又發燒

尋日朝返工就已經有少少頭痛，無理！都唔知係咪食左碗石頭窩飯有問題，下午回到公司頭痛加重，食左粒頭痛藥之後，都唔覺止到痛，仲要開始覺得周身骨痛，都知道應該作發燒喇！好辛苦至捱到收工，本來要去接Ambrose學小提琴，真係頂唔住要打俾爹爹叫佢早少少收工去接放學！

 

好辛苦返到屋企即探熱，果然真係發燒！即時沖涼上床抖左陣，飯都唔想食，但都要起身食飯至可以再食藥！呢一晚，完全無能力行落床，d骨痛到連對腳踩在地上、洗手都覺得痛得要死！真係覺得自己病重，但又唔明點解咁突然？！

 

本來爹爹想我睇埋醫生至返屋企，但我真係唔得，要痴實張床至掂！所以都係第二日去睇醫生。醫生話係病毒感染，有可能會燒幾日，但其實我除左發燒，咩其他徵兆都無，醫生話應該d菌未落到腳，所以未有徵狀出現，可能之後就會出現的了！醫生俾左兩日假我，剛好接住星期六日，再連住星期一嘅年假，無啦啦又放五日假！

 

最奇怪嘅係之前食左退燒藥都唔退燒，睇完醫生就開始慢慢好，然後到夜晚已經好好多了，精神都開始回復過來，甚至，醫生話病毒會落腳某處，都無出現過，只係平白無事咁無啦啦發兩日燒！

 

諗起上個月又係無啦啦有日開完會，可能响conference room凍到，當晚返去又係即發燒，又係發左兩日咁上下，真係覺得好奇怪，好人好姐，無啦啦發燒發得咁密都有！

 

可能，工作真係太忙碌，我又夜瞓，身體開始發出警告了！根本就唔係病毒！我話似疲勞過度多d！