Homemade紀子元肉蜜糖

呢樽野望落似唔似辣椒醬呢？

 

早兩晚，奶奶無啦啦走出黎叫我幫佢抄低d野，原來佢啱啱聽到收音機講自製紀子元肉蜜糖，整好放雪櫃，每晚可以“不”一匙出黎開水飲，對於眼乾，皮膚乾重有唔知咩野好好架喎！

 

不過由於奶奶一聽見我話要摷番部攪拌機出黎，唔知係咪怕麻煩我，佢就耍手擰頭又話算，但又見佢買哂材料返黎架喎！所以我估佢係唔好意思叫我幫佢多過真係唔想整！其實做法都幾簡單，所以今晚即刻試整喇！

 

做法：元肉紀子各 一兩 ，用攪拌機打碎，再拌以同等份量清水烹煮至杰身，熄火待涼，再加同等份量蜜糖攪勻，放入玻璃樽待冷卻後即可存於雪櫃中。

 

今次用左蜜勞卡抗氧化蜂蜜，第一次試做，真係叫揼本，衰左就慘喇！好彩試飲過，又幾好味喎！平時就咁沖蜜糖水俾Ambrose飲，佢都唔吼，飲一啖就俾番我，今次佢見我整黎整去已經勁問我做咩，到整好左之後我就俾左d佢飲，佢飲完我再俾埋我果半杯佢飲，佢都照單全收。等我試多幾次Ambrose飲唔飲先，如果佢肯飲，一星期整一樽都唔係好花時間啫，飲蜜糖聽講對氣管同敏感都好，抵抗力都好d，一直都想Ambrose飲架喇，奈何佢唔肯飲，而家Homemade紀子元肉蜜糖，如果佢真係肯飲就好喇，加左紀子元肉，重更加好添呀！