今個月有幾個比賽要去，搞到畫班又上唔到！望勻成個月，好辛苦至度到時間俾Ambrose補堂，盡量都唔想因為要比賽表演而唔上畫班，所以點都要擠d時間出黎補堂！
一早已經講左話轉純畫班，最主要係想Ambrose多focus學畫畫，始終畫畫媽咪唔多識畫又唔識教，俾人教好d，手工自己有時都可以同Ambrose做，都ok嘅！點知今堂返到去，見上一班同學仔全部都係做輕黏土母親節花花咭，都已覺得不妙。到Ambrose上堂前，由於之前本畫薄留左响畫室，媽咪借意同老師講Ambrose本畫薄留左响度，叫老師攞返出黎俾佢用。但老師就話今堂係做手工，媽咪即話Ambrose報嘅係純畫班，老師聽見之後又遲遲疑疑咁話都會用畫紙畫野，咁媽咪都無野講！呢個老師又要唔係平時嘅Miss Chan Chan！
好啦，接放學時見到Ambrose攞住果張花花咭，真係幾嬲吓！已經講左係報純畫班，又話會用畫紙畫野云云，擺明係敷衍媽咪，出到黎咪又係做左手工！真係睇唔出邊度有用畫紙，或者係指張咭紙啦，但媽咪真係睇唔出，除左果少少草同桱 ，有邊度係要畫囉！仲要張咭朵花，只係一個輕黏土搓圓撳扁，再用d毛絨條屈花瓣，其餘就只係用膠水貼上去嘅眼睛同幾塊閃片，媽咪諗唔明，呢張咭點可能花一個鐘嘅時間去做呢？！
媽咪嬲，唔係覺得Ambrose整得唔靚，只係覺得，明明就係報左純畫班，但耐唔時都會有做手工，都算！媽咪嬲，更大原因係，呢個月嘅上堂時間真係度得好辛苦至就到上堂，如果一早知呢堂係做手工，媽咪點度都度過第二日囉！仲要俾個老師耍，話都會用畫紙畫野喎！同埋，明明見同學仔幾曰前响另一間分店上係畫媽咪同小朋友嘅畫，所以一早expect畫類似嘅畫，點知出黎係手工，落差真係幾大！
後記：表姐仔原來之前一日下午上堂，都係整呢張咭，但張咭內頁，就真係有張白色畫紙畫左公仔再貼上去，靚好多！而Ambrose呢張，入面只有I Love You，仲要明顯係老師寫上去架囉！
我見有時miss chen都唔係度，新黎既姐姐感覺上好生手咁
回覆刪除其實純畫班同綜合班max埋一齊上，佢地分到邊個學生淨畫畫嗎？
我總覺得佢地係一致咁教
[版主回覆05/22/2013 18:19:15]我都唔知有新老師。今次呢個係舊老師，平時教開油畫的。
綜合同純畫mix一齊上，係得架！我本來唔知，有好幾次見點解有個女仔堂堂畫畫，我地手工佢都畫，仲以為佢補堂所以咁。係後來想轉純畫班，問個時間至知星期日果段時間都有純畫，但mix左綜合，咁我見其他時間我唔太啱，就照舊上囉。
其實學生都唔多，我地又上左咁耐，有心望下個list都分到邊個上乜啦！如果佢地分唔到，就唔應該同我講呢個時段都係純畫班囉！