爬行比賽

原來想同Ambrose報爬行比賽都好難！之前有好幾個爬行比賽舉行，不過Ambrose又未識爬，到佢識爬嘅時候，又無爬行比賽。Ambrose已經十一個半月，先黎有一個爬行比賽，好彩佢重未識行，唔係真係爬爬吓企左起身都唔知點算！因為要就番同月份bb一齊爬，雖然我要求 八月一日 爬，但大會都派左 七月三十一日 俾我，我見呢個可能係Ambrose人生嘅唯一一次嘅爬行比賽，就算果日上完playgroup要趕過去都在所不計。

爬行比賽之前Ambrose要上playgroup，佢果朝九點起左身，之後搭車佢都無瞓過，上到playgroup其實佢隻眼都細哂，表現不在狀態。平時上playgroup Ambrose都好少喊，係有一次佢眼瞓豬重俾人抆頭髮喊左幾聲就停左，佢其實都幾enjoy上playgroup，我估！今堂playgroup佢又係眼瞓，加上玩彩虹布，我地唔俾佢爬開一定要佢玩，佢又喊幾聲，真係可想而知佢有幾累！我都好擔心佢上完堂趕過去愉景新城未必會瞓，因為表姐都响車度，佢一定唔願瞓！

好好彩，佢上車同表姐玩左一陣，佢就開始瞓著左，表姐都係，真係超級好彩！因為車程唔耐，兩個小朋友响中途先開始瞓，去到泊車嘅時候都係瞓左一陣。見未夠鐘報到，我地停左車之後由佢地瞓多一陣先，老公落車出去行吓，表姐幾乎係同一時間就醒左，只係等Ambrose而已。到差唔多夠鐘去報到嘅時候，只聽見Ambrose發開口夢，講左一句外星話，之後再半句，咁就醒左，笑死我！

一行人去報到。好快已經夠鐘入去standby熱身。因為只可用一樣野黎引bb，我攞左個殺手間，就係上鏈蟲蟲。呢條蟲一出，Ambrose一定會起動去追，係百發百中咁濟，只係亦有機會佢唔係追住條蟲，佢係會同條蟲相反方向速逃，咁就弊傢伙喇！不過因為我日日返去都會同佢一齊周屋爬，所以第二殺手間就係我自己喇，我一爬，佢一定會跟住追我，哈哈！熱身時間我攞左條蟲出黎，果然，Ambrose一見條蟲行，佢就起勢去追，真係超快，唔係講笑，連計分員都忍唔住話佢好快，我見佢無因為瞓得少而唔願郁，真係放心哂！不過為免佢爬得太攰到比賽會失準，我收左條蟲，然後俾佢自由發揮一下。

熱身一排司儀終於行出黎叫我地standby响指定地方，我抱起Ambrose去到起點，佢不斷掙扎要落地爬，我就不斷拑實佢唔俾佢落，果兩個司儀，唉，真係俾佢地激死，我好辛苦咁拑實Ambrose，佢地原來有成抽野要講，講極都唔完，我又要一手拑住Ambrose，一手又要準備同條蟲上鏈，上左鏈嘅蟲又要定住佢唔好郁，真係好難攪，我就不斷大叫講完未呀，雖然好無禮貌，唔知佢地聽唔聽到，不過我真係投降啦，再唔開始Ambrose可能扭落地落唔到發脾氣喊，到時一開始就坐左响度唔肯郁係咁喊真係好掃興架麻！

終於司儀話開始，我即掉條蟲落地。可能條蟲上左鏈定住左好耐都無放度，一放落地都唔多郁，Ambrose啱啱扭完一放佢响地條蟲又唔多郁佢又唔大反應。不過我係咁拍張地墊同震吓條蟲，唔使幾秒佢郁番，Ambrose都一如平時咁起動追，真係好快，簡直係一枝箭咁衝左出去。我自己無周圍望，不過都見到係Ambrose一馬當先去終點，而司儀都講緊七號仔（我地條賽道係七線）一馬當先差唔多到終點喇！點知Ambrose就响離終點差一步嘅地方停左落黎，望實响終點坐左响度嘅計分姐姐唔郁，真係俾佢笑死！因為前面已經有個計分姐姐坐响度，老公又响果度錄影緊，我唔可以帶頭爬住引Ambrose行埋果步，唯有掉左我部Iphone出黎引佢，不過佢都係無動於衷，只係自己望夠喇就爬多兩步過埋終點，時間係十七秒，不過已經 三甲 不入，只係排第五，唉！真係好失望，不過亦都好好笑！

我同呀仔講第時大個唔好成日掛住望女仔呀，同埋要望都要棟d質數高d先麻！