廸士尼雪亮聖誕 (4y3m)

Work Hard Play Hard ，呢句說話，爹爹發揮得淋漓盡致！平日Ambrose雖然要上多個興趣班，但爹爹一向都要Ambrose嘅生活取得平衡，所以，每當佢一放假而Ambrose又唔需要上興趣班嘅日子，爹爹都會盡情同Ambrose去玩！

今日兩仔爺又去左廸士尼玩喇，相信，Ambrose對於廸士尼樂園嘅環境同遊戲設施仲熟悉過媽咪！上次媽咪收工獨自入園shopping已經團團轉，佢兩仔爺講嘅遊樂設施，媽咪有時都唔知响邊同係點，哈哈！

 

將踏入十二月嘅廸士尼，開始有聖誕節嘅主題活動，除左有聖誕樹亮燈，仲有飄雪。媽咪收工入去join佢地，僅僅見到聖誕樹亮燈，同埋之後嘅飄雪！不過飄雪嘅範圍出奇地細，飄雪又唔係多，Ambrose好失落，成日問住佢頭上面多唔多雪？哈哈！

 

趣事：

Ambrose今日有帶自己嘅相機入園，佢嘅相機，其實就係媽咪幾年前嘅數碼相機，相對而家嘅科技，呢部相機已經過時了！一入園，Ambrose就攞住部機係咁影，佢話要影俾媽咪睇喎，真係有媽咪心！哈哈！之後，佢地去同大公仔影相，通常d人都會將部相機交俾工作人員幫手影相，爹爹都唔例外，將手機交俾工作人員影，而Ambrose竟然係都要將佢果部outdated嘅相機塞俾工作人員影相，爹爹話，一個大男人帶住個仔入園玩，伸要用部咁outdated嘅機，搞到佢好似好苦情咁喎，哈哈哈！辛苦哂！