Thomas學習筷子 (2y6m)

其實買左對Combi嘅學習筷子好耐，但一直都無俾Ambrose用，一來唔覺得佢有興趣要用筷子，二來媽咪又覺得可以大多少少先至用都得！點知上次同同學仔媽咪飲茶，大家講開用筷子問題，先知原來好多媽咪都已經俾佢地嘅小朋友嘗試用筷子喇！咁即係Ambrose都可以開始試吓、熟習吓先啦！所以媽咪就攞左對Combi筷子俾Ambrose試！唔．．．．．唔可以話Ambrose用唔掂對筷子，佢都勉強夾到餸食，不過因為Combi筷子只係有個托托住隻手指公位，所以當Ambrose夾吓唔得又扭吓又擰吓之下，媽咪發覺Ambrose雖然係夾到，但手指嘅位置就錯哂，佢只係務求用果兩枝筷子夾到野黎食，完全無理手勢！

 

因為咁嘅原故，媽咪今日走左去吉之島買左呢對Thomas學習筷子，起碼手指位全部都係圈圈，手指可以穿入去唔會咁易走到出黎，唔係吓吓要同Ambrose擺番隻手指响個托上面都幾煩架麻！本來响灣仔玩具街見過同款賣$49已經覺得ok，因為Combi買嘅時候係正價，要$6x，咁比較之下就覺得$49係平d！點知超之島標價$38，重要有八折再九五折，折左只係$28，超值！

 

估唔到即晚再試呢對新筷子，Ambrose真係好快上手，佢自己輕易夾到餸食時都超級興奮同得戚，哈哈！佢重不斷講話“我同爹爹媽咪一樣用筷子呀！”不過，佢用左筷子就唔肯用匙“不”飯食，d飯又點夾丫？夾到都食得好慢呀，唯有教埋佢用手攞起個碗“爬”飯入口啦，攪到成檯都係飯粒！