咁咪由得佢去玩囉！

之後Dr Poon派左幾個環，要我地示範將d環套落手指度，然後俾bb自己放，呢個遊戲係訓練手眼協調。其實我地一早已經買左個圈圈柱俾Ambrose，一早已經教佢去將d圈放入柱度，不過無論我地點教，點幫佢一齊放入去再讚佢，Ambrose都只係一攞上手就食同fing，而家食少左，但係當你想捉住佢手同佢一齊放嘅話，佢會以為你想搶走佢玩具而大叫“唔”！所以當Dr Poon話要玩呢個遊戲，我都無抱希望，而事實係，Ambrose依然係唔放，你有你放，佢有佢fing同搶人地嘅圈圈！望吓其他bb，有d都可以做到，都有少少羨慕，不過我相信Ambrose現階段可能對物件興趣大過動作，所以希望滿足佢對物件嘅好奇之後佢會肯跟住做動作啦！Dr Poon話如果bb唔識放可以將d圈圈入bb手同腳度，睇bb識唔識自己整番出黎，佢話咁都可以令bb諗辦法同伸縮自己手腳令個圈出返黎，對佢地都有幫助，但係Ambrose見到個環，整兩下唔甩就由佢，真係唔會覺得唔舒服！睇佢平時vivi同poo poo左都唔出聲唔投訴就知佢有幾唔mind，第日大個都係“呢啡”架喇！爹爹可能見呢堂無咩野做到又話悶喇！有時候我都會覺得悶，當人人都做緊同做到指定動作而我地係做唔到嘅時侯，我唔會不斷去迫Ambrose去做，而其他人又重做緊，咁我地停左落黎又無咩好做咁，不過始終個playgroup目的唔係俾我地玩，而係學一d可以幫到bb發展嘅遊戲，咁諗嘅話會好d，只要記住邊d有幫助而又做唔好，咁過一陣又响屋企玩番睇吓會唔會又得囉！

玩完圈圈後，大家就圍個大圈，玩返之前果個空中飛人，唔同嘅係今次聽住歌仔，去到某個位就大家會向圓中心行前，所有bb都會相遇，呢個都幾得意，好彩今堂爹爹有黎，唔係我諗Ambrose相遇唔到其他bb，因為佢一定已經俾我抱到“線”哂落個肚腩度，哈哈哈！！！

唱完歌仔又say bye bye喇！不過到今時今日，除左 一兩 個bb我係幾得個名之外，我都唔記得，真係好渣！

第一聲媽媽

啱啱先寫完Ambrose十個半月成長記錄，重話未聽過佢叫媽媽！點知今朝一早起身，佢自己企左响床仔度，向住我，出奇不意咁，叫左一連串“媽媽媽媽媽”，哈哈！雖然唔知佢係咪真係叫我，不過都好窩心，我當係架喇！

十個半月成長記錄

原本諗住有好多Ambrose嘅第一次都會寫blog，但係原來湊住個仔都唔係幾得閒，佢有好多嘅第一次都唔知幾時發生左．．．時間一過左又好難記番大概幾時，重諗住一個月做一次記錄都好啦，點知上次九個月成長之後，一去而家已經十個半月喇．．．．呢個呀媽真係抵打，我再唔寫之後又唔記得架喇！

九個月嘅Ambrose食粥都係麻麻地，打仗咁，餐餐都俾麻麻話，我地放工返到去麻麻都會投訴，好勞氣吓！我都無辦法，自己好辛苦整定唔同食材俾麻麻第二日煲，試左唔同嘅野，大家都好心灰意冷，認定佢唔鍾意粥仔鍾意同大人一樣食飯，重諗住睇吓點捱過呢個時期快d俾飯仔佢就好喇！大概九個半月左右，忽然有日老公問麻麻Ambrose食粥食成點，好似好耐都無聽佢有投訴，以為佢已經無咁好氣日日投訴啦，原來Ambrose唔知幾時又得喇，麻麻唔提可能驚佢小氣！我就好開心啦，因為姑娘話最好九個月就代到一餐，我以為呢個target會做唔到，成日好擔心一歲返去打針俾姑娘鬧，而家唔使怕喇！見Ambrose食一餐都得，唔知點解好快又同佢轉兩餐粥，又得喎！真係安樂哂～～～

九個月嘅時侯Ambrose只係識蟲仔“冷”地，但係真係好快，九個半月左右已經係爬行自如，四肢落地周圍去，又爬又坐，不亦樂乎！最記得五月尾上完第一堂playgroup落堂果陣，人人都係度換片，佢就周圍去“莊”人，又攪人地d濕紙巾！

具體幾時識做d咩真係唔記得太多，如果有mark calendar可能都大概寫得番出黎，真係好可惜！直至今日為止，Ambrose十個半月大，大致有以下嘅進程：  

一、                飲水依然係天一半地一半，俾個飲管杯佢啜，係啜到但係唔吞，流番出黎一身都係！而家同佢轉左個就咁飲嘅學習杯，依然係一路飲一路漏。用匙餵水佢都肯飲，再用飲管杯裝茶或果汁，佢都會流番出黎，真係無佢符！

二、                俾奶樽佢自己揸住飲奶，其實好早已經識，touchwood佢無抗拒要人揸先肯飲！我地會整佢上半身瞓响大人個枕頭度，俾枝奶佢自己揸住飲。近日都唔知係基於整蠱佢定訓練佢，就咁俾枝奶佢睇佢識唔識自己舉高揸住飲或者瞓低飲，結果係唔識！佢重好攪笑咁揸住枝奶係咁啜，奶又唔上佢又望吓個樽，同佢講話瞓低飲佢又一味唔聽起勢啜，我地就會輕輕推佢落個枕頭度，佢實係大字型瞓响度嘆奶架！

三、                可以快速扶物企起身，重可以打橫行到幾步，重有可以上一級仔個櫃去攞櫃面嘅野，不過就唔係好識落番黎！有時甚至可以單獨唔扶物企幾秒！

四、                爬行速度好快，兩隻手好大力“啪啪”聲咁爬，唔知以為佢跑緊，好攪笑！

五、                而家唔止見唔到人識去廚房搵人，其他房佢都會入去莊，直到搵到人為止！佢重識得打開門摷門後面d野出黎玩（好多時係佢嘅片片／褲仔儲備）！一有人出門口佢會趕去，驚死唔預佢咁，有時重會喊哂，可能驚我地走左去唔理佢呀！

六、                好鍾意拍手，fing手，跪响度“un”成個人，一攞玩具就係咁fing ，重要係一攞一定係兩隻手都攞然後將兩樣野拍拍拍，拍到有哂聲，呢d唔知係咪叫節奏感？！最近佢重識玩搖鼓，好開心咁用手拍嚮佢！

七、                識同人揮手say hello同bye，尤其是日日都見嘅樓下看更，叫佢一定做！錫錫一時時做到，不過佢都唔係用咀，係成個頭挨埋你個頭度，哈哈，係咁上下啦！

八、                好多野講，好多怪叫，佢講果d音係好難學到，有d似西班牙法文果d捲舌音，好奇怪！我開始認真諗係咪應該俾佢上其他語言嘅playgroup，可能佢有天份，哈哈！不過從未聽過佢“媽”過，開始有d失望，因為佢好似都識叫爺爺喇．．．．

九、                鍾意玩水！我地抱佢去洗手盆洗手洗腳，佢而家識得我地未開水龍頭已經遞手去個水龍頭底接水！同佢去游水眼瞓都醒哂，用一個圈水泡都唔驚，重識“long”隻手上水泡度，有時重會瞓吓水，好爽！

十、                時常越級挑戰比佢大嘅小朋友，搶野玩，重係好大力搶，會識得一路搶一路大叫“唔”！有時要攞佢手上玩具走佢唔肯俾，重會發忟咁一路“唔”一路將個玩具收去自己身後！

十一、        瞓醒如果重食住個咀同佢講俾，佢會吐出黎俾番我地！但係有時佢响大床玩，佢會專登爬去床尾烏個頭望地下再吐個咀落地，如果佢有奶咀蓋，佢更加會爬埋去床尾用手掉落地，然後一味望，再想伸長隻手去拾，不過當然佢隻手係拾唔到啦！佢坐high chair都開始鍾意掉野落地，好似好好玩咁！唔知佢係咪學緊因果同距離嘅關係呢？

十二、        開始同我爭枕頭！半夜會自己喊醒或唔喊企左起身用手拍人要過黎同我地瞓，只要一放左响我地中間唔使五秒就瞓番！到五點幾六點左右開始個頭“lui”埋我已經摺左一半嘅枕頭，務求頂走我，自己獨瞓個枕頭！好似係由十個月左右佢開始鍾意將大半身趴响我地個枕頭度瞓，成舊壽司果塊刺身咁，重瞓得特別“lum”，重要係鍾意我個枕頭多過老公果個，你話係咪激死？！

十三、        開始自己打開櫃筒攞哂d野出黎又走左去！連貼响個櫃門嘅安全鎖佢都抆得爛！！！

十四、        近一個星期發覺佢摷d書呀玩具出黎之餘，有時都會揭書喇！見佢好似揭得比以前好左少少，我就試吓俾本Mickey厚紙板書佢引佢揭，見佢有興趣，不過厚紙板書又重左少少，佢捧起去自己身上到真係揭到都幾花氣力，我就諗起有d厚厚林林唔同嘅書仔，即刻擺哂出黎任佢揭，唔理佢點揭，打斜又好倒轉又好，務求佢有興趣得閒揭多d訓練吓手指力，我相信佢如果自己揭到少少書，佢係會有興趣揭黎睇嘅！

十五、        打喊露大大聲，好似大人咁，好好笑！有時佢自己好大聲打完喊露，自己都忍唔住笑左出黎！  

真係要寫進程果時，又唔係好記得有咩喇，下次一定記起d咩寫低好d．．．．．

Dr Poon Playgroup – 第四堂

又係要同奶奶一齊湊Ambrose出尖沙咀上playgroup嘅星期六，又係同Ambrose一齊瞓晏左，一起身就要執野出去早餐都唔得閒叫上黎食，真係唔知點解堂堂都趕頭趕命咁！一落樓個保安已經同我地講啱啱上左酷熱天氣警告，oh my god！一望出去真係陽光普照，萬里無雲咁款，未行出去個人已經開始溶啦！推住bb車去西鐡站，沿路都無遮蔭，無食早餐，水都無滴，行到去西鐡站真係濕哂，又累又無力，奶奶都好慘架，佢為左大少唔好哂親，又驚落個bb車檔去遮太陽會焗親大少，佢都好大犧牲，一路擔住把遮追住我黎幫Ambrose遮太陽，真係大汗叠細汗呀！今次出去，我地決定搭西鐡去到柯士甸站直出行過去算數，唔好煩！

西鐡去到柯士甸站都好快，大概半個鐘左右，不過果時都已經成十一點，上堂十一點三，要推住bb行過去都真係唔夠時間，重要，Ambrose夠鐘食奶！！！我地响站裡面先沖好奶就繼續行，諗住到達左先飲。今次都叫好，西鐡站閘口夠濶出bb車，指示清楚，之不過原來Exit F又有分F1，F2咁，我都有猶豫，不過都係估估吓出左，又有斜路推車，唔使好似上次咁搬樓梯，出到去都啱嘅，無花到太多時間搵出口都係萬幸喇！

不過出到去都好熱，真係熱到溶！好辛苦上到去Dr Poon度，濕哂！拿拿林坐好餵奶，好彩都有個bb又食緊奶，咁都無咁odd！而好彩Ambrose雖然都幾好奇望其他小朋友，係有d分心，不過佢都keep到佢平時飲奶速度，好快飲完就上堂喇！

因為之前兩個星期都係放假唔使上堂，今堂係假後第一堂。bb學野好快，兩個星期唔見，Dr Poon一開始就問我地呢兩個星期bb有咩進展，有咩叻！講真，我真係好難諗Ambrose叻d咩野，在於我黎講，我覺得佢好叻成日笑，不過，好似呢d又唔叫叻，叫鍾意笑，講出黎都有少少唔好意思！不過做人父母就係咁架啦，自己bb小小野都覺得佢叻架，只係我唔敢响咁多人面前話佢呢d叫叻囉！咁我咪話覺得Ambrose飲奶食野都touchwood叫叻囉，點知Dr Poon即刻已經好認同話佢飲奶好快，攪到我有d唔係幾好意思之餘又好開心，係架，Ambrose飲奶又乖又叻架，食粥暫時都好好，唔係認叻！哈哈！講到進步，我話Ambrose學識左掉野落地，哈哈！Dr Poon話呢d係叫有力量喎，真係正面到無野好講！

講完之後唱埋歌仔就開始玩喇。第一個遊戲係向外抱住bb，另一個人去追佢，其實自己响屋企都會玩呢個，Ambrose會玩到咯咯笑架，不過上堂玩呢個又真係幾累，因為當好累嘅時候重見其他人重玩緊，如果自己又停哂手，又好似唔知點，好似唔投入咁，但係，真係好累，未食早餐，水都無滴落肚，又酷熱天氣下推住Ambrose行過去上堂，一上到去又唔停，又要抖住佢個頭飲奶，手都軟埋，一黎又玩d咁刺激嘅活動，真係無命！

之後Dr Poon攞左好多波波出黎，然後又每人派左個筒仔，呢個遊戲係有幾個玩法嘅，一係用波波引bb爬，去追波波，呢個無難度；二係教bb放d波波入筒度，呢個真係好難，Ambrose從來都唔肯聽指令放低佢手上面玩緊嘅玩具，真係無佢符；三係Ambrose自創嘅，係搶埋人個筒，一手一隻係咁拍，佢真係好有力量，個筒仔其實唔係好大，不過佢隻手仔又細，個筒又圓，一手攞一隻已經要好用力抓實，重要抓完攞黎拍拍拍，真係要俾個服字佢！响呢個遊戲裡面，我見到Ambrose唔知係咁啱定對藍色波波有少少情意結，佢有好幾次都係攞左藍色波波上手係咁fing，重要兩隻手都係藍色！

之後Dr Poon每人又派左一個小小嘅有蓋盒仔，裡面係兩舊砌埋左一齊嘅lego。首先都係用個盒搖到有聲去引bb爬埋黎搶個盒，之後睇佢識唔識自己開蓋。Ambrose都未開過蓋，所以佢唔識，我示範左一次俾佢睇，佢知道原來咁得意都搶番個盒，但係佢都開唔到！見佢好落力“meet”個蓋邊都唔得，佢又唔識轉去蓋邊有個位突出黎嘅拉橫度“meet”，咁Dr Poon話如果bb開唔到可以唔好蓋得咁實，俾少少位佢自己可以拉，我地都盡量去幫Ambrose去整鬆d，佢真係無咩耐性，初初開唔到佢就索性掉開唔玩，之後我地示範左幾次佢又有d興趣，我地又整鬆左，佢都一味唔study吓，起勢亂“meet”，真係激死，佢就係咁架喇，有d咩野一係就唔聽人教自己有自己做，一係就攪唔掂就走左去，都唔會望吓研究吓同睇你點做嘅，真係有d擔心第日大個讀書會唔會好難教！幾經辛苦佢先開到個盒蓋，講真，我覺得佢係撞彩開到，不過都要俾d鼓勵佢至得！Ambrose攞左個lego出黎，我地又示範左個lego原來係分得開嘅，再砌番俾佢，唔砌得好實，有少少鬆啦，今次佢自己抆得開，我地又再砌又再俾，佢都得，之後我地索性唔刻意砌鬆，真係砌完俾佢抆，佢一樣得，叻仔！開始諗原來我地都可以買大舊lego俾佢玩喇！Dr Poon再俾多兩舊lego我地砌落去，等Ambrose知道成舊野係可以分開幾舊嘅，都係示範左 一兩 次之後俾番佢，佢都大致可以抆番開一舊舊出黎，只係有時當佢兩隻手都有野揸住，佢會唔記得去抆，走左去係咁fing囉！呢個遊戲都幾好，起碼我真係無諗過咁早可以訓練佢開盒，真係無試過喎！而玩完呢個遊戲，我認同Dr Poon話Ambrose好有力量，但我覺得佢手指唔夠靈活，運用得唔好，所以佢開黎開去都開唔到個盒，但一要抆開舊lego就一下攪掂。真係要好好訓練佢d手指至得喇！

玩完盒同lego，Dr Poon教可以教bb伸一隻手指出黎，再之後就係教點蟲蟲喇！都唔知Ambrose幾時識自己點蟲蟲呢？

唱埋歌仔又落堂喇！

下水禮

Ambrose嘅下水禮終於在 七月一日 舉行！

七月一日，晴天，非常熱，真係最啱bb去游水，唔怕冷親！心情真係既緊張又興奮！當日我地決定三點幾四點去游水，因為諗住游一陣Ambrose都會累，沖埋涼瞓一陣食粥仔就啱啱好，唔太趕！點知，Ambrose可能知道有得去玩，未出發先興奮，游水之前都唔肯瞓一陣，雖然佢都係咁捽眼捽面好眼瞓咁款！見佢真係捱唔到太晏，我地三點鐘已經同佢著好游水片褲，換上米奇泳衣出發去游水！

一去到泳池，我地放左Ambrose落個穿腳仔水泡度坐，佢開頭都有少少吽，不過坐左一陣，我地又將個水泡船慢慢推吓推吓，佢就知好玩，加上有兩個表姐同佢一齊，就更加醒神！我地開頭一直都在兒童池度玩，無太陽哂到，而大人池又勁哂，一來兒童池呀仔隻腳點都掂唔到地下，同去大人池無咩分別，二來雖然呀仔有搽防哂，但陽光實在太猛，真係驚不知不覺哂傷，我地唔敢過去！我地一路都推住個水泡同佢玩，不過見佢坐左落個穿腳水泡度，個上半身其實無濕身，得下身在水中，而佢又好似坐船咁高左，佢成日鳥低想攪吓d水，但隻手又唔係好夠長，變左佢就側埋一邊，我地見d水其實已經哂到好暖，咁就直頭唔用水泡，一手抱住Ambrose將佢上半身至頸左右都浸埋落水，呢個時候佢真係好enjoy！一路笑一路周圍望同埋一路用手拍水，果然，下水禮真係要真真正正下水先好玩！

玩左一陣，又發覺佢一d都唔驚水，好鍾意玩水咁，我地同表姐仔借黎一個一個圈嘅水泡俾Ambrose試吓用，點知，一笠落去，真係唔使教，佢已經識得“long”住對手响個水泡面度，好似真係游水咁款！當然我地梗係會擔心Ambrose會突然離手成個人响中間穿入水，所以我地都有一路扶住佢。見佢用埋個水泡重high，可能真係好free好舒服咁浮水啦，又有水玩，佢重一時登直雙腳好似大人踩水咁，一時又挨住個水泡將對腳浮上水面，真係爽爆！

玩到咁上下，我地驚個兒童池無太陽又有少少風會凍，終於去左大人池又玩左一陣，拋吓波波，玩吓沖涼用果ｄ噴水玩具，真係不亦樂乎！估唔到我地都玩左一個鐘，重以為落去十五分鐘就要走人，哈哈！Ambrose最尾好似“撻皮”咁撻住左個水泡上面，我地見佢d手腳皮都皺哂又無瞓過覺，都係快d返去白白豬抖吓喇！

見咁好玩，決定 七月四日 又再玩過，yeah～～～