智慧寶寶 － 兩個半月進度

八月初買左智慧寶寶，頭一日就同Ambrose睇身體部位字咭，見佢都幾有耐心睇，好開心！不過呢個情形佢都只係維持左幾日，我地已經發覺佢唔鍾意睇，一攞出黎佢就顧住搶筆，再唔係就唔睇你點字，搶埋張咭打開入面睇圖，同佢睇幾張咭真係好似打仗咁！有時候就算我好成功咁無比佢搶到d咭或筆，亦都唔見得佢真係有望到張咭，真係好氣餒，有d似之前同佢碌dwe字咭咁，唔通又要好似上次咁同佢搏鬥一段時間先可以正經咁睇？更嚴重嘅係，佢已經去到一個地步係我地攞d咭出黎叫佢引佢一齊睇，佢係可以無反應走左去，完全無興趣咁！相比起同期我地買嘅fun with words果枝mickey筆，可以睇得出佢係鍾意mickey筆唔鍾意智慧寶寶喇！真係好失望！可能我地對dwe都有好嘅評價，而且dwe真係內容豐富好多，好多野都好配合，唔似得智慧寶寶主要得d咭，公仔唔吸引，又真係好難怪Ambrose無興趣，我地都無咩心機同佢用呢套教材！而好彩嘅係Ambrose都鍾意聽歌仔，我偶然都會點讀d字之後比佢聽枝筆唯一一隻歌仔，務求唔睇字咭，聽吓都好過無啦！不過聽得一排，Ambrose連首歌仔都無咩興趣，自己就更加放棄用套教材！兩個幾月以黎，都重係開頭抽出黎果十張字咭無轉過！

今個月，唔知點解無啦啦又有人同Ambrose攞住枝筆點讀，不過係點讀海報而唔係字咭。唔知係咪因為Ambrose終於都識得揸住枝筆知道邊度點落去先有聲（佢之前係將成枝筆打橫拍埋去d字咭同海報度以為咁樣會有聲），加上自己可以行黎行去，自己可以任意行埋去點牆上嘅海報而有滿足感，又唔知係咪佢對於動物有濃厚興趣而海報其中一張係動物，點讀動物時會有果種動物嘅叫聲令佢好有興趣，見佢好鍾意攞住枝筆周圍點，好開心！我地靈機一觸將原本佢唔睇嘅身體部位字咭抽走，抽出動物字咭俾佢自由點讀。果然，佢真係好鍾意睇！一口氣睇十幾廿張都得，真係驚喜！而家有時佢都會手指指，指住個放智慧寶寶筆嘅櫃筒，好似係叫我地攞俾佢玩咁！有時佢又會係咁抆起攝埋一邊嘅海報出黎，咁我地都會知佢想要筆！有時佢攞住枝智慧寶寶筆黎點普通海報又或者dwe海報，佢暫時都未係好分到邊枝筆點邊d海報，不過對於現有嘅進展，我都好滿意，起碼佢開始有興趣去玩，唔會走左去！我相信任何野只要以興趣行先，係唔難再發展落去！希望Ambrose繼續對呢套教材有興趣，唔好浪費就好喇！