Home Craft Time @ 輕黏土蟹仔(3y)

對上一次同Ambrose整輕黏土已經係一個月前嘅事了，原來時間過得咁快，仲以為係早兩星期嘅事！

 

今晚見Ambrose未沖涼，又驚住包輕黏土開過唔知會唔會變硬，都係快d玩埋佢好d！

 

原本媽咪構思用泥膠嘅英文字母模去整Ambrose個名，攞齊哂材料，撈好顏色，印埋，先至發覺輕黏土同泥膠唔同，黏土始終有黏力，用字母模“吸”完之後黏土仲留响個模入面，用手搣出黎，因為黏土有拉力，根本起唔到模，一搣就爛！結果試左幾次均告失敗！

 

Ambrose當然好失望啦，難得有泥膠碌玩，又有模印，唯有問佢今次想整咩，媽咪同佢一齊整啦！Ambrose好快就話要整蟹喇！好，蟹都應該易整嘅，就同佢整啦！

 

本來打算一齊整一隻蟹，點知Ambrose話不如媽咪整一隻，佢自己整一隻啦，見佢主動要求，唯有即時又撈多幾舊黏土一人整一隻啦！媽咪果隻整到d腳起角嘅，Ambrose果隻係bb蟹，短短直直，卡通d囉！

 

成隻蟹都係Ambrose自己整，都幾靚！趁佢入左去沖涼，又醒起原來蟹蟹未有蟹箝，所以兩隻蟹嘅箝箝係媽咪好怱忙之下整落去嘅！眼睛係Ambrose自己搓自己放上去，媽咪幫Ambrose蟹仔點睛，Ambrose又話想試吓自己點，結果俾佢點媽咪蟹，都ok嘅，係無咁醒神啫，哈哈！