聖誕裝飾2013 (4y4m)

上年媽咪就好好心機同Ambrose一齊整聖誕飾物，今年已經無咁神心喇！不過，唔整唔整，無啦啦都有一堆聖誕裝飾！

首先係Ambrose响學校做左個聖誕吊飾，一個用報紙做嘅大環，油左顏色後再加上吊飾波波，媽咪覺得好靚呀！另外，上左個聖誕workshop，用廢紙整左個聖誕老人頭，呢個就不過不失啦！又收到從前教Ambrose的老師自己整嘅聖誕老人頭襪仔，真係好感動呀！仲有就係媽咪上司送嘅紅鹿裝飾，仲有之前同Ambrose揀嘅DIY白鹿裝飾！

將成堆裝飾擺埋一齊，望落都幾有氣氛丫！

 

自製聖誕咭2013 (4y4m)

又一年了！有著前兩年製作聖誕咭之經驗，媽咪知道要與Ambrose自製聖誕咭，著實需要不少時間，加上今年Ambrose開始和較多同學仔熟絡起來，再唔會好似之前兩年咁整少量聖誕咭也可應付，所以，媽咪今年打算十一月就開始籌備DIY聖誕咭了！

2013年聖誕禮物 (4y4m)

十一月行經反斗城時，見到Ambrose夢寐以求嘅海賊戰隊帆船號大槍，出奇地特價平左幾百蚊，本來應承左聖誕節時買呢把槍俾佢做聖誕禮物，但見平左幾百蚊，都係忍唔住即時買左，仲同Ambrose講定，而家買左份禮物，到正式聖誕節時就無架喇！

Ambrose第一次小提琴表演 (4y4m)

今日係Ambrose第一次小提琴表演的日子，由於係第一次，媽咪緊張得請了假去支持他。

事前，對於表演細節著實所知不多，老師只吩咐Ambrose好好練習Jingle Bell，但又沒有提及究竟係個人表演還是樂團表演。不過Ambrose加入樂團只是兩、三堂的事，想來也應該不會叻到可以同其他人一齊合奏吧，雖然第二小提琴手是拉和音這些較易handle的地方，不過就係正正因為係和音，Ambrose自己在家中練習時，拉起來就變得好古怪，歌不成歌的，更加難練。所以媽咪估計，應該是個人表演居多。

表演時間為下午，踏正晏覺時間，好彩今日放假，Ambrose都無咁攰！換好衫出發去集合，一如想像，去到都要等set場rehearsal 等，差不多又等左一個鐘，晏覺時間再加呆等，真係考起爹爹媽咪，唯有不斷俾d零食Ambrose食住先，分散下注意力啦！

創意畫班@第五十三堂(4y4m)

上兩星期嘅恆常班，轉左比賽班，又因為入醫院請左假，所以再改埋時間同分店上，比賽畫畫起就交，無點影低相keep record，所以寫blog都搞到有少少混亂，開始忘記邊堂打邊堂！

無上兩堂恆常班，今堂再上返，感覺好似好耐無上堂咁，哈哈，可能唔係媽咪帶上堂吧！

Ambrose今堂畫左薑餅人同糖果屋！爹爹媽咪都有少少surprised，點解Ambrose會知咩係薑餅人，我地都無同過佢講！原來係老師教畫畫時同佢講嘅！

Home Craft Time @玻璃貼 (4y4m)

前幾日同表姐們食飯，佢地買左DIY玻璃貼手工，Ambrose好有興趣想痴埋去玩一份，當然，又俾表姐耍佢，成日都要安排俾咩色佢，又呢樣又果樣，搞到Ambrose都費時玩，油油吓走左去玩其他野！

其實屋企都有DIY玻璃貼手工，只係一直諗住條黑色綑邊線好似好難畫，畫完填色又怕佢搞到d顏色撈埋一pat，所以媽咪都無打算攞出黎俾Ambrose玩！見佢同表姐一齊整果時，又好似其實都handle到，所以今晚就即管摷左出黎俾佢試吓！

Ambrose的小帽子小手套 (4y4m)

月尾會去台灣旅行，其中有一、兩天會留在清境，知道呢個地方天氣較寒冷，媽咪於是摷左 Ambrose兩歲時嘅小手套俾佢試吓，一心諗住佢都成四歲幾，唔啱架喇，仲有一星期就出發，都係要急急買番對手套！點知，小手套都仲啱戴喎！見佢仲啱戴，又摷埋同一set嘅小帽子俾佢戴，都仲戴得落，哈哈！Ambrose戴左之後，又好似番個BB咁，好可愛呀！

星星老師@第二十四堂(4y4m)

今堂畫班仍然離不開以聖誕節為主題嘅！Ambrose畫左聖誕老人、禮物車、滿天星星以及裝飾波波串！聖誕老人係Ambrose一買畫法，伸脷！哈哈！

士的糖 (4y4m)

Ambrose學校今日開聖誕Party，媽咪準備左士的糖俾佢攞返學派俾同學仔！盒糖早在Ambrose月頭住院時，媽咪忙裡偷閒去了一轉九龍塘超市買的，哈哈！放左大半個月，幾乎都忘記了！不過唔知係咪因為細枝而且又係條狀嘅關係，枝士的糖跌一跌就好易斷！都未攞俾Ambrose，媽咪自己已經整斷左幾枝，哈哈哈！

Ambrose的白恤衫 (4y4m)

白恤衫，因你變耀眼～

 

相信，除左校服之外，Ambrose都無咩機會著恤衫！家中唯一一件花恤衫，都係多月前去飲時著過一次咁大把！Ambrose麻麻地鍾意扣埋個領包住條頸嘅感覺，畢竟，佢並唔係斯文書生類吧！

兒童樂團(4y3m)

Ambrose學小提琴已十個多月，看著他由亂拉一統到現在可看譜拉簡單樂曲，由當初成日叫住佢溫習到現在佢自發練習，真的很開心及感動！

Ambrose一直都是單對單上堂，雖然覺得較集中及有效學習，但就沒有同其他人交流的機會，當有些地方拉得不太好的時候，爹爹媽咪指點Ambrose，佢總唔願聽，堅持自己沒有問題！唔知係咪覺得自己已拉到了歌曲出來，少少錯處並不在意，在媽咪眼中，覺得佢對自己要求不高！

浸浴缸@聖誕老人泡泡彈 (4y3m)

之前同Ambrose行過Lush，見有聖誕主題嘅泡泡彈，忍唔住買左個聖誕老人泡泡彈迎一迎聖誕節！

今日同Ambrose去完Children Xmas Party，見佢無瞓過晏覺，又玩得一般盡興，所以攞左個聖誕老人泡泡彈出黎俾佢浸浴，等佢開心下，同埋最緊要係，浸完浴，個人relax哂，加上放左成日電，早d入房瞓覺，咁媽咪就可以自由活動囉，哈哈！

個聖誕老人泡泡彈好神奇，睇佢白白地帶淺粉紅色咁，仲以為佢落到水無咩色，點知佢炸左一陣之後，原來入面包住聖誕綠色，成缸水就因此變成聖誕綠色，真係夠哂應節！

 

聖誕Party第一擊@舊公司的Children Xmas Party (4y3m)

今日應舊同事邀請參與舊公司每年都舉行嘅Children Xmas Party！地點就近在屋企附近，實在方便得很，知道有跳彈床同埋魔術表演，媽咪一於帶Ambrose去玩吓湊吓熱鬧！

Ambrose見到彈床就已經衝左上去狂跳狂撻，好彩人唔算太多，就由得佢盡情放電！跳完彈床就去排隊玩game booths，共有6個booths，玩完蓋印，玩哂6個booths可以去換領禮物一份！但game booths嘅games其實某部分都有難度，唔係咁啱四歲嘅Ambrose，不過，玩完贏輸都會有小禮物一份，Ambrose都無咩投訴嘅！

星星老師@第二十三堂(4y3m)

今堂手工仍然離不開以聖誕節為主題嘅！今堂Ambrose整左一棵黏土米奇米妮聖誕樹，雖然望落米奇同米妮有點點A貨的感覺，但媽咪仍然覺得這棵聖誕樹很靚，很有創意呢！Ambrose今次進步了，見到佢個名，都知今次係佢寫的了！

Home Art Jamming @ Under the Water (4y3m)

今晚好搞笑！媽咪沖完涼出黎，一開門就已經見到Ambrose畫左幅畫貼响廁所門上！幅畫似係畫緊海底世界，有八爪魚、蟹、龜、鯊魚等，不過唔知點解佢另外又寫左d無特別意思嘅英文字母出黎，仲要係近期佢最愛嘅粗體英文字！

Home Art Jamming @Counting(4y3m)

Ambrose畫左幅畫，媽咪覺得好似Counting嘅Poster咁呀！上面有好多隻八爪魚，同埋蟹，仲有英文字母，畫到密密麻麻，都幾靚！張紙約係A4嘅四分一多小，有剪過痕跡，最底嘅公仔，部分被剪走左，媽咪估計Ambrose畫完之後，自己玩玩吓又攞起d紙又剪吓貼吓，可能就係攞左呢張去剪，所以得番少少！好彩仲有少少俾媽咪發現keep起留念！

近期，唔知Ambrose响邊度學番黎，定係自創，佢好興將d英文字粗化，加多一行，畫到好似幾立體咁，唔錯唔錯！

Ambrose 自己寫字(4y3m)

近排Ambrose除左仍然係咁畫畫之外，佢仲興自己寫字！雖然寫嘅野係無咩特別意思，但佢自己主動寫，感覺上佢似乎對寫字都有d興趣咁啦！

Ambrose 恨著Boots (4y3m)

Ambrose真係大個仔喇，一向對衣著無要求嘅佢，入季時見到媽咪著長Boots，竟然成日問住媽咪點解著Boots，同埋竟然同媽咪講，佢都好想要一對長Boots！以為佢只係三分鐘熱度，點知佢講左個幾月！於是，媽咪就話要同佢去睇吓邊度有得賣男仔長Boots先！

見天氣真係開始轉涼，都係時候同Ambrose添置少少新衣，而且為左獎勵佢入院時做檢查嘅勇敢表現，媽咪今日就同佢去睇吓童裝店，會唔會有男仔長Boots賣！

Home Art Jamming @爹爹媽咪(4y3m)

Ambrose最愛畫畫，畫完之後往往會送俾爹爹媽咪！今日媽咪就收到呢幅畫喇！佢話係爹爹媽咪黎架喎！唔知點解，Ambrose成日畫爹爹都會有帶眼鏡，而媽咪就無？

 

Ambrose問媽咪，知唔知點解媽咪細粒d，媽咪話因為媽咪係女仔，所以細粒過爹爹？佢話，唔係呀，因為妳企得後左遠左，咪細粒d囉！

Home Art Jamming @帶帽的人(4y3m)

又在Ambrose成堆廢紙中，找到呢幅帶帽嘅人！而家Ambrose畫人仔好多時都會畫埋手指腳趾，由於佢都未掌握到畫得細緻d，所以成日都畫到手掌腳掌都好大，分分鐘同個頭或者個身一樣大咁濟，都幾搞笑！哈哈！

Home Art Jamming @舞動的火柴人(4y3m)

今日同Ambrose上完興趣班去食野，等緊食物送來時，媽咪攞左本小畫冊俾Ambrose畫畫。見佢埋頭苦幹，一畫就畫左三個火柴人仔，每個都有唔同嘅姿勢，好似跳緊舞咁，真係幾得意，亦頗有Ambrose自己嘅影子，哈哈！

後來，佢再畫多一個火柴人，但就無厘頭畫多兩隻八爪魚伴舞，好搞笑！

星星老師@第二十二堂(4y3m)

配合聖誕節，今堂Ambrose畫左幅雪人同聖誕樹嘅畫，媽咪覺得都幾靚！Ambrose畫左兩個雪人，一個男一個女，都幾搞笑！欣賞佢畫嘅聖誕樹，係由深淺不同嘅綠色以線條勾勒出黎，感覺上，很有層次感，較油密幾個三角形而成嘅聖誕樹，更立體！

Home Art Jamming @彩色獅子(4y3m)

Ambrose畫左幅畫，上面有隻彩色動物，媽咪問佢係咩黎，佢話係獅子囉！見獅子隔離又有屋又有車，媽咪就問佢，點解獅子會去左城市入面架，佢唔係住森林嘅咩？Ambrose就話，我鍾意佢响度丫麻！媽咪問咁點解佢個身有棵聖誕樹嘅？Ambrose就話靚囉！

 

果然係好天馬行空，完全無理可依！

Home Art Jamming @媽媽及嫲嫲(4y3m)

Ambrose而家好興剪張紙出黎，响上面直接畫個樣出黎！

今次佢畫左媽咪，佢話媽咪伸高手say hi！

之後，佢又畫左嫲嫲，形態有d似平時嫲嫲做運動咁！Ambrose仲二話不說貼左上嫲嫲房門上，哈哈！

Ambrose的住院畫作(4y3m)

Ambrose第一次住醫院，由於事出突然，媽咪又無咩經驗，只係帶左入院前興趣班老師送贈的毛公仔陪住 Ambrose。

幸好，原來醫院响小朋友入院時會派發一盒顏色筆，而媽咪手袋中又剛好有一本剛為Ambrose添罝嘅小畫冊，原打算細細的一本放在手袋中，有時同Ambrose外出用膳，於等待中都有d野做，打發時間，所以本小畫冊即時大派用場！

Ambrose第一次住醫院(4y3m)

Ambrose第一次住醫院，過了三天兩夜呢！

星期日早上起來， 叫極Ambrose 食蛋糕佢都唔多願食，以為係因為表姐們在家過夜，夜瞓會攰d，同埋以為佢掛住同表姐玩唔願食，所以不以為意。但因為見佢有幾聲咳，咳中有痰，而且又有少少鼻水，所以送左佢去補堂後，媽咪即時同Ambrose去醫生處掛號，諗住快d睇醫生食藥快d清左d咳佢舒服d！

點知，接放學時，老師話Ambrose應該發燒，見佢擺左張櫈俾Ambrose放腳，Ambrose個樣皺哂眉，好似好辛苦咁，即時就同佢去診所睇醫生。一早黎掛號，但已經係排十幾二十個，隔左成個鐘再返去，姑娘都話唔到仲要等幾多個！其實Ambrose自己都已經話要睇醫生，去到診所見到咁多人又未到自己見醫生，佢已經好扭計，又喊哂，爹爹抱住都唔係幾安撫到。平時Ambrose都唔會咁樣扭計喊法，甚至上星期打疫苗針都無扭無喊過，都知道佢今次應該真係好唔舒服。有幾次佢仲係响爹爹懷裡本來安安靜靜的，突然大喊出黎，真係好反常！爹爹話見到Ambrose抖氣唔係好順，有點氣促，而且要大力抖氣，心知不妙！已經問左好幾次姑娘仲有幾多個至到Ambrose，都係答唔到，叫量體溫又話入左去見醫生都會量，真係俾姑娘激到彈起！見Ambrose好似越黎越唔對路，爹爹已經忍唔住衝去同姑娘講，Ambrose越來越氣促，可唔可以睇先！好彩咁啱終於輪到Ambrose！

Home Art Jamming @手提電話(4y3m)

Ambrose除左鍾意畫畫之外，佢仲好鍾意自己玩剪剪貼貼，成日搞到成屋都係紙碎、膠紙等！今次又在成堆紙中發現佢整左一部手提電話，哈哈！佢剪左個長方形出黎，再在上面畫左數目字（同埋有英文字母）、螢光幕同埋入面嘅人樣，都幾搞笑！

Home Art Jamming @象(4y3m)

仲以為呢隻係烏龜，點知Ambrose話佢係大笨象，有長鼻子架喎！真係笑死媽咪！

星星老師@第二十一堂(4y3m)

今堂Ambrose做黏土壽司，一碟有四件，真係幾似呀！尤其是粟米壽司，d粟米一粒一粒，唔知佢點整出黎嘅呢？！

初試電動牙刷 (4y3m)

最近媽咪想著應該幾時俾枝電動牙刷俾Ambrose 用。猶豫，係因為怕佢以為玩具，玩多過用；而且最近又已經提早送了聖誕禮物，又滿足左佢買聖誕樹，再俾枝咁靚嘅電動牙刷俾佢，佢分分鐘以為爹爹媽咪係可以成日送禮物俾佢架喇！

為食嘅Ambrose成日食完飯無耐都會話肚餓，要人俾野食佢，真係有時會諗佢係咪生蟲！今晚，佢又問媽咪攞野食喇，媽咪話，咁夜食野會蛀牙架喎，Ambrose當堂呆左，問媽咪，真係架？咁我唔食喇！唔夠三十秒，佢又再話，但係我真係好肚餓喎！媽咪無奈之下，就俾左件自己焗嘅蛋糕佢食啦！收到蛋糕嘅Ambrose好開心，但下一秒就問媽咪，咁會唔會蛀牙架？真係唔知點應付佢好，食又驚蛀牙，無得食又話肚餓！！！唯有同佢講，食完要飲多d水同快d去刷牙啦！

都唔知Ambrose幾時開始咁驚蛀牙，之前要三催四請佢去刷牙，佢都唔多在乎蛙唔蛀牙咁！今晚又突然咁緊張，真係好好笑！見佢一食完蛋糕，真係九秒九跑去刷牙，媽咪突然就諗起，今晚，似乎係個幾好時機介紹Ambrose用電動牙刷！

Ambrose的聖誕樹 (4y3m)

家中以前有棵六尺定七尺嘅聖誕樹，好不熱鬧！但每次要攞出黎裝飾同埋收藏，真係好花時間同力氣，所以，後來都送人了！那時都未有Ambrose，哈哈！

Ambrose出世以來，曾經有想過再買聖誕樹裝飾屋企，但都因為懶，同埋總覺得佢未知係咩黎，所以都不了了之。

十一月初嘅一個夜晚，Ambrose突然語帶責備咁同爹爹媽咪講，話周圍都整好哂聖誕樹喇，仲咩我地唔快d整聖誕樹裝飾屋企？講到好似屋企一定有聖誕樹咁，只係爹爹媽咪懶唔攞出黎整，好搞笑！後來媽咪同佢講，其實屋企無聖誕樹，所以無整，佢就問媽咪可唔可以買一棵俾佢，同爹爹商量過，決定今年就買一棵小小的聖誕樹給他！

Home Art Jamming @Snowman (4y3m)

有一晚，Ambrose自己埋頭苦幹，佢一向都鍾意自己畫一大餐，又或者自己剪剪貼貼，媽咪無為意，自己做自己野！估唔到，一陣之後，Ambrose行左過黎俾媽咪睇佢畫嘅畫，佢話個Snowman同媽咪say hi喎！真係幾surprised佢自己畫到個雪人咁是正。奇怪點解佢識畫雪人，佢話學校老師教架喎！原來學校都會教畫公仔，真係第一次知道！

廸士尼雪亮聖誕 (4y3m)

Work Hard Play Hard ，呢句說話，爹爹發揮得淋漓盡致！平日Ambrose雖然要上多個興趣班，但爹爹一向都要Ambrose嘅生活取得平衡，所以，每當佢一放假而Ambrose又唔需要上興趣班嘅日子，爹爹都會盡情同Ambrose去玩！