DIY燈籠@K1 (3y)

記得上年一開學就收到通告話有親子燈籠比賽，果時咩都唔知，又唔識點整，又無時間預備，結果，趕左兩晚夜先做好個燈籠俾Ambrose交返學校，非常辛苦！上年整完個燈籠之後，媽咪就決定下年要早在收到通告前預備了，費時好似上年咁，收到通告幾日就要交就麻煩喇！

 

今年八月尾、九月頭開始，媽咪已經耐唔時行入大型書店睇吓有無燈籠材料賣，點知行左好幾次，都係無！直至九日上旬一日，終於見到有Pack裝賣，但全部都唔包電燈芯，只有傳統用candle嘅燈籠套裝，媽咪以為再等下應該有，點知一等就等到學校出通告九月十八日交燈籠了！

 

有一日媽咪心血來潮收工專程趕回家附近嘅舊式文具店，終於買到燈芯！但買左之後又遲遲未動工去做，原因其實媽咪轉左工之後個人成日都好累，呢排又好忙，而且學校係以家長投票定勝負，以上年嘅經驗，好多唔使返工嘅媽咪成日可以走去投票俾自己同朋友（無限票數），對於媽咪呢d返工媽媽黎講，根本一定唔會得到太多票數，可以預期無論燈籠整成點都唔可以勝出，所以有一刻，媽咪都諗住放棄了！

 

直至有一天收到同學仔whatsapp做起左個長頸能燈籠，又覺得如果人人都有燈籠可以攞返學校一定會開心d，所以媽咪都係決定點都要整一個俾Ambrose攞返學！

 

由於之前成日都好攰又想放棄，所以遲遲未開工！直至決定做燈籠，又只淨番幾日時間！原本問左Ambrose要飛機定要船，佢話要船，但到媽咪認真思量點整時，又覺得好似好難，同埋好似好難裝飾咁！媽咪唯有假民主問Ambrose要大象好定機械人好，原本佢都話要大象，媽咪又再諗，大象可能都幾難做，做起又一隻色加對眼，都唔會太突出，幾番引導之下，Ambrose就話要機械人了，嘩哈哈！

 

媽咪構想機械人都只係紮兩個正方體，之後紮埋一齊就可以成為頭同身，好似比較簡單！因為實在無太多時間，諗到整頭身之後再無諗太多就開工！

 

結果，紮完兩個正方體，再紮埋一齊之後再諗手腳問題，真係頭都大埋！原本想話用其他物料是但整d手腳上去就算，但諗起封玻璃紙之後再痴其他野上去都未必受到力，覺得唔可行！再諗如果紮埋手腳，一來唔知點整，二來好似好大工程！唉！真係進退兩難！最終，媽咪都係決定紮埋手腳啦！第一晚時間，只係紮個機械人嘅頭身腳，由十一點幾Ambrose瞓左開始整，整到三點幾四點！

 

第二晚，陪Ambrose瞓著左，十二點鐘紮醒，真係好想繼續瞓落去，但已經係星期六喇，再唔整，真係唔使交喇！所以好攰好攰都係要起身整埋個燈籠啦！紮好對手，可以開始封玻璃紙！其實因為整機械人時都唔知點預大細，求其整正方體，整完之後至發現都幾大個，同埋因為手腳都要做立體，所以要封玻璃紙嘅面，真係幾多吓，仲要今年媽咪紮得麻麻，接口位都紮得好大舊，要封玻璃紙又要仔細cover埋，唉！所以呢個機械人手工做得無上年條魚咁靚，玻璃紙亦都拉得無上次條魚咁“恆”，但總算係包好哂嘅！

 

包好哂機械人之後，其實都幾“早”下，但因為要預備埋機械人嘅裝飾，最後又花上個幾鐘整埋至上床瞓覺！呢一晚，整到五點八，搞掂埋機械人嘅裝飾，預計星期日可以俾Ambrose幫手貼上去，叫做親子燈籠架喇！機械人裝飾，其實都係上網搵機械人嘅圖參考，再自製嘅，雖然唔係極有創意，但媽咪都已經好滿意了！

 

星期日早上，爹爹收工，同爹爹講起機械人裝飾細節，其實原本媽咪好想整埋齒輪，但要畫又唔太識同埋亦未必畫得靚，可能要download齒輪圖再剪落手工紙上會好d，原本都無諗住再攪任何野，爹爹話整埋啦，於是又上網搵齒輪圖片，剪好後再由媽咪加工，加少少其他細節，又整埋埋機械人嘅背面裝飾了！

 

由於機械人做出黎都比較高大吓，爹爹媽咪發覺用一個燈泡可能不夠光，於是爹爹要駁電線加燈泡，响機械人身同頭都有一個燈泡，咁至夠光夠靚！是日，湊開左Ambrose，日間花左兩個幾鐘攪埋呢堆野！

 

夜晚，玩完一輪返屋企，叫Ambrose幫手痴裝飾，佢都不知幾開心！由於裝飾其實係有固定擺位，之前媽咪已經舖好樣版影低左，到Ambrose痴時要求佢跟住樣版去痴！媽咪睇住佢痴，一路都好擔心，驚佢痴上去又覺得唔好想再搣過出黎再痴過時會整爛玻璃紙，好彩，Ambrose都無，只係個口媽咪略嫌痴得低左少少，不過都係無法挽救，咁就由得佢啦！

 

整好哂個機械人，Ambrose都好開心，不枉媽咪咁辛苦去整！不過下年，可唔可以唔好再搞燈籠比賽呢？