十個半月成長記錄

原本諗住有好多Ambrose嘅第一次都會寫blog，但係原來湊住個仔都唔係幾得閒，佢有好多嘅第一次都唔知幾時發生左．．．時間一過左又好難記番大概幾時，重諗住一個月做一次記錄都好啦，點知上次九個月成長之後，一去而家已經十個半月喇．．．．呢個呀媽真係抵打，我再唔寫之後又唔記得架喇！

九個月嘅Ambrose食粥都係麻麻地，打仗咁，餐餐都俾麻麻話，我地放工返到去麻麻都會投訴，好勞氣吓！我都無辦法，自己好辛苦整定唔同食材俾麻麻第二日煲，試左唔同嘅野，大家都好心灰意冷，認定佢唔鍾意粥仔鍾意同大人一樣食飯，重諗住睇吓點捱過呢個時期快d俾飯仔佢就好喇！大概九個半月左右，忽然有日老公問麻麻Ambrose食粥食成點，好似好耐都無聽佢有投訴，以為佢已經無咁好氣日日投訴啦，原來Ambrose唔知幾時又得喇，麻麻唔提可能驚佢小氣！我就好開心啦，因為姑娘話最好九個月就代到一餐，我以為呢個target會做唔到，成日好擔心一歲返去打針俾姑娘鬧，而家唔使怕喇！見Ambrose食一餐都得，唔知點解好快又同佢轉兩餐粥，又得喎！真係安樂哂～～～

九個月嘅時侯Ambrose只係識蟲仔“冷”地，但係真係好快，九個半月左右已經係爬行自如，四肢落地周圍去，又爬又坐，不亦樂乎！最記得五月尾上完第一堂playgroup落堂果陣，人人都係度換片，佢就周圍去“莊”人，又攪人地d濕紙巾！

具體幾時識做d咩真係唔記得太多，如果有mark calendar可能都大概寫得番出黎，真係好可惜！直至今日為止，Ambrose十個半月大，大致有以下嘅進程：  

一、                飲水依然係天一半地一半，俾個飲管杯佢啜，係啜到但係唔吞，流番出黎一身都係！而家同佢轉左個就咁飲嘅學習杯，依然係一路飲一路漏。用匙餵水佢都肯飲，再用飲管杯裝茶或果汁，佢都會流番出黎，真係無佢符！

二、                俾奶樽佢自己揸住飲奶，其實好早已經識，touchwood佢無抗拒要人揸先肯飲！我地會整佢上半身瞓响大人個枕頭度，俾枝奶佢自己揸住飲。近日都唔知係基於整蠱佢定訓練佢，就咁俾枝奶佢睇佢識唔識自己舉高揸住飲或者瞓低飲，結果係唔識！佢重好攪笑咁揸住枝奶係咁啜，奶又唔上佢又望吓個樽，同佢講話瞓低飲佢又一味唔聽起勢啜，我地就會輕輕推佢落個枕頭度，佢實係大字型瞓响度嘆奶架！

三、                可以快速扶物企起身，重可以打橫行到幾步，重有可以上一級仔個櫃去攞櫃面嘅野，不過就唔係好識落番黎！有時甚至可以單獨唔扶物企幾秒！

四、                爬行速度好快，兩隻手好大力“啪啪”聲咁爬，唔知以為佢跑緊，好攪笑！

五、                而家唔止見唔到人識去廚房搵人，其他房佢都會入去莊，直到搵到人為止！佢重識得打開門摷門後面d野出黎玩（好多時係佢嘅片片／褲仔儲備）！一有人出門口佢會趕去，驚死唔預佢咁，有時重會喊哂，可能驚我地走左去唔理佢呀！

六、                好鍾意拍手，fing手，跪响度“un”成個人，一攞玩具就係咁fing ，重要係一攞一定係兩隻手都攞然後將兩樣野拍拍拍，拍到有哂聲，呢d唔知係咪叫節奏感？！最近佢重識玩搖鼓，好開心咁用手拍嚮佢！

七、                識同人揮手say hello同bye，尤其是日日都見嘅樓下看更，叫佢一定做！錫錫一時時做到，不過佢都唔係用咀，係成個頭挨埋你個頭度，哈哈，係咁上下啦！

八、                好多野講，好多怪叫，佢講果d音係好難學到，有d似西班牙法文果d捲舌音，好奇怪！我開始認真諗係咪應該俾佢上其他語言嘅playgroup，可能佢有天份，哈哈！不過從未聽過佢“媽”過，開始有d失望，因為佢好似都識叫爺爺喇．．．．

九、                鍾意玩水！我地抱佢去洗手盆洗手洗腳，佢而家識得我地未開水龍頭已經遞手去個水龍頭底接水！同佢去游水眼瞓都醒哂，用一個圈水泡都唔驚，重識“long”隻手上水泡度，有時重會瞓吓水，好爽！

十、                時常越級挑戰比佢大嘅小朋友，搶野玩，重係好大力搶，會識得一路搶一路大叫“唔”！有時要攞佢手上玩具走佢唔肯俾，重會發忟咁一路“唔”一路將個玩具收去自己身後！

十一、        瞓醒如果重食住個咀同佢講俾，佢會吐出黎俾番我地！但係有時佢响大床玩，佢會專登爬去床尾烏個頭望地下再吐個咀落地，如果佢有奶咀蓋，佢更加會爬埋去床尾用手掉落地，然後一味望，再想伸長隻手去拾，不過當然佢隻手係拾唔到啦！佢坐high chair都開始鍾意掉野落地，好似好好玩咁！唔知佢係咪學緊因果同距離嘅關係呢？

十二、        開始同我爭枕頭！半夜會自己喊醒或唔喊企左起身用手拍人要過黎同我地瞓，只要一放左响我地中間唔使五秒就瞓番！到五點幾六點左右開始個頭“lui”埋我已經摺左一半嘅枕頭，務求頂走我，自己獨瞓個枕頭！好似係由十個月左右佢開始鍾意將大半身趴响我地個枕頭度瞓，成舊壽司果塊刺身咁，重瞓得特別“lum”，重要係鍾意我個枕頭多過老公果個，你話係咪激死？！

十三、        開始自己打開櫃筒攞哂d野出黎又走左去！連貼响個櫃門嘅安全鎖佢都抆得爛！！！

十四、        近一個星期發覺佢摷d書呀玩具出黎之餘，有時都會揭書喇！見佢好似揭得比以前好左少少，我就試吓俾本Mickey厚紙板書佢引佢揭，見佢有興趣，不過厚紙板書又重左少少，佢捧起去自己身上到真係揭到都幾花氣力，我就諗起有d厚厚林林唔同嘅書仔，即刻擺哂出黎任佢揭，唔理佢點揭，打斜又好倒轉又好，務求佢有興趣得閒揭多d訓練吓手指力，我相信佢如果自己揭到少少書，佢係會有興趣揭黎睇嘅！

十五、        打喊露大大聲，好似大人咁，好好笑！有時佢自己好大聲打完喊露，自己都忍唔住笑左出黎！  

真係要寫進程果時，又唔係好記得有咩喇，下次一定記起d咩寫低好d．．．．．