初試電動牙刷 (4y3m)

最近媽咪想著應該幾時俾枝電動牙刷俾Ambrose 用。猶豫，係因為怕佢以為玩具，玩多過用；而且最近又已經提早送了聖誕禮物，又滿足左佢買聖誕樹，再俾枝咁靚嘅電動牙刷俾佢，佢分分鐘以為爹爹媽咪係可以成日送禮物俾佢架喇！

為食嘅Ambrose成日食完飯無耐都會話肚餓，要人俾野食佢，真係有時會諗佢係咪生蟲！今晚，佢又問媽咪攞野食喇，媽咪話，咁夜食野會蛀牙架喎，Ambrose當堂呆左，問媽咪，真係架？咁我唔食喇！唔夠三十秒，佢又再話，但係我真係好肚餓喎！媽咪無奈之下，就俾左件自己焗嘅蛋糕佢食啦！收到蛋糕嘅Ambrose好開心，但下一秒就問媽咪，咁會唔會蛀牙架？真係唔知點應付佢好，食又驚蛀牙，無得食又話肚餓！！！唯有同佢講，食完要飲多d水同快d去刷牙啦！

都唔知Ambrose幾時開始咁驚蛀牙，之前要三催四請佢去刷牙，佢都唔多在乎蛙唔蛀牙咁！今晚又突然咁緊張，真係好好笑！見佢一食完蛋糕，真係九秒九跑去刷牙，媽咪突然就諗起，今晚，似乎係個幾好時機介紹Ambrose用電動牙刷！

Ambrose一見媽咪有所行動，又走埋黎八掛，見到枝牙刷，就狂問咩黎，點解同平時牙刷唔同等等！媽咪話知佢驚蛀牙，所以買左電動牙刷，刷得乾淨d就唔使怕啦！點知，呢枝電動牙刷好睇唔好用，淨係打開電池盒個位，已經搞左幾分鐘，到打開左之後，擺完電芯，想話蓋番好，又搞左幾分鐘！期間，Ambrose已經好心急，已經忍唔住衝去刷牙，可想而知佢驚蛀牙嘅情度，真係俾佢笑死！

最後，成功第一次用到枝電動牙刷，Ambrose用後話，好舒服！哈哈！

後記：枝電動牙刷第二晚有少少失靈，唔小心碰了一下後又得番，應該係電芯位有少少接觸不良！而且，雖然有好幾枝刷頭可換，但唔同平時果d可以隨時即換，呢隻要鬆螺絲至換到，唔太方便。下次再買，都係正經買番電器店嘅電動牙刷好了！