新車落地 (3y8m)

Ambrose好早已經識踩三輪車，所以當佢熟練後，爹爹就同佢換左架輔助碌嘅單車，果時只係兩歲半，唔係好高，所以只可以買12寸車碌嘅單車。無咩太講究，只係帶左Ambrose自己去揀，又係揀番Mickey，同架三輪車一樣。

 

買左返黎踩，至發覺架車麻麻地！因為車碌唔係真車碌可泵氣果隻，而係硬膠成個啤出黎嘅，所以車碌有時唔太啜地，有時踩踩吓＂線＂軑唔郁，要推一推至得。初學都唔無咩所謂，耐左熟左真係好煩！但架車只不過買左一年左右，其實可以話好新，掉左架車又好浪費，但繼續踩，以Ambrose而家來去自如，下下要幫佢推一下，或佢自己要用力踩一下，真係好煩同好費力！

 

忍左架車咁耐，開始又心動想同Ambrose換架BMX，之前果架因為好早買，所以只有12寸車碌，再同佢換車，爹爹話要換14寸，起碼尺寸唔一樣，唔係買相同嘅野，感覺好一d喎！

 

同左Ambrose講換車，佢當然開心！不過爹爹媽咪唔想俾佢覺得d野咁垂手可得，同佢商量左係要用佢嘅利是錢黎買嘅！為左等佢知道咩叫用佢嘅利是錢買野，明明可以直接去買單車，都係要返一返屋企，同佢一齊拆利是，再數夠足夠嘅錢攞出去買單車（哈哈，新年過左咁耐，d利是真係一封都未拆過）！

 

Ambrose其實都幾心急，本來諗住同佢揀啱色至買，預要走幾個地方。但爹爹去朋友介紹嘅一間賣得平d嘅單車舖先，去到其實只有螢光綠同紅色。媽咪以為Ambrose必定要橙色，仲諗住轉地方買，點知佢話要紅色！買埋個車前籃，裝吓d濕星野，好快趣就俾得錢攞間單車走。架Mickey車又無人接收，單車舖呀伯雖然話呢隻車無BMX咁好踩，但又打架車主意，話唔要俾左佢喎！見佢想要，我地又唔願俾喇，再諗下點處置先！