KPCC幼兒普通話水平測試-初級 (4y)

睇吓佢考完試個樣仲咁呆，真係一額汗！

 

六月份的時候，除了為Ambrose報了GAPSK考試外，同時又為佢報了KPCC幼兒普通話水平測試-初級試。報的時侯沒想太多，老師話KPCC考試比GAPSK考試易，因為KPCC考試只係背書多，所以當時爹爹就報哂兩個，當係迫自己有個目標同Ambrose溫書，又或者當係俾佢練膽都好，反正，之後都仲要再考高級少少嘅試！

由於當初無諗太多就報，時間都幾急！六月報考試，七月尾考GAPSK，九月頭就考KPCC，但要考完哂GAPSK之後至開始溫KPCC，每個試其實也只有一個月左右的時間！之前可能諗得太簡單，考完GAPSK之後就發現，小朋友唔同大人，唔係話要佢地幾時溫書就溫書，要佢可以on schedule咁溫熟哂考試嘅每一part，其實真係幾難！所以，當考完GAPSK之後，媽咪有諗過放棄KPCC唔去考，起碼唔想九月咁急又考過！再加上，八月中的時侯，已經收到通知Ambrose在GAPSK考試中取得很好的成績，媽咪就更加想放棄唔考KPCC住！

 

就在十五十六究竟去唔去考呢個試嘅同時，普通話老師同Ambrose上左一堂，出黎嘅comment係唔多得，老師話以Ambrose現在嘅表現，頂多只有優良級別，或者可能只有合格級別，老師叮囑媽咪要同爹爹商量一下，究竟去唔去考呢個試？聽到老師咁講，媽咪心下一沉，既然預期只有合格或優良嘅級別，又何苦咁勉強去考試呢？考得試，當然希望考到最好，如果只有合格，好難過到自己！當下，媽咪心底其實已經放棄了，一心諗住慳返d時間準備GAPSK嘅K2-K3試！但當同爹爹商量時，爹爹就話報左就去考，態度係唔需要谷Ambrose去溫書，由得佢自己發揮，媽咪嘅心態亦要調節番，去考呢個試，只係俾佢體驗多d，同埋測試佢嘅能力，成績係點，並唔重要！就係咁，最後媽咪就同普通話老師講，Ambrose會去考試！

試前溫習，真係好難！因為Ambrose記性麻麻地，尤其係四首詩入面有兩首係唐詩，基本上Ambrose唔係太明白內容，就算已解釋多次，佢都係好難理解咁，所以背起上黎較其他兩首困難！到佢背好詩文，又往往記錯或掉轉左作者，甚或完全唔記得停左响度，更甚係其他兩首本來都好熟練嘅詩都可以忘記其中一句，唉！

 

問答題嘅預備其實都有難度，因為要取高分就只有練習長答，雖然時間不多，但總無理由一開始只教Ambrose短答吧！問答題共有四十題，加埋果四首詩，其實唔係話好多好難，但Ambrose記性差，媽咪完全無把握！更令人擔心嘅係，Ambrose往往唔會跟已預備好嘅答案去答！其實咁應該係好事嘅，因為佢有自己嘅主見，同埋佢係真係明白問題問咩至可以自己答其他答案，證明佢嘅水平唔差！不過佢答其他答案嘅音，係時啱時錯囉！佢識講果d咪ok囉，唔識嘅佢都會努力試吓讀＂咩＂少少當係，真係唔知好嬲定好笑！只可以話佢勇於嘗試，但考試咁嘗試法好易失分！

 

試前嘅mock exam，老師評估Ambrose僅僅取得卓越，但媽咪深知，呢個成績並沒有太牢固嘅基礎，偶一犯錯，隨時只有優良成績！也還好吧，因為比起當初老師評級只有合格或優良，至少，現在已進步到優良或卓越吧！

 

試前一天，Ambrose仍然為其中一首唐詩「春曉」掙扎著，呢首詩，其實之前已經背到好熟，但之後因為要背「靜夜思」而又局部性忘記了！背好「靜夜思」後，佢竟然將「春曉」作者忘記了或記錯了「靜夜思」的作者，到佢記好作者之後，往往讀了詩名及作者之後就忘記了詩文，呆在當場！媽咪一直在心裡想，希望唔好咁好彩抽中「春曉」吧！

 

考試當日，撞正學校交通安全隊第一堂，學校亦安排了家長講座，小朋友一齊聽了半小時，見到好幾個小朋友累得瞓著了，其實都幾搞笑！Ambrose多次擰轉頭望向爹爹媽咪，都見佢對眼出哂雙眼皮了，媽咪心諗，唔知佢夠唔夠精神考試？唔知佢第日上交安時會唔會都係咁辛苦呢？

 

考試時間為16:54，Ambrose放左交安後話好肚餓，去左食野之後至開車出發去考試。當然，佢嘅晏覺時間就係呢程車程喇！早左出到去泊車，等左一陣至叫醒Ambrose，但佢仲好似遊緊魂咁。行出停車場至發覺試場附近無咩地方可以行吓打發時間！無處容身之下，直接上到試場，寧願上去培養吓情緒等考試。點知登記過後，職員話未有人到，可以俾Ambrose入去考先，當時只不過係16:30左右！其實媽咪唔多想，因為Ambrose明顯仲發緊呆，爹爹同佢講野都未講夠五句，媽咪又未同佢作最後溫習，咁嘅狀態入去考好似麻麻地！但職員已經叫Ambrose名入房喇！

 

等待嘅時侯，爹爹媽咪都好緊張，尤其是見Ambrose一臉茫然咁入去，就更加不安！好快，都唔夠十分鐘，可能只有五、六分鐘，Ambrose推門而出，媽咪仲諗緊係咪有咩問題佢走左出黎，但原來佢話佢考完出黎！仲見到有職員去攞張分紙出黎計分！Ambrose係咁問點解咁快傾完計，哈哈！爹爹行埋去＂莊＂吓幾多分，咁都俾佢＂莊＂到Ambrose成績達卓越分數！媽咪當然不敢相信，直至職員很快地拿了證書出黎俾Ambrose，媽咪才放心，而且開心得很呢！

 

再看看分紙，真係好恐怖，見到Ambrose原來真係抽中要唸「春曉」，有無咁好彩呀？！以Ambrose今日狀態，又抽中唸「春曉」，呢個卓越，真係得來不易，可以話係僥倖而來！有朋友話考試都好講運氣，如果真係嘅話，Ambrose嘅考試運尚算不錯，希望佢嘅運氣唔好咁快無哂就好喇！當然，媽咪好希望，佢可以靠自己實力多過運氣啦！