去完旅行返來，海洋盃已經定左時間，比賽日期係今日，五月四日，早上9:20 – 10:10！雖然已經知道會响五月進行，但旅行前先至報名，旅行後返來就已經定左幾日後就比賽，之前媽咪一直仲諗住旅行回來花d時間同佢練吓，而家咁突然，真係有d不知所措！
媽咪諗起之前有個同學仔媽咪whatsapp左自己小朋友參加朗誦嘅錄影，Ambrose好鍾意睇，所以為左鼓勵Ambrose，平時好少俾佢掂手機，都俾佢睇左幾次！Ambrose見同學仔上左個台仔又有個咪對住之後朗誦，唔知係覺得咁樣好叻定好型，佢似乎都幾受落咁！終於，又氹又讚先至可以令Ambrose背一次，但因為唔太熟，佢都要停吓諗吓！但佢肯响爹爹媽咪面前表演，已經係一大進步了！
為左等Ambrose知道黎緊有比賽，媽咪都不嫌其煩事前同佢講左好多次，但佢唔多明白點解比賽就要唸呢一首詩！有一次叫佢唸一次黎聽，佢話咁難，不如唸小公雞、小白兔啦！但無法啦，老師定左呢首，就呢首啦！因為老師話比賽係兒歌，所以希望佢可以做埋動作。老師好好，錄左自己朗誦呢首兒歌加動作俾媽咪，等媽咪可以同Ambrose响屋企練習，而且Ambrose睇多左老師嘅錄影後，真係比較肯表演俾爹爹媽咪睇！
就係响無咩練習同準備之下，無啦啦就要去比賽！爹爹媽咪只係期望Ambrose只要可以講到，即使唔做動作同埋唔攞獎，其實已經好滿意喇，始終係第一次個人比賽，都唔可以俾Ambrose咁大壓力！
今日一早就同Ambrose出灣仔比賽，講真，媽咪之前一晚都瞓得麻麻，又要晨早起身出去，心情其實好緊張，真係仲慘過自己去比賽！本來話一家長陪同小朋友入場，但見人人都唔係一大人一小朋友，唔理啦，照入！其實個埸只係一間房，唔係好大，有張大比賽banner，banner前預留左空地俾小朋友出去朗誦，側邊就放左張檯俾兩位評審坐，其餘地方都放左櫈俾家長坐。見到個環境都幾焗促，真係好擔心Ambrose唔知受唔受得住！之前仲以為有個細台仔同咪俾參賽者用，仲係咁同Ambrose講比賽嘅情景，點知咩都無，Ambrose仲話點解無台嘅，真係唔識答佢！
比賽開始，見到小朋友逐個出去，始終無咪，又多家長在場，爹爹媽咪又坐到最後，如果小朋友大聲d都仲可以，但有d怕羞少少，肯講但幾乎响喉嚨發音咁，其實都唔係幾聽得到！Ambrose被安排於中後時間出場，見識左之前小朋友表現，其實感覺上以Ambrose在家練習嘅表現，都唔會比呢班小朋友差，真係爭在佢夠唔夠膽出聲！正正因為咁，媽咪更加緊張！原本以為只有媽咪緊張，點知爹爹無啦啦都同媽咪講，佢好緊張，嘩哈哈！無計啦，Ambrose肯唔肯講，真係唔到我地控制，控制唔到嘅野，自然緊張架喇！
就係Ambrose差不多出場時，唔記我係佢前一個定兩個嘅小朋友，出左去企左响度唔肯講野，個小朋友媽咪係咁要佢講，佢唔肯就喊起上黎，真係令媽咪嘅緊張心情推至極點！始終有小朋友喊，唔多唔少都會幾影響未出場嘅小朋友，尤其是就黎要出去嘅Ambrose！個媽咪仲好恐怖，小朋友唔肯講，於是佢就抱走小朋友返位坐，佢地其實坐响媽咪隔離，只見佢將小朋友成個掉落個位度之後就鬧小朋友無用，嚇到媽咪同坐佢另一邊嘅媽咪都忍唔住望左一下！
好快，就到Ambrose喇，佢聽到叫名之後，就一枝箭行左出去，爹爹媽咪跟住後面準備幫佢影相同錄影。可能之前無好好同佢講個流程，都未等評審撳鐘，Ambrose企好後自己就開始朗誦喇！只見佢面部表情有d緊張生硬，而且動作有少少甩漏，但讀字方面幾清晰同大聲，好快就朗誦完，亦有講謝謝，真係好抵讚呀！呢一關終於捱過左！
比賽係即時知結果嘅！其實聽完前前後後嘅參賽者表現，爹爹媽咪自覺Ambrose表現都算係中上，爹爹天真地認為Ambrose可得冠軍，但媽咪知道唔會啦，始終讀得字正腔圓、又大聲又動聽嘅小朋友大有人在，但媽咪可以肯定，獎，一定有！老師其實之前都有講過，雖然個比賽係人人有獎，但要肯講至會有獎，同埋有分金銀銅及優異獎，所以媽咪估計，Ambrose响呢班小朋友之中，應該會有銅獎以上。
派分紙時間，又係叫名出去攞，Ambrose得分85分，是銅獎！只要有多一分，就可得銀獎了！可能，如果Ambrose可以輕鬆少少，有多少少笑容，就已經穩奪銀獎了！Anyway，第一次朗誦比賽，target只係希望佢肯開口講，唔expect可以得獎，所以呢個銅獎可以話係bonus！
後記：今次比賽總共有兩個小朋友出到去唔肯講野，原來真係會咁，大會都好好，俾左三次機會佢地，唔係一刀切，但可惜，兩個小朋友一出去就喊，真係比賽唔到喇！所以之前爹爹媽咪咁緊張真係不無原因！另外，呢個比賽又話可以俾人影相，但又唔俾d家長行出走廊影，其實真係好難囉，如果响位影，佢地又無台俾小朋友企高，家長一定要企高影，如果後面有家長坐，一定係遮哂，好突兀。行出走廊影，可以蹲下影，基本上都唔阻人，比賽完返位其實都係幾分鐘的事，對於唔係比賽緊嘅人黎講，根本唔會理有無人响走廊度影相或阻唔阻，但個staff就係咁面黑黑叫我地唔好响走廊影相！仲有就係，大會已講明唔可以以任何形式提示小朋友，但見到有人坐在家長位對住自己小朋友做口形，再跟住做哂動作，無人阻止！果個小朋友參加廣東話兒歌，佢首歌好長，個媽咪由頭guide到尾，真係咁都得！好想講，如果要咁提示，咁不如同佢揀首短d嘅去比賽啦！
沒有留言:
張貼留言