GAPSK幼稚園普通話水平考試增設了k1組別，一早鎖定之後要考k2-k3組別嘅媽咪，知道了有k1組考試後，心郁郁想俾Ambrose去試吓，一來過了八月開學後，升左班嘅Ambrose應該不能再考k1試吧；二來，經歷過兩次朗誦比賽後，知道Ambrose面對比賽嘅膽量暫時沒太大問題，想試試佢對考試嘅反應又如何；三來，媽咪總係覺得既然普通一個朗誦比賽都要花費幾百蚊，出黎嘅證書獎牌可以好流，既然當初係諗住俾Ambrose練練膽量而佢又其實已經做到了，那何不將果幾百蚊去報個考試，一樣可以練膽，而得出嘅成績，起碼都有少少認受性，起碼都可以真實地反映到小朋友嘅普通話水平吧！最重要係，三月尾以來開始學普通話，由於無咩目標要達到，一直都係hea教hea學咁，上完堂回家又自然唔會溫書，報左考試，自然就有動力去鞭策Ambrose，唔係又會好似英文咁，懶懶閒上左成年都唔知學到d咩咁浪費！
未完全決定要報考試前，都有問過普通話老師，佢嘅comment係可以試吓，但亦講明，其中一part係要看圖情景問答，佢話呢part無把握Ambrose可以應付到！當時，媽咪其實見老師攞住k2-k3嘅綱要，展示圖例俾媽咪睇究竟呢part係有幾難，例如幅圖有座山有間屋，天上有幾隻雀仔，圖係彩色嘅，問題係圍繞住呢幅圖去問，而其中一條問題，係幅圖入面有幾隻雀仔，老師仲話唔可以簡答，一定要長答，媽咪已經覺得長答對Ambrose黎講已經好難，仲要加埋成幅圖問左問右，以佢好唔利嘅眼睛，都唔知人地問完搵唔搵到答案，再加上果條幾隻雀仔嘅問題，媽咪真係覺得Ambrose未必可以同時handle到又要睇又要數仲要轉化成長答案！
但媽咪又覺得，既然k1組係新開嘅考試，又無理由程度同k2-k3組一樣咁難吧，應該總有點分別吧！於是，媽咪就去書店買了k1試嘅綱要，希望了解下個試實際考d咩！最後發現，k1組嘅看圖真係比較簡單，幅圖好簡單直接表現一個圖畫，唔似k2-k3組係成個scenario咁！同埋k1組可以簡答，雖然簡答應該唔會攞到高分，但起碼容許簡答！睇埋其他考試內容，雖然都覺得考嘅野唔少，但基本真係考小朋友嘅聆聽理解同埋說話能力，最重要係唔使背詩，媽咪覺得，似乎可以俾Ambrose一試！
於是，就响老師唔係太睇好同埋似乎唔多願意之下（可能覺得媽咪有點怪獸了吧），同爹爹商量後，爹爹於六月上旬就為Ambrose報了第一個普通話考試！七月二十八日為考期，距離考期，準備時間就只有六星期左右，真係有d急趕！
報左考試，就要全力以赴，雖然老師都會幫Ambrose應付呢個試，但由於之前同老師商量報唔報考試時，發覺佢對呢個試唔係咁熟悉（可能個考試今次係新開第一屆），仲有點被耍嘅感覺（佢同媽商量時根本並未買k1組考試綱要睇），所以媽咪覺得今次考試真係唔可以完全靠哂老師！
老師幫Ambrose練問答，但Ambrose基本上唔係好肯媽咪同佢在家溫習，所以備試初期其實進度不大，當時仲未開始練看圖情景對話，都已經覺得有點沮喪，因為對答都叫有個範圍去溫習，圖係唔知佢會出d咩黎問，根本無得準備，所以如果連問答都做唔好，兩part加埋都佔一半了，其他做得幾好都無用！
如是者，過左一排，好神奇地，有時媽咪趁同Ambrose換衫時咋帝問幾條題目，佢竟然肯答吓，亦開始答到長答案喎，真係好意外！媽咪無本事訓練Ambrose有此進步，相信都係老師嘅功勞！問答有進展，又令媽咪重燃希望，開始有動力幫Ambrose溫習！
媽咪買左本模擬試題同Ambrose做，其實Ambrose第一次做係基於好奇，所以肯坐埋黎做。第一part係聆聽完將特定嘅貼紙貼去指定數字格度，其實呢part媽咪覺得應該係最易，但因為考試有規定時間，一條題目讀兩次，每次唔知幾多秒，Ambrose好快貼完後，因為下題未到，佢就開始左整右整，搞吓其他貼紙，之後仲同媽咪講，做咩咁耐！同埋，佢有個唔好習慣，就係當佢做功課時，佢每答一題都要問左係咪咁至肯去action！唉！做完第一次mock，媽咪開始擔心，到真實考試時，得佢自己入去考，無人肯定佢嘅答案，佢會唔會亂黎？同埋最擔心係佢貼完第一張後等得太耐至到第二題，中間唔知會唔會亂玩貼紙又或者分心左其他野而令佢miss左之後嘅題目？！
第二part其實綱要就話係聆聽再行動，應該係動作題又或聽指令，但本模擬試唔知點解呢part變左聯線。又係擔心唔知Ambrose會唔會到時分心左miss左題目，miss得一題的話，好大可能miss哂之後果d，始終佢唔係大人，可以知道miss左就skip一題再做埋之後果d，分分鐘佢係好堅持咁去做番miss左果題，然後就跟唔到之後果d架麻！媽咪唯有教佢聽住題號，如果聽到果個題號，就搵番果題出黎做，不過，要佢聽明數字唔難，要佢聽完再搵果條題目出黎同聯啱線，媽咪無把握Ambrose做到！除左媽咪在家有同Ambrose做mock exam paper，老師都有同Ambrose做，老師仲話Ambrose另一個問題係，聯線要點對點，Ambrose只係求其畫條線連住，並無畫落點到，老師話怕真係考時，唔知道唔對點會不會計分喎！
原本媽咪諗住頭兩part應該不用花太多時間去練，曾經以為，呢d一問就知點做，但到真係試做之後，就發現有咁多可能嘅問題出現，除左要同Ambrose溫普通話字音外，更重要嘅原來係考試技巧！
Ambrose係一個你比咩佢佢都唔係太抗拒嘅小朋友，同佢報嘅興趣班從來都好順利咁自己入去，即使係越加越多，同埋返到屋企要做興趣班功課都好，佢都無投訴，爹爹媽咪好欣賞佢呢點！不過雖然Ambrose好合作，但佢有佢嘅原則同自主性，佢肯去上堂，並唔代表佢肯日日溫同一科書做同一科功課。一星期入面，昨日溫左普通話，今日佢係一定唔會肯再溫；今日做左數學，明天佢就一定唔會再做的了！仲未計要練琴！爹爹媽咪都明白，Ambrose咁乖去上堂已經好難得，其實真係唔應該再迫佢每日都要溫哂呢樣果樣，佢只不過係個三歲幾四歲人仔，所以一星期裡面，媽咪可以同Ambrose溫普通話時間真的不多，做mock只可以一星期一次，問問題就只係佢換衫要企定時不定期抽問，問到佢好煩厭時就即停，過兩日再問！
雖然明知咁短時間去準備考試，而且仲要係第一個學術性考試，媽咪唔應該太緊張，始終，當初打算去考呢個試時，心態係想俾Ambrose練膽，同埋當熱身，考小學前點都要考個高階少少嘅試，今次呢個只係入門試，基本上考成點，將來應該唔會攞出黎用。但，媽咪個性就係咁，一決定要做的事，就希望做好佢，希望盡全力去做，奈何，要考試嘅並唔係媽咪，而係Ambrose，媽咪希望鞭策佢，但同時又害怕迫得太緊，只能亦步亦趨。
一個係咁想衝嘅媽咪，遇著個吊兒郎嘅仔，好想講，真係仲慘過自己去考試！
沒有留言:
張貼留言