2013年5月31日 星期五
Sun Catcher (3y9m)
Masquerade- Animal Friends@Amos (3y9m)
Ambrose 的第三對芭蕾舞鞋(3y9m)
不知不覺,原來Ambrose 學芭蕾舞已經有十五個月了,雖然佢都唔會跳俾爹爹媽咪睇,但見佢返學放學總是笑咪咪的,知道佢應該幾enjoy跳舞,所以都任由佢繼續落去,當做吓運動。
當初學跳舞,媽咪親自同Ambrose買左對芭蕾舞鞋,果時只係size 8.5D,哈哈!仲記得果時第一次買時,個sale竟然俾左對size 10俾媽咪,一攞上手,超大對,唔使度都知唔會啱著!Ambrose轉左跳舞學校後,其實學校都有代訂芭蕾舞鞋,但媽咪都係堅持自己買,總係認為學校訂那對無自己買咁靚!
今晚,媽咪又要幫Ambrose買鞋了,呢對係佢嘅第三對芭蕾舞鞋,已經著到size10.5D了!之前果兩對,暫時都好好地珍藏住!睇住Ambrose 嘅鞋仔,先至發覺佢一日一日咁在長大喇,時間真係過得好快!唔知Ambrose會學幾耐芭蕾舞,會換幾多對芭蕾舞鞋呢?
2013年5月30日 星期四
Home Art Jamming @迷宮 (3y9m)
好搞笑呀!唔知係咪前一排同Ambrose做過走迷宮,所以佢有d印象。尋日放工返屋企,竟然見佢畫左幅唔知咩畫出黎,媽咪問Ambrose幅畫係咩黎,佢話係迷宮,望落又幾似喎!佢仲即席自己畫埋走迷宮線出黎!
今日又見Ambrose畫迷宮,今次佢仲畫左白兔同紅蘿蔔,話白兔要行迷宮去搵紅蘿蔔食喎!嘩哈哈!雖然個迷宮好簡單,一d都唔迷,但真係覺得Ambrose對畫畫係超熱愛,竟然連迷宮都要自己畫,真係估佢唔到!
Home Craft Time@巴士 (3y9m)
自從放左把較剪出黎俾Ambrose用,佢真係經常會自我練習。雖然某程度上覺得Ambrose畫畫嘅作品無之前咁多,好可能因為有時掛住剪野而分薄左畫畫時間,但另一方面,見佢會自己畫完d公仔再用較剪剪出黎,感覺上佢開始創作簡單嘅小手工俾自己玩,媽咪很感安慰!
今晚執Ambrose檯又發現左4架巴士,好可愛呀!
Home Art Jamming@奇形怪車 (3y9m)
2013年5月29日 星期三
Home Art Jamming@巴斯光年 (3y9m)
認拍子 (3y9m)
媽咪發覺Ambrose認野真係麻麻地,除左之前已經令人頭痛嘅認字之外,原來,佢認音符都一樣麻麻地!1-4拍嘅音符,其實一開始學小提琴已經教左,同佢溫習,都要花好多時間重複講解。好喇,見佢認得,又因為有其他野要溫習,自然又放埋左一邊。到過一星期再問番佢,佢又係洗腦般忘記了,每次抽問都係靠撞靠估,真係俾佢激親!如是者,學小提琴都有四個月喇,以前d歌仔只係1拍咁簡單,所以無咩問題,但呢排d歌仔多左其他拍子如2拍同4拍,咁就發覺Ambrose又再洗腦!但又好奇怪地,佢可以好快記到哂4個音嘅音符位置,一首歌仔入面換音佢都無問題,真係唔明點解就咁1-4拍咁簡單都認唔到!
媽咪無咩方法同Ambrose認拍子,只係不斷畫音符在紙上問佢,問完就會寫番答案出黎。如是者,今晚佢要掉轉角色,由佢自己畫音符問爹爹媽咪,再由爹爹拉出正確拍子!咁樣玩法,似乎又幾好,至少,今晚佢自己畫嘅音符,佢可以自己寫出正確答案!
不過,見Ambrose畫音符好好笑,有少少左右或者上下對掉!
星星老師@第二堂 (3y9m)
爹爹湊放學,影左呢幅畫俾媽咪睇,媽咪諗左好耐,都唔係好確定Ambrose究竟畫咩!有d似菠蘿,但又覺得無理由葉嘅部份有點點白色!
返到屋企,開估了!原來呢幅係仙人掌。爹爹話老師真係俾左盤真嘅仙人掌俾小朋友對住實物畫架喎。問番Ambrose知唔知自己畫咩,佢話樹,嘩哈哈!佢都應該係第一次見仙人掌!
2013年5月28日 星期二
初試Numicon (3y9m)
買左盒Numicon返黎原來大大話話都有年半咁耐,一直都無攞俾Ambrose玩,只係好偶然一、兩次俾佢玩過另外買嘅1-10嘅shapes。呢排成日都諗緊點開始教Ambrose數學,諗起呢套教具,終於的起心肝去睇吓guidebook點用,但媽咪每次睇都瞓著左!如是者,一日拖一日,今晚終於唔等喇,唔理guidebook點教,點都攞左出黎試玩左先算!
首先玩左Picture
baseboard overlays先,諗住有公仔砌吓,Ambrose應該鍾意!果然,佢一見到就已經好興奮,係咁要砌!其實以佢嘅年紀,要砌Picture
baseboard overlays,相對淺了!不過,當要砌到單數嘅shapes時,由於塊shapes係單丁突起,唔係齊口,Ambrose要將塊shapes係咁轉係咁試至得,有好多時發覺佢轉到只係差一步,只要mirror番塊shapes放下就可以,但佢就係唔多知可以咁做!同佢寫字成日都會掉轉個字寫,9變6 ,3變E,唔知有無關係呢?欣賞Ambrose嘅係,佢玩左一陣後,開始砌圖形時先望吓同一shape要幾多塊先,然後,响個盒度一次過攞左所需數量嘅shape放响自己側邊,再慢慢砌。媽咪相信,响呢個過程中,唔多唔少,可以深化counting
skill嘅!
諗住Picture
baseboard overlays咁簡單,Ambrose好快會嫌悶唔玩,但見佢越玩越開心,就俾佢砌哂先!或者下次增加難度,要佢唔可以exactly攞番個shape出黎砌落去,一定要搵其他shapes砌番同一個圖形,咁就可以玩耐少少!
有一張Picture
baseboard overlay係全張都有shapes嘅,由於媽咪覺得跟足顏色果面砌其實太簡單,所以索性一開始就反轉後面全灰色嘅,俾Ambrose自己砌!一開始,佢都有跟張overlay上面嘅shape形放,但玩玩吓,佢自己就唔跟喇,鍾意攞邊塊shape放上去就攞邊塊,咁仲好,可以睇吓佢最後可唔可以完成成塊board,訓練吓佢個腦仔!見佢好鍾意攞shape
1放,其實咁最簡單,不過shape 1數量有限啦,佢唔可以全塊board都shape 1,所以都要被迫用吓其他!砌左一輪,唔使提示下,佢自己完成左,不知幾開心!媽咪見砌全board其實都幾好,自己砌到滿哂為止,一來一定係次次唔一樣,一定要用腦;二來,呢個玩法,即使無人陪佢之下,佢都可以自己玩,咁其實可以平時放出黎俾佢自己玩,好方便。媽咪提議不如再玩一次,點知Ambrose話唔啦,咁難!真係估唔到,見佢玩果時又無咩野,但原來佢係覺得難架喎?!Ambrose唔玩,媽咪自己玩啦!Ambrose見媽咪放左兩塊shapes之後,又忍唔住要教媽咪玩,結果,話唔玩唔玩,佢又搶左去玩,哈哈!
玩完overlays後,就試吓同Ambrose砌pattern,媽咪砌一行,之後Ambrose要跟住砌番同一樣嘅,呢個似乎又係簡單左,佢好快就已經砌好左!呢個玩法,要再諗諗點先可以玩啱Ambrose嘅年齡至得!或者可以試吓開左個pattern俾佢要佢接住砌番之後嘅pattern,又或者砌左前同後,漏空中間俾佢fill?下次又試吓先!
最後,攞埋pegs出黎玩,俾佢叠高高!佢係都要用shape 10砌!媽咪提議佢數左10個pegs出黎先一次過砌,今次佢又唔肯喎!由佢啦!佢一路砌高,一路都好興奮,每砌高一層,媽咪都會問佢而家有幾層,佢又真係每次都要數,哈哈!由於pegs唔多,佢又攞左shape 10出黎砌,結果砌左七層之後,pegs得番8個,問Ambrose得8個夠唔夠砌多一層,佢走去數個shape之後就答,唔夠!再問佢爭幾個先夠,佢當然答唔出,媽咪就話砌上去就知架喇!結果,將果8個pegs砌埋上去,仲有2個洞,媽咪就問爭幾多個?今次Ambrose識答2個喇!
雖然無睇guidebook自己走去玩套教具,但一路玩一路都諗到少少ideas點去玩好d,其實都算user friendly!今晚同Ambrose玩呢套Numicon,都有偷d時間教佢攞塊shape出黎,再攞其他shape砌上去,即shape 5可以用shape 2同shape 3砌出黎,又可以係shape 4同shape 1砌出黎,感覺Ambrose暫未有興趣咁玩,但起碼知道佢唔抗拒呢套教具,希望佢多玩之後會喜歡上,從而慢慢領略到數嘅關係啦!
2013年5月27日 星期一
創意畫班@第三十二堂(3y9m)
又係補堂!今次Ambrose畫嘅畫,原來係有故事架!Ambrose一見到媽咪,就急不及待要話俾媽咪聽!佢話隻小烏走去偷恐龍蛋bb,點知俾恐龍媽媽發現左,恐龍媽媽大哮嚇隻小鳥走,哈哈!
之後,爹爹同媽咪講,呢幅畫原來仲有個故事!原來Ambrose本身畫左一個大圓形,仲油埋顏色,之後Miss Chan打電話同老師講,Ambrose尋日已經畫左蜘蛛畫,個大圓形,本來就係老師教佢畫嘅蜘蛛身體了!老師見已經畫左個身體,唯有臨時變主題去畫埋落去,就變成左呢幅畫喇!
懶瞓豬 (3y9m)
尋晚Ambrose發脾氣,時而打野,時而大喊,最佳方法都係唔理佢!唔理唔理,佢開始平靜少少,知道爹爹媽咪在書房,佢就走埋黎門口莊,見我地無反應,又走番出去沙發,來來回回佢跑左好多次係咁莊,爹爹媽咪雖然覺得好好笑,但都要忍住唔笑!呢個Ambrose,性格真係好倔強,跑黎咁多次,死都唔肯先閞口叫我地唔好嬲,更惶論道歉?!唉!某程度上,媽咪不得不承認,Ambrose好似媽咪!
爹爹媽咪唔可以妥協,所以呢場仗打左好耐,搞到好夜先瞓覺!可能瞓前Ambrose喊過黎,個心又忟,加上瞓前佢對眼又痕,要滴眼藥水,佢又勁驚,搞到呢一晚Ambrose瞓得好差,成晚發夢,時而忟,時而抽泣,半夜仲係咁搵爹爹,媽咪過去安撫左佢幾次都無咩用,最後都係要叫醒爹爹安撫佢至得!不過來來回回真係無咩點瞓!
今朝起身,Ambrose攰到話自己對眼打唔開,好辛苦!仲要眼瞓到攞左個枕頭出沙發瞓,嘩哈哈!
2013年5月26日 星期日
試堂@Jolly Kingdom (3y9m)
成日覺得Ambrose 係一個Slow Learner,唔知佢係咪對文字無咩興趣,當個個N班時已認哂 A-Z、1-10,佢就要上到K1先認到,仲要未計細楷英文字母!唔好講其他嘅英文字或中文字喇!已經讀緊英普幼稚園,好似都無太大幫助咁,仲要另外俾佢上英文班都快將一年,成效真係唔係點見到!有時諗,真係唔知佢係吸收得慢?定係而家只係input期未有output,會唔會好似學講野咁,兩歲前無野講,兩歲後突然間突飛猛進呢?好希望佢係後者啦!
學校評估中,phonics係最差嘅一part!見到有呢項評估時都好意外,媽咪都唔知道,學校原來已經教左Letter Sounds,因為無聽過Ambrose講過。後來問番其他同學仔,佢地都有返屋企講,先覺得Ambrose應該係吸收唔到,所以返黎無講,問佢亦唔識!原打算暑假幫Ambrose報吓phonics嘅暑期班,但發覺學校暑假其實只有三星期,太短,好難搵暑期班密集式惡補一下!後來,諗住暑假係七月,而家都快將六月,都唔爭在果一個月,就決定唔等暑假,而家就同佢報恆常班!
爹爹朋友响出面嘅Jolly Kingdom上緊,評語幾好,所以當要搵phonics班時,都直接去左Jolly Kingdom,有得試堂同評估,諗住試左先,唔得就再搵第二度啦,距離K2開學都仲有少少時間去試吓嘅!揀呢度仲有另一原因,就係呢度可以揀一個月上四堂、八堂或十二堂,媽咪諗住如果情況可以同進度良好,可以考慮密集上堂,加快進度,呢度可以好彈性!
約左今日試堂評估,估唔到都幾多人!去到無耐,就見有家長係咁叫小朋友唱英文歌,又用英文問佢叫咩名、幾歲?當小朋友答單字時,家長又叫佢答句子,真係十足十似出左九龍塘幼稚園面試咁!其他嘅,就有內地口音嘅媽媽們,小朋友扒左响地度玩,又嘈又叫,完全控制唔到咁!
之後,中心分左D小朋友幾批入房,家長就入左另一間房聽講座!嚴格黎講,講座內容無咩特別,都係講解學phonics嘅重要性,呢d唔講都知!講解課堂安排其實好少,只係講評估係for將小朋友分level,每個小朋友進程唔同,可能用書都唔同,而且一班人上堂未必人人學嘅一樣,其實都唔係好理解佢地點教。有家長問時,佢就答有d時間係common time,有d時間係自己做野時間,咁唔知係咪即係自己顧自己時間呢?定係要做功課?無時間細問了,因為評估完成,評估報告派左俾個講者,所以要搞埋後續嘅野!
講者叫左媽咪入房!好彩唔使响出面同人迫住一齊聽,哈哈!評估老師評Ambrose完全唔識Letter
Sounds!其實都估到啦,但都不由得有d失望,返左成年學,真係學唔到少少都有?!不過評估老師就話Ambrose聽得明佢講咩,亦都回應到,而專注力亦好好!最後係話要由level 1學起!無咩所謂嘅,預左佢係白紙一張去學架喇,由最基本開始都好!
暫時幫Ambrose報左一個月先,睇吓佢返成點,希望呢度小班教學,佢吸收得好d啦!
創意畫班@第三十一堂(3y9m)
今日終於可以正常返畫班,見到Miss
Chan Chan也在,太好了!
由於今朝Ambrose瞓矮頸嘅關係,媽咪要同職員講佢擰唔到左邊,以為職員會識得安排,點知轉過頭見Ambrose坐嘅位置,根本就要佢擰左至望到老師,爹爹激到彈起,走左入去再同個職員講到明,佢坐唔到果度!
本來見到上一班整手工,媽咪都有擔心,會唔會今堂又唔記得左我地係純畫班,又走左去做手工?但見Miss Chan Chan响度,應該無問題吧!而且,有一刻都有擔心,其實係媽咪想Ambrose集中畫畫啫,Ambrose本身都好鍾意做手工。如果佢見其他同學仔都在做手工而自己响度畫畫,會唔會反而唔開心?
早左少少去等接放學,見到全班同學真係做手工,得Ambrose一個人畫畫,佢時不時都有望住人地做手工。不過當佢攞住本畫薄出黎時,又係一個開心樣,都知道佢好enjoy畫畫!
老師同媽咪講,原本今日要畫隻大蜘蛛,但Ambrose要畫幾隻,仲要畫左個人跌落個蜘蛛網度,但好開心咁笑住架喎!哈哈!真係服左Ambrose!
放左學後,問番Ambrose,佢會唔會想做同學嘅手工多d,但Ambrose答佢鍾意畫畫多d!
瞓捩頸(3y9m)
今朝Ambrose起身,無啦啦好痛苦咁話條頸好痛,見佢一臉痛苦又好認真,仲要摸住條頸喊哂口咁,覺得佢唔係講笑!爹爹檢查左一輪之後,發覺佢條頸擰左邊擰唔到,其他方向係無問題嘅,估計佢應該"瞓捩頸",真係估唔到咁細個小朋友都會咁!
第一次瞓捩頸,Ambrose又驚又痛,時不時臉露痛楚神色,又摸住條頸想喊想喊,真係好可憐咁!但見佢擰唔到左邊,用對眼斜望過黎果個樣,又覺得好好笑!爹爹仲特登响Ambrose面前狂擰頸,整蠱Ambrose,真係俾佢笑死!
2013年5月23日 星期四
Home Craft Time@輕黏土企鵝扣針及海豚 (3y9m)
真係整開黏土有條癮,Ambrose今晚又話要玩輕黏土!
見Ambrose上次整隻介子咁開心,靈機一觸攞返早幾日執櫃時搵到一個唔要嘅飾物扣針,將面層嘅飾物搣走,淨返個圓底加扣針,咁就可以好似整介子咁整黏土上去,做一個黏土扣針喇!
今次Ambrose揀左整企鵝!可惜媽咪無預備過,當整白色肚時都唔識因個size,整左落去要整眼睛時,先至覺得原來唔多夠位整埋個嘴同頸巾,所以搞到有少少痴埋一齊咁!原來企鵝手就貼住响身兩邊,Ambrose又話唔好,要整响上面,兩隻手可以伸出黎喎!但咁樣整一整,媽咪都唔知點整條頸巾上去,因為有兩隻手頂住,哈哈!
Ambrose整完隻企鵝,望吓本書,問媽咪,點解佢果隻企鵝咁眼瞓喎?笑死人喇!
之後Ambrose又話要整海豚,不過難度都幾高,d魚鰭又圓又尖咁,媽咪都唔識教Ambrose點整,又由於時間嘅關係,媽咪要快手收工,所以Ambrose參與左搓魚身同痴埋一齊,仲有整眼睛同埋剪開魚口(明明幅圖都無話要開口,搞到怪怪咁)。
2013年5月22日 星期三
星星老師@第一堂 (3y9m)
思量良久,趁腰斬左Tom Lee個Music Wonderland興趣班,慳左學費同時間,加上機緣巧合下,決定幫Ambrose報多一個畫班,希望佢嘅興趣同專長(暫時似乎發展得比較好少少)得到更多啟發,有所得著!
第一堂,延續上次特別班畫嘅長頸鹿,整左一隻輕黏土長頸鹿,效果出奇地好!估唔到係咁大隻,仲係成隻輕黏土!
媽咪一放工返屋企,Ambrose已經手揸長頸鹿衝出黎俾媽咪睇,好興奮、好開心!仲同媽咪講,原來長頸鹿身體係用蛋做,頸同腳都係筷子,再以黏土包住!第一次聽到Ambrose咁清楚同祥細描述製作過程,想必佢真係好enjoy呢一課!
Home Craft Time @ 輕黏土兔仔及老虎介子 (3y9m)
因為早幾日同表姐一齊玩過輕黏土,又抽起Ambrose條癮,尋晚又話要玩輕黏土!媽咪諗起之前留起左兩粒大鈕諗住同Ambrose做輕黏土介子,所以索性尋晚同佢試一試。
材料有圓形大鈕同毛絨條,當然仲有黏土啦!媽咪叫Ambrose將毛絨條穿入大鈕的孔度,然後媽咪幫手度好手指粗度再扭曲定位。不過可能呢個係新手工,Ambrose之前揀左做白兔仔,唔知佢係咪覺得點解唔係用黏土開始,佢就係咁不斷重複話要整白兔仔,唔整鈕!媽咪嘗試解釋,穿毛絨條定到介子圈後就整黏土上去,佢都唔太明。當聽見媽咪話只係整個白兔面上去介子度,佢即時話唔整介子,整白兔仔,俾佢激死!
好啦,媽咪由佢自己跟書整白兔仔,媽咪自己繼續整隻介子,諗住都開左個頭,又未試過,試整一隻睇吓咩效果都好!
結果,Ambrose隻白兔仔都未整好手手腳腳,媽咪已經完成左隻白兔介子!呢個時侯,Ambrose見到個成品原來係咁,突然間又好興奮,又話要整介子!一早都叫左佢整介子架啦,而家至發現好玩呢!好彩大鈕有兩粒,仲有一粒可以俾Ambrose整埋!
今次佢揀左隻老虎,本來見書入面隻老虎眼睛只係一條彎線,感覺上無咁精靈咁,所以叫Ambrose不如整番大眼睛,但Ambrose好固執,佢話要跟足本書個樣,由佢啦!
整完出黎,Ambrose好興奮,差d想戴住隻介子瞓覺!今朝起身,一出廳就問媽咪,隻老虎乾左未,知道未乾都有少少失望,直至媽咪放工回家,佢又再問乾未,媽咪話乾左喇,佢就即時要戴上手,真係好好笑!Ambrose自己影呢張相!
Homework Time @ Starting to Count (3y9m)
因為本workbook都要寫字,發覺Ambrose數都無咩問題,但可能數完有時會忘記左個相應個數字點寫,而由於學校只係教寫到7字,所以暫時只係同佢做完1-7嘅練習,仲爭8-10,好快可以KO左呢本workbook喇!
不過呢本workbook實在有少少令人失望,做到6時,有一題要油有6條魚嘅魚缸,英文竟然寫“six
fish”,雖然Ambrose都唔會知有錯架喇,不過作為一本for幼兒嘅workbook,英文咁淺都有錯,真係有d難以置信囉!
Home Craft Time @ Slap-on Stickers Maker (3y9m)
對上一次同Ambrose玩Slap-on
Stickers Maker,原來差不多已經係一年前嘅事!
Slap-on Sticker Maker I
Slap-on Sticker Maker II
Home Craft Time @ Slap-on Sticker Maker (2y10m)
今晚媽咪突然心血來潮,又摷番兩盒Slap-on Stickers Maker同Ambrose玩!不過都唔係俾哂所有模俾Ambrose填,只係俾佢揀左幾個,都夠佢玩喇,哈哈!
今次同佢玩,同一年前又唔同左!一年前同佢玩呢盒野,佢只係識得狂唧,唔識掃開sticker paints,又或者响一隔入面唧左唔同色落去。今年同佢玩,佢已經可以自動波自己整,即使媽咪行開左,都唔擔心!只係有時d顏料開始少,無啱啱新開好滿時咁好唧,可能要幫一幫佢,除此之外,都無咩野!
今晚俾佢唧左顏色先,等乾左先至再唧面層clear bond sticker paint,再乾埋就大功告成!
其實呢個手工都幾好玩,好輕鬆,不過d sticker paint用得好快,唔知响邊度可以配番,如果配唔番,d模都幾浪費喇,因為今次都有整番上次嘅蟹、鯊魚同海星,新嘅模只係用左個沙桶,其他全部未玩,但sticker paint有幾枝已經好難唧,就黎用完喇!
自由發揮較剪練習 (3y9m)
自從較早前發現Ambrose使用較剪能力退步左,媽咪已經開始諗吓有咩方法!屋企有好多Cutting嘅workbook,有時都攞黎同佢做,不過Ambrose成日都左揀右揀,媽咪唔多想佢咁,成本workbook梗係做哂先好啦,揀淨唔做好浪費架麻!又由於其實一晚時間唔多,都唔可能晚晚同佢玩剪野,所以根本無咩時間做番training!
媽咪深知呢個Ambrose對有興趣嘅野係會自已不斷練習,而睇得出Ambrose對用較剪係好有興趣嘅!考慮左好一陣究竟好唔好將佢把較剪擺出黎任佢用,俾佢自己練習,但又怕擺出黎有時無人睇得咁實,會有危險!不過幾經思量後,媽咪相信Ambrose應該明白較剪嘅危險,相信佢應該可以handle,所以早前upgrade左佢嘅文具櫃之後,亦順便放埋把較剪出黎俾佢自由咁用!
估唔到,效果真係好好!放工返去就見到Ambrose識得畫完公仔,再將個公仔剪番出黎,真係好surprised!講真,佢自己畫嘅公仔線條好多轉哂彎,反而可能做cutting workbook直線、zip-zap線或者簡單圖案仲會簡單容易!其中一個公仔,Ambrose畫左波浪紋裙腳,雖然剪得唔係完美,但見佢都盡量剪成佢要嘅波浪紋,真係好叻!
突然諗,其實唔係Ambrose用較剪退步左,只係之前要跟workbook線剪,可能佢根本唔知自己要做d咩,好猶豫咁!然後到媽咪俾佢自由發揮,佢就自己畫完公仔自己去剪,佢清楚知道自己畫咩同想點,所以就變得容易?小女孩!
好朋友手拖手!
波浪裙腳!
兩架馬車喎!
2013年5月19日 星期日
拉丁舞及標準舞公開賽 (3y9m)
2013年5月18日 星期六
Home Craft @ 火車 (3y8m)
整完輕黏土後,見仲早,所以又同Ambrose及表姐齊齊整火車。材料係之前買落嘅set裝手工,咁啱有兩架木火車,可以一人整一架!俾Ambrose整Melissa and Dough果架係因為諗住sample火車係黑色,表姐一定唔鍾意,所以俾左架美芯火車set佢自己油鍾意嘅顏色。點知呢pack美芯手工火車,真係唔多掂,開左出黎油果時就已經發現有parts唔齊,不過見大件嘅組件都有,無再為意!
Melissa and Dough附送嘅四色顏料,唔知係咩顏料呢,好上色,不過就一定唔係washable,Ambrose洗極刮極都有d黑色整唔甩!表姐果架火車,媽咪開左Crayola Kid’s Paint,只係加左幾滴水等d顏料唔好咁杰易推d,點知上木材係唔多上到色,好淺色,唔似Ambrose嘅顏料咁實色,唔知其實應該要用咩顏料先可上到木材呢?
油完顏色,因為要等乾,所以手工活動要暫停了!
第二日,Ambrose起身,爹爹媽咪掛住瞓未起身,佢就自己玩。當爹爹媽咪起左身之後,佢就攞左架火車入黎。好surprised,原來Ambrose起左身出去自己將火車果六個碌組裝好,仲自己貼好哂d貼紙,叻!
另外,姑仔亦同媽咪講,表姐架火車攞左返屋企後打算砌,點知砌唔到喎!本來媽咪知道有parts無左,以為只係火車頂果d一枝枝裝飾,點知佢話d位唔啱,有d野又無左,根本砌唔到!原來平野真係無好野,激死人!
2013年5月17日 星期五
Home Craft Time @ 輕黏土龜及魚(3y8m)
今日放假,無安排咩節目俾Ambrose,因為一來爹爹要返工,二來呢個月都好勞碌咁,好想安安靜靜响屋企休息吓!
本來就諗住同Ambrose畫水彩,但姑仔有事要同大表姐出去,留左二表姐俾媽咪湊,咁就好難困獸鬥咁全程响屋企玩喇!先同佢地去食個早餐,好彩二表姐好乖,孖住Ambrose,Ambrose特別合作,所以兩個坐一邊都無問題!食完早餐,就同佢地去左Dymocks睇書,好過反轉屋企個書櫃,哈哈!
最後,就係返左屋企做輕黏土手工!都係攞左本黏土大全出黎俾佢地揀,先做條魚。Ambrose大概都知知地發生咩事,都會問完郁手整,但二表姐就唔多知,問完之後整,但又不停咁講野,跟住舊黏土係無郁過,所以Ambrose進度快少少!條魚本身有好多鱗片,但Ambrose只係肯整一行三塊鱗片,好疏落,但佢話佢鍾意咁喎!
之後佢地要整龜,又繼續整!龜嘅殼面係用兩隻色黏土搓圓撳扁貼上去,呢方面Ambrose做得幾好,可能次次整黏土都有呢個技巧要整,佢都知咩事!二表姐就撳到面個圓幾乎大過底個圓,差唔多遮哂底色,最慘係佢整龜都話要粉紅色,媽咪要佢用藍色整殼面果d圓,結果佢又揀番粉紅色貼在藍色上,撳到面大個底,只係見到一片粉紅色,真係俾佢笑死!本來本書係教龜嘅手同腳都係貼住張檯平放,但媽咪掛住幫二表姐時,睇唔切Ambrose,轉個頭見佢打直痴左上殼邊。媽咪話佢痴錯左,但Ambrose話,唔係呀,佢鍾意隻龜行,所以佢要打直痴呀!媽咪冷靜咁望吓,又係喎,跟書嘅話,隻龜平放就好似攤左响度,但好似Ambrose咁整,隻龜就似行緊喇!有時候,真係不得不服小朋友嘅創意,媽咪明顯地已經俾本書個框架框住左,有一part唔跟就以為佢整錯左,仲話Ambrose錯添!
2013年5月15日 星期三
創意畫班@第三十堂(3y8m)
今日爹爹湊Ambrose返畫班,放學會合媽咪後,第一句就同媽咪講,幅畫麻麻地!媽咪於是睇吓幅畫,發現真係好一般!好老實講,呢幅畫,就好似Ambrose平時响屋企畫嘅畫咁,好簡單!以Ambrose畫到熟哂嘅程度,如果畫班畫巴士,合理期望係應該畫得更仔細,又或者係構圖更豐富!但呢架巴士,仲簡單過平時Ambrose响屋企自己畫嘅巴士!果d山,好明顯係Ambrose平時會畫嘅山;果d雲同太陽,亦係Ambrose平時會畫嘅雲同太陽!有d懷疑,幅畫有無老師指點過畫出黎嘅?!定係俾左顏色由Ambrose自己畫就算!!
呢期嘅畫班,真係有d令人失望呀!
2013年5月13日 星期一
流鼻血(3y8m)
今晚放工去接Ambrose放學,早左去到响出面等果陣,突然間跳舞老師走左出黎搵媽咪,原來係 Ambrose流鼻血!媽咪衝左入去之後,抱起Ambrose行左去隔離房先,個助教竟然諗住引媽咪行出中心外!當時媽咪手抱一個幾十磅嘅小朋友,佢仲流緊鼻血,又驚又喊,佢竟然諗住媽咪抱個仔出去自己搞掂,真係有少少嬲!媽咪問佢可唔可以stay住响呢間房度先呀,反正都無人在上堂,但竟然係唔得!
行左出走廊之後,媽咪即時要放低Ambrose,實在太重喇!好狼狽咁攞紙巾幫Ambrose止血,好彩好多家長都到左等放學,所以好多家長都有遞紙巾俾媽咪!
其實Ambrose都唔係第一次流鼻血,上次流都好似唔夠兩個月前,响屋企瞓瞓吓話有鼻水,爹爹入房睇佢發現佢流鼻血,成面成枕頭都係血,個鼻好似開水喉咁係咁有血流出黎,抱左出廳止血都止左一陣,果次大家都係第一次應付流鼻血,真係手忙腳亂,Ambrose自己都驚!
今次又係開水喉式咁流,仲要今次流得比上次嚴重,媽咪自己一個人處理,真係好驚!見撳極個鼻都唔止血,流出黎嘅血又好紅,又有血塊,Ambrose又驚到大叫大喊,媽咪不知幾慌亂、幾無助!有個好心媽咪過來幫手撳Ambrose個鼻,但都唔得,仲係流,正當媽咪諗緊係咪要call白車定點好時,另一家長就話撳左咁耐都唔止血,應該撳個位唔係出血位,如果撳啱個位應該一分鐘都止到血,佢叫媽咪試撳其他位!果然,轉吓位撳多陣之後,真係慢慢開始收,真係有驚無險!