普通話興趣班(3y8m)

三月中，媽咪幫Ambrose報左學單對單普通話。其實學校係英普幼稚園，但始終有部份時間係以廣東話授課，而且，Ambrose吸收力似乎較弱，所以縱然返緊嘅係英普幼稚園，都要另外同佢出去上英文同普通話班，當係補習咁，唔係期望佢程度要高人一班，只係怕佢返學跟唔上，出去補吓習當溫書，等佢唔好跟得太吃力就好了！

 

四月中，老師通知有一個朗誦比賽，希望媽咪可以幫Ambrose報名，媽咪好猶豫，總覺得Ambrose性格雖然好似好強悍，但實質上，佢係一個幾怕羞嘅小朋友，要佢一個人上台參加朗誦比賽，仲要咁多人望住，講嘅又係佢唔多熟嘅普通話，種種因素之下，媽咪係有d卻步，怕好似太push
Ambrose咁！但老師話Ambrose其實都ready可以試吓去比賽，因為平時上單對單堂都好，其實入面有d中學嘅哥哥姐姐補習，有時都有叫Ambrose响佢地面前朗誦，老師覺得可以俾Ambrose一試，當攞吓經驗。就係咁，媽咪半信半疑之下，收下報名表。

 

都未等媽咪填妥報名表，臨出發旅行前，老師又提議媽咪，要媽咪幫Ambrose報另一個朗誦比賽（全港朗誦藝術交流大賽 – 海洋盃），因為老師話誦材一樣，而之前一個比賽係六至七月期間至開始比賽，但呢個海洋盃就係五月，規模細少少，可以當熱身，俾Ambrose攞吓實戰經驗。老師直接了當話，希望幫Ambrose儲certificate，因為唔係每一次比賽都名列三甲，要儲就一定儲冠亞季嘅cert，而且亦有d比賽，比賽資格係曾奪三甲至可以參加，所以老師更希望Ambrose可以參加不同比賽，攞經驗儲cert.！聽到老師直接咁講，雖然感覺上好似好現實，但不無道理，儲cert.已經係個個家長已經做緊嘅事，就算唔係為攞獎攞cert.，以Ambrose性格，真係要俾多d機會佢磨練一下自信心，等佢大膽d至得！所以臨出發去旅行前，媽咪就幫Ambrose報哂兩個朗誦比賽！

 

其實媽咪幫Ambrose報名都有少少隱憂，因為Ambrose一直都好少响家中表現响學校學到嘅野，歌仔好少唱，英普更加少聽佢講。有時，真係唔知佢係唔想表現出黎，定吸收力問題，根本唔識！而返左普通話單對單之後，呢個情況係持續嘅！老師每堂都有notes派返黎，亦會俾返上堂嘅錄音俾媽咪，聽見d錄音，感覺上Ambrose都跟到，但叫佢响家中念番出黎，又唔肯！所以，當老師叫媽咪邊一堂就最好背到邊首詩，媽咪其實都好束手無策。一來，錄音只係响媽咪電話中，即係要等媽咪放工記得至有時間播俾Ambrose聽，實在太少時間；二來，Ambrose唔肯講出黎，根本同唔同佢溫習！所以，參加朗誦比賽，唔多唔少，真係好睇佢上堂吸收幾多喇！