拉丁舞及標準舞公開賽 (3y9m)

今個月嘅第三場跳舞比賽，亦都係呢個月嘅最後一場，好彩地，竟然安排在區內進行。不過比賽時間為四點半左右，老師話要三點半到會場stand by，正值Ambrose晏覺時間，真係令人頭痛！好彩今朝一早，爹爹就帶左Ambrose踩單車放電，踩完回家大家都謝哂，所以Ambrose成功地瞓到晏覺！起身之後仲好期待去比賽添！

 

去到會場，一如以往地，男仔其實無咩好準備，又唔使化妝，set頭都係好簡單摷兩摷個頭真搞掂，所以都係得個等字！不過同平時比賽唔同，今次比賽場地係一個大禮堂，個台反而唔係用黎比賽，而係個禮堂，四周已經擺哂櫈俾人觀賽，留空左中間好大位置俾賽手响度跳舞。今次無後台，所以爹爹媽咪全程都可以同Ambrose一齊等，兼睇人比賽。今次比賽係公開賽，所以年齡個range都好大，細至幾歲小朋友，大至幾十歲嘅公公婆婆都有。

 

按照schedule時間，正式比賽之前嘅幾個項目時，已經叫定哂成班小朋友响角落頭stand by。以為得幾個項目好快就到，點知跳嘅係成人舞，每個項目又跳幾隻，又要等賽手準備，其實幾個項目都等左好耐！仲要臨到要比賽時，竟然無啦啦有個break，俾成人賽手rehearsal，又十分鐘，前前後後，成班小朋友响側邊企响度等出場，等左成大半個鐘以上，真係不得不佩服佢地可以响咁多人咁嘈嘅環境都保持到專注同忍耐！

 

Rehearsal終於完結，比賽開始。其實媽咪都唔係好明，點解個比賽係拉丁舞及標準舞，我地都竟然參加得，不過係跳舞學校安排，佢地話去，咪照去囉！呢個比賽項目原來係第一年增加幼稚園組，唔知係咪咁，當班咁細嘅小朋友出場，都幾哄動，大家都覺得好得意，見到佢地d動作倫倫盡盡，都忍唔住笑！

 

覺得Ambrose跳呢隻舞都係比較熟前半part，次次去到中段，Ambrose都一定有d甩漏，要望其他人先至跟到，不過最慘係有時佢跟果個都跳錯左step，哈哈！綜觀幾次表演比賽，唔知點解總覺得女仔大多表現好d，明顯地會記得steps去到邊咁，even其實同team有其他男仔，分別都已經係K2及K3，都跳錯或有甩漏，但同齡嘅女仔，一般嘅問題都好似無咁大！

 

比賽結果，Ambrose果隊得季軍！意料之內！因為得三隊參賽，攞季軍，即係又係包尾，嘩哈哈！不過暫時對於Ambrose黎講，咩獎都無太大分別，佢只係enjoy比賽過程而已！even佢跳完出黎未可即時有獎盃，曾經都有問，唔係要攞獎盃咩，同佢講未可以攞之後，佢又一樣咁開心跳跳紮紮咁！見到佢鍾意跳舞，又咁開心，總覺得很滿足！