Crayola – Model Magic Presto Dots & Colour Wonder Paper Roll

趁Ambrose 去左上畫班，媽咪又周圍行吓！原本想話睇吓有無中秋節玩嘅螢光條，點知又俾媽咪尋到寶！

 

又响反斗城清貨區買到兩件Crayola產品！Model Magic Presto Dots，其實之前買過一盒係整獨角獸都未開黎整，但姑姐同媽咪一齊買，佢已經整左，仲話入面嘅黏土好好，真係一d都唔痴手，好乾淨，只係表姐無心機整咁耐，最後都係姑姐整，所以媽咪都唔捨得咁早開俾Ambrose玩，哈哈！見又有racer做清貨，仲要原價$169.9，清貨價$70，真係好抵囉！其實另外仲有一盒同款藍色車架，不過果盒要$100，點解差成$30咁多，大概可能因為呢盒入面有包黏土個袋開左少少掛！見姑姐之前話d黏土係有剩好多，所以都係揀盒平架啦！

 

另外果盒Colour Wonder Paper Roll之前一直都好想買，因為有好多Colour Wonder　Mess Free嘅筆，反而淨紙就難買，所以之前想買一卷配埋玩，不過成$109.9買卷紙真係幾貴，所以一直都唔買！今日竟然見到佢响清貨區，真係好開心！雖然媽咪原則都係以原價嘅一半價錢先至會買，呢卷紙差少少，但見已平左幾十蚊，真係好心動，所以都照買喇！

 

兩件產品加埋只係$140，仲用埋滿$100減$10嘅coupon，埋單$130，好抵，真係好開心！嘻嘻！

 

 

P.S. 返到屋企至發現卷paper roll入面都有包埋筆，真係頭都大埋，一屋都係呢隻mess free筆！