與IPNG同學仔BBQ(3y)

今日IPNG同學仔又有gathering，今次係BBQ！原本爹爹帶Ambrose去，媽咪都無諗住會join到，因為佢地下午開始！點知到媽咪五點半收工，都仲未開爐開始燒， 所以媽咪決定收工入去join埋佢地一齊玩！

 

當日其實Ambrose四點已到場，等齊朋友仔玩都已經四點幾喇，可能班小朋友去哂玩，大人都無時間set up，所以遲遲未開爐，哈哈！

 

收工入到去已經係七點了，都只係剛開始，班小朋友識左成年，日日都見，一齊玩係開心好多！所以基本上，大家其實都好忙睇住班小朋友，驚佢地走散左，又或有咩危險，所以雖然開左爐，但真係食野又無咩時間咁！班小朋友更加掛住玩唔願食野，為食如Ambrose都係求其食左少少雞翼，麵包都只係食左一角，就同媽咪講飽喇，其實個心飛左去玩就真！

 

今次BBQ一直去到夜晚十點，Ambrose由四點玩到十點，真係好勁！都知佢一要走時一定好易瞓著覺，成身燒烤味又汗臭，爹爹媽咪都要不停同佢講野先至可以keep住佢清醒！最慘係今日爹爹無同佢做定功課，即係話返到屋企除左要沖涼，仲要做埋功課先可以瞓，以Ambrose咁眼瞓嘅狀態,，真係一大挑戰！

 

結果係返到屋企，沖埋涼，做埋功課，Ambrose都唔願去瞓囉，搞到十二點至入房瞓，大件事！

 

後記：可能實在玩得太顛，Ambrose瞓到清晨五點幾醒醒地，見到爹爹起身返工，佢就開始喊吓停吓夾雜住發脾氣果隻叫法搵爹爹，足足持續左個幾鐘，要成七點至瞓得番，可憐媽咪又夜瞓，晨早俾佢嘈左個幾鐘，頭都痛埋，仲要起身返工！嗚嗚嗚！