Ambrose的獨立屋 (4y)

上星期，家中嘅雪櫃突然壞左，由於都唔係第一次壞，再整不如買過部，所以上星期漏夜出去買，第二朝即送貨，真係快到唔信！送貨工人叫媽咪唔好掉個盒，試真d部雪櫃先去掉喎！

 

就係咁，一大個紙箱棟左响屋企！爹爹忽發奇想，話要整間屋俾Ambrose！於是爹爹叫左Ambrose去度吓位，同佢開左度門，開左兩邊窗俾佢，仲有門窗上都有個細孔，剛好夠Ambrose嘅手指篤入去方便開關！

 

開哂門窗之後，其實咩都無，Ambrose已經極度讚嘆：「好靚呀！」

於是，Ambrose就樂此不疲咁成日走左入去佢自己間屋度，嘩哈哈！佢仲攞埋自己d寶貝入去，最搞笑就係，佢攞埋d書入去睇！咁黑，點睇呀！於是，爹爹又將之前買落嘅Thomas小燈，幫Ambrose間屋整左吊燈，仲有就係掛左個鐘入去間屋度，真係好搞笑！

 

有日媽咪在家時，Ambrose靜英英咁，媽咪無為意，隔左一陣見佢响間屋出黎，原來佢响入面畫壁畫，出黎時仲同媽咪講，佢係古魯家族喎，真係俾佢笑死！

 

雖然係有d阻地方，但見Ambrose咁開心咁鍾意，又點捨得咁快掉左佢間屋丫？！