天水圍嘉湖海逸酒店

之前聽Ellen講天水圍嘉湖海逸酒店有個幾大嘅playroom，又有泳池，一方面幾想同老公二人世界去住吓relax吓，另一方面又想帶Ambrose去玩，順便又可以試吓究竟Ambrose係跟人瞓定跟地方瞓！一直都係得個諗字，因為之前奶奶乳房原位癌要等睇report，好多野都hold住左唔敢四圍去玩，前兩日佢睇左報告知道係零期cancer，雖然都係cancer，不過係不幸中嘅大幸，大家都叫做鬆一口氣，見公司有住房優惠，老公就話不如星期六入去住返晚啦！咁啱Ambrose星期日又唔使上playgroup唔使一早撲出去，咁我即刻行動去book房喇！

可能奶奶見book間房咁平，佢又走去問姑仔去唔去，想話兩家人去熱鬧d喎！原本都有諗住仿效Ellen日頭同個仔玩完之後送返個仔俾奶奶湊，然後同老公入返去酒店二人世界，relax一下，最重要係可以好舒服咁瞓到第二日，諗起都正！不過而家奶奶叫埋姑仔，都無得咩二人世界喇！諗住佢之前病等睇報告大家都好down咁，咁佢想一齊去我咪無出聲，黎個family gathering，大家去散吓心囉！至好彩嘅係我地公眾假期入住，前一日我臨急去book多間房都重有房！

兩家人gathering，我地都係揸車入天水圍，真係唔可以睇少去一晚酒店要帶嘅野，重要係屯門同天水圍好似好近咁！我地一抽二袋咁入去check in，無belt boy，自己推住bb車載貨，都幾誇張，都無法，一共三個小朋友，想少野都幾難！

Check左in之後我地好快入左房放低d野準備出發去玩！間房真係唔錯，一入去左手邊係廁所，好大吓！右手邊係衣櫃門隱藏雪櫃加小廚房（有洗手盤同煮食爐），行入少少係個小偏廳，有沙發同茶几，同埋小餐台連椅，再入少少就係張大床！估唔到咁平價錢有咁大間房！Ambrose有足夠地方走動，唔會迫夾！

放低野之後我地是但食左少少野，把握時間去樓下遊樂場同playroom玩喇！不過下午時份室外遊樂場都幾曬，奶奶同姑仔都怕曬，係咁叫入室內玩！其實小朋友曬一陣我覺得無咩所謂，成日都係冷氣地方行街，甚少哂太陽出一身汗，難得兩家人去玩，成個遊樂場又只係得我地，我其實唔想咁快入playroom，不過都無計！落去攞左個入playroom嘅password就入去玩！同出面一樣，無人去架！得我地玩！間房其實都叫幾大，全房都舖左軟膠地墊，好安全！裡面其實設施簡單，有兩個玩具屋仔，有兩個帳蓬連隧道加波波，有個滑梯鞦韆架，有張mini氣墊板球台，另有一個洞洞帳蓬可以俾小朋友掉波波入洞！其實唔叫多野玩，可能自己都有滑梯同帳蓬隧道，所以唔覺果果度d設施好吸引！不過可能果度大，又有表姐一齊玩，成間房都幾colourful，牆上又油左d唔同圖案，Ambrose入到去同表姐一齊大叫，好似好好玩咁，又行左又行右，又爬又跑！

玩左一陣都快五點鐘，我地book左六點半buffet dinner，為免d小朋友夜晚食野先扭眼瞓，我地玩到咁上下就湊哂上去瞓覺先！點知Ambrose唔肯瞓，抱佢上床佢又走落床，又喊到好利害，我地重諗唔通要返屋企？！見佢重有成九個字先夠鐘食粥，但係咁扭我地唯有餵粥仔，佢又肯食，點知就係坐响沙發食食吓釣魚！終於都瞓左覺喇！抱佢上床瞓左陣，爹爹起身咳左兩聲佢就開眼，聽到爹爹入左廁所沖涼佢又“吉”起上半身去周圍望，又再撻番落床再瞓，隔一陣佢又開眼，又再望吓個廁所，又再撻番個頭落張床瞓．．．．．．如是者幾次，到爹爹出左黎行埋去睇吓佢，佢竟然成個人坐左起身！前後瞓左响床都無九個字！

見Ambrose起左身，又未夠鐘食buffet，抱左佢去行吓附近商場，行左陣就去食buffet喇！

Dinner buffet係出乎意料地好，雖然食物種類又唔算勁多，都叫可以，食物都好味！我地都係第一次帶Ambrose去食buffet，原本以為實攪唔掂，好彩又ok喎！Ambrose重不停咁要食野，根本無停過，佢真係破哂戒食左好多唔同嘅野，連凍野都照食呀！我地話好抵，因為Ambrose係免費，佢都食番夠本呀！哈哈！

食完buffet原本想話行一陣商場，點知沿路行去班細路又掛住玩！一路行一路行左去玩地下一個個大石波波，行前又行後，一條唔太長嘅路，行左好耐都行唔到，眼見d店舖都關左門，我地咪唯有坐在路邊睇班細路玩！

玩左一陣我地都係決定不如上返酒店個室外遊樂場玩，又係慢慢行返酒店，好彩個室外遊樂場原來唔會關門，而且重有大燈照住好光猛！又係全場得我地玩，d細路爬上爬落玩個不亦樂乎，大人就都幾攰，要一路追住佢地驚佢地有危險整親，而Ambrose就更加，因為佢細粒好多野都上唔到去玩，要“eer”我地抱佢上去佢想玩嘅地方，真係攞命！

到咁上下，我地又要湊仔沖涼。原本Ambrose响沖涼方面都幾好，佢唔使用盤沖涼，係照淋花灑，我地可以煩少一樣野！點知間酒店個花灑係固定左响上面唔可以攞出黎，而水龍頭出水又矮左少少，好難叫Ambrose一直蹲在下面沖涼唔起身，所以我地都唯有開一缸熱水同Ambrose浸浴，所唔同嘅係，佢都係企起身咁浸浴囉！哈哈！不過其實都危險架，因為都驚佢“線”腳滑到浸親，不過真係無辦法之下嘅辦法，唯有兩個人一齊同佢沖，以防萬一囉！

沖完涼，心思思又走去隔離房探表姐，哈哈！真係好似去旅行咁，唔願瞓！原本Ambrose晚晚大概十點就瞓，就算唔係佢都會捽眼捽面表現眼瞓咁，今晚成十點幾佢竟然無，望落重好似一d攰都無咁！好神奇！姑丈同Ambrose用點讀筆睇書，Ambrose又肯跟住姑丈好正經咁睇喎，本書重唔係Ambrose係表姐架！睇左大概幾個字咁耐，Ambrose終於打第一個喊露，果時都成十一點喇，我地即刻返房沖奶俾佢瞓，佢飲埋枝奶就瞓左！真係好簡單，完全無扭，同下午唔知點解喊到拆哂天有好大分別！好彩唔使真係漏夜返屋企咋！

呢一晚我瞓得好舒服，一來張床大左，所以即使Ambrose都係半夜開始企左起身要爬黎同我地瞓，都唔會踢到我迫埋一邊迫住瞓，二來可能同酒店果塊遮光curtain係有關係，間房暗d真係好似瞓得好d咁！Ambrose係個人肉鬧鐘仔，即使間房暗過平時，佢依然係七點幾就起身要飲奶奶！唔會因為之前一晚夜左瞓就瞓晏d！真係嘥哂個咁正嘅curtain！好彩嘅係佢飲完奶奶都係瞓多陣，我地都可以瞓多陣同埋睇左少少戲先起身！

九點幾十點一家三口都起哂身，之前食buffet其實係食果時好飽，過後好快餓，所以我地一早起身已經好肚餓，打俾隔離房又重瞓緊覺，我地都係唔等佢地出左去食野先！天氣其實唔係好凍，不過又無話好熱好大太陽，見Ambrose流鼻水同咳又未好得哂，都係唔去游水，費時佢攝親又麻煩！所以都係出左去食個早餐行左一陣，等埋姑仔果邊食埋個早餐，我地又去左playroom玩多陣，點半鐘左右就check out喇！