創意畫班@第一堂 (3y)

今堂 又黎番之前嘅畫室學畫畫喇，都好嘅，雖然呢度附近環境一般，但畫室教得比較有創意又多元化，其實媽咪比較鍾意呢度多d！Ambrose比以前大個左少少，唔會太一舊飯咁，都係時候放開少少俾佢認真d學架喇！

 

又估唔到Ambrose記得之前响呢度學過畫，佢仲問媽咪係咪整黏土Ms Chan果度！不過因為舖位搬左，Ambrose都有d疑惑，仲話唔係呢度，哈哈！好順利咁湊左Ambrose入去，而家課室大左，又有多一個人睇住，媽咪都放心擺低佢就走！同以前唔同，呢度再唔可以企响出面睇足上堂全程，如果要睇，就一定要企門口位，咁Ambrose又好易見到媽咪分心喇！

 

放學時見到Ambrose好滿足攞住本畫薄出黎，一睇就知今日畫巴斯光年啦！老師同媽咪講，Ambrose堅持要畫彩虹星球喎！當媽咪問老師幅畫係咪真係Ambrose自己畫，老師話係，不過因為佢小肌肉未夠，畫手部線條其實都未掌握得好，係老師幫佢嘅，其他所有都係佢自己一手搞掂！老師仲讚Ambrose油得好密，少少白色都無，仲話Ambrose剛三歲，可以油得咁密真係好難得！不過老師話佢好落力油，變左好大力，搞到幅畫水彩部份油到起哂粒粒！哈哈！可能平時Ambrose多以crayons畫畫，慣左用力，而佢又好少用水彩畫畫，所以當佢用水彩畫時都係用同樣力度，未有因應顏料質感而調較力度，睇黎，如果有機會，媽咪都要多在家俾佢用水彩畫畫喇！