粉瘤

條頸有兩粒暗粒十年喇，有時睇開醫生問吓，都係話粉瘤啫，唔使理佢。雖然其實我都唔多鍾意有兩粒摸到嘅野响條頸度，但醫生話唔使理，又唔痛，咁我咪無理佢，一直忍佢地囉！

 

一忍就十年！呢排冬天著衫多，件件都中領，都唔為意，直至上星期沖涼除哂衫無啦啦响鏡度見到其中一粒粉瘤變大左突左同紅左，撳落去重有d痛添，心諗，唔係麻，無啦啦咁樣都有嘅，唔係話唔使理架咩？驚驚地之下當然都係唔敢怠慢，即時去睇個普通科醫生，再叫佢refer專科啦！醫生睇左陣話係粉瘤，因為發炎先至又紅又腫，咁都無咁驚！佢話粉瘤根治方法就係割左佢喎，但換黎嘅係疤痕！我問如果唔割，咁會唔會有問題，醫生話粉瘤會反覆發炎，但無咩傷害，重話人就會變，粉瘤唔會變喎！不過佢都照寫張referral letter俾我，我重以為會refer外科，點知原來refer皮膚科！

 

一返到屋企，老公同奶奶都話有得割就割左好d喎，唔係第日變左就大件事！我就將醫生話人就會變，粉瘤唔會變呢個理論搬出黎，但奶奶就話有個親戚之前又係話有粉瘤，之後割左出來驗先知原來係cancer，所以佢話有得割就割左去，唔好留响身體入面喎！我又唔係話好驚要割，都係小手術，比起生仔開果刀，呢d都唔係咩一回事！我驚嘅係割左之後個傷口，會好似我開刀生仔果條疤咁出肉芽，又痕又突又粗，好肉酸架麻，重要响條頸咁明顯，我真係有保留！

 

老公就叫我去睇吓皮膚科先，睇吓專科醫生點講喎！所以今日下午攞左病假去睇喇！無法啦，公司無得俾我公司時間去睇醫生，呢d專科又唔可能收工之後接症，所以都要迫住請病假去囉！個醫生見到粒野，都話係粉瘤，不過我聽佢口吻，都係話可以唔理，可以唔割！但當我問個醫生會唔會變嘅時候，佢就好protective咁話，無人會保證唔變架喎！咁即係點？咁即係可以唔理，但唔保證唔變？既然佢咁講，似乎要割嘅機會都幾大，始終有d野响個身度，都咪話唔驚！問吓個醫生，佢話我粒粉瘤幾大，又深，所以佢幫唔到我割，如果我要割，要refer我去外科喎！唉！咁一早就直接refer我去外科好過啦！我順便問埋個醫生另一粒粉瘤一齊攪埋佢得唔得，佢又話呢粒佢可以幫我割！其實我見個醫生都麻麻地，一味同我講可以唔理，又話佢地皮膚科通常都係比藥多，唔係點同人割，又話要傷口細就外科好d，要傷口靚就整形外科，講到好似佢地皮膚科唔整得靚但求割到咁，一聽佢話可以幫我割粒細嘅，即時話都係等埋外科一次過割兩粒啦！佢聽到又話係割都割住一粒先啦，有疤都係一條，試左會唔會條疤好勁先喎！唉！講中我嘅死穴，本來都諗住消左炎後一次過割就割啦，俾佢咁講又再驚過！

 

咁究竟好唔好割呢？