Ambrose做功課 - pattern(3y)

Ambrose 好鍾意做功課，學校嘅功課每日一頁，基本上都唔使五分鐘就做完，佢一定嘈住要做媽咪功課！媽咪無咩心機時會俾本顏色冊佢自己油，有心機時先至同佢一齊做吓功課，不過其實無心機時間多d，哈哈！所以最近佢都係油顏色同畫畫多！

 

今日Ambrose又嘈住一定要做媽咪功課，顏色冊都話唔好，見佢咁堅持，真係唔可以偷懶！又攞左本左腦右腦嘅workbook出黎同佢做，其實本workbook都做得七七八八，淨低幾個練習媽咪覺得Ambrose應該做唔到，所以一直想收埋第日至做，今日俾Ambrose纏住要做，佢自己一路揭一路睇，好似真係好好睇咁，見佢咁有興趣，就問吓佢今日不如做d難少少架啦（平時如果太難佢係無心機做有機會話唔做），點知佢又真係話好呀！

 

結果做埋淨低嘅pattern練習，不久前同佢做過完全唔知媽咪講咩，今晚竟然講解完做過一題後突然好似明白左咩一回事咁，竟然做啱哂！其中一頁係小圓點填色就比較弱，對住幅圖，硬係認唔到同一個位置油圓點，係要媽咪不斷提示、指點至完成到，似乎空間感麻麻地喇！