無上之前嘅英文班，媽咪幫Ambrose報左個Phonics班。本來中心要評估完再度過個時間，話俾差不多level嘅學生同班，但上左一堂後發現，原來中心有竹昇妹／仔，或外籍人士樣嘅英文老師，於是，爹爹話要學，咁就上外籍人士啦，俾 Ambrose對多d紅鬚綠眼嘅人，反正學校不嬲都有，佢都無問題，唔爭在呢度都對吓喎！所以就同Ambrose轉左時間，由本來女嘅竹昇妹轉左個男嘅外籍老師，都唔覺轉時間有難度，唔知究竟有無真係夾過小朋友level！
上左幾堂，次次問親Ambrose學左咩，佢都話唔知呀，唔記得呀，一係一放學即問佢學左嘅sound，佢都可以答錯，真係俾佢激死！問佢老師有無講故事，佢又話無，問佢响入面做咩，佢竟然話玩！而事實上，之前媽咪真係响門外聽到收拾積木嘅聲！
其實同呢間中心好似無咩緣份咁，由第一堂要上堂都可以唔記得左返，到上左個幾月都時有發生唔記得左而走堂，可想而知呢堂响爹爹媽咪心目中真係無咩特別得著，是以成日忘記上堂！
另外，就係因為成日走堂，所以要補堂，而補堂可能會係第二個老師上，Ambrose返左一排之後，開始會問今日返咩，講左俾佢知之後，佢就會問係男老師定女老師。如果同佢講係平時嘅男老師，佢就唔多開心，有d唔願返咁嘅樣；如果話係第二個老師，佢又無咩野，好順利咁去返學。由於呢個情況都唔係第一次，媽咪感覺上佢唔多鍾意個男老師。
上左三個月，唔覺Ambrose有明顯進步，或者可能佢會比以前記到幾個sounds嘅，但感覺成效唔大。而最往要係，中心果本手冊，係會記錄每堂學左d咩同埋老師嘅comment，但學左三個月，comment真係好一般，只係會寫”well
done”, “try hard”等呢d唔覺係comment嘅comment，仲要d字係核突到其實要睇好耐至睇得出囉，感覺老師有心極都有限咁！而次次問Ambrose，佢都會話入去玩Lego，聽到都覺得怪怪地，佢响入面除左做果幾頁嘅功課之外，其餘時間都唔知做咩！總之，整體感覺係：無咩特別，唔知做咩！
最後，呢度上左三個月，都無再上了！
沒有留言:
張貼留言