Ambrose上畫班之一

今朝同Ambrose上畫班，雖然媽咪早左成個幾鐘頭起身，幾乎只係晏過返工一個鐘起身，但最後都係趕頭趕命咁趕去，十點準時去到！唔知係咪因為趕住去，加上課室入面已經有幾個小朋友喇，Ambrose好似又怕醜病發作，個人即時發呆，唔知點算咁款！媽咪同佢著手工衣又唔肯，媽咪話媽咪入去喇，佢重竟然話好，可想而知佢幾怕醜，寧願唔上堂都唔入去！老師走左出黎引Ambrose，話今日整機械人，又有得玩水，聽落好吸引，媽咪唯有氹Ambrose話媽咪唔行開，一直都响門口睇佢，佢至肯著手工衣自己行入去，真係一額汗呀！

 

今日好奇怪，有兩個比較大嘅小女孩分別坐埋一邊，檯上面已有一個半製成嘅pizza，唔知佢地係咪上堂做唔哂，今堂補做定點？！不過最奇嘅係，老師本來已經開好哂粉筆盒同畫薄俾Ambrose，突然間又幫佢收埋哂！之後重攞左d輕黏土出黎俾其他小朋友搓。今堂計埋果兩個大少少嘅小女孩共有七個人上堂，其實果五個小朋友年齡就比較接近，但都以Ambrose最細，見佢地都唔係幾搓到撳到咁，媽咪見Ambrose嘗試搓，不過搓極都係一卷野，哈哈！其實都幾悶，但老師好多時都去take care果兩個小女孩，呢五個細路唔多整到都唔理！最 後 老師要小朋友撳成一塊三角形狀嘅pizza，當然果五個小朋友都整唔到，係老師逐個埋去撳出黎！但唔係話整機械人咩？？？

 

之 後 老師再分別俾左唔同顏色嘅輕黏土同埋膠刀俾小朋友整pizza上嘅餡料，其實又係整唔到d咩，Ambrose只係識用把刀係咁“咪”舊黏土，完全無點搓撳過！哈哈！其實都無所謂嘅，俾佢試吓，不過就嫌成堂都係咁，對住舊黏土無所適從，好似有d悶囉！最後就係幫pizza上色，再痴埋d餡料上面，要留响度吹乾下堂至攞得喇！

 

後記：今日上堂，見Ambrose有時都會望出黎搵媽咪，明顯比起第一堂緊張左！希望下堂佢可以自己上堂，唔好搵媽咪啦！今日我最擔心嘅事發生左，上上吓堂有小朋友話要去廁所，咁點呢？又係得老師一個人，但有七個小朋友！原來老師話一個小朋友去廁所，全班都要一齊去。畫室隔離就係廁所，老師要小朋友响畫室門外排隊，佢就鎖門。不過得佢一個人，佢顧得鎖門時，隊頭小朋友已經等唔到，佢要行喇！而因為畫室响商場入面，雖然早，但都有其他人行過，呢條隊又唔係排得好，其實都幾散吓！媽咪就企响畫室外，見老師好似麻麻地handle到，媽咪無刻意幫，想睇吓究竟老師平時一個人係點攪，當然話唔幫都好，媽咪對眼係唔會離開Ambrose！過左一陣，老師同小朋友出番黎入番畫室，媽咪其實見到少左個小朋友，得番六個，但唔知响入面發生咩事，所以無出聲，直至所有小朋友坐好哂之後，好 明顯 老師至發現少左個小朋友，佢即時又入番廁所捉佢出黎，但佢係留低左班小朋友响畫室直接入廁所搵人！唔知佢係明知媽咪响度至咁放心定係平時都係咁，不過佢咁樣俾媽咪覺得好無安全感！家長俾小朋友黎上興趣班，諗住你會睇實佢地，點知咁樣去廁所法，一個人睇住真係唔夠，真係可以漏左一個响廁所度！好彩係晨早流流無咩人，同埋廁所响正隔離，如果唔係，都唔知會唔會唔見左個小朋友，又或者有心人裝無心人，唔知會唔會有人吼呢d機會捌小朋友架麻！媽咪要再搵吓其他畫室資料至得喇！

 

另外，今日要幫pizza上色，可能所需顏料唔多啦，老師將畫筆沾左d顏料出黎放在色碟上，竟然重要兩個小朋友share一齊用！share用其實都唔係問題，因為只係油pizza面，真係唔使用好多顏色，問題係老師要Ambrose同對面個小朋友一齊share顏色，但個色碟就擺左响對面小朋友張檯度咁濟，重要係有色果邊向住對面小朋友喎！見到Ambrose嘗試伸直手去沾顏色但又唔夠手長，個樣好慘囉！佢沾唔到顏色又唔識講，係咁望住老師，老師又無望佢，淨係顧住大果兩個小朋友，媽咪真係好想拍門同老師講囉！其實大果兩個小女孩有一個好百厭，成日行黎行去，又攪吓畫室入面嘅手工作品，又試過攞住把黏土有鋸齒膠刀係咁“拮”另一個小女孩，老師都睇唔到，雖然係畫班，但秩序品行問題都應該要幫一幫眼掛！所以媽咪都係要重新考慮响邊度上畫班！不過雖然話呢度麻麻，但好可能度度都一樣，只係呢間可以俾媽咪睇到上堂情況，其他睇唔到其實根本唔知發生咩事！