今早有兩場跳舞比賽，一跳完第一場，都無得睇埋全節比賽，就要離開搭旅遊巴去第二場比賽埸地喇！不過其實趕過去都係得個等字，原來都未夠鐘，比賽場地係香港兆基創意書院，果頭附近都無咩野行，一係就要行到好遠，所以爹爹決定都係留响會場等候好了！
等呀等，由於太多人的關係，書院入面嘅零食機同汽水機，幾乎都無得賣咁濟，真係未見過零食機同汽水機會無野食同野飲！好彩都買到少少野食俾Ambrose頂吓先！
食完零食搵番d同學仔，三個男仔無野做，好容易郁手郁腳玩打交，爹爹就係驚好易出事同埋唔想太勞氣，所以遲遲唔俾Ambrose行埋去同學仔度。唔知叫好彩定唔好彩，原來兩個男仔已經眼定定睇緊Ipad，Ambrose過到去就睇埋一份，三個男仔竟然好乖好定咁坐埋一齊，Ipad真係鎮定劑！雖然平日唔太buy，但特別時候，都唔理得咁多！
等呀等，終於等到入場！今次原來小朋友都可以坐觀眾席，但因為方便老師帶，Ambrose都係同爹爹媽咪分開坐！
今場舞跳得無朝早果場咁好喇，見Ambrose都無咩笑，唔知係咪士兵上身，所以要扮cool樣，定係太早起身，又係咁等，無所事事又好攰，所以無咩表情呢？仲要攞花位搞錯左，見隔離個男仔攞花佢又走去攞，但其實又未跳到果個step，佢又呆呆地跟住人！最開心嘅環節，仍然係搶左公主嘅花之後跑左去，哈哈！雖然整體跳到有d甩漏，但最後佢都識得埋位，舉高兩隻手，算係咁啦！
呢個比賽係即時頒獎，由於Ambrose果組係幼兒A組，果組得兩組參加，所以跳得唔好，都有個亞軍！其實得兩組，亞軍即係輸左，所以得獎感覺唔大，不過，見到Ambrose落力演出，雖然名義上輸左，但呢個小小獎盃對佢黎講都係一種鼓舞！
沒有留言:
張貼留言