由於比賽時間為九點幾，跳舞學校安排旅遊巴八點集合上車，所以今日六點幾就要起身喇！好彩叫Ambrose起身都幾順利！不過由於太早起身，旅遊巴開到半路時，Ambrose難敵睡意，竟然瞓著左！見佢咁早起身，有機會瞓就梗係俾佢瞓啦！點知真係出事！落車之後因為要報到，要整醒Ambrose，但又未真係ready入後台stand by，成班小朋友就响度等！過得一陣之後，老師要帶小朋友入後台，但Ambrose太攰又唔太醒咁，又可能現場其實都有少少亂，佢竟然唔肯跟老師去，仲喊起上黎添！仲以為佢overcome到之前嘅表演，應該唔會有問題！今次係Ambrose第一次跳舞比賽，當然希望順順利利啦，咁樣喊一喊，搞到爹爹媽咪都好擔心囉！好彩老師抱佢入去之後，又無野喇，都係扭入去果一下啫！
不得不讚高山劇場嘅職員真係好尊業，人流管制真係做得好好，職員見有人開始排隊，就係咁指揮d人點排，又check飛；見人想行入會場都會多加細問至俾人入，我地一交左Ambrose俾老師後就即去排隊，務求霸返個靚位睇Ambrose，排咁耐都無俾人打尖！甚至乎，媽咪飲住盒檸檬茶排隊，都不斷俾職員提醒場內唔可以飲食，要媽咪响出面飲哂至好入去！入到場之後，霸到第一行坐，點知原來唔可以攝影錄影，幾乎一攞部相機同攝錄機出黎，已經有職員行埋黎叫停，仲有最勁係就算攞個電話出黎，都一樣有人衝埋去阻止。
咁都好嘅，大家都可以專心睇比賽！
今日跳隻舞個名叫＂當公主遇上頑皮王子？＂，其實媽咪之前都無睇過Ambrose跳過。只見Ambrose出場之後都跳得有板有眼，仲見到隔離個男仔無蹲低識得叫人蹲低，但佢又真係講埋做埋動作叫人蹲低，真係好好笑！之後有一環係男仔要攞女仔手上紮花，見到Ambrose超興奮咁搶過花束，個樣真係超好笑，夠哂頑皮！搶完花束，男仔就要兜圈跑，呢個Ambrose真係忘哂形，個台又大，見佢好high咁狂跑，見人地都有做skipping動作，明顯佢顧住跑咩都無理啦！最搞笑係跑跑吓有d花仔甩左落地下，呢個Ambrose咁啱跑到埋去，停一停，之後又笑咪咪咁踢朵花仔，真係夠哂合主題 －＂頑皮＂！唔講真係以為呢d咁頑皮嘅舉動都係排出黎，哈哈！呢場舞，其實真係跳得唔錯，個個小朋友都有笑容，Ambrose更加係由頭笑到尾，動作又好鬼好笑，連隔離坐位果個姨姨都問Ambrose係咪媽咪個仔，哈哈！好可惜，呢場舞無得攝影錄影，唉！
後記：呢個比賽，最終攞左銅獎！其實睇過之前其他學校嘅小朋友跳之後，爹爹媽咪已經諗住唔會攞到獎，始終好多幼稚園參加，佢地練習時間密好多，真係齊好多，好叻！最終得到銅獎，都好開心！
沒有留言:
張貼留言