換左架新單車俾Ambrose，踩開三輪車嘅佢竟然唔識踩單車，爹爹媽咪都有d意外，以為係一樣嘅添！不過Ambrose一向大肌幾好，加上佢又咁熱愛踩單車，媽咪估計Ambrose一個月內應該會學識。點知，今日佢無啦啦打到圈踩喇！ 二月十九日 買嘅單車， 二月二十九日 已經踩到喇！十日咋！真係唔可以睇小Ambrose！從此以後，爹爹媽咪同佢去踩單車將會有好大運動量喇！因為要追佢架單車，驚佢有危險麻，單車一踩去得遠過三輪車，下次同佢去踩要著番對波鞋至得喇！
2012年2月29日 星期三
轉讓動物造型貼紙一卷 (已售)
一卷唔記得有幾多張貼紙喇，應該係二百張左右，唔sure！一卷有六款動物造型貼紙，圖入面為duplo系列lego作比例參考。全新，轉讓價為$16一卷，屯門／灣仔面交，郵寄則郵費另付，有興趣請私人留言給我！
轉讓Colorations Training Scissors
之前托表姨媽响美國買番黎俾Ambrose練習用較剪，不過等到表姨媽返黎時，Ambrose已經開始用zebra較剪，重已經有概念點用較剪！可能佢已經認定左zebra較剪係佢專用嘅，所以對於呢把training scissors完全抗拒，更唔好話同一把較剪要同媽咪一齊揸住，NO WAY啦！由於Ambrose唔肯用，加上佢又已經識得用較剪，呢把Training Scissors完全無用武之地，所以都係轉讓啦！用法係小朋友手穿入裡面嘅圈，大人同時穿入出面嘅圈，咁大人就可以同小朋友一齊開合把較剪，從而令小朋友明白點樣用較剪！九成九新，未剪過任何野，轉售價$20，有興趣請留言！
2012年2月27日 星期一
沉迷Thomas路軌火車 (2y6m)
之前有d亞洲萬里通嘅miles到期，所以換左套Thomas and Friends Starter Set俾Ambrose，佢對架車其實都幾有興趣，至於路軌，唔知係咪因為媽咪好怕呢d要砌哂出黎嘅野，阻住哂，所以媽咪一直無點同佢砌過，更加將d路軌擺埋左，一路都相安無事，Ambrose又好少會摷出黎要砌架喎！
點知早兩日姑姐終於摷番袋Thomas路軌火車出黎，佢唔要，送左俾Ambrose！其實Thomas路軌火車都唔平架，唔使錢就梗係開心啦，不過見到果大袋野，媽咪真係好頭痛，邊度重有位擺呀？真係要抽d時間執吓d書同玩具至得喇！
以為Ambrose唔係太大興趣，點知果晚攞返黎，佢已經急不及待自己走去打開攞黎玩喇！真係好奇怪！明明自己都有，平時又唔覺佢玩咁！爹爹同佢一齊砌一齊玩，佢不知幾開心，唔捨得瞓覺！瞓左第二朝都要撲出廳掛住玩，真係服左佢！
今晚放工返去，一地都係路軌，要叫Ambrose執番先開到飯食！好彩，叫左幾次佢都肯拆左佢執番埋！好聽話，重要好叻咁自己用筷子“爬”哂成碗飯！佢食完飯心急到完全唔記得左要食jelly，直接跑去堆Thomas路軌度，叫媽咪陪佢玩！其實媽咪唔鍾意玩呢d，又唔係幾識砌，所以就叫Ambrose自己砌，Ambrose望實媽咪話“你唔同我砌呀？”媽咪就話你試吓砌先啦！Ambrose走去攞左兩塊路軌黎砌，都砌到喎；再攞，好似又麻麻地得咁！媽咪忍唔住出手喇！於是乎，媽咪就同Ambrose一人砌一邊，砌到最尾由媽咪駁埋一齊，整左個好大範圍嘅路軌！Ambrose急不及待攞d車出黎放落去玩！其實都係架火車自己行，有時都唔係好明點解小朋友咁鍾意玩，哈哈！
之後Ambrose要揸埋直昇機，佢就開心啦，呢架野不知幾嘈，平時唔開慣電視慣左靜嘅媽咪，不知幾受罪呀！
2012年2月26日 星期日
尖沙咀消防局開放日 (2y6m)
今日上完畫班，接埋表姐就出發去尖沙咀，一來諗住行街，二來諗住去消防局開放日！不過其實都知應該好多人會去，所以都諗住揸車經過時望吓多唔多人至決定去唔去！點知離遠見到都幾多人吓，大表姐話佢去過唔想去，想行街！但二表姐同Ambrose就話要去，結果當然係去左啦！
門口已經擺左架消防車，好多人都排隊抱小朋友上去影相，咁多人，媽咪真係懶得排呀！唔排就入左去睇野喇，都係有好多消防車，救護車同埋電單車，媽咪想講真係好多人，d隊排到轉黎轉去，都唔知邊度打邊度！本來都好想搵一條黎排吓影相，但爹爹去左泊車，媽咪自己湊住Ambrose，人又多，如果再要拖住佢行黎行去睇吓排邊條同搵隊尾，真係好狼狽！所以媽咪只可以抱住Ambrose，同佢睇吓d車就算喇！都幾可惜！d消防電單車，好型呀！不過要隔住隊海去睇囉！
幾經辛苦，行左去消防車同救護車嘅車頭，見無人排，所以是但車頭都影吓啦，哈哈！有個消防員企响度同人影相架，媽咪叫Ambrose行埋去同消防員哥哥影張相，點知佢又驚，結果係媽咪抱住佢行埋去同消防員哥哥影囉！
可能今次開放日連埋個嘉年華，出面有埋好多攤位遊戲，但又係好多人排，no way喇！見到有魔術表演，Ambrose話要睇！之後又有拉丁舞表演，大表姐又話要睇，就係咁睇表演嘅時間重耐過睇消防車嘅時間，哈哈！不過媽咪都幾鍾意睇拉丁舞，真係幾好睇架喎！
失落於影電單車，原本都想話睇吓有無關於消防車嘅紀念品買，點知d紀念品全部都係for大人嘅，唔係杯就係匙扣同埋袖口鈕，無收獲啦！如果消防局開放日無咁多人就好喇，下次試吓留意d細局再去影過先！
去完消防局，大人散哂，小朋友全部未瞓過覺，食埋野都係打道回府啦，架車重要泊到好遠，以為會响海港城行街架麻！
神氣揸筷子 (2y6m)
估唔到Ambrose一換左有圈嘅筷子後咁快上手，幾乎係一攞上手已經識得用，唔使教，只係教佢穿邊隻手指入邊個圈！有見佢已經可以用到筷子，經Wing姨姨提醒，其實出街都開始要攞埋筷子架喇！所以為左個靚靚筷子盒，媽咪又買多左對Mickey餐具set，有學習筷子同bb膠匙叉，匙叉就就無用架喇，太bb喇！好彩吉之島做緊bb節，折左都重平過媽咪果時買果對Combi筷子！連續買左兩對學習筷，咁一對咪可以放去婆婆度囉！
今晚去左婆婆度食飯，Ambrose又係堅持用筷子，神神氣氣咁，真係服左佢呀！睇佢有姿勢都有實際嘅，呢餐飯，都係用筷子食，唔肯用匙喇！Ambrose重周圍同人講，佢同邊個邊個一樣用筷子，哈哈哈！
食雞翼好滋味 (2y6m)
Ambrose同爹爹一樣，好鍾意食雞中翼！尤其係鍾意用手就咁揸住食，佢就好滋味喇！媽咪次次見到都頭痛，佢對手勁油，又會摷頭髮，又會摸呢度果度，咦～～
呢一餐，佢食左四隻雞翼呀！人仔細細就食咁多，好利害！
Ambrose上畫班之四 (2y6m)
今日又係爹爹送Ambrose上畫班，媽咪瞓到唔願郁呀，哈哈！
爹爹話今日用左少少時間整埋早幾堂果個pizza，重以為無野要再整，點知又話要整埋先！又以為會再搓其他pizza料放上去，點知原來只係擠d顏料上去咋喎！爹爹話老師俾Ambrose果枝顏料，Ambrose用力擠極都無野出，點解成日都係咁架？唔係擠唔出就點唔到顏色，好彩返埋呢堂會轉去第二度上啫！
用左少少時間整埋舊pizza，之後就係畫畫！其實媽咪都prefer畫畫，可以俾Ambrose多d機會玩顏色，奈何上左幾堂都係整黏土，真係悶死人！今日畫嘅係企鵝，不過媽咪一見到嘅時候，唔知道以為係雀仔，嘩哈哈！
2012年2月25日 星期六
Ambrose上芭蕾舞班之二 (2y6m)
今日Ambrose上芭蕾舞班，雖然好似一見到咁多人就怕怕醜醜咁，但又係一見到表姐時就高高興興！今日雖然都凍左少少，不過為左方便上堂，都係同Ambrose著好legging同上衣，加件褸就出街，去到一除褸就得，唔使又除又著咁麻煩！今日好順利同佢著埋對芭蕾舞鞋，開開心心咁拖住表姐隻手行入課室！
又係一入去就關左門，想睇都睇唔到！不過爹爹例牌坐果度等佢落堂，上堂中段表姐走左出黎話要vivi，所以爹爹至可以見到Ambrose分組扮太陽花！估唔到今堂表姐又要走出黎vivi，爹爹話見到Ambrose响度搬膠地墊，重俾老師問佢重咩走去搬野！哈哈哈！原來佢都唔係咁留心上堂咋喎！
2012年2月24日 星期五
情人節蛋糕 (2y6m)
情人節果日無出街食，爹爹同Ambrose走去買左個情人節蛋糕返黎。爹爹已經同左Ambrose講買俾媽咪食，Ambrose已經知道架喇！但個蛋糕一攞出黎，Ambrose就已經超興奮，以為係自己生日！爹爹叫佢聞吓個蛋糕，點知佢聞吓聞吓伸埋條脷出黎！之後重指揮媽咪去攞“candle”，情人節蛋糕黎架！但Ambrose話要，咁咪點囉，點完之後，Ambrose就話要唱“Happy Birthday”喇！佢重要唱漏一句，唱到Happy Birthday to you後面再加個Ambrose，笑死爹爹媽咪，唱完又走去吹“candle”，之後就話錫啖先！真係以為係佢生日咁，哈哈！
Thomas學習筷子 (2y6m)
其實買左對Combi嘅學習筷子好耐，但一直都無俾Ambrose用，一來唔覺得佢有興趣要用筷子，二來媽咪又覺得可以大多少少先至用都得！點知上次同同學仔媽咪飲茶，大家講開用筷子問題，先知原來好多媽咪都已經俾佢地嘅小朋友嘗試用筷子喇！咁即係Ambrose都可以開始試吓、熟習吓先啦！所以媽咪就攞左對Combi筷子俾Ambrose試！唔．．．．．唔可以話Ambrose用唔掂對筷子，佢都勉強夾到餸食，不過因為Combi筷子只係有個托托住隻手指公位，所以當Ambrose夾吓唔得又扭吓又擰吓之下，媽咪發覺Ambrose雖然係夾到，但手指嘅位置就錯哂，佢只係務求用果兩枝筷子夾到野黎食，完全無理手勢！
因為咁嘅原故，媽咪今日走左去吉之島買左呢對Thomas學習筷子，起碼手指位全部都係圈圈，手指可以穿入去唔會咁易走到出黎，唔係吓吓要同Ambrose擺番隻手指响個托上面都幾煩架麻！本來响灣仔玩具街見過同款賣$49已經覺得ok，因為Combi買嘅時候係正價，要$6x，咁比較之下就覺得$49係平d！點知超之島標價$38，重要有八折再九五折，折左只係$28，超值！
估唔到即晚再試呢對新筷子，Ambrose真係好快上手，佢自己輕易夾到餸食時都超級興奮同得戚，哈哈！佢重不斷講話“我同爹爹媽咪一樣用筷子呀！”不過，佢用左筷子就唔肯用匙“不”飯食，d飯又點夾丫？夾到都食得好慢呀，唯有教埋佢用手攞起個碗“爬”飯入口啦，攪到成檯都係飯粒！
2012年2月23日 星期四
反斗城清貨玩具
媽咪發現反斗城有個位置係專放清貨玩具，價錢超平，只係包裝盒可能比較破舊，份玩具其實係無任何損毀嘅，買黎自用，無咩所謂啦！所以，媽咪耐唔時都會收工去睇有無好野買！當中真係買過唔少抵到爛嘅心水玩具：
１） Montesorri嘅圓柱組合，原價唔知，但一定唔平，清貨只需$120！Ambrose玩左成年，而家有時都重會攞黎玩吓，只係無啱啱買番黎咁有興趣，但都ok，抵抵抵！
２） Melissa and Dough嘅開鎖板，原價一定過$200，媽咪用左$100買，真係好鬼抵，一見到嘅時候就攞起死都唔放！哈哈！Ambrose唔知係咪好細個已經玩開呢個開鎖板，所以佢比起其他朋友仔都真係靈活d架喎！
３） Smart Games嘅Day and Night積木，原價都係過$200，媽咪買左$100，嘩哈哈！Ambrose都幾鍾意玩，不過暫時佢只可以跟住圖砌一幅起兩幅止，可能佢嘅觀察力弱d，一玩唔係佢強項嘅野佢就無咩心機！
４） Leap Frog嘅Fridge Phonics，原價$199，清貨只需$90，呢盒真係好鬼抵，加上之前媽咪一直都想買但嫌貴，一見到佢有盒清貨，真係以為自己發緊夢，哈哈！
重有好多濕星野，好似crayola嘅crayon都買過，太多唔係好記得！
今日收工又貢左入反斗城，今日好多好野！好可惜，Ambrose已經有類似嘅，又或者唔啱玩，或未啱玩！好似有：
１） 搖控巴斯光年，原價$799，清貨$400，雖然都重係要$400，但真係好平，因為佢平時真係賣$799架！不過Ambrose已經有一個一樣但無得搖控嘅巴斯光年，無都可以諗吓嘅，哈哈！
２） Thomas and Friends火車沖涼玩具，原價$199，清貨$100！
３） Thomas and Friends嘅雙軌火車套裝，唔記得左幾錢，不過又係半價！
４） Thomas and Friends手提火車玩具（有燈），又係半價！
５） 巴斯光年電腦，半價！
６） Leap Frog點讀筆，原價$399，清貨＄200，媽咪覺得幾抵，都有心動想買，見平時耐唔時都有Leap Frog嘅有聲書清貨，咁樣執平野都唔錯！不過都係怕怕地唔知有無壞（應該可以去收銀驗左先買嘅），加上屋企好多點讀筆啦，算罷啦！
７） 男仔好鍾意果d海棉彈槍，有長有短，唔記得幾錢喇，都係半價咁上下啦！
８） 公主玩具，因為係女仔玩具，完全無攞上手睇，哈哈！
唔知點解今日見到呢批清貨，所有盒都好好，無穿無爛都半價，真係難以置信！最後媽咪只係買左盒Smart Games嘅Penguins on Ice，諗住送俾大表姐嘅！原價$179.9，清貨價$80，成盒野都搵唔到有問題，抵！
其實平時清貨重有好多好野，都唔一定係殘盒，有d重係無穿無爛架，有時重唔止玩具，重有浴盤、廁所仔等嘅嬰兒用品，如果撞啱有用又未買，真係好正囉！所以，有時間入一入去望吓，分分鍾執到好多荀野架！
Sticker Fun – 反斗車王排隊隊
見Ambrose原來都鍾意玩sticker scene，今晚媽咪發揮創意，攞左之前Wing姨姨送嘅反斗車王貼紙出黎同Ambrose玩，索性DIY Sticker Fun！
攞左張唔用嘅海報背頁黎用，媽咪就隨手畫左少少背景，叫Ambrose將反斗車王嘅車車分方向貼响兩條馬路上面！Yeah～～～佢果然鍾意玩喎！如果好似平時咁只係俾張貼紙佢自由發揮任佢貼，佢一定好快無興趣玩擺番响度，又或者走去貼地貼牆！而家响張紙度畫少少野，佢就覺得唔同，好有心機貼，哈哈！
整好左之後，Ambrose攞俾爹爹睇，當然爹爹大讚啦，不過就話媽咪個背景咁寡，話要畫幾棵樹喎！Ambrose又要畫埋一份，點知佢畫到亂哂！又堅持攞枝黑色crayon畫，佢話佢畫海豚喎！
呀仔，海豚要响海入面至得架，佢唔會過馬路架！
2012年2月22日 星期三
轉讓基礎漢字啟蒙級500兩本
上年七月買，諗住試吓Ambrose有無興趣先至考慮買一套，點知買番去睇過一次之後，第二次攞出黎睇時Ambrose已經耍手擰頭，點都話唔睇，如是者試過隔一排再攞出黎俾佢，開頭果下都肯，一打開都未講完一課就話唔睇，相信佢真係無興趣兼唔鍾意！兩本書近全新，原價$48一本，七折轉讓，兩本一併轉讓不散賣。屯門／灣仔面交，郵寄則郵費另付，有興趣請私人留言給我！
面試結果@培正幼稚園
面試結果早於2月3日已經收到喇，係爹爹收信，薄薄一封，唔收呀！其實都預左唔收，六千人爭二百四個位，邊有咁易丫！預左還預左，都總會有少少失落嘅！一日咁多啦！之後已經唔記得左呢件事，到今日至發現唔記得update blog，哈哈！
又係老土果句啦，去面試時好擔心Ambrose扭計喊，佢無喊住出黎，媽咪已經好感動，覺得佢好叻架喇，考到當然係開心啦，考唔到只可以話際遇問題，Ambrose同間學校無緣囉！
轉讓二手Vtech Sing and Learn Musical Mic
Vtech Sing and Learn Musical Mic，買返黎Ambrose無興趣，所以擺唔夠三星期就收埋左諗住遲吓攞出黎再玩過，點知一收就完全唔記得左！早排執玩具先至重新發現呢枝Mic，但Ambrose已經有自己嘅真Mic同埋Karaoke唱歌Mic，對於呢個比較bb嘅玩具Mic，已經唔啱玩亦無興趣玩喇！呢份玩具好新，因為都真係無點玩過咁濟，有歌曲又有動物叫聲，盒已掉，反斗城原價$119.9，二手轉讓$70，只作屯門／灣仔面交，有興趣請私人留言給我！
2012年2月21日 星期二
Jusco Sticker Book I
今晚攞左之前响Jusco買嘅sticker book出黎俾Ambrose玩，呢本sticker book其實係情景貼紙。書嘅內頁分別係屋企嘅廳、房、廚房、花園同埋街外嘅垃圾站。而兩張貼紙就係唔同嘅公仔、人物同埋物件。Ambrose可以將相應嘅人或物貼响唔同位置度，好似食物、飲品同杯碟就應該响廚房，細微到應該貼响廚櫃度定檯上面都有；又例如一袋袋垃圾要掉出去垃圾站度；花要响花槽度等等！
原先諗住兩張貼紙玩住一張先，點知Ambrose一定要玩哂去，攪到又夜左瞓喇！不過再一次俾媽咪感覺到Ambrose對於呢d情景貼紙係有興趣嘅，而透過玩呢本sticker book，可以睇到Ambrose觀察力有幾高，亦都順便可以教佢物件名稱同埋唔同物件應該响邊度出現，又可以發揮創意，重有係練到搣貼紙技巧，係唔錯嘅小肌肉訓練！今晚玩哂兩張貼紙，大大小小貼紙應該都有好幾十張，Ambrose只係搣爛左一張貼紙！
DIY Color Matching Worksheet
之前媽咪買左pack有關顏色嘅貼紙，一式有幾張，買嘅時候其實都諗唔到用途，之後一直都擺埋左。早排執野時見到，加上發覺Ambrose其實好鍾意做功課，以致到媽咪呢陣子都不斷買workbook入貨，所以靈機一觸，諗到可以用呢張顏色貼子DIY做張顏色配對工作紙！之前做聖誕咭用淨左張黑畫紙，剛好用黎做呢張worksheet！
今晚攞左張worksheet出黎俾Ambrose做，佢都做得唔錯，只係白色同灰色因為貼紙印刷問題唔係好清楚至要媽咪提示，其他都可以自己搵到！連線concept因為做開學校功課所以唔使講已經識連喇！當然連線力度同埋直度都有待改進啦！最好笑係佢由顏色筆連線去公仔度時，往往都會俾自己隻手遮住d公仔，攪到佢好多次連連吓要縮開手去搵番個公仔出黎至連到，所以可能因為咁，有d線真係連到好迂迴，哈哈！
2012年2月20日 星期一
Dymocks雜誌
唔得喇，灣仔區真係無咩野好行，媽咪日日lunch去黎去去都係果幾度地方，真係會中毒呀！今日行經Dymocks，又忍唔住入左去行吓，點知又買左幾本雜誌，分別係Fun to Learn Friends，Thomas and Friends同埋National Geographic Little Kids！本National Geographic Little Kids重送多一本Ladybird嘅故事書，媽咪專登揀左The Lion King俾Ambrose，啱哂佢啦，佢成日話自己係lion，成日都响屋企Roar，哈哈！呢set書真係好抵喎，只係$25就有一書一雜誌，唔買對唔住自己咁，哈哈！
媽咪開始要戒毒喇，屋企嘅書櫃都放滿哂Ambrose嘅書，真係唔可以吓吓都話見到就買定先，因為已經買定左好多喇！
2012年2月19日 星期日
新單車
Ambrose識踩三輪車已經一段時間喇，而家佢可以踩得又快又自如，有時候爹爹重會同佢去附近嘅單車徑踩單車，一踩又往往個幾鐘頭，Ambrose真係好熱愛踩單車！不過爹爹同媽咪分別都聽人講話唔好俾小朋友踩太多三輪車，話踩三輪車嘅姿態同踩正式單車唔同，對腰定腳唔係幾好喎，如果要踩，就要正正式式咁踩單車。因為爹爹媽咪分別有聽過咁樣嘅說法，又見Ambrose學玩三輪車同滑板車都好快上手，所以既然有人話唔好，反正遲早都要買單車俾Ambrose，咁就不如早d買，早買早玩更加抵啦！
所以今日上完畫班就去左反斗城，揀左一輪，揀左Ambrose嘅至愛，Mickey單車喇！媽咪之前去交通安全城玩，見到小朋友踩BMX好鬼型，所以一直都想買BMX俾Ambrose！但係一來反斗城無BMX，二來原來要踩正式單車，Ambrose嘅選擇唔多，佢只可以揀12吋軑嘅單車，而一般嘅單車其實係14吋，Ambrose坐左上去係唔夠腳長踩囉！12吋軑嘅單車，款唔多，重一定係卡通公仔嘅！媽咪話不如再遲多幾個月至買，買架14吋軑嘅單車好似踩得耐d化算d，但爹爹話既然Ambrose未夠腳長，一定唔可以為左慳少少而要佢格硬踩架咁高嘅單車或者繼續踩住三輪車啦！何況，一架單車只係幾百蚊，過多兩三年再要換車，其實呢幾百蚊攤番開兩三年，其實唔貴，年中買少件衫都响番度！
睇得出Ambrose好鍾意架單車，佢由揀好部車之後，就已經係咁望實架單車，哥哥幫佢較番張椅低d，佢又蹲低去望；要去俾錢，又堅持要自己推去收銀度；要擺的士响車尾箱，佢又好似監工咁要睇住爹爹放上車至肯上車；落車後又第一時間衝去尾箱迎接佢架戰車，真係超級緊張呀！
原先以為Ambrose識踩三輪車，轉踩單車應該一樣無問題，點知佢未係好踩到，可能踩三輪車雙腳打圈嘅幅度細，而踩單車雙腳打圈幅度幾大，所以暫時佢只係可以踩落一下後停低，架車係可以向前行，不過因為無打圈踩，所以其實非常慢！不過估計只要多加練習，Ambrose應該可以好快掌握到好快學識嘅！
爹爹而家好期待Ambrose識踩單車之後，可以同佢一齊去單車徑一齊踩單車兜風嘅日子！哈哈！
Ambrose上畫班之三
尋日開party開到十一點幾，Ambrose晏左瞓，爹爹媽咪要執屋，攪到成十二點幾一點至有得瞓，重要成個人都散哂！爹爹提議不如今堂畫班請假，不過媽咪一心想快d上完呢幾堂畫班，快d轉去第二間學，加上唔想因為之前玩得晏左，咁輕易就話唔返學，免得Ambrose本來有少少唔想上畫班又要隔多一星期先再上會變得陌生！今朝Ambrose都唔係晏左好多起身，八點幾九點已經醒左飲完奶，係咁想叫爹爹媽咪起身同佢玩，但係爹爹媽咪真係攰到唔想郁，兩個都無理佢，媽咪重諗住都係算罷啦，打個電話問吓可唔可以改去後一個鐘頭果班！點知過左一陣，爹爹忍唔住Ambrose嘅攻勢，終於起身，見重有時間，都係同佢換衫出去上畫班啦！媽咪無起身，爹爹叫媽咪抖吓，事關次次都係媽咪去同Ambrose上堂，次次都係媽咪企足成堂等Ambrose，爹爹話輪住去喎！
匆匆忙忙出左門口，媽咪懶床一陣之後，都係忍唔住起身梳洗諗住撲出去接放學！十一點落堂，媽咪十點十一剛剛趕到，但原來已經落左堂，Ambrose剛出課室門口正在除手工衣！即係早左落堂啦，好彩都趕得切！
之前老師話今堂要完成埋前一堂果塊pizza，其實都唔知點解重有下半part，媽咪以為已經整完架麻！點知去到就見到爹爹手揸一紮輕黏土花，老師見媽咪到左，重指一指紮花其中一朵，由幾條條狀黏土痴埋一齊，佢話呢朵花好似手掌喎！媽咪覺得好奇怪，又話整pizza，點解又整左花架？媽咪即 時問 老師，佢至話因為今日有人黎試堂，所以今日整花，個pizza會下堂用一半時間去做番喎！真係激死人喇！媽咪一向唔會抗拒俾Ambrose做手工，因為媽咪知道Ambrose都喜歡做，不過觀乎上次做pizza嘅情況，太多idle時間，Ambrose又未掌握到搓黏土，睇得出佢都幾悶！上完呢堂畫班後，下星期Ambrose已經話唔去上堂，要响屋企畫畫，所以媽咪猜想Ambrose其實唔鍾意搓黏土，佢對油顏色興趣大d，所以媽咪當然唔想再上黏土啦！原本以為今堂做埋個pizza就完啦，點知而家整左花，下堂又要整pizza，計埋試堂已經上左四堂喇，下堂係第五堂，畫畫嘅堂數真係太少喇！媽咪真係怕開左一個唔好嘅頭，會令Ambrose唔鍾意上畫班呀！
講番朵花，其實真係唔知有幾多係Ambrose整，媽咪相信唔多！呢d黏土要搓都要用力，我相信Ambrose重未得，就算係搓到，應該唔會靈活到搓到指定形狀囉！
上堂趣事：今日Ambrose上上吓堂嬲呀！佢係嬲到鼓埋個腮，兩隻手短短咁撓响胸前，完全唔做野，嬲爆爆！哈哈！事緣今日玩輕黏土，有個小朋友好頑皮，竟然將舊黏土掉去對面位，Ambrose見到就發揮佢嘅小管家嘅本領，叫小朋友唔准掉，不過人家可能唔理又頂Ambrose嘴，Ambrose好似同佢鬧左幾句之後，就嬲到鼓腮同撓手，咩都唔做，要老師過去氹番佢至繼續工作，真係好好笑呀！爹爹重影低左呢個咁攪笑嘅過程添，呢個Ambrose真係好可愛！
2012年2月18日 星期六
Ambrose上芭蕾舞班之一
今日Ambrose正式上芭蕾舞班喇，好彩爹爹今日都放假，可以一齊去！因為前一晚試鞋時已feel到Ambrose唔鍾意對鞋，所以媽咪預感今日上堂會有阻濟！知道Ambrose唔鍾意對鞋，就算媽咪用好誇張嘅語氣講對鞋有幾靚同佢著得幾好睇都無用，爹爹索性同Ambrose講，話對鞋真係唔靚，不過對鞋只係著黎跳舞，只係著一陣，吩咐Ambrose今日上堂時要聽話著鞋，咁Ambrose又好似接受d咁，爹爹真係好治到Ambrose架！
因為天氣凍，媽咪又見條跳舞褲真係唔多fit，所以突然靈機一觸前一晚已去左Uniqulo買條legging俾Ambrose做跳舞褲，今朝响屋企同Ambrose著好跳舞衫褲，再加外衫外褲同褸就行得，去到文協，只係除左衫同褲，換件冷外套就攪掂！換好衫等左陣就同Ambrose著芭蕾舞鞋，佢都ok喎！只係送佢入課室，佢明顯未warm up，成個人呆呆咁，其他小女孩撩佢玩，佢都發吽豆，媽咪都知唔多對路！果然，爹爹行出課室後，媽咪正準備要走，Ambrose就拖實媽咪唔俾走，真係唔明之前幾次試堂都無咩問題，今次會咁唔順利，莫非Ambrose真係唔鍾意對鞋，所以唔想跳？
氹左一輪，終於等到表姐黎到，有表姐响度，係好d嘅！原先一見表姐到，爹爹就推Ambrose入課室，叫Ambrose入去等表姐，點知Ambrose又好堅持要拖住表姐一齊入課室，無法啦，佢肯入，都要順佢意思先啦！
課室門一關，又係咩都見唔到！爹爹又係留响度等，以防Ambrose扭計唔肯又或者要去廁所，佢話全班得Ambrose一個男仔，驚老師或其他家長唔識點幫佢去廁所喎！
後來，原來表姐中途要去廁所，課室門一度開左，爹爹話見到咁啱唱太陽花，見小朋友分成幾組响度扮花喎，好攪笑！
不過，計埋試堂都叫上左兩堂文協嘅芭蕾舞，兩堂都好似唱廣東兒歌咁，媽咪就有少少猶豫喇，咩芭蕾舞會係播呢d歌黎跳架咩？上次較貴果間芭蕾舞學校就唔一樣，真係播classical架喎！媽咪其實比較鍾意classical多點，起碼多聽classical對於個人氣質修養都係好架麻，同埋俾Ambrose學芭蕾舞，其中都想粗魯嘅佢學得溫文d，如果一直都係聽廣東話兒歌黎跳，似乎又唔多正統咁！不過今堂Ambrose有抗拒，都係等佢上完一期文協先至再考慮過唔過番正統d嘅芭蕾舞學校學喇！
寶貝Ambrose識分享 (2y5m)
媽咪一直都覺得Ambrose係好typical男仔一個，好粗魯，不拘小節，佢鍾意嘅野，全部都係好男仔嘅，好似動物、恐龍同車仔！佢嘅佔有慾係好強，有小朋友想搶佢玩具，佢會發脾氣打人或者喊，重要爭到都喊一餐，有時，佢都幾機靈，响小朋友未出手搶時已經洞悉到人地想搶佢野，佢已經即時擰開，哈哈！好多時候，有朋友仔黎同佢玩，本身佢都唔玩果樣玩具，但佢見有地玩佢就唔俾人掂，人玩咩佢就去阻止，有時真係唔明白點解佢會咁！
不過媽咪今日見到Ambrose進步左呀！今日爹爹嘅朋友黎左開party，連埋Ambrose有五個小朋友，其中一個重係得兩個半月嘅b女！b女好多時候都瞓覺，所以爹爹就叫朋友擺b女去Ambrose張床仔度，以為Ambrose會唔肯，點知佢又無野，佢重對b女好有好奇心，走左上床坐响床仔嘅床尾度離遠望b女，好攪笑！佢又伸手去摸b女，輕輕力咁，好叻仔！落左床，佢又企响圍欄度望b女，完全唔會覺得b女霸左佢張床！爹爹成日抱住b女，佢又無話呷醋扭計喎！
除左b女外，其他四個小朋友都係男仔，真係好熱鬧！佢地四個不時大叫大笑，果然男仔都係咁嘈架！巧朗哥哥比較怕醜同斯文，比較痴爹爹，唔知係咪佢印象中嘅Ambrose唔係幾好惹，所以巧朗哥哥實際無咩同Ambrose有交流，哈哈！Ambrose同斯翱哥哥就比較投契d，對上果次gathering，Ambrose已經好罕有咁對斯翱哥哥有禮，果時未係好識講野嘅Ambrose重係咁叫斯翱哥哥同佢一齊take turn排隊“sir”滑梯，今次再見面，估唔到Ambrose真係對斯翱哥哥特別好，又肯分享玩具俾佢，又一齊玩！呢d係咪真係大夾人緣呢？
Ambrose唔單止同斯翱哥哥，佢重想同曉正弟弟玩！不過曉正弟弟只有歲半，個性比較慢熱同埋唔鍾意其他人接近，好多時Ambrose都想同佢玩而攪喊佢，但Ambrose只係出於想同人玩嘅心態去接近曉正弟弟，唔係想整蠱人整喊人！奈何曉正弟弟真係一埋身都無做d咩野已經喊左，哈哈！正當曉正弟弟喊住走去佢媽咪度挨住，Ambrose就走左埋去，起初以為佢會格硬拉人地同佢玩，點知唔係！唔知係咪佢知道曉正係bb，細過自己，佢走埋去細細力用手拍佢背同肩膀，好似呵番佢咁，個樣又笑咪咪，之後又指一指佢嘅玩具角，好似係想同曉正弟弟講：你唔好喊啦，去果度玩啦，好多玩具架！哈哈！佢呢個動作一連做左好幾次，好可惜，曉正弟弟一味掛住喊，完全無望過Ambrose咁誠懇有禮嘅笑容！但媽咪全部看在眼裡，頓時覺得Ambrose又大個仔左，進步左呀！
我嘅寶貝Ambrose，媽咪鍚哂你呀！！！
2012年2月17日 星期五
Ambrose的芭蕾舞鞋
Ambrose响文協試左堂芭蕾舞之後，媽咪諗左幾日，究竟好唔好俾Ambrose學芭蕾舞呢？如果學，係咪响呢度學，定係上次果間好呢？其實，唔多唔少都因為“男仔學芭蕾舞會唔會好怪異”呢個問題纏繞住，令到媽咪想試但又有d卻步！左諗右諗，正反兩邊不停拉鋸，最後媽咪都係覺得反正文協咁平，試學一期睇左Ambrose嘅反應先再諗呢個問題啦，可能佢好鍾意，一定要學都唔定；又或者佢好唔鍾意，唔肯學就唔使諗啦！試學一期都係三百幾蚊，咪當俾Ambrose同二表姐去玩吓開心吓都好啦！當然，媽咪最擔心嘅係服裝問題，會唔會買跳舞衫重貴過學費好多呢？打左去問老師，可能真係太少男仔學跳芭蕾舞，老師可能洞悉到媽咪都唔想花太多錢買衫同鞋，加上男仔跳舞衫其實真係無咩特別，所以老師就話上身衫可以著返自己衫，下身就最好著單車褲喎！至於鞋，老師話可以代買， $120，佢會買黑皮芭蕾舞鞋喎！不過媽咪希望正式上堂時Ambrose就可以有鞋有衫有褲著，唔想佢仍然又係便服同襪咁上堂，所以同左老師講自己試吓搵左先，真係唔得，上第一堂時先拜託老師代買啦！
就係咁，媽咪就上網搵吓有邊度有得買芭蕾舞用品喇！原來遠在天邊，近在眼前！灣仔就有一間喇，咁媽咪可以lunch過去買啦！
二月十五日，媽咪就咁衝左上去諗住買對芭蕾舞鞋，但媽咪完全無同Ambrose度腳，只係話佢著波鞋幾號。個sales堅持買芭蕾舞鞋唔同買波鞋，芭蕾舞鞋一定要fit腳，唔可以好似買波鞋咁預大。就係因為個sales好堅持又話唔知波鞋碼點對芭蕾舞鞋，佢叫媽咪返去用張紙去印Ambrose對腳出黎先至黎買，所以呢日買唔到鞋，只係買左一條棉黑色短褲俾Ambrose跳芭蕾舞！
由於媽咪細個時都有學過吓芭蕾舞，當時上堂只係著技巧鞋，見其他同學仔都著對靚靚粉紅色嘅芭蕾舞鞋，真係好羨慕，又自卑囉！所以決定左俾Ambrose學芭蕾舞嘅時候，媽咪諗都唔使諗已經決定一定要買對正式嘅芭蕾舞鞋俾佢，一定唔要布鞋或技巧鞋！問左價錢，本地黑皮芭蕾舞鞋$128，入口貨就$170，媽咪決定買對平嘅俾Ambrose試左先！
二月十六日，媽咪攞返條短褲去問有無再細一個碼，原本都已經係XS架喇，不過著上身，短褲變左四骨褲，腰圍有少少鬆但可接受，但整體著上身唔多fit囉。可惜，原來XS已經係最細，唯有接受啦！攞埋張腳板印出黎俾sales幫手攞鞋！其實媽咪度過對腳板大概15cm鬆少少，所以預15.5(如有)或16都應該可以！個sales入左去好耐至出番黎，媽咪已經覺得好大可能無碼，點知佢出黎竟然攞對17碼俾媽咪，佢重攞對鞋去度個腳印，明顯大左架喎！媽咪質疑問，尋日另一個女sales話芭蕾舞鞋要fit腳至得，咁而家好似大左好多喎，個sales又話差唔多喎，因為男仔唔係著襪褲，著普通襪喎，所以可能厚少少要預埋喎！媽咪又諗住Ambrose返學白襪都係厚襪，所以咪聽佢講，照買囉！
返到屋企攞對鞋俾Ambrose著，都幾易著，不過真係大左少少，同平時買波鞋預大少少差唔多咁！同埋鞋頭條索帶都要索緊至可包貼Ambrose對肥腳，印象記得d人嘅芭蕾舞鞋真係頂趾咁，唔似Ambrose而家有虛位架喎！Ambrose試左一下對鞋已經即除喇，氹左一陣先肯著多次俾媽咪睇清楚，媽咪feel到Ambrose唔多鍾意對鞋，大件事！
二月十七日，媽咪攞對鞋返去換細一個碼，因為之前索緊左對鞋，除左又無特別解番開，個sales似乎有d微言，無法啦，諗住換唔到都要番呢對，唔想拆左返去又綁過丫麻！個sales又入左去好耐，出返黎時同媽咪講話最細17碼，媽咪好驚訝點解最細17碼時，佢至講其實唔係，係斷左碼喎，都唔知有無攪錯，尋日黎買嘅時候一定係無碼先至俾對17碼我啦！個sales再度腳印，佢話Ambrose腳得15cm，唔使著17碼，可以試15.5喎，咁媽咪話好啦，就15.5啦！點知又等左好耐，另一個sales出返黎攞住一對黑一對白嘅芭蕾舞鞋俾媽咪，話黑色只有15碼，白色就有16.5碼喎！真係俾佢激死！呢個sales就係當日死都話17碼啱果個sales喇！有咩理由會攞對15碼出黎俾媽咪至得架？？Ambrose對腳已經係15cm多少少，15碼一定唔啱啦！白色有16.5碼，但媽咪由始至終都話要黑色架麻，重要如果17碼都大要黎換，咁16.5又細左幾多丫？結果，媽咪迫不得已再問入口貨有無16碼，又係激死人！入口貨嘅碼同本地貨完全唔同架！個sales攞左對10碼俾媽咪，超大囉，一睇就知大過17碼添啦！佢竟然再問媽咪咁要咩碼，媽咪又點知喎，又唔知佢地點計，結果佢又攞對8.5碼出黎，望落都正常少少，度落張紙，好似真係剛剛好，用尺度，又有16cm喎，所以最終媽咪都要補錢買左呢對入口貨囉！
本來諗住買最少嘅野黎上芭蕾舞堂，點知對鞋都已經$170喇！最衰都係媽咪有芭蕾舞鞋情意結，哈哈！算啦，著上腳跳嘅，買貴少少都不為過嘅！媽咪對呢對芭蕾舞鞋真係愛不惜手，真係覺得好靚，細細對好cute呀！可惜唔係粉紅色囉！不過當媽咪攞出黎俾Ambrose試嘅時候，佢一見到即時話唔好，唔肯試！唉！咁貴買番黎，唔肯試咁點算好？氹佢話同表姐一樣，要著住一齊跳舞，佢竟然寧願唔學喎，真係頭都大埋！幾經游說，終於肯試一試上腳，真係一下咁大把！呢對鞋其實鞋形比本地果隻纖幼d架，媽咪都有擔心Ambrose對肥腳唔知夠唔夠入，加上佢唔係著襪褲，只係著普通襪，真係幾啜幾難入吓！不過著左入去又真係啱啱好喎，只係對鞋好似唔多夠橫咁，條索帶完全發揮唔到作用囉！所以都係決定明天上堂前問一問老師意見至俾佢踩落地喇！
呢對係本地黑皮芭蕾舞鞋，條褲suppose係短褲黎架！
呢對就係入口黑皮芭蕾舞鞋,真係好纖幼，個袋又窄又長架！
2012年2月13日 星期一
Pandora
之前上BK睇野，發覺好多人都講Pandora呢個牌子，再睇吓個價錢，真係唔明點解咁貴都有人買！有晚，同老公講起原來已經好少人响BK曬／講LV同Gucci，轉而係Chanel同埋Hermes，連一條Pandora手鏈都閒閒地要好幾千蚊，原來咁多人咁捨得買名牌！點解好似幾萬蚊一個袋都好似咁容易“帶”左佢返屋企！哈哈！當時，真係純粹討論，甚至乎，對於Pandora係咩黎，我完全唔知，只係知係手鏈！
點知，今晚老公趁Ambrose瞓左覺之後，無啦啦攞左袋野出黎送俾我，話係情人節禮物喎！估唔到重會有情人節禮物呀，真係好驚喜！佢重叫我估吓係咩黎，攞上手輕飄飄嘅一袋野，我隨便答係手鏈，心目中連少少idea係咩手鏈都無，咁就俾我估中左！原來老公買左條Pandora手鏈俾我！佢話條手鏈係有意思架喎！首先有個boy dangle charm，係代表Ambrose，而兩邊分別係dad charm同mum charm，代表我同佢，一家三口！而老公知我一向都鍾意玻璃飾物，佢揀左兩粒唔同色嘅琉璃珠，紅色係我鍾意嘅顏色，綠色係Ambrose嘅幸運顏色！老公話每個人嘅Pandora都有story嘅，呢條鏈就象徵左我地一家三口！
講真，收到條鏈嘅時候雖然都覺得靚，不過又好似有d唔等使咁！不過聽完佢咁講之後，又見到佢咁用心咁去睇人地嘅分享先至走去買條鏈，重用左個幾鐘慢慢襯，重如數家珍咁同我講咩charms係咩意思，淨係呢份心思，已經好感動啦！條鏈戴左上手，越睇越鍾意呀！不過，問極佢都唔肯講買左幾錢！
突然間諗，原來女人都係鍾意人買埋d唔等使嘅野架喎！以前收到嘅禮物，有d真係好實際，但問心，話好鍾意咩，又唔係架喎！收到呢份禮物，一見到時就覺得唔多實際，重諗買咩買咩重抵重好啦，但又出乎意外地超鍾意！原來，女人都係口是心非，都係虛榮嘅！哈哈！
訂閱：
文章 (Atom)